هذي قصيدة الشاعر (خلف مشعان)

ياكثرهم .. لا قلت لك .. عرفة وجيه
وياقلـهـم .. لا قـلـت .. قــدر ومـعـزه
:
رجـلٍ .. تعـزه بعـد ماتلتـقـي .. فـيـه
ورجـلٍ .. قبـل ماتلتقـي بـه .. تـعـزه
:
ورجـلٍ .. تـرزه بالمجـالـس مبـاديـه
ورجـلٍ .. فلوسـه بالمجـالـس تــرزه
:
ورجلٍ .. يموت ولا يجيبـون طاريـه
ورجل ٍ .. يجي طاريـه فـي كـل حـزه
:
ورجلٍ يهزه .. بعض موقف ويشقيه
. ورجلٍ .. مهوب أيّات موقف يهـزه
:
ورجلٍ .. ضعيف .. ويستفزه معاديه
ورجـلٍ .. كـلام اعـداه .. مايستـفـزه
:
ورجلٍ .. تلزه يعترف لـك .. بخافيـه
ورجـلٍ .. علـى خافيـه .. محـدٍ يلـزه
:
ورجلٍ .. يوزونه .. ويزعـل بنيخيـه
ورجلٍ .. يزعّـل مـن يحـاول ، يـوزه
:
ورجلٍ .. تكـزه لا زم انـك .. توصيـه
ورجـلٍ .. بلـيّـا مــا توصـيـه .. كــزه
:
من لا فرش .. للمرجلـه .. ماتغطيـه
ومن لايخز .. النـاس .. محـدٍ يخـزه
:
ان كنت تعرفني فهي .. عرفة وجيه
مو شرط لك بالقلب قدر .. ومعـزه




( مجاراتي للقصيده )



ياشوم لا قلت الوفا صعب اوفيه
وتقدر رغم شحة ادينك ترزه


ناب الليالي في سماهم تراويه
والطيْب اللي دون طلبه يحزه


اخوك محزم ولاتحزمت وفيه
خلك يمينه ومن يعزك تعزه


اليوم لك وبكره تجيك المشاريه
اخذ وعطى يومن بيوم المفزه


المال يفنى والرجاجيل تهديه
جود وكرم نخوه رجال ومعزه


بعض الوفا يبقى مخلد طواريه
وراعيه يبقيه الزمن في مرزه


يسابق المطنوخ وينشد مراقيه
اللي الطواري عمرها ماتهزه


رجال وافي والمطانيخ توفيه
ومن قال عنه في غيابه تجزه


ورجال خايب يفشلك لو توصيه
ورجال قرمن بالأشاره تفزه


ورجال خبلن ماتنعم بطاريه
ورجال طلق النار صعبن يهزه


ورجال يعشق والغواني تخاويه
ورجال تالي الليل يطلب مُعِزه




عُذيب اللمى
(بنت حرب)