الكانيلونى باللحمه المفرومه وصوص البشاميل
*********************
**المقادير:
اولا مقادير اللحمه المعصجه:
*****************
ربع كيلو لحمه مفرومه
بصلة كبيرة
رشة جنزبيل ورشة قرفه...فص حبهان...ورقة لوري
ملح وفلفل اسود
1معلقه كبيره صلصة
2 معلقه كبيره زيت
ثانيا مقادير البشاميل:
***************
نص كيلو لبن حليب
3 معالق كبيره دقيق
3 معالق كبيره سمن
1 مكعب مرقة دجاج
رشة جوزة الطيب
ملح وفلفل
100جرام جبنه موتزريلا مبشوره
بقدونس مفروم للتزيين ان وجد
ثالثامقادير الكريب:
**************
كوبايه لبن حليب
نص كوبايه ماء
كوبايه ونص دقيق
2 بيضة
نص معلقه صغيره ملح
رشة فلفل
الطريقة :
*******
اولا تعصيج اللحمه المفرومه
*******************
نفرم البصلة ناعم ونشوحها فى معلقتين زيت لحد ماتصفر نضيف اللحمه والبهارات والملح والفلفل ونقلب كويس على نار متوسطة لحد ما تتشرب ميتها
اول ما تبدا السوا نضيف معلقة الصلصة ونقلب كويس ونسيبها تبرد
ثانيا: طريقة البشاميل
*****************
فى حلة على النار نحط السمنه والدقيق ومكعب المرق ونقلب كويس لحد ما الدقيق ياخد لون دهبي نبعد الحلة عن النار ونضيف تدريجيا اللبن واحنا بنقلب عشان مايتكونش تكتلات لحد اللبن مايخلص نرجعه عالنار ونقلب باستمرار ونضيف الملح والفلفل وجوزة الطيب ونقلب لحد البشاميل مايتقل ونسيبه يبرد
ثالثا: طريقة الكريب
***********
فى طبق غويط نخلط الدقيق واللبن والبيض والملح والفلفل كويس مع بعض
فى طاسة تيفال سخنه نبدأ فى صب كميات موحدة فى كل مرة من خليط الكريب و نلف الطاسه بايدنا عشان تتساوى الكميه واول مانحرك الطاسه نلاقي الكريب بيتحرك نقلبه ((كل وش للكريب بياخد 30ثانيه للسوا)) وثواني ونرفعه عن النار لحد الخليط مايخلص
**التطبيق**
*********
نبدأ فى تجميع الكانيلونى
في صنيه او بايركس نفرد ملعقتين من البشاميل
ناخد راق كريب ونحط معلقتين لحمه معصجه ونلف الكانيلوني رول ونرصه فى الصنيه او البايركس الجزء المفتوح يبقى لتحت للصنيه
نحط طبقة من البشاميل على الوش لحد مانغطيه كله ونرش طبقة من الموتزريلا على الوش وندخله الفرن20دقيقه ونشغل الشوايه 10دقايق لحد الوش مايحمر
نرصه في طبق التقديم وممكن نزينه ببقدونس مفروم....ويتقدم معاه سلطه خضره
وبالف هنا

احُب كل شي كان رحمه لي من الله