الجزء الحادي عشر
+ وحيدة بالمدينة +
=========
"عذاب بقربك..وعذاب ببعدك"
من بدأت العطله الصيفيه وكان الفراغ ملازم ومصاحب بشده يومها الباهت اللون,,اسبـوع مضـى وهي بحالة مللّ ليس له منفى..
ولو استرجعت الأشياء المفيده اللي حدثت لها بظرف هالأسبوع فلن تحصل لا اعمال خيرّه ولا ذكريات جميله غير مكالمة حنان اللي طمئنتهم على وصولها بالسلامه..وحتى سامي كان اكثر انشغال وسافر حوالي الأربع مرات لأجل عمله الغير منتهي,,
:
نزلت من غرفتهـا بالمصعد اللي تعودت على استخدامه في بيت اهلها..وتناست اهميته في بيتها..وضحكت لمن مرّ بذكرياتها معارضة سامي الشديده بعدم وجود المصعد في بيتهم..وطبعا لأنها هنا..فبتستغل جميع ذكريات مراهقتها المجنونه..واولهم..الشات اللي بلا شعور تناست اهميته بحياتها..
فتحت الاب توب..وتربعت بجلستها..ووضعته باارجلها..وهي مشغوفه ومتشوقه لعالم الشات اللي فقدتـه..
فتحت الصفحه..وكتبت معرفها المميز "انا لولو" على حس صوت امها اللي دخلت الصاله وحامله عبايتها
ام لولو بدريه\مارحتي بيتك.!
القت لولو نظره على الأسماء المتواجده بالشات\لا مالي خلق..يمه وين رايحـه..!!
لبست بدريه عباتها\معزومه عند ام سلمان..ودك تروحين!؟
عقدت لولو حواجبها ومال فمها دليل على قرفها\لا طبعا..ورجعت ملامحها لطبيعتها وهي تكمل..توقعتك تتعشين الليله وياي..!
بدريه\لا تنتظريني..تعشي لوحدك..
لولو لاحظت انه النافذه اللي فتحتها بدأت بمحادثه لكن تجاهلتها\ تعبت وانا اكل لوحدي..واجلس لوحدي..يمه تعالي مبكر وتعشي وياي..
تأففت بدريه بملل\اوووف..اذا انتي حاسه بالوحده دقي على بنت خالتك وقولي لها تجيك..ولا روحي بيتك اللي ماتدرين عنه من يومين..وخرجت من الصاله معصبه من بنتها اللي مقيدتها..
قفلت شاشة الاب توب بقوه...ورمت ثقلها على الكنبه بضجر..مدت ايدها للتلفون..ودقت على رقمـه..وثواني فقط..وكان الردّ
سامي\هلا والله..
لولو\اهليين..
ظلوا فتره قصيره ساكتين..وسامي قطع هالصمت..
سامي\كيفك.!
مسكت خصله من شعرها وظلت تلعب فيها ترخيها مره وتشدها مرات ندمت لانها اتصلت عليه..المفروض انها تكابر مثل ماهو يكابر\...زينه..
سامي\وانا بخير الحمدلله..
اتسع ثغرها..وظلت مستمعه..
سامي\بكره راجع..للمعلوميه..
لولو حست بـ وميض من الفرح لكن ماحبت تبين\حلو..
سامي رددّ كلمتها\حلو..حلو..مانمتي..!..ولا توك صاحيه
لولو كانت مكتفيه من النوم\الثانيه..
سامي بنبره مختلفه..هاديه وحنونه\ لولو..
لولو\ هممم
سامي بصوت دافي\وحشتيني..
لولو\.........
سامي\طيب..ماوحشتك..!
لولو\......
سامي\انتي معي..!؟
كانت تحس انها بعالم مزعج..ضيق.. مليء بالضجيج..وفجأه..سامي انتشلها لعالم...هادىء ومغلف بالسكينه والعاطفه..
لولو\ايوه معك..
سامي استغرب من برودها\ماعقبتي على كلامي..ولا ماعجبكـ..
لولو قاطعته بسرعه\ لا بالعكس..بس..بسـ تفاجات..
سامي\يعني.!
لولو\سامي..
سامي كان مستعد لتعقيب اجمل وادفأ..عاطفته كانت هاللحظه متفجره وجياشه..سفره..شغله الغير منتهي..بعده المتعب عن لولو..محتاج للقليل من العاطفه,, لكلمة تصبره..وتسكن احاسيسه..
سامي\عيون سامي..
لولو\بسكر..امي تبغاني ضروري.مع السلامه..
اغلقت الخط من هنا..ولحظات فقط..وتجمعت الدموع بعيونهـا..وانفجرت تبكـي..!تبكي بدون توقف..
تبكي بدون سبب..بدون نهايه وبااكبـر وجع..!
ماتدري هل انفجرت لأنها اسمعت صوته..او لأنها ضايقه وحاسه بالبؤس واليأس بحياتها..او لأنها كارهه عيشة الأستفهامات المبهمه..!
كرهت الضعف اللي سرى بخلاياها من اول مانطق...بكلمة :وحشتيني:..بينت عدم مبالاتها واغلقت الخط لأجل تعلمه أي عذاب هي تعيشه..!
ليش تبكي..!المفروض ماتبكي..وتظهر انهزامها وضعفها حتى لو كان بينها وبين نفسها.هي اقوى..اقوى بشخصيتها..لازم تمشي على خطتها..لازم تعلمه منوا لولو..!؟لازم تخليه مايرسي على برّ..مره تظهر له اشواقها الاهبه..ومره تخليه عطشان على بحر جاف..!!بتكون مجنون ياسامي..
لكن مجنون فيني!!!
=========
"احساس مؤلم يااول الغربه"
كتمت آهاتها بصعوبه..وشدت على فمها اللي خنقتها العبره..خلاص,,الحبايب غادروا..وهي ظلت وحيـده..
وحيده بالرغم انها بوسط اهلها..تذكرت أول اسبوع قضته بالأردن..ماتقدر تنكر انه جميـل وممتع وخصوصا لقائها مع بيت عمها امجد بعد غياب طويل استمر ثلاث سنوات..وكيف استقبلوهم بالدموع والأحظان..وحتى بنات عمها الاء ومنال اللي دوم يغارون منها كانوا مشتاقين لهم بالرغم انهم حاولوا يخفون اشتياقهم..
كانت تعرف انه صعب الوصول لقلبهم..ولأجل كذا..اهدتهم هدايا بسيطه عباره عن قلاده من فضه بقلبها حرف كل وحده منهم..والحمدلله حاليا الأجواء مستقره..ودليل على ذلك..نهار هذا اليوم بيقضونه كله بالتسوق بشوارع ألأردن واسواقها..
"
لبست فستان اسود اللون مخطط بلون ألفيروزي على بنطلون اسود..رفعت شعرها ذيل حصان..ولونت شفايفها بمرطب زهري..وزدات من الماسكرا كحليه..لبست حجابها الأسود..واخذت حقيبتها وخرجت تتنظر مرت عمها والبنات بالصاله..
جلست على الكنبه وتأملت المكان..اكثر حاجه تعجبها في بيت عمها الحجر البني اللي ماخذ حيز كبير بالبيت..من مداخله ..وواجهته..كان بشكل عام بسيط ويتكون من طابق واحد لكن لمساتهم والوان البيت الجبليه اضافت التميزّ بكل ركن..هذا غير نقوض الزهور اللي بصنع ايدهم المنثوره بجمال على المفارش والخداديات..
دخلت هاللحظه ام منار "صفاء " وابتسمت لمن لاحظت حنان جاهزه وسرحانه\غلبناكي ياحنان معنا..يابنات يالله ..حنروووح..
بادلتها حنان ابتسامه خجوله\لا عادي..خاله..انا كمان تأخرت باللبس,,!!
قطع حديثهم دخول منال وخلفها ولاء اللي فاجأ حنان وارغم عيونها تتسع من هول الصدمـه..
منار بنبره ساخره\شوفيك..ليش عم تتطلعي عليّنا..!
رمشت عيون حنان بذهول\لا..مافي شيّ..!
ناهد وقفت على ارجلها\يالله يابنات..
خرج الكل..واخرهم كانت حنان اللي تناظر منار والاء بذهول,,كانوا وبكل جراءه لابسين بدي وجينز يبرز جسمهم..وبدون غطاء على الشعر..
هي صحيح تكشف سواء كانت بالسعوديه او بأي مكان اخر..لكن لبسها ساتر جدا..ولايقارن بلبس بنات عمها اللي تركوا الحجاب نهائيا على عكس امهم اللي ملتزمه بحجابهـا..يمكن عمها راضي..او راضي بااكراه..!!هي مو بعلم بالمستجدات اللي طرأت بحياتهم..
لكن الصدمه لازالت تلجمها....وفعلا اللي يقول الأنسان يتغير بين يوم وليله..!
خافت بهاللحظه تكون مثلهم..تغرّها الحياه الجديده..البيئه المتفتحه..العادات الغريبه عليها..
ناظرت شوارع الأردن..وفكرت بالأيام الجايه....بحلمها اللي يراودها ليل ونهار..وطموحها
اللي بدأ يقترب.. بالجامعه المختلطه اللي بتجمعها ببنات وشباب..هل بتقدرّ على هذه الحياهّ؟
هل بتصمد وبتظل متمسكه بحلمها..!؟
هي خايفه..خايفه من هالشعور الغريب..الحائر اللي يلازمها..!؟في شيء ناقص بحياتها الجديده..في حلقه فارغه بداخلها..
ماتدري..هل غربه..والا وحده..والا هواجس عنيده تعكر لحظاتها..ومع كل هذا..فهي مظطره تتأقلم مع الوضع الجديد اللي بدايته ماتبشر بخيرّ ابدا..
منار\يالله حنوا..وصلنا..
تهاوت ايدها من على خدها وخرجت من السياره وتحركت بخطوات خجوله وبطيئه..ومشوا الأربعه بااسواق ألأردن الشعبيه...وطرقاتها المزحومه بالناس..كانوا يفرجونها على كلّ حاجه مميزه بااماكن مختلفه وهي مستمعه والأبتسامه الخجوله مافارقت ثغرها..ولا وجهها الباسم..وتكتفي بتعليق بكلمه او كلمتين..كانت عكس حنان الحالمه..الثرثاره..المجنونه..تذكرت هاللحظه صديقاتها..وكيف اذا خرجوا يتسوقون..والضجه اللي يعملونها اذا طاحت اعينهم على أي شـيء حتى لو كان عابرّ..كانت ايام حلوه..تتمنى لو تسترجعها..ويكونون معها بهاللحظات..!!
دخلوا محل صغير اشبه بكوشك منثور بكل زواياه طاولات صغيره خشبيه يبيع عصاير ومثلجات..طلبوا لها ايس كريم بالمانجا لانهم مدحوه ..تذوقته وانعجبت فيه لكن ماكان بحلاة ايس كريم فريده..فريده اللي مشتاقه لها بجنون..لو هي جنبها بهاللحظه كان اخذت منها الأيس كريم ورفضت احد يتذوق غير ايس كريمها..
ابتسمت على هالذكرى..بشوق كبير يملىء روحها..
الاء\الظاهر الأيس كريم..ماعجب حنوا..
حنان زدات ابتسامتها الخجوله\لا بالعكس..لذيذ..
الاء\الا مائلتي لي حنوا مستعده للدراسه..!؟
حنان\بدك الحقيقه!؟
الاء\ايوه..
حنان\متحمسه وبنفس الوقت خايفه..!
ناهد\مابتخافي..شوي شوي راح تتعودي..
حنان\ان شاء الله..
الاء كانت بعمر حنان..وتغار بشكل كبير منها..لأنها الأجمل..ولطيفة المعشر..عكس الاء العادية الملامح والمغروره..!
الاء\الله يعنيك يبغالك سنه حتى تتعودي..
ناهد\لا حنان قويه..وحنا ماارح نخليكي..
الاء بغلّ \ايه..طبعا..
حنان\تسلموا..وعمّ الهدوء..ماعدا ثرثرة الاء الغير منتهيه..
وبعدها طلعوا..وكملوا تجولّ بالأسواق..لغاية ما انهلكوا..ورجعوا البيت حاملين اكياس تبضعوها من اسواق متفرغه..
=============
"جميله..تلك العنيده.."
تهاوت الملابس من شتى الألوان وجميع الموديلات على الأرض والسرير وهي تناظرهم بنظرة ازدراء وملل..مو متخليه انها ممكن تلبس هاللبس..!هذا مو ستايلها..ولا لبسها..!!
هي بتكون نكتة الموسم اذا استمعت لكلام بنت خالتها وطاوعتها..!.؟
مستحيل...مستحيل اللي تقوله يكوووون..!
لولو\شوفي..هذا الأسود بيطلع جنان عليك..قيسيه ..!
ارمقتها فريده بنظره..واخذت الفستان ورمته بالأرض مع بقية اخوانه.
فريده\انا صحيح قلت لك بلبس مثلكم..لكن مو لهدرجه..!؟شنوا..هالحرير..وقسم بالله لوحة رسم..واخذت بلوزه شيفون بلون الأحمر القاني..وش ذا..!؟انتي من صجك بتلبسيني هاللبس..!؟تبين اجيب اخرتك..!وتنفست بشده..!
عقدت لولو حواجبها بقهر..وكتمت غيضها..وبحلم ردت\قلبي انتي..يعني شنوا تتوقعين اجيب لك..!!مو انتي قلتي تبغين تغيرين وتكونين انثى بمعنى الكلمه..!؟
ترددت فريده بالأجابه...هي فعلا تبغى هالشيء لكن مو لدرجة تلبس شيفون وحرير..وخامات ثانيه جهلت اسمائها..!؟
لولو لمن لاحظت سكوتها حاولت تغريها بصوت بمثل هسيس الرياح\ياغبيه...فكري زين..انتي وراك جامعه وحياه جديده ومو معقوله بتلبسين جينز ....ومو بس كذا..انتي وراك شي اعظم محد يعرفه غيري وغيرك.!!
اتسعت عيون فريده..وهي تسمع كلام لولو..معقوله فهمتها..وعرفت مقصدها..!!معقوله تقرأ افكارها وتعرف انه من اسباب العزم على التغيير هو اخوها!؟اخوها اللي بتعلمه منوا فريد الولد على مقولته!؟؟
احمرّ وجهها..ورغمن عنها ظلت هادئه..
لولو\حنا بنات وفاهمين على بعـض..وانا وياك لأخر المشوار.. وغمزت بعيونهـا..
عضت فريده على شفايفها وبتلقائيه رق صوتها\طيب..شوي شوي علي..مو معقوله من بديتها بلبس هاللبس..وبعدين انتي تعرفين انه هالألوان ماتعجبني..!!
لولو فرحت لمن قدرت تقنعها\اوكي مو مشكله..خلي الفساتين على جنب..وش رايك بهذه التنوره..!!
دخلت هاللحظه عايشه حامله معها اكواب الكابتشينوا مصفوف بجنب كل كوب قطعة شوكلاته..
عايشه\للحين مالبستي..!؟وااااو حلوه اللي بأيدك لولو..
ناظرت فرديه التنوره القصيره بوجه عابس..كانت بلون الاورنج..وفيها قصه على الخصر.ومره ناعمه..تنفست بعمق..وصرخت مره ثانيه\ياربي حتى هذه مقدر البسها..!
البنتين بنفس اللحظه\ليييييييييش!!
جلست على السرير بضيق\بس..بــس..مقدرّ..فهموني بليييز..
ناظروا البنتين بعض لحظات قصيره..وعايشه اخذت كوب كابتشينوا ومدته لفريده\خذي..وروقي..!
اخذت فريده الكوب..وشربت قليل منه وهي خانقتها العبره..!!
وش فيها..!؟ليش هالأنهزاميه..والسلبيه..!؟ماكانت كذا..ايش اللي قلب كيانها..وضايق نفسها..!
ماتقدر بين يوم وليله على كل هذا التغيير,,!
ليش ماتنساه وترتاح..هي وش تبغى بالظبط..معقوله تغير نفسها لأجله,.وهو اللي مااكترث فيها..!؟
لالالا..هي بتتغير للأفضل عشانها..عشان حياتها الجديده..وبنفس الوقت بتعلمه منوا فريده اللي خسرها..!
بتعمله منوا فريده اللي باعها لأجل طموح ضال..!!
بتعلمه انها بتظل شامخه..وعاليه..وطريقه صعب اللي بيوصل لها..!
فريده\اوكي..اطلعوا خلوني ابدلّ..
صرخوا البنات من الفرحه..وكلها ثواني وكانوا خارج الغرفه..
تلمست فريده قماش التنوره..وقررت تلبسها على تيشرتها السكري..غيرت ملابسها بحركه بطيئه..وترددت تشوف نفسها بالمرايه..رفعت عيونها ببطء..وناظرت وجهها..وبتلقائه طاحت نظراتها للتنوره اللي كانت بمقاسها وماسكه على جسمها..وبلا شعور وضعت ايدينها على وجهها و ابتسمت بخجل على شكلها..
لولو\خلصتـــي..
ابعدت فريده ايدنيها..وتخيلت لو يشوفونها البنات بهذا الشكل..ومامداها تفكر اكثر لأنه البنتين فتحوا الباب..وهي بلا شعور حاولت تنزل التنوره لجل تخفي ساقيها..
لولو وعايشه\واااااااااااااااااااااو..
حطت فريده ايدها على خصرها وصرخت بوجههم لأجل تخفي خجلها\كولوا عســـــــل..
تقدمت عايشه وفيها الضحكه\لحظه..فتحت الكلبس اللي رافع شعرها صديقتها..وتناثر ببعثره على اكتافها..وابتعدت شوي عنها..ومثل مااتبعدت خطوه تقدمت خطوه ونزعت النظاره اللي محاوطه عيونها..وابتسمت بحبور..والله انك قمــر..
مسكت فريده بتلقائيه شعرها..وحاولت تاخذ النظاره من عايشه\لا.اعطينني اياها..
عايشه\اسفه..
فريده بضيق\والله مااشوف..
لولو\لبسي عدساتك لو سمحتي..مافي نظاره بعد اليوم..يخرب بيتك عيونك فناجيين..
عبست فريده عيونها وانحرجت من هالأطراء رغم دفاشتها\طيب اعطوني اياها اللحين..والله مااشوفكم زين..
هزت عايشه راسها بالنفي\لا..
فريده صاحت بضجر وكانت جاده بكلامها\عوااااااااشي..لاتستغلين نظري الضعيف
لولو\قبل مانعطيك..لازم نحط لك مكياج خفيف..
فريده\لااااااااااااااااا
لولو\مو بكيفك..عواشي مسكيها..
مسكوها البنات بااكراه..وجلسوها على مقعد التسريحه..وهي كانت تشتمهم ومغتاضه منهم ..وبصعوبه..وضعوا لها .. فاوندشين وحددوا عيونها بقلم وردي..واكثروا من البلاشر الفضي على عظمة خدها..وحلوس وردي على شفافيها..
رضت لولو بالنتيجه اللي توصلت لها..وطلبت من فريده تناظر شكلها\فتحي عيونك ياغبيه..وشوفي شكلك..
عايشه\شكلك خطيير..بسم الله عليك..
فتحت عيونها بقهر..وقربت من المرايه لأجل تشوف ..وضحكت لمن شافت شكلها..كانت شكلها مختلف جدا..بالرغم من بساطة المكياج..
فريده\وش ذا..!؟
لولو\حلو صح!؟
فريده بلا شعور نطقت \ياربي شكلي غير..!؟وظحكت ببلاهه..ههههههههههههه
عايشه\هههههههه
لولو بمكر ردت\ليت ابو شامه سوداء موجود..
قطبت فريده حواجبها..
عايشه\يبيليك تشقير حواجب...!!
فريده هنا عصبت\احلموا.......
عايشه\والله بتطلعين احلى..صدقيني..حواجبك كثيفه بالرغم انها محدده..
فريده\لاتحاولين..
لولو\مو على كيفك..بكره بنروح سوى المشغل..
فريده\انتي تاكلين عسل..جيبوا نظارتي عمى.مااشوف زين..!
اعطتها عايشه النظاره وهي تبتسم\اليوم سماح..
فريده لبست نظارتها بسرعه وحست بالأرتياح لأنه النظرنعمه لاتقدر\كثير متفائله انتي.!
عايشه\وليه مااتفائل..!!غصبن عنك بتسوين اللي بنطلبه منك..وبكره بنروح المشغل..صح لولو!
لولو باابتسامه ذات مغزى\اكييييييييييد..
فريده\كولوا عســل..واطلعوا ابغى ابدّل..
لولو\وعمى ماكملتي عشر دقايق..
قامت من مقعدها وطردتهم..وهم معترضين..ومعصبين..وقفلت الباب لجل مايتطفولن ويدخلون..ناظرت شكلها نظره اخيره..وهالمره تمعنت النظر لأنها لابسه نظارات.. شعرت بالخجل وهي تتأمل شكلها..وبسرعه قصوى..فصخت ملابسها ورفعت شعرها..ومسحت المكياج..ومابقى الا القليل من اثره..وطلعت للبنات وهي متاكده انهم بيصرخون من القهر..وفعلا هذا اللي حصل..
لولو\ليييييييييييش..يادوبه..!
تقدمت لهم وهي تبتسم بمكر وجلست قبال التلفاز تفرر القنوات\بس..طفشت..
ناظروا البنات فريده بنظرة قهر..وهم يتوعدونها بالأيام القادمه..
فريده\لاتناظروني كذا..كيفي..البس متى مااحب..وافصخ متى مااحب..
عايشه\اوكي غلبتينا هالمره..!
لولو\اقولك قومي..اكيد سامي وصـل له ساعتين..!؟
عايشه ناظرت لولو اللي تلبس عباتها\وين ..بدري بنات!!
لولو\مقدر حبيبتي اتأخر اكثـر..!
فريده\مو انت تقولين تبغين تتأخرين عشان تقهرينه..
لولو\صح ..واللحين اكيد هو متنرفز..!!
اخذت فريده عباتها وبدأت تلبسها\يستاهل..!
عايشه\وانتي تحرضينها ياانسه..
لولو\ليش غيرتي رأيك مو هذه من خططك..!
عايشه\معك حقك..لكن مو بهالطريقه..!؟
لولو بنظرة تكبر قالت\انا اعمل مثل مايعمل هو..
طلعوا البنات بعد ماسلموا على عايشه..ومثل كل مره عايشه كانت توصي لولو توصياتها المعتاده..
===========
"دمرني وجودك"
اغلقت التلفاز ووضعت الكنترول فوقه..ماكان فيها نوم..
يمكن بسبب الكابتشينوا اللي شربته وبدأ مفعوله..!!فكرت تكتب شوي وتضيع وقتها..لكن بهألأيام هذه تحس بفتور عنيد..ومحتاجه الهام يداهمها لأجل تكمل اللي بدأته..!تذكرت باايام الأمتحانات كانت تحلم باليوم اللي تنتهي من الدراسه وتتفرغ لكتاباتها تفرغ كامل..وفعلا هاليوم انكتب..لكن اشياء كثيره استجدت معاه..واولها جرحها اللي عيا يطيب..ليته يموت..وترتاح..بس اللي تطلبه محــال!
سلمت امرها للباري,,وطلعت لغرفتهـا..رتبت الفوضى اللي احدثتها فريده ولولو..
وتذكرت انه ايام وتسافر وتشوف امها..امها اللي مالتقت فيها من تسع سنين..!!
ياترى تغيرّ شكلها..!؟..شعرها لازال طويل..وبشرتها البيضاء اللي اكتسبتها منها لازالت بنضارتها..!!
واخواتها الأربعه..اكيد كبروا..مو قادره تخبىء الأحساس اللي يرغم قلبها على زيادة نبضاته اذا تذكرت انها ايام وبتلتقي فيهم..بتجلس معهم..وبتسمع سوالفهم..صحيح مرت عليها ليالي سوداء..كرهت فيها اسم "ام" واخت وعايله واهل..لكن ماتقدر تنكر بداخلها انها فاقده..فاقده هالأحساس القوي..
تناقض غريب تعيشه لكن بكلا الحالتين..هي محتاجه لهم اكثر من أي وقت مضــى..
سمعت صوت تناديها..تركت اللي بأيدها..وطلعت لها..
عايشه\توقعتك نايمه..تقدمت لها وناظرت التكالوجات اللي بايدها..ايش هذا!
حكت ساره رقبتها بضيق\لي ساعه وانا ادور على فستان ييلق بأخت المعرس..ومو لاقيه..!
حست عايشه بالضيقه ترجع لها..واصبح كل شيء اسود بعيونها..!
ساره\وشفيك..لي ساعه اتكلم وماتردين..!
عايشه\ولا شيء..بس جالسه افكر مثلك متى اخيط فستان..!؟
ساره\والله حاله..شهر واحد بس بقى..وبهالشهر احنا مظطرين نروح الرياض عشان زواج جماعتنا..وبالمره تشوفين امك..!
عايشه\طيب نفصل بالرياض..او نشتري هناك..
ساره\لا..ابغى اخلص كل شيء قبل مانمشي..
"يافرحتي..كل هذا عشاني"
التفتوا زوجين من العيون لمصدر الصوت..وبتلقائيه حست عايشه بالأختناق والدوخه في آن واحد عكس ساره اللي استقبلت اخوها بوجه بشوش
ساره\جيت والله جابك..تعال اختار لي موديل..!
تقدم لهم حمد بخطوات ثابته وهو عينه متركزه على عايشه اللي اسودّ وجهها وزادت دقات قلبها من الخوف اللي داهمها..وكل هذا كان بثواني..
جلس جنب اخته بااريحه ومددّ ايده على طول الكنبه اللي شبر وتوصل لكتف عايشه\وانا وش يعرفني بهالشغلات!؟
ساره فتحت على كذا موديل عجبها..واعطته اخوها\شوف..اي واحد احلى..!
حمد وعينه مانزلت من عايشه\مدري..كلهم حلويين..صح عايشه..وابتسم ابتسامته الخبيثه..
عايشه بكل رعب..وبكل الم..اومات رأسها المنكوس..
ساره\بلا مجاملات لو سمحت..!تعال شخبارها خطيبتك..!
حمد\قصدك زوجتي..قمر....تعجبني وعاجبها...
ساره\الله يهني سعيد بسعيده..
حمد وبااسلوب حقير اكمـل\ لكن لازال قلبي خالي ويستقبل..
اتسعت عيون ساره بذهول\وانت ماتعقل..مستانس على اللي تقوله..
حمد بكل عصيان \وانتي وش عليك..!!خليني اعيش ايامي..
ساره\كل هذا..وماعشت..بتدخل الخمسه والثلاثين..!!
حمد ردد بااسلوب منرفز\شباب..شباب..
ماعلقت ساره..ورجعت تناظر التصاميم بتركيز..
حمد بنبره هاديه وماكره\وانتي ياعايشه..اخترتي لك موديل..!!
ماعرفت كيف ترد عليه..!او حتى كيف تنطق..كل حروف العالم نستها بحظوره وخبثه وحقارته..!!
وش تقول..!!؟تقول انك اقبح مخلوق عرفته!! اصلا حتى كلمة مخلوق بحقه ظلم..هو نكره..نكره عاله عليها..ولازم تمحي وجوده بحياتها..!لازم تعلمه انه الله حق..والظالم عقابه قريـب مهما ارتفع شانه..
الله عليك ياظالم..تٍسالني بكل وقاحه..ولا كأنه حدث شيء..ولا كأنك نبشتي قبري بايدك..
الله ينتقم منك..!الله ينتقم منك..وتموت ..والا انا اموت وربي ياخذني وارتاح..
حمد\وشفيها بنت اخوك ياساره..ماتحكي..!!
حاولت تقــوم..وتترك المكان له..وجوده خطر ومعذب بنفس الوقت..لكن ليش تحس انه رجولها ماعادت تشيلها..وروحهـا الفقيره انقبضت وماعادت تستجيب لأي احساس...وحراراة جسمها تضخ وتحرق كل خلاياها..
حاولت وجاهدت...تنسى هالجاثوم لو ثواني لأجل توقف على ارجلها وتبتعد عنه..ذكرت ربها كثير وتعوذت من الشيطان.....تذكرت صديقاتها لعبهم..وظحكهم..وحبهم لها.. وخف توترها...ولحظات بسيطه جدا وكانت بغرفتها والأرض تحظنها وتشهد انتصارها لأول مره..
===========
|