منتديات قصايد ليل - عرض مشاركة واحدة - دمـــــــــــــــــــــوع عذراء رومانسية جريئة

04-15-2017

الجزء الرابع والعشرون ،،

بعد يومين وتحديدا يوم الاحد .. رد فيصل على يعقوب علشان يجيني اليوم بعد ما كلم عبدالله علشان يكون موجود بالبيت .. رحت المجلس بعد ما تاكدت ان لابسي زين ! وما يكشف شي مني ،، دخلت : السلام عليكم ورحمه الله .. وقف وهو يطالعني : وعليكم السلام ورحمه الله وبركاته .. شفته شكله مجهد كانه طالع من حرب .. تفضل اقعد .. والا ناوي توقف طول الوقت ! كلمته بعد ما انتبهت انه سرحان بوجهي .. ههههههههه ضحك ورد: شلونج العنود .. ؟ رديت وانا اقرب له فنجال القهوة: بخير اذا انت بخير .. رفع راسه وهو يقول: بس انا مو بخير ! ارتبكت يوم شفته مسك يدي واخذ الفنجال وحطه على الطاوله .. يعقوب شفيك ! رديت وانا احاول ابعد .. رد وهو يوقف: لا تخافين والله ما راح اسوي شي بس ابي قربج .. رفعت راسي احاول افهم قصده بس اللي شفته اني كنت بحضنه وهو يضمني لصدره .. ارتجف جسمي وشي داخلي يحترق ! يعقوب صرخة مخنوقه طلعت مني وانا خايفه مش عارفه ليش احساس غريب حسيته وانا بحضنه : ارجوك لا واللي يسلمك .. بعدني وهو يتنفس بقوه ويدي مازالت بيده .. وقال : العنود ما اقصد شي .. كل اللي ابيه تحسين فيني شوي .. طالعته ونظراتي كانت رجاء !! راح وقعد بعيد عني .. هذاني بعيد .. قال وهو يكمل : اسمعي يالعنود انا جاي علشان اقولج ايش صار معاي .. لاحظت شي اشوفه يتكلم بسرعه كانه يبي يتخلص مني ! رجعت على وراء وقعدت على الكرسي وانا اخذ نفس .. قال :يوم خطبتج من اخوانج طلب فيصل مني ما اخبرج خوفا انج ترفضين مسوؤليه سالم .. هذا اولا ! اما ثانيا .. رفع راسه وهو يطالعني وقال: كنت متزوج بنت خالي " نوف" الله يرحمهم برغبه من امي لانها يتيمه .. وجاني ولد منها والامور كانت بخير لين رحوا للعمرة مع ابوي بالسيارة وانا كنت بالدوحه لان سالم كان مريض شوي .. وعلي الرده صار لهم حادث وتوفوا .. من عقبها ما احد يهتم فيه غيري و.. قبل لا يكمل كنت مصدومه وقفت وجيت عنده وانا مش مستوعبه : وين كنت تخلي سالم اذا رحت الدوام! طالعني ورد بكل براءه: عند فيصل !

كنت البس العبايه بروح انا والبنات فيلاجيو .. علشان اشترى فستان للعشاء راشد اخو محمد ما باقي عليه الا 4 ايام.. دخلت وضحى بعد ما افتحت باب الغرفه بقوه: يالله عاد تاخرنا .. والله اذا جاء حمود ما راح تروحين ويانا ؟ طالعتها وانا البس الشيله: اذكري الله .. وبعدين انا خبرت حمودي اني بروح وياكم! والا تنسين انا اللي اسوق؟ دشت الجازي وهي تستعجلني: ندوووووووش بليز تاخرنا.. هههههههههه ضحكت عليهم وانا اخذ شنطه يدي ومفتاح السيارة : يالله قدامي.. ما شفت الا غبرتهم " صج حبوبات" الله يرحمج يا منيرة وحشتيني .. طلعت الصاله وانا اشوف امي تعطي ابوي دواءه .. قربت من عندهم وحبيت راسه: شلونك يبه .. عساك بخير .. لف صوبي : بخير دامني اشوفج طيبه ومرتاحه ؟ رديت عليه وانا اخذ كاس الماي من يده:اكيد مرتاحه .. عند امي وابوي وخواتي ورفعت راسي وانا اشوف راشد داخل الصاله وكملت:وعند اخوي راشد بعد .. ابتسم راشد وهو يقول: مادامني اخوج ممكن اعرف علي وين العزم! رد ابوي وهو يقول: هي شاورت زوجها وابوها .. انت اصغرنا مالك خص! هههههههههههه ضحك راشد وهو يقول : السموحه يا باشا.. ضحكنا عليه وانا اوقف قلت له: رايحين السوق نشترى حق حفلة زواجك .. طلعوا البنات وانا اقول : لاتخافون اكثر من 7 ما اقدر اتاخر محمد يجي على 8 ونص .. طلعنا وانا اسمع دعواتي امي وضحكت ابوي .. ونغزات راشد!

بالسوق واحنا نحوس وندور شي يناسب الحفله ...: شرايج بهذا لفت علي ندى وهي تشوفه وعقبها : روعه عليج بيكون .. صدقيني ! ههههههههه من قال انه لي رديت عليها وهي مستغربه ،، وقالت: عيل حق من،، رديت على ندى وقلت : لج يا حلوة .. صدقيني يناسبج اكثر .. ابتسمت وهي تقول: جوجو " الجازي" انتي مجنونه استحي البس جذي قدام ابوي .. رفعت ندى عينها مرة ثانيه على الفستان .. كان ذهبي مفتوح الصدر على رقم 7 ومن وراء نفس الشي وفيه تكسيرات من عند الخصر وراسم الجسم عدل! .. رديت عليها وانا اقول: مالت عليج غصون الجنه قولي امين .. يا حلوة العشاء بيكون في بيت عمي يعني لما يدشون الرجاجيل نلبس عبايتنا .. حسيت ان ندى اقتنعت واخيرا خذته .. ووضحى وصافيه اختاروا لهم بعد .. وطلعنا من فيلاجيو بعد ما خصنا اغراضنا لان العشاء بيكون يوم الخميس الجاي!! مرينا على ماكدونالز وكل وحده فيني شرت لها اكل الا ندى تبي تاكل وياي محمد .. وصلنا البيت على الساعه 7 وربع وكل وحده راحت غرفتها خصوصا ان البيت فاضي!

لازم اكلمها .. الساعه الحين 8 اكيد فاضيه .. يالله فشيله اكيد زوجها عندها .. ياربي ساعدني .. رفعت جوالي وانا اضرب رقمها .. عند الرنه الرابعه ردت : هلا فيصل ..؟
فيصل : هلا فيج .. شلونج ندى .. وانا اسمع صوت بنات وازعاج عندها !
ندى : انا بخير والحمدالله! انت اخبارك !!
فيصل والاحراج طاغي على وجهي: انا بخير ولله الحمد .. ندى ابيج بخدمه اذا ممكن؟!
ندى: افا عليك يا خوي تفضل !
فيصل:ابي اتزوج .. بس .. هههههههههههههههههههههههههههههه سمعت صوت ضحكتها اللي خلتني اضحك معاها ..
فيصل: طيب ليش تضحكين ..
ندى : مادري حسيت انك ولدي وانا مادري.. وبعدين ليش تقولي قول لامي .. وهي تخطب لك ..
سكت شوي وانا احاول ارتب كلامي : لان البنت اللي ابيها هي اسماء رفيجتج! هدوء على الخط الثاني وعقبها جاني صوتها ..
ندى: انت متاكد .! فيصل لازم اكلمك شخصيا اذا اسماء اختيارك!
حسيت بخوف وانا اسمع كلامها ..
فيصل : ليش يا ندى البنت مو .. لا تقولها .. قاطعتني وهي تكمل : اسماء اشرف من الشرف كله .. بس في شي مهم لازم تعرفه قبل .. رديت وانا ابي اعرف الموضوع الحين: طيب متى راح تجين بيت خالتي .. امممممممممم اعتقد يوم الجمعه .. ردت علي وهي تفكر .. خلاص عيل الجمعه لازم نتكلم !

دخلت البيت وجسمي مهدود كانت الساعه 9 وثلث يعني متاخر من زحمه الليل .. كنت امشي وانا كسلان!! دخلت الصاله ما شفت احد استغربت بالعاده يكونون البنات مسوين حفله .. سمعت صوت ضحك قوي جاي من غرفه المرحومه .. رحت لهم وانا مستغرب الوضع الغريب اللي عندهم .. فتحت الباب بشويش وانصدمت وانا اشوف ندى ترقص مصري .. والبنات يغنون لها .. ابتسمت وتسندت .. والجو عاجبني اكثر منهم .. ندى تميل بخصرها برشاقه اول مرة اعرف انها تعرف ترقص،، حمود متى جيت .. صرخت صافيه اللي تخرعت من شوفتي .. لفت ندى بسرعه وهي منحرجه .. وجهها صاير احمر رديت : من نص ساعه تقريبا .. بس عجبني الوضع شوي .. ضحكوا البنات وندى طلعت من الغرفه وكتفها ضرب كتفي .. لفيت على خواتي : يالله اشوفك باجر .. تصبحون على خير .. طلعت عنهم وانا راح صوب غرفتي .. دخلت وصكرت البااب بس ندى مو موجوده .. توقعت انها راحت تجيب لي عشاء ..متعود على جذي! فسخت البدله العسكريه وحطيت الفوطه علي خصري ورحت جهه الحمام "عزكم الله" بس كان مقفول .. طقيت عليها : ندى افتحي ابي اسبح .. فتحت الباب وهي تحاول تمر من جنبي .. مسكت يدها وقربتها صوبي: شفيج ! لا يكون زعلانه لاني شفتج ترقصين! رفعت راسها وحطت عينها بعيني .. يارب صبرني عذااااب هالبنت،، قالت: محمد ممكن تترك يدي.. قربتها اكثر: ندى كم مرة اقولج لا تقولين محمد .. وبعدين ليش زعلانه او علشان شنو! قولي لا تظلميني ..

ما كنت قادره اتحكم بعمري .. هو قريب مني .. بس موضوع الصورة لين الحين في بالي .. قلت له :مو زعلانه بس متضايقه .. كملت وانا اشوف يده تترك يدي ..طالعته وانا اقول: شلون عرفت ان انا اللي بالصورة شلون؟ في ذاك الوقت انا ما اعرف منيرة والا اعرفك .. وعمري 18 سنه وانت 16 !! ترجيته وانا خاطري اصيح ..كملت كلامي : ادري اني سخيفه بس ابي اعرف حبك صار له عشر سنين من صورة بنت بس ! حط يده على فمي علشان ما اكمل خصوصا ان صوتي بدء يقطع .. مسك يدي وقعدني بحضنه وقعدنا على الكرسي اللي بغرفه الملابس .. ارتبكت وضاعت علومي .. قال لي : والا يهمج انا اقولج .. كمل وهو يقول: بس ان قلتي محمد بعد اليوم انا اللي راح ازعل .. هزيت راسي اني موافقه .. حلو قالها وهو يمسكني من خصري عدل.. وقال: يوم خذت الصورة ما كنت اعرف البنت من .. توقعتها اخت فيصل بس اللي خلاني اشك الكلام المكتوب وراءها " اغلى من الروح" .. وخلال معرفتي بـ فيصل عرفت عنده اخت بس اصغر منه .. فقلت بنفسي مستحيل تكون نفس البنت اللي بالصورة.. ومع هذا ما عورت راسي لاني كنت مصمم اعرف بس برواقه .. في يوم انتي جيتي عندنا مع فيصل .. في ذاك الوقت كنتي صديقه المرحومه .. شفت فيصل برع وسلمت عليه بحكم المعرفه اللي بينا وطلبت منه يدخل .. بس هو رفض قال انه مستعجل وان الاهل داخل .. رفع راسه يشوفني وكمل : دخلت البيت من جهه المجلس وكنت تعبان جاي من الدوام .. شفتج طالعه من باب الصاله تضحكين ونفس البسمة اللي بالصورة ونفس البنت .. انصدمت وقفت في مكاني .. وانا اسمع منيرة تقولج ندى لا تنسين الاوراق حق باجر.. وعقبها طلعتي وعرفت من اللي سكنت قلبي ومن اللي احرمتني لذيذ النوم! سكت محمد .. وهو يطالعني ورفع يده يمسح دمعه طاحت من عيني ..قال : لا يا قلبي دموعج العذريه غاليه علي !