ياهاجسي قد كتبت الشعـر والقـاف
وماحد ٍ فهمنـي وفـي شعـري قرانـي

ويوم اكتب الشعر لي غايات واهـداف
ماهـي تجـارب وياعـلّ وعسـانـي

ولاهو على شان ينشـر ثـم ينشـاف
أكتـب معانـاة نفسـي يـوم أعانـي

يوم ألتفت والليالـي سـود وعجـاف
واقـرا تفاصيـل عمـري بالثـوانـي

أقول راحـت عليّـه والعمـر طـاف
والوقت فـي صفحـة كتابـه طوانـي

الى متـى والمسافـه ظلـم واجحـاف
مدري مـن النـاس وإلاّ مـن زمانـي

وكيف اطلب اللي جهلني بعض الإنصاف
وهو ماعـرف كيـف يقرانـي معانـي

الشعر احبه واعشقـه حيـل واخـاف
علـيـه لايهـتـدي درب الهـوانـي

أبي حضوره يجـي بإحسـاس شفـاف
وابيـه الاول ولا ارضـى شـي ثانـي

مادامـي اتنفّسـه مافينـي خــلاف
ماهمنـي كـل مـن راح ونسـانـي

الناس مـن بينهـا عـادات واعـراف
وبينـي وبينـه اليـا احتجتـه لقانـي

أغيـب لاشفـت ماقدمـت ماضـاف
ولاحضـورٍ ينـزّل مــن مكـانـي

وأجي اليا شفـت ليّـه فيـه ميقـاف
واليـا تغنيـت بـه جبـت السمانـي

أتعب ليا من لافانـي حـد الإسـراف
وليـا كتبنـي قصيـدي ماعصـانـي

وان ماتباهيت به فـي كـل مشـراف
ماهـوب شعـري ولابصمـة بنـانـي

وان ماتحـوّل كـلام اعـداي لهتـاف
أحسن لي أسكـت ولا اتعّـب لسانـي


* *
* *
* *

نهار الممدوح