ما جيت أبشكي حب ريم وغلا نوف =جيت أشتكي من طعنة إنسان غالي
أدمت ضلوعي طعنته وأدمت الجوف =لو أعرف الأســباب.. يرتاح بـالي
مير البـلا طعنة... بلا ذنب معــروف=منها شكت عيني شــهور وليالي
ضامي بصحرا تايهٍ ممتلي خــوف =ما ادري دروبي شرق والا شمالي
أخاوي انجوم السما وأبعد الشوف =وأرجي شروق الشمس بعد الزوالي
لاني طليق ولاني في الدرب مكتوف =أمشــــي وحيد مير ماني لحالي
الجرح في وسط الحشـا لافني لوف =صار السهر لشوف عيني اظلالي
والحــزن في دربي مقيد ومكـلوف =لو غمضـت عيني أشــوفه قبالي
طـوَّل طريق الدمع والليل والأوف =وزاد الشــتات وغربتي وارتحالي
والبرد ماهو برد ( يالابس) الصـوف =ذبحني برد الحــب هـيا تعـالي

ما عاد باقي صبر يا ساكـن الجـوف =يكفينـي إلـي مـن غيابـك جرالـي
أن كان ما يرضيك وصلي معي روف =وإن كان ما يرضيك موتـي وصالـي
لا تلحقيني من بعد صبـري حسـوف =لا تحرقينـي فـوق جمـرة سـؤالـي
راعي الهوى لو يخفي الجرح مكشوف =الله يعيـدك يـا الليـالـي الخـوالـي
كل ما ذكرت الوصل ونيـت ملهـوف=مـن حرقـة الفرقـا وشـي بقـالـي
بصدري جلس والناس من حولي وقوف =محـدٍ يشوفـه غيـر قلبـي وبـالـي
احتل بي السمـع والنطـق والشـوف=وصب المرار ولا ترك شـي حالـي
للبـوح شمـس بكفهـا ورد مقطـوف =من واقعـي مـن غربتـي وارتحالـي
واللي جبرني ارسم الجـرح بحـروف =قصـة غـرام وغيبـة انسـان غالـي