منتديات قصايد ليل - عرض مشاركة واحدة

11-07-2016

سكر سعود الجوال وصدره ضاق من هالوضع الي عايش فيه تركي من جهة وعبير من جهة ثانية !!
لوهلة كان بيعود أدراجة لوين ماهي عبير ويقولها عن تعب تركي وحاجته لها بهالوقت !! لكنه يعرف أخته لو درت ماراح تقعد بهالبيت ولا لحظة وبتنسى كل شي وتطير لزوجها وحبيبها .. وأهو يبي يحل السالفة بينهم عن لاتتكر مره ثانية وتظل عقبة بدورب سعادتهم !

كان باب جناحه مفتوح شوي .. دخل لقى منال قاعده على الكنب وأول ماشافته داخل قالت : كنت تكلم تركي ؟؟؟
مشى سعود ناحيتها وأهو مضيق عيونه فيها بنظرة ترمي سهام اللوم ! واهي حطت عينها بعينه تبي تفسر هالنظرة لين قعد وأبعد عينه عنها وقال باقتضاب : .…... ايه
منال : ياعمري عليه تعبان ولا عنده من يداريه ويعتني فيه ..
سعود تجاهل مقصدها وقال : مو بس أهو الي تعبان !
منال : صادق ! كلنا تعبانين ..
طالع فيها سعود بنظرة متفرسة وقال : شالي تعانين منه يامنال ؟؟
منال : ليه تسأل .. يهمك ؟؟
سعود : طبعا يهمني .. مو انتي زوجتي ؟؟ يهمني اعرف شالي تعبانة منه !
منال : التعب أنواع ياسعود .. وتعبي انا ماحد راح يفهمه ويحس فيه ..
سعود : انا أفهمك .. بس انتي احكيلي وقوليلي .. شالي تعانين منه بحياتك شالي ناقصك ومالقيتي من يحققلك اياه !
طالعت منال فيه بنظرة سريعة وشاحت بوجهها عنه واهي ماتدري شسر نظراته الي سارعت دقات قلبها .. بس كانت ملامحها أقوى من الهيجان الداخلي الي تعيشه ولا حسست سعود بشي وقالت : انا ماأعاني الا من شي واحد بس .. اني مو لاقية أحد يفهمني ..
سعود : لأن لغتك غريبة ومو مفهومة يا منال ! تتصرفين تصرفات صعب الواحد يلقى لها تفسير !
منال : سعود .. تلمّح لشي ؟؟
سعود : أشياء وأشياء .. تصرفات كثيرة تصدر منك مادري شغرضك منها ولادري ليه تسوينها وان سكت عنها فأنا أسكت بمزاجي أو انتظر الوقت المناسب عشان احكي ..
منال بثقة : زي ايش ياسعود !
سعود : وجهي هالسؤال لنفسك !
منال : شرايك انت بعد تسأل نفسك هالسؤال !
سعود : أنا أسأل نفسي ؟؟
منال : ايه .. حتى انت عندك تصرفات غريبة وماني لاقية لها تفسير ..
وقف سعود واهو يقول : يصير خلينا ساكتين أحسن !
منال : لاقول ياسعود لا تسكت ..
سعود : اقول خلينا بساعة رحمن وتصبحين على خير ..

كانت لحظة ممكن تنكشف فيها بعض الأوراق .. لكن سعود ماكان مستعد يدخل بدوامة دمار معها ومع الأهل لو كشف سرها .. ! لأنه يدري ان هالسالفة بتجر وراها سوالف وسوالف ..
واهو مو شايف قدامه الحين غير الهروب من هالدوامة لأحضان حبيبته وعد ..

طالعته منال واهو يمشي لفراشه ويتمدد عليه .. اتمنت تخترق أعماقه وتسبح فيها وتشوف شالي يسكن خواطره من أشياء يدري عنها واهي ماتدري عنها !!
وقفت واهي تحس بالضيق يكبت على صدرها .. ومشت وفتحت الأبجورة وسكرت النور ..

مشت للصالة وهي آخر شي تفكر فيه هاللحظة انها تنام ! ماتدري ليه أعصابها توترت من كلامه وأسئلته المفاجئة !
بالوقت الي المفروض أنا أوجه لك هالأسئلة تقوم انت تسألني ! شالتصرفات الي تقصدها ياسعود .. ! انا ماشوف اني غلطانة بأي من تصرفاتي .. انا كل الي أسويه صح بس مافي أحد فاهمني !!

قعدت على المكتب وفتحت لابتوبها واهي بالها مو معها بس تبي تمضي الوقت لين يجيها النوم .. وأي نوم الي بيجي مع ثورة مشاعرها وأفكارها هالوقت ..
مرت ساعة واهي قاعدة لين انتبهت للوقت واتذكرت حبتها اليومية الي متعودة تاخذها كل يوم بهالوقت .. اتذكرت انها ماخذتها ليلة البارح الله يستر على اللخبطة الي بتصيرلها !

سكرت لابتوبها وطلعت من الصالة واتوجهت ناحية تسريحتها .. مدت ايدها خلف السلة تبي تسحب الشنطة بس اتفاجأت بالفراغ الي صادفها .. عقدت حواجبها وميلت راسها خلف السلة لقت الشنطة مو موجودة !! استغربت اهي مخبية الشنطة بهالمكان وكل يوم تاخذ حبتها منه !! دورت بتسريحتها .. فتحت أدراجها .. مالقت أي أثر للشنطة !!

لاشعوريا طالعت بطرف عينها سعود واهو نايم !! معقولة يكون شافها وأخذها !!! معقولة اكتشف ؟؟؟ وعشان كذا يسألني ويحقق معاي ؟؟؟؟ أجل وين بتكون رااااحت !! وين يامنال حطيتيها اتذكري .. !!
مررت ايدها على شعرها بضيق واهي تسترجع وفجأة اتذكرت .. سولا !!!! ايه سولا أمس كانت ترتب غرفتي يمكن هي غيرت مكانها !!
مشت بسرعه وفتحت باب غرفتها وطلعت .. مافكرت وقتها مين صاحي ومين نايم .. تبي تطلع لسولا وتسألها عن الشنطة وتريح خاطرها ..

فتحت الباب الفاصل بين جناحها وبيتهم وحمدت ربها يوم لقته مفتوح .. مشت للدرج وطلعت بسرعه للدور الثالث وين ماهي غرفة سولا ..

وصلت لباب غرفتها ودقته دقات متواااصلة ورى بعض لييييين انفتح الباب ..
دفت منال الباب ودخلت واهي تقول : افتحيييييي .. (( ودخلت وفتحت النور ..
كشرت سولا بوجهها بسبب النور واهي الي كانت غاطسة بالنوم ..
منال بلا مقدمات : سولا اسمعي .. امس لما رتبتي غرفتي في كان على التسريحة شنطة .. ورى سلة الكريمات !! شفتيها ؟؟؟؟؟؟
سولا واهي تحاول تتذكر : فين هذا شنطة !
منال بضيق : ياسولا اتذكري تكفيييييين .. شنطة صغيره .. انا كنت حاطتها ورى السلة على التسريحة .. الحين جيت بشوفها مالقيتها ودورت بالتسريحة والادارج مافيه !!
سولا : أييييييواااااه .. هذا شنطة لون بني ؟؟
منال : اييييييييوة وين وديتيها !
سولا : انا سويت نظيف تسريحة بعدين حطيتها فوق الدولاب ..
وسعت منال عيونها وقالت : أي دولاب بالضبط !!
سولا : هذا دولاب جمب الباب ..
شهقت منال وحطت ايدها على راسها واهي مكشرة بقهر !!!!!!
سولا : اس فيه ؟؟؟
منال بانفعال : شالي اش فيــــــــه ؟؟؟؟ هذا دولاب سعود يالفالحة !!! شنطتي تحطينها فوق دولاب سعود ياحظي فيييييييك ياسولا !!
سولا : معليس مدام انا نزلت شنطة وسويت نظيف بعدين ماعرفت فين احط .…..
منال : اقول اهجدي خلصنا وخلاص !! مره ثانية شغلي مخك ورجعي كل شي مكانه فاهمه !؟

وخبطت بالباب وطلعت .. حسبي الله عليك من خدامة غبية !! مالقت تحطها الا فوق دولاب سعود ياويلي الحين بيشوفها ان ماكان شافها بعد !! لا لو كان شافها مستحيل يسكت ! وليه يسكت ؟؟ بالله بيكتشف اني آخذ موانع حمل وبهالكثرة ويسكت !! آخ الله يستر ..

نزلت الدرج لقت عبير واقفة عند الدرج وتطالعها وعلى وجهها علامات الاستغراب والتعجب !
انصدمت منال يوم شافتها ووقفت لحظات .. بعدها اصطنعت البرود وكملت نزولها ..
لكن عبير ماقدرت تسكت وقالت : شموديك فوق ؟؟؟
منال : وانتي شعندك تراقبيني !
عبير : انا كنت طالعة من غرفتي بانزل المطبخ الا سمعت صوتك فوق واستغربت !!
منال : شغلة فقدتها بغرفتي وطلعت أسأل سولا وين حطتها !
عبير : وتصحينها من نومها عشان تسألينها ؟؟؟؟؟؟؟؟
منال : الله وأكبر مصيبة يعني اذا صحيتها !
عبير : مهي مصيبة بس مافيها شي لو انتظرتي لبكرا وسألتيها ..
منال : موضوع مايحتمل التأجيل عاد !
عبير : حني عليها حرام عليك الآدمية تكرف طول النهار بين بيتنا وبين جناحك بعد ! << قالت الكلمة الأخيرة بسخرية ..
ونزلت الدرج رايحة للمطبخ ولافات منال نبرة عبير الساخرة الي نرفزتها ونزلت وراها واهي تقول : انتي لاتسوين فيها حنونة وطيبة على الخدامة وزوجك الي هو زوجك ماتدرين عنه !!!
وقفت عبير بنص الصالة يوم جا طاري زوجها والتفتت بخفة اهي تقول : منال انا ماطلبت رايك فلو سمحتي لا تتدخلين ! (( ومشت للمطبخ
منال من وراها : ولاني متدخلة مع ان هذا أخوي ولازم أتدخل بالشي الي يريحه ويسعده .. بس اقولك قبل لاتحنين على غيرك حني على زوجك الي مرمي بالفراش من كم يوم لاعنده من يهتم فيه ولا يراعيه !

اتوسعت عيون عبير بصدمة ماقدرت تخفيها !! تركي تعبان ومرمي بالفراش !! هذي صادقة ولا تكذب عليها !!!
التفتت وقالت بصوت مرتعش واهي ماسكة باب المطبخ : شفيه تركي ؟؟
منال : هههههه تسأليني انا !! لو يهمك صحيح ماتركتيه عشان أسباب تافهة الله يعلم شالي وراها !
عبير بحرقة : انا ماتركته الا بسبب المشاكل الي جرتنا بسبتك انتي ومرة ابووووووك ..
منال : والي سويتيه يعتبر أكبر مشكلة ممكن تصير بين تركي وأبوي !! تبين تنجين نفسك من الهموم على حساب علاقة أخوي مع أبوي !!
عبير : هذي نظرتك السودا الي تشوف الأمور بهالطريقة .. انتي ماعانيتي الي عانيته ودايم الصافع ينسى بس المصفوع عمره ماينسى !
منال : ليه ياحبيبتي تحسبيني مبسوطة بببيت الهنا الي انا فيه ؟؟ ما كأني أحلم بالاستقلالية زيك وزي أي وحده غيري .. بس عمري ماضغطت على زوجي وتركت البيت عشان يطلعني بيت بروحي ! عمري مااتخليت عنه وتركته بحاله تعبان .. ولو سويتها فزوجي عنده امه تطبطب عليه .. لكن انتي يوم تركتي تركي مافكرتي تركتيه لمين ؟؟ تركتيه بدون زوجة ولا أم ولا حطيتي ببالك أي اعتبار لهالأمور وجاية الحين تتفلسفين عن الحنية !! اتعلمي معنى الحنان بعدين تعالي اتكلمي عنه .. !

ومشت عنها وطلعت وعيون عبير تلاحقها تبي تناديها تبي تسألها عن تركي تبي تقولها انتي غلطانة انا مو قاسية لهالدرجة .. تبي تقولها لاء انا ماتخليت عنه وتركته .. لا تركي مايعاني بروحه .. تبي تبرر موقفها بس لا قدرت تنطق ولا قدرت توقف .. خارت قواها ورمت نفسها على الأرض عند الباب ودفنت وجهها بين ركبها وصارت تبكي وتناهج بكل ألم وحرقة .. !

آخر شي كان ينقصها هالطعنات الي طعنتها منال فيها .. اهي بدوامة حيرة وتعب ماكانت ناقصة تجيها وترمي عليها اللوم والعتب وتطلعها بنظر نفسها أكبر غلطانة وخاينة للوعود ..

ياما قـ ـ ـالت ..
إيدي بإيدك على الحلو .. وعلى والمـُر ..
باوفي وعودي لك حبيبي كل العمُر ..
تشهد على حبنا عيون البشر ..
وعيون القمر

وين الوعود .. وين العهود .. وينك حبيبي .. ووويني أنا .. !

آآآآآآآآه مين يصـــــدق !
يمرالوقت ماشوفك .. ولادري بك اذا موجوع !
يمر الوقت ما أدري .. وساعات الزمن تجري
ساعة بعد ساعة .. واسبوع جر اسبوع
ولادري حتى انت وين !
ولادري عنك وعن أحوالك
ضايق .. ولا حالك زين !!!

قامت تلم جروحها ومشت واهي يالله تشوف دربها .. كيف مشت كيف طلعت الدرج ماتدري .. كانت صورته قدام عيونها وكلمات منال يتردد صداها داخل كيانها بطريقة توجع قلبها وتكوي روحها ..
وصلت غرفتها ومشت لجوالها .. مسحت دموعها بخلف كفها ورجعت خصلتها ورى اذنها واهي تطالع بالجوال .. تبي تكلمه تبي تسمع صوته .. حبيبها تعبان بروحه واهي تعبانة من غيره .. ! اكتسبت جمود مهي قده وعنفوان مهو من طبيعتها ..
مسرع مانهارت كل مدن القوة أمام حنينها لحبيبها واحساسها انه تعبانة وبحاجة لها ..

دقت على رقمه بلا تردد ورفعت الجوال لاذنها وأنفاسها تتسارع بترقب لسماع صوته ..
انقطع الخط ومارد وعضت على شفاتها بألم !
معقولة مايبي يرد علي .. ؟؟ ولا نايم وماسمع الجوال ! ياربي شصار فيني مو قادرة أصبر ولا لحظة .. أبي أسمع صوته أبي أكلمه ماقدر أتحمل أكثر ..
عادت الاتصال مره ثانية وانتظرت لين فصل بلا رد !!

اتأففت بضيـــــــق ! فجأة اتلاشت كل طقاقات الصبر بخاطرها .. ! مهي قادره تكلمه ولاهي قادرة تصبر أكثر .. لا ماقدر أصبر .. مو راضي يرد يصير بروح له .. !! قولوا عني الي تبون مجنونة .. مهووسة .. ضعيفة .. مايهمني .. الي يهمني ان حبيبي تعبان ومحتاجني ..

وقفت ومشت تفكر كيف تروح له هالوقت ؟ مين فاضيلها يوديها هالوقت !!
خـــــــالد !! اخوي خالد اهو راعي سهر أكيد سهران الحين وبجيبه من وين ماكان ..
وبسرعة البرق أخذت جوالها ودقت عليه .. وزي ماتوقعت كان الحلو سهران على فلم اهو ومرام ..
ورد عليها: هلاااااااااا والله بعبير ..
عبير واهي تحاول تعدل صوتها : هلا خالد شلونك ..
خالد : تمام .. غريبة شجابنا على بالك هالحزة ؟؟
عبير : خالد ممكن أطلب منك طلب ؟؟
حس خالد ان فيها شي وأرخى صوت التلفزيون واهو يقول بجدية : آمري عبير شتبين ؟؟؟
عبير : أبيك تجيني بيت أهلي وتوديني لبيتي ..
خالد : ….... عسى ماشر ياعبير ؟؟؟
عبير : الشر مايجيك خالد بس أبي أرجع بيتي ..
خالد : أوكي مو مشكلة بس ليه فجأة كذا صار شي ؟؟؟
عبير : لا بس انا متضااااااااايقة وابي أرجع خصوصا ان تركي تعبااان ومحتاجني ..
خالد : عبير انا مابي أرفضلك طلب لكن .. مابي تندمين على أي خطوة تسوينها .. انتي جيتي لأهلي عشان تنحل سالفة طلعتكم من البيت والحين بترجعين بدون ماتحلينها ولا شي وأخاف بالآخر الغلط يركبك انتي ..
عبير : سعود قال بيكلم تركي ويتفاهم معاه .. وانا بخليه يتفاهم معاه حتى لو رجعت .. بس الحين تركي تعبان ياخالد انا مابي أفكر بشي ثاني غير اني اكون مع زوجي هالوقت ..
خالد : على راحتك ياعمري انتي كبيرة وعاقلة وانتي أدرى بمصلحة نفسك ..
عبير : اعذرني خالد بتعبك معاي هالوقت بس سعود نايم والبيت كله نايم ولاقدر اروح مع السواق لحالي الحين ..
خالد : مشوار الطريق وانا عندك ..
ابتسمت عبير وقالت : الله لايحرمني منك ياخوي .. انتظرك ..

بنفس هالوقت كانت منال واقفة تحت الدولاب تطالع الشنطة واتطمن خاطرها يوم لقتها بعيدة وبهالشكل ضمنت ان سعود ماشافها لأن بظنها سولا الغبية رمتها آخر الدولاب ..
مشت والهواجس تعصف براسها ..
للحظة حست حياتها على وشك الانهيار !! قعدت على السرير واتأملت سعود وأهو نايم !!
صراع مابين الخطأ والصواب !
لا أنا ماغلطت ! الغلط اني أجيب منك أطفال أظلمهم بهالدنيا .. أموت عنهم ويظيعون من بعدي زي ماظعنا تحت قسوة ابوي وظلم زوجته .. الغلط اني أجيب أطفال من زوج ماحس بالأمان بقربه ! أحس انه ممكن يتركني بأي لحظة ويبعد عني .. أحس اني عالة عليه وعلى أهله ! بس دام اني مقتنعة بالي اسويه ليش خايفة يدري ؟؟ ليش حاسة ان الدنيا بتنقلب علي وباطيح بهاوية مالها قرار !

غطت وجهها بكفوفها ومسحته واهي تحس بتوتر فظيع ..

خلاص منال انتي مو غلطانة خلي عندك قناعة بهالشي .. وسعود مايدري ولو درا مستحيل بيسكت عني ! مستحيل يبقيني عنده الا بيقلب الدنيا على راسي ويعلّم أبوي !
ووقتها محد بيفهمني أو يعذرلي أسبابي !
::

(*)
وش حيلتـ ـــ ـــي بقلــ ب ــي !؟

مناته السكنـى " بجوفكـ "
نـــــــاسي الدنيا (بغيابكـ .. )
سارح بعالم ! طيوفكـ !
راااجع ونااااسي ,،‘ عتاااابكـ ‘،,
مشتــــاق للمسة " كفوفكـ "
راااجع وراااضي (بعذااابكـ .. )
لو تطعنه أكبر ! سيوفكـ !
عاش عمره عَ ‘ حسابكـ ‘
معاند و راضي " بظروفكـ "
(*)

وصلت عبير بيتها بعد ماوصلها خالد .. مشت واهي مو قادرة تخمن وضع تركي بهالوقت
فتحت باب الجناح ودخلت ! اتسمرت عند الباب أول ماشافته متمدد على الكنب !
تحس مر دهر كامل على الفراق ! فاضت بقلبها الأشواق .. !

مشت بخطوات مهزوزة .. لين وصلته ولقته نايم .. قعدت جمبه ملاصقه فيه ومسكت إيده ..
حس تركي فيها وبريحتها وقربها بس ظن ان هذا خياله الي عاشت فيه طول الليالي الماضية ..
اتأملت ملامحه الذبلانة والتعب الواضح فيها ..
تفتت قلبها عليه .. ومدت إيدها ومسحت على خده بحنيه واهي تهمس : تركي حبيبي .. هذي انا عبير ..
حست بحرارة جبينه واتجمعت دموعها بعيونها ..
فتح تركي عينه وشاف ملاك روحه جمبه .. ماقدر يمنع ابتسامة مع تعبها الا انها تذوب القلب ..
بادلته عبير نفس الابتسامة واهي تمسح على راسه وقالت : حبيبي سلامات .. فيني ولافيك ياقلبي ..
همس تركي باسمها كنه يبي يتأكد بوجودها : عبير!
عبير : ياعيون عبير ..
مسك ايدها وسحبها لفمه وباسها بقووووة ..
طاحت دمعتها على كفه واهي تشوف تعبه وولهه عليها بشكل أخرسها وبعثر كيانها ..
عبير : حبيبي انت تعبان .. تحتاج مستشفى تحتاج دوا ..
تركي بتعب : خليك معاي وأنا أطيب .. انتي دواي ..
عبير : ياحياتي قلقت عليك .. أنا أحبك تركي .. أحب دنيتك الي انت فيها أحب كل شي فيك ..
تركي : وانا أحبك ياروحي .. ولهت عليك فقدتك حييييييل تعبت وتهت من دونك ..
قربت عبير منه ولمت راسه بحضنها وياكثر ماكان تركي محتــــــاح لحضنها الدافي وصدرها الحنون ..
ضمها واهو يقول : اتحريت رجعتك كل يوم ياعبير .. اتحريت اتصالك كل وقت تقولين تعال خذني ياتركي ماقدر على فراقك مثلك ..
عبير : كان غصب عني ياتركي انا كنت منهارة وتعبانة ..
تركي : سامحيني عبير عذبتك معاي .. آذيتك وآلمتك ..
عبير واهي ضامه راسه حيل لصدرها : حبيبي انا نسيت كل شي .. وانت مالك ذنب بشي ..
تركي : فهمتي الحين ان مو بإيدي شي .. ؟ لو بإيدي كان حققت لك الي تبين من ثاني يوم ورجعتك .. كان ماأبعدتك عن عيني ولا لحظة ..
عبير : حبيبي انا مابيك تبررلي الحين انت تعبان .. انا راجعة عشان أريحك ما أتعبك ..
تركي : ضميني حبيبتي .. ولا تتركيني ولا لحظة !

,, واذا لـ م ـني ~ دفى ~ حـ ض ـنكـ ,,
,, وغـ ف ـت عيني على صدركـ ,,
,, أحلـ ف ـك لااااا توقـ ظ ـني ,,

::

ومن بكرا بعد صلاة الجمعـة ..
طلع سعود من بيت عمه أبو تركي .. واهو مرتاح الخاطر !
لكنه ماكان يسولف مع تركي !
كان قاعد يسولف .. مع عمه .. أبو تركي !!؟

******

‘ بعـد يومين ‘
طلع سعود من الشركة واهو يكلم بالجوال : تكفى يا أنس لا تنسى تبلغهم عن سفري واذا كان تقدرون تأجلون الاجتماع لين أرجع يكون أفضل ..
أنس : الساعه كم رحلتك ؟؟
سعود : الساعه 5 لازم أكون بالمطار والحين الساعه 3 يالله يمديني أرجع البيت اتجهز بسرعة وأمشي ..
أنس : تروح وتجي بالسلامة ولا تشيل هم شي انت ..
سعود : الله يجزاك الخير .. يالله سلام

سكر منه وأول مافتح باب السيارة وصله مسج ..
فتحه واهو يركب السيارة وقرا :

لاتغلى ياحبيبي لاتغلى ..
أثر من تغلى ما تخلى !!
أحبك بكل مافيك
وكل ماتهجر أجيك
وبكل صراحة أبيك

تكاثرت الرسائل الي من هالنوع .. كلها من نفس الرقم وكلها حب وغرام ولا يدري مين المُرسل .. أرسل يبي يعرف مين ولاجاه الا مسج حب ثالث ورابع وعاشر !
كتب الرقم واتصل عليه واهو يشغل السيارة .. وبعد رنة وحده جاه الرد بصوت مايع : اهليين ..
سعود واهو عاقد حواجبه : هلا مين معاي !!
: ماعرفتني ؟؟؟
سعود : لا والله .. بس شكلكم غلطانين بالرقم ..
: لا ياسعود .. الرسايل لك انت مو لغيرك !
سعود وكنه بدا يميز الصوت بس حب يتأكد : مين معاي !!
: لاتسوي نفسك ماعرفتني ياسعود ..
سعود : أتمنى أكون غلطان .. وماتكونين انتي الي ببالي !
: لييييه شدعوة ..لهالدرجة ماتبيني .. سعود بصراحة أنا أحبك وأدري انك مو مبسوط مع زوجتك .. ولا أنا مبسوطة مع زوجي .. فليه مانعيش حياتنا ؟؟؟
ثارت أعصاب سعود لدرجة فضيعة بعد ماعرفها واتأكد منها وصرخ : انتي ايش انتي ؟؟؟؟ ياواطية ياخاينة !
نوال : أعصابك حبيبي .. لاتصارخ .. وصدقني الموضوع بيكون سر بيناتنا لين نتخلص من ارتباطنا بأشخاص مانبيهم ولايبونا ..
سعود : انتي أحقر من الحقارة نفسها .. حرام عليك عمي الي حاشمك ومدللك على حساب الصغير والكبير بالبيت .. ومين قالك اني مو مبسوط مع زوجتي .. ! انا أحب زوجتي ومبسوط معاها وموتي بحرتك انتي ..
نوال : هههههههههههههههههههه اكذب على الي تبي بس علي أنا لاء .. انت ماتحبها ولاتبيها ومنجبر على الزواج منها .. وأنا أبيك تحبني زي ماحبك ونكون لبعض !
سعود بصرامة حادة : إلزمي حدودك يانوال وانسي هالكلام ولاعاد تفكرين فيه .. احترمي نفسك واحترمي زوجك وخافي ربك قبل أي شي !! وانا بانسى الي صار وبسوي نفسي ماسمعت شي لكن لو اتكرر هالكلام فلاتلومين الا نفسك !!

وسكر الجوال وقفله ورماه ولا فكر يفتحه واهو الي مابقى على سفره غير كم ساعه !

قعد كم دقيقة مصدوم ومو قادر يحرك السيارة واهو يسترجع الموقف !!
نوال مرة عمـه .. تخون عمه .. معاه أهو !!!!!!
شهالمصيبة الي طاح فيها .. شهالبلاوي الي تطيح فوق راسه من كل جهـة !! ؟؟
يلقيها من وين ولا من وين !! اتنهد واهو يهز راسه بصدمة وضيييييق !! حلف ان قرار سفرته لوعد كان بمحله ..
يبي يهرب من مصايب الدنيا لعيونها .. منانهمار الصدمات لدنياها وبس دنياها ..
وين ماتختفي الأحزان ويعيش وياها بين أبهج ورود الحب .. والسعادة ..

رجع البيت ودخل الجناح وكان باين مستعجل .. سلم على منال وبغى يطلب منها تجهزله ملابس بس اتردد ..
شي بخاطره منعه يطلب منها تسوي له أي شي يتعلق بسفرته هذي .. يمكن لأنها سفرة خاصة فيه وتتعلق فيه .. مهما كان ماهان عليه يخدعها ويخليها تجهزله ترتيبات سفرته لحبيبته وفضّل يسوي اهو كل شي بنفسه ..

وبعد ما أنهى حمامه طلع لبس ملابسه ..و أخذ ساعته يلبسها وشاف منال بطرف عينه واهي قاعدة على الكنب ولامة ركبها لصدرها ..
انتبهت لنظرته وقالت : كم يوم بتقعد ياسعود .. ؟؟
سعود : ماحددت والله .. بس مو أكثر من اسبوع !
منال : عمل ها ؟؟
سعود واهو مضيق عيونه فيها : انا قلتلك .. ومراح أعيد كلامي !
منال بتنهيدة : على راحتك .. بس لاتقول تصرفاتي أنا بس الي مالها تفسير ..
سعود : منال .. راجعي نفسك .. لا تكذبين على نفسك كذبة وتصدقينها .. انا بسافر وانتي راجعي حساباتك وراجعي حياتك وبتشوفين شمسوية وبتفهمين قصدي ..
منال : انا ماشوف اني مسوية اي خطأ بحياتي !
سعود : متأكدة ؟؟؟
منال واهي تهز راسها : متأكدة ..
سعود : منال في مره قلتيلي انك تقدرين البوسة الي على الجبين .. !
استغربت منال اش دخل هالسالفة الحين !! بس ردت وقالت : ايه .. أحسها ترمز للاحترام !
سعود : حلو .. (( ومشى ناحيتها وانحنى وباسها على جبينها وهمس : فمان الله ..

ومشى وتركها مشلولة الحواس وحتى الفكر !!
يمكن ماقدرت تفهم تفسير لهالحركة هاللحظة ..
ويمكن يجي يوم تفهمها .. وتبكي عليها .. لين تغرق .. بدموعها !!