منتديات قصايد ليل - عرض مشاركة واحدة

06-07-2017

أقول (نـص ونـص) وأزيدها اثنين
................ أو واحــــــــد ٍ يمنــــــاه نقطـــة وحيـــده

عشــــره على عشره بكل الموازين
................ الــــــــزين بيّن والقصيــدة ( قصيــــدة )

بس اسمع اللي ما يداني لك الشين
................ يا رشـــــدي خـــــذ مني نصـــايح سديده

قدّمتـــها لك دون كـــاش ٍ ولا دين
................ خـــــذها تراها لمثــــــــل حـــــالك مفيده

اللي أعَــــرْف ان البنـات المـزايين
................ منطـــــــــوقهن يقطــر عْـــذوبه أكيــــده

ولا يجتمع في شي شين ٍمع الـزين
................ الـــــزين هــــو نبـــض الخفوق ووريده

هذا الذي يقلـــب جميــع المــوازين
................ وخلّى خليّْ البــــــال يشكــــــــي لسيْـــده

وش غربلك مع وحــدةٍ خلقها شين
................ منطوق ٍ أقشــــــر.. فــــــوق هذا عنيده

أيضاً وسنّـت لك نظــــام وقـــوانين
................ وصــــــــرت بنظرها يا عباطه ( بليده )

إرجــع لها وابــد التحيــــة بكفـّــين
................ إن كـــــان لك حـــق ٍ تبـــي تستعـيــــده

والا أقول : اسمــــع ونفـّــذ بتقنين
................ عطهــــــــا من المعســـــول شـيٍّ تريده

غازل مشاعرها على اللطف واللين
................ واحـــــــذر تصــدّق ( كل هذا مكيـــده )

هي قالت ( انطم ) آآآآه ويلاه ياشين
................ الهقـــــوه انك يا عـبــــاطـــه وليــــــده

حاول تزوجها على الشـــرع والـدين
................ ولو انّـــــــها يا( بيك رشدي ) كــــويده

ثم اقلب الفـــــروه ولا النــاس دارين
................ إقبس عليــــها وخــــــــل قلبـــك حديده

نتّف علابيــــها علــى شــــــان ثنتين
................ ( انطم ) ولا تنسى المطمـّــــه ( بليده )

إبد المواهب ليا غـــدى الليــل ليلين
................ كـــــرٍّ وفــــــرٍّ والمــــــراوغ تجيـــــده

وقل لييييه يوم انك لرشدي تقــولين ؟؟
................ ( إنطم ) ويش أنتـــي بعـد مستفيـده ؟؟

وان كان هه وهه ، إمغـط كــراعين
................ وازبن عــــن الـــــورطــة ديارٍ بعيـــده

جرّب وعلمني عــــن العلـــم بعدين
................ عسى نتــايـــــــج خطتـــي لك حميـــده

يا خوفي من انك تـــذوق الأمـــرين
................ كنـي أشـــوف فشــوخ راسـك عديـــده

من شــــان خطتنا تحمّــل ولا تلين
................ ولو جـــت على الجبهه بقوس ٍ شديده

تذكّر ( انطم ) واقبل البقــس بقسين
................ ترى النهاية هـــــي تـــوجّـــع من ايده ( الله يا هي خِطّه )

أما الجرايد ما بهـــــا الا العنـــاوين
................ قلـــــت الصـــواب بما نشر بالجـــريده

ما كل ما ينشـــــر بها وافــــيٍ زين
................ يا ما قــــــرينا من القصـــــايد لهيـــده

والختااااااااام
هات الجــــــديد وكلـــنا لك محبـين
................ واللي تريــــــده كــــــل منّــــا يـريـــده