سألتهم وانا على الرجم منصاب
مامركم يا حادي العيس نبنوب ..
مابه على عوج النضى معكم احباب
ياناطحين الضلع والظلع محطوب ..
قفوا ورجع الصوت يدوي وينساب
في داخلي والجرح بالجرح مخضوب ..
كذا وقفت اجالد فراق الاصحاب
لاباحك الله هجر وذنوبك ذنوب ..
ماتدري انك رحت وحسابك حساب
يعني حرام أني من الحب ماتوب ..
عاتب وطلعني على طول كذاب
اشره علي بأية لغة بأية اسلوب ..
اضحك يفوح الكون زنبق وعناب
سولف يبوح ايلول للثلج ويذوب ..
تعال باقي لي هنا جرح ماطاب
جرحٍ على خبرك من العام ملهوب ..
من قال كفك خلته ينزف اطياب
من قال لونته قرنفل وخرنوب ..
ملكك تسوي به على كيف ماطاب
لبى يدين طيح القلب بالدوب