الكون موحش والمسا فاقد احساس والهم ينسج من خيالي قصيــــــــده . . اكتب همومي بالقلم فوق قرطاس وآرسم معانـــاة الجروح الجديــــــده . . القلب وش خلاه مخنوق الانفاس بين الضلوع العوج ينزف وريـــــــده . . الا الفراق وغربة الناس للنــــــاس وبعض السوالف و العلوم المكيــده . . ياقلب لا تحزن ولا يغلبــــــك ياس ارتاح واستبشر بلحظه سعيــــده . . اقولها ياقلـــب لاباس لابــــــــاس لاتقهرك سود الليالي العنيــــــده . . اللي ذكر طيبي على العين و الراس واللي تجاهلني تجاهلت سيـــــده . . ماهمني من باعني دون مقيـاس عزيت نفسي والامانــــي بعيـــده . . انا كذا طبــــعي مع كل الاجنــــاس القلب عزيته وشـــديت قيـــــــــــده حوله من الأضلاع حطيت حـــــراس تحميه من غــــدر الليالي الشديده . . اللي يذوق الغدر صافي من الكاس لابد يتـــــــــــعلم وعلمه يفيـــــــده . . ضوّيت لي في ســـود الايام نبراس يهدي حياتي للدروب الرشيــــــده . . محشوم فكري عن تفاكيرالادناس نفسي عن الهفوات دايم زهيــده . . واللي يحاول يسرق اللول والمآس ماطالته عينه ولا طالت ايـــــــــده . . ماكل صيد يجيبه الحــــــــر قرناس يموت بالرمضا ولاهـــــــو يصيــــده . . كتبتها جملـــــه أنا بين الاقــــواس (لاتقرب النيران جسمك تبيــــده) . . اعوذ بالرحمن من كل خنــــــــاس من الوساوس والحيـــــــاة البليده . . ياوجد حالي كل ماهب نسناس سافرت بـ افكاري لدنيــــا بعيـــــده