ياهيه أنا دايم على الطيب ممشاي
محدٍ نعتنـي بالخصـال الرذيلـة
طيبي أخذته غصب من فعل يمناي
ومن راس رجـالٍ يفـز لدخيلـه
على الوفا والطهر والجود مرباي
شربت من نبع الطهـر سلسبيلـه
حرة عفيفـة طاهـراتٍ نوايـاي
أرقى مراقيب العلـوم الجميلـة
ماهزني عزف المجانيـن بالنـاي
ولاكل زولِ مـر عينـي تخيلـه
أمشي طريقي ماتتوهني أخطـاي
دربٍ مشيته ماتجـي فيـه ميلـه
لبست ثوب الطهر وشيدت مبناي
على الثريـا مارضيـت ابديلـه
ماينحني راسي شعاري ومبـداي
ماغير ربي هامتـي تنحنـي لـه
هذي أنا ياجاهـلٍ فـي سجايـاي
حرة ولي مبدأ ومهـرة أصيلـة