الجزء الثالث والعشرون


وقفت السيارة قدام منزل أبو فيصل
التفت خالد عليه وشاف عيونه تطالع بالشباك بنظرات شوي وتخرقها .. !!
قال بهدوء : يالله يافيصل ..
مابدا على فيصل أي رد وانتباه .. مما خلى خالد يعيد بنفس الهدوء : فيصل وصلنا .. انزل !
التفت فيصل بخفة لخالد .. وطالعه بنظرة ماتختلف عن النظرة الي كان يطالعها من الشباك .. وبعدها نزل عيونه وفتح الباب ونزل بدون أي كلمة ..
نزل خالد وسكر الباب واهو يطلع جواله .. اتصل على أول رقم كان مخزن تلقائي عنده .. ورفع الجوال لاذنه وبعد أول رنة جاه الرد بصوت مليان دموع : هلا خالد ..
خالد : هلا حياتي .. وصلنا ..
مرام بغصة : أوكي وأهو شلونه ؟؟
خالد بهمس عن لايسمعه فيصل : مافتح فمه ولا بكلمة ..
مرام وإهي تبكي : ياعمري ياخوي ..
خالد : يالله ياقلبي بروحله وانتي علمي الي عندك
مرام : اوكي مع السلامة ..

سكرت منه وبسرعه طلعت من غرفتها وراحت لغرفة منى .. فتحت الباب وطالعت بمنى وبلعت ريقها وقالت : ......... فيصل جا ..
شهقت منى وقالت وهي شااااايلة هم : ياربي .. (( ودمعت عيونها واهي تقول : ماقدر أشوفه ..
مرام واهي تدمع : لاتقولين كذا يامنى .. كلنا مانتحمل نشوفه بس مايصير نحسسه بهالشي .. اهو بروحه مهزوم مو عاد احنا نهزمه أكثر ..
منى : انا ماتحمل اشوفه عشانه اهو بعد .. ماتحمل أشوف شكله ومنظره وحزنه وصدمته ..
مرام : خلاص يامنى عاد شنسوي قدرنا ان أخونا يصدم اختنا .. (( وشهقت واهي تمسح دموعها ..
وقفت منى وقالت واهي تمسح دموعها بطرف كمها : قلتي لفتون ؟؟؟؟
مرام : لا حسبتها عندك .. وينهي؟؟
منى : كانت عندي وراحت غرفة مشعل ..
مرام : آه ياعمري يامشعل .. اجل بروح أشوفها ..

وطلعت من الغرفة وأول مادارت ..
شـــافته !!
شافت فيصل طالع الدرج ووراه خالد !
طالعها بنفس النظرة الي يطالع فيها كل من توقع عينه عليه ..

اتسمرت مكانها واهي تطالعه وصرخات تتفجر بداخلها .. مابين عتاب ومابين رحمة ..
رجعت الدموع تتجمع بعيونها لاشعوريا لكن فيصل ماوقف ليشوفها .. أبعد عينه ومشى ناحية غرفته ودخل وسكر الباب ..
تبعته بنظرها لين دخل وسكر الباب و .. سالت دموعها !

مشى خالد لعندها ومسكها وضمها وقال : كان سلمتي عليه يامرام ..!
مرام واهي تبكي : ماقدرت اتحرك ياخالد مادري شجاني ..
خالد : قوي قلبك حياتي هذا أخوك وانتي ماشفتيه من رجعنا من السفر !
مرام : بادخله الحين .. الله يقويه ويقوينا معاه ..
باس خالد راسها وقال : آمين ..

تركها ونزل للصالة ومرام مشت لغرفة فيصل واتنهدت واهي تفتح الباب ..
دخلت وسكرت الباب وراها وشافته قاعد على السرير بملابسه وساند ظهره على المسندة وذراعه خلف راسه ومسكر عيونه ولا فتحها حتى يشوف مين الي دخل !!

مشت بهدوء لين وصلتله وقعدت جمبه ومسكت ايده ونادته : فيصل حبيبي ..
فيصل على نفس وضعه : ....................!
مرام : فيصل لاتسوي بنفسك كذا الله يخليك .. افتح عيونك وطالعني ياقلبي ترا كلنا معاك .. محد فينا ضدك !
سكتت تنتظر منه اي تفاعل .. لقته اهو زي ماهو عليه ..

انفتح الباب من وراها ويوم التفتت لقت منى داخله .. سكرت منى الباب واهي تنقل بصرها بينهم وتحاول تستشف من تعابير مرام عن وضع فيصل ..
مشت وقعدت جمبها واهي تطالع فيصل واهو مسكر عيونه عنهم .. نادته بهدوء : فيصل ياعمري شلونك ؟؟؟ اشتقنالك !
فيصل : .............................. .
طالعوا مرام ومنى ببعض بحزن .. (( وعادت منى عليه : فيصل رد علي لا تقطع قلوبنا عليك بهالشكل ..
فيصل ساكت .. بدون أي رد .. ولا أي تفاعل .. !!

ماتحملت مرام وضعه وغطت فمها بإيدها تمنع شهقاتها وقامت عنه ..
وقفت منى وقربت منه وباست راسه وطلعت وراها .. تاااركينه يصــــــــارع بداخله أنواع العذاب واتهامات الضمير الي تطعن عمق قلبه .. !!
أنا السبب !! لا مو أنا .. انا شدراني انها طالعة بال هالوقت .. ؟؟
صــــــالح السبب .. قالولي انها كانت معاه وتركها .. لا بس اهي شطلعها ال أساسا ..؟؟ حنان الي أرسلتها .. يصير حنان السبب !! هالابنية دومها تمشي بأمر حنان .. بس ولو حنان شدراها اني باصدمها .. وانا ليه صدمتها ؟؟ شالي طلعني من البيت وركبني السيارة وخلاني أصدمها .. ايه فتوووون .. عشان أجيب فتوووون .. !! آآآآخ يافتون انتي السبب .. !! ايه انت السبب بكل عذاب بحياااتي ..!
بـــــــــس ! بس يافيصل .. مايصير ترمي اللوم على كل واحد .. ولا حتى عليك !!
اتأفف بضيييق ! .. يعني لو ما صدمتها انا ماكانت بتمر اي سيارة ثانية غير سيارتي وتصدمها ؟؟؟ مو طلوعها أساسا كان مباغت ولاحد كان بينتبهله ؟؟
لا بس انا غير .. أنا اخوها .. سندها .. عزها .. كيف ماشفتها !! كيف ماحسيت فيها ؟؟ كيف ماتفاديتها ؟؟ شكان فيني ذيك اللحظة !!
عشان فتون جمبي ؟؟؟؟ لاااااا فيصل لاتظلم فتوووون .. فتون كانت جاية عشاني .. فتون كانت تبي تبدا صفحة جديده معاي .. ليه ودي أطلع نفسي من الاتهام وأروح أرميه على غيري .. محد جاني ومحد ظالم غييييييييرك يافيصل .. !!
اتأفف واهو يخبط راسه بالجدار بكل ألم وضيق !

بنفس الوقت كانوا مرام ومنى يبكون برا الغرفة ومرام تقول : ياعمري ياخوووي .. مو سهله عليه ابد ..
منى : الله يقويه يارب .. الله يقويه ..

مشوا الا سمعوا صوت فتون من غرفة مشعل ..
منى : قلتي لفتون ؟؟؟؟
مرام : لا والله طلعت لقيت فيصل بوجهي ومامداني اقولها ..
منى : يووووه والله ان تذبحنا الحين ..

ودخلت لفتون .. ومرام نزلت لخالد ..

دخلت منى شافت فتون ضامة مشعل من كتوفه وتقول : بس يامشعل وبعدين ؟؟ وين الكلام الي من اليوم أعيده عليك ..؟؟
مشعل واهو يشاهق : انا السبـ ـ ـب .. أنا الـ ـي كنـ ت أدعـ ـي عليـ ـها دايـ م .. أبيهـ ـا ترجـ ـع وأخليـ ـها تلعـ ـب معـ ـاي زي ماتبـ ـي .. والله مـ ـاقولهـ ـا شي .. والله ما أضربهـ ـا .. والله ما أتهـ ـاوش معهـ ـا ..
بكت منى ومشت بسرعه لعنده وضمته بقوة وقالت لفتون وصوتها يالله يطلع منها : فيصل جا
شخص بصر فتون واهي تفز وتقول : متى ؟؟؟؟؟؟؟
منى : توه .. شوفيه بغرفته ..

مشت فتون مسرعة ولاحتى سألتها شلونه وكيف وضعه .. كانت تبي تشوفه بأسرع وقت وإهي الي ماشافته ولاحد شافه ولا درا عنه من صار الي صار .. !!
وقت إلي اختفى ولاحد عرف وينه الا خالد الي جابه البيت غصب عنه ..

راحت لغرفته ومسكت مقبض الباب وحاولت تضبط انفعالاتها .. كيف بشوفه وكيف باتحمل مظهره !! كيف أهو بيتقبلني وياعالم وش يدور بباله عني !!
لايكون يحسني السبب ؟؟؟ وهل أنا فعلا السبب ؟؟ مو أنا الي طلعته من البيت وخليته يركب السيارة ويجي ياخذني ؟؟؟ أنا الي لهيته بالطريق وأخذت عقله بغبااااااائي !!! أي غباء فتووون ! نسيتي شكنتي ناوية عليه ذاك اليوم ؟؟ مو كنتِ ناوية ترجعين وتفاجئينه بــ ......... آآآآخ !! بس فتون .. وربي بافقد عقلي من كثر ماأفكر وألوم نفسي .. الله يعين يارب .. ياااارب ياااارب ...
دقت الباب بخفة .. وفتحت ودخلت وسكرت الباب وشافته على نفس الوضعية الي تركوه عليها خواته ..
وقفت مكانها تتأمله .. واهو لافتح عينه ولا اهتم بأحد .. حست انه يصارع بداخله أعنف أنواع العذاب .. !! بداخله بس تخمد نيران وتشتعل نيران .. بداخله بس يموت ويحيا آلاف المراااات !!

مشت بخفة وقعدت جمبه .. مسكت ايده وحستها بأصابعها وهي تطالع فيه بحنية ..
وقبل ماتناديه ............. فتح عيونه نصف فتحة وشافها !
يمكن وصله عبيرها .. يمكن اتسرب لكيانه حسها من لمسات يدها .. المهم فتح عينه وأهو متأكد انها فتون ..

ضربت عينه على إيدها المجبرة ورجع غمض عينه مره ثانية واهو يتنهد من أنفه!

حست فتون انها تواجه أصعب مهمة بحياتها !! استجمعت قواها وقربت منه لين لصقت فيه وصار وجهه مواجه وجهها .. مررت ايدها السليمة على خده واهي تقول برجاااااء : حبيبي افتح عينك وطالعني ..
سكتت شوي وقالت برجاء أكثر : الله يخليك !
بلع فيصل ريقه وفتح عينه وطالعها .. شافت فتون فيها العذاب يصرخ بعنفواااان ..
ابتسمت بحنية واهي تقول : شلونك .. ؟؟
نقل فيصل بصره بين عيونها بلا رد .. شيقولها وش مايقوووولها !! الي بخاطره أكبر بكثييييير من ان تعبر عنه كلماااات .. !

فتون واهي تمسح على شعره ورقبته : فيصل انت أقوى من كذا بكثير .. صحيح صدمة قوية بس مو انت الي تطيحك .. ! انا دارية ان مو هاد حيلك غير الخواطر الي بداخلك .. (( وبرجاء : فيصل لاتفكر بطريقتك الي قاعد تفكر فيها .. انت مو السبب !! هذا قدرها .. هذا شي مكتوب على جبينها من طلعت على الدنيا .. ماتدري شحكمة ربي من انك انت أخوها إلي تصدمها .. يمكن لو كان أحد غيرك كان آذاها أكثر .. !
سكتت تراقب عيونه وكنها تقرا خواطره الي تدور فيه هاللحظة وكملت : زعلان عشانها .. ؟؟ ودك ترجعلنا ساره الي أول ؟؟ ادعيلها يافيصل .. اهي ماتحتاج منا الحين الا الدعــــاء ..

سكتت تحاول تستشف من تعابيره أي تفاعل.. رد عليها بدون كلمات .. بعذاب النظرات الي تترجم مابداخله من لهيب الجمرات ..

قالت واهي تضغط على كتفه وتهزه بخفه : فيصل اتكلم قووووول شي .. مايصير لك اسبوع مختفي لا شفت أحد ولا فتحت فمك ولا بكلمة .. فيصل طلع الي بخاطرك علي أنا .. باتحملك ياقلبي ومو مانعتك من شي .. سو الي تبي بس اطلع من الحالة الي انت فيها ..!!

سكتت شوي واهي تراقب عيونه ..
انتبهت أو اهي اتوهمت لعيونه تلمع بالدموع .. رفعت حواجبها واهي تقول بهمس : ابكي يافيصل .. طلع الي بقلبك بالطريقة الي تريحك انت .. والي تبيها انت .. انت وبس !

انتبهت لعيونه تلمع أكثر والدموع بدت تتجمع فيها ..
قربت منه وضمت راسه لصدرها ..
وكن فيصل كان ينتظر هالحركة بس عشان يبكي ويطلع الي بقلبه ..

بكى !

اي نعم بكى !

ولحد يلومه دموعه وضعفه هالوقت ..!!

لأن عمره مابكى ....

وهالمره بكى يوم .....................

صــــدم أختــــــــه بنفســه .. بسيــارته ..
ورماها بـــــ :

(( قسم الحالات الحرجة .. والعناية المركزة !! ))

::

في ذاك المكان الي يشهد يوميا على أنواع الدموع والآلام والصياح ..
بأحد أقسامه المتعلقة بالحالات الخطرة ..
كانت زهرتنا ترقد ........ ساكنة ....... ولا حركة ........ ولا كلمة ........ ولا همسة .. !

سكرت أم فيصل المصحف بعد مامضت ساعه كاملة وإهي تقرا فوق راس بنتها .. وحطته على الجمب ورجعت تتأمل بنتها الصغيرة .. !

يا كيف أوصفلكم شكلها ؟؟؟

شاش ملفوف حول راسها مو مبين غير جزء من وجهها .. بعد العملية إلي سووها براسها وأضافوا قطعة معدنيه داخل الراس .. !!
توصيلة مشبوكة بجانب قلبها موصلة لجهاز مراقبة القلب والأوكسجين !
وتوصلية ثانية بجهاز التنفس الصناعي داخلة لرئتها عن طريق الفم ..!
سيقانها الاثنين مجبسة من عند القدم لآخر الفخذ !
تنهدت أم فيصل تنهيدة طوييييييييلة وبعدها قالت : الله يسامحك يافيصل !! الحمدلله .. الحمدلله على كل حال!

التفتت شافت حنان قاعدة على الكرسي وراسها طايح على الجمب ومسكرة عيونها بتعب !
طالعتها بحنية .. لأنها أدرى بشعورها .. هذي أمها الثانية .. سبحان الي زرع فيها الأمومة بدون ماتكون أم !
حمدت ربها ان هالبنت مانخبلت ولا صار شي لمخها .. صحيح إهي أمها بس حنان هاربة من صدمات الدنيا لدنيا ساره .. مرات تحسها مو عايشة الا عشانها .. تحس انها تشوف الأمل والخير بعيون هالصغيرة ..

شكرت ربها ان الهستريا الي صابت حنان اتوقفت على ذاك اليوم وماعاد رجعتلها ..!!

آآآآآآآه ياذاك اليوم ......... !
حاولت تطرد عن بالها مشاهد ذاك اليوم المشئوم .. !

وقت تعالت الصرخات .. وعمّت الفوضوية كل مكان .. الكل يركض ويصرخ وينادي ..
قلبها كان ناغزهااااا من قبل !! وفز قلبها وقت لقت احساسها صدق !!!

طلعت ال واهي بالقوة تسحب رجولها ولاهي مستوعبة شصاير .. !
وبلحظة حسبت ان فيصل الي فيه شي .. !!

لما شافت فتون وحنان يركضون بال ويصرخون ..
وشافت فيصل يمشي ويترنح قدام عيونها وبالقوة مسك باب ال واهو يطالع لنقطة بعيدة .............
التفتت أم فيصل لوين مايطالع .................
وكانت صدمتها عنيفة وقت شافت بنيتها بين إيدين صالح .. والدم يصب منها ومن راسها بشكل مُريع !!

صرخت مفجووووعة ..!! صرخة تردد صداها بأرجاء الحي كله !!

وش صار بعدها .. ؟
كيف وصلوا المستشفى ومين كان معاهم وشالي صار داخل السيارة .. ماتذكر !
إلي تذكره ان أول ماوصلوا المستشفى استلموا الدكاترة بنتها وأخذوها لغرفة العمليات ولا طلعت منها الا بعد 9 ساعات .. وفورا نقلوها للعناية المركزة .. !

أنقذوها وما أنقذوها .. أسعفوها وما أسعفوها .. عالجوها وماعالجوها .. لأنها على كل سوووه فيها .. لا صحت ولا فاقت .. !
ولسان حالها كنه يقول" كل الي سويتوه انكم أجلتوا موتي .. ولا أنا ميته .. ميته .. ! "

من نقلوها للعناية وإهي .. نايمة .. ساكنة .. !! مايندرى شصاب راسها .. ولا متى تفتح عيونها وترجع لهم من جديد .. !

حمدت ربها وشكرته على الإلهام الي ألهمها طول الساعات الي كانت بنتها بغرفة العمليات .. يوم رمت نفسها بسجادتها تشكوا لله وتدعيه وترجوه ..
أهو وحده المعين بهالوقت .. لا الطب ولا الناس ولا أحد يقدر ينقذ بنتها غيره سبحانه .. شكثر حست بالراحة يوم لجأتله .. وضبط على قلبها .. وخلاها تستوعب وقتها شالي طيح بنتها .. ؟؟

وانصدمت !! صُعقت !!
فيصل ضناها .. بِكرها .. اهو الي صدم بنتها .. زهرتها .. !!!
ياااااااااااااااااه !! يالله كيف بتلومه ؟؟ ولا تعاتبه ؟؟ وأهو ولدها .. وهذي بنتها .. و هذا قدرها ..
والأقسى من كذا ........ انه اختفى .. !!
بعد ماطاح الكل منهار قدام عيونه ..
أمه وأبوه بلغوه يبعد عن عيونهم ذيك اللحظة بالذاااات .. لأن مايدرون وش بيصير فيهم وفيه لو شافوه .. !
حنان صابتها حالة هيستريا وصارت تصرخ وتسب وتلعن فيه وتدعي عليه !!!

وخلااااص .. مااااااااتحمل يبقى بينهم .. !!!
وأهو يشوف انقلابهم عليه وباقي نظرات الاتهام واللوم بعيون الباقين ..
يكفي انه اهو متهم نفسه وحاقد على عمره ومنكوي بنار ضميره ..

يذكر ان كان في شخص وااااحد من بينهم كلهم .. يدافع عنه .. يبررله .. يحاول يمحي التهمة عنه !!
لكنه طلع عنهم .. لوين ماختفى لحاله .. ويا لهيب الندم .. وعذاب الحسرة .. !

ووصلته منهم أنواع الرسايل والرجاوي ..
بعد ماستوعبوا أخيرا المصيبة .. واستوعبو اختفاء فيصل ولا هان عليهم .. وأهو لو وش ماكان يظل سندهم وعزهم وغاااالي عليهم .. !

لكنه مارد على أحد الا بعد مئاااااات الاتصالات والمسجات والرجاوي ..
لما شاف رقم خالد وعرف ان حتى أهو رجع من سفرته ويدور عليه ..
رد عليه على الأقل خالد ماشهد على شي ..
يمكن يرحم قلبه من نظرات العتب !