منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-06-2016

تغيرت بدور .. بدور اعتذرت من قمر .. واشرحت لها انها تتمنى انها تسامحها لانها كانت لئيمة معاها .. تغيرت البدور من تطلقت .. شخصيتها تغيرت وايد .. لكنها ما احضرت حفلة ملجة قمر .. رغم أن قمر أصرت لكن بدور اشرحت لها أنها مستحيل تخرب عليها الحفلة ..
ليلى ـ مابترقصين ؟
دانه ـ لاء .. أنا تعبانه مافيني على الرقص .. بس بتم جنب قمر ..
ليلى ـ يلا .. أنا وأنتي نرقص بنعومه انتي تعبانه وأنا حامل ..
دانه ـ ما أخيبج ..
رقصوا خفيف وويلسوا بعدين ..
قمر ماكانت راضية لين اللحظة الاخيرة عن حمد .. بس بعد اللي صار لبدور ودانه .. غيرت رايها ..
المصيبة على الناحية الثانية.. في الميلس حمد المينون وجلسة الاونس اللي مسوينها له أخوانه الميانين . حمد اللي كان معصب .. كان بيده يفركش هالزيجه بس عناد في هالبقر قمر .. رضى .
قمر ـ عمتي ..
دانه ـ هلا .. الي يسمعج تقولين عمي يقول بينا خمسين سنه ..
قمر ـ ههه . زين دانه .. خذي ..
دانه ـ ؟؟؟
قمر ـ خالي ضاحي سافر اليوم .. ويبي حد مع مايا .. رديها معاج لبيته وتمي هناك ليما يرد ..
استنكرت دانه طلب قمر ..
قمر ـ سافر دوره .. أربع أشهر .. مدري وين قال لي اسم الدولة بس نسيت .. يدة مايا ارجعت تشتغل وهو مايبي يردها.. أمي موب فاضيه تيلس مع منايا .. أنا اقترحت عليه أنج انتي تمين .. (خصوصا بردة هناء من العمرة بيرد الموال القديم) ..
شلون ما فكرت دانه ؟؟ نست العذاب النفسي اللي ذاقته على يد هناء ؟؟
دانه ـ بعدين وين أروح لما يرجع ..
قمر ـ لا تنسي عرسي بابن اخوج بعد ثلاثة أشهر .. صدقيني محتاجينج حكم بينا .. صدقيني ..
ضحكت دانه ..
قمر ـ أبوي أعطى حمد بيت في مدينة خليفة يقول هدية زواج .. ولج فيه غرفة .. غرفة والله لج غرفتين .. بس أرجوج .. مايا هالمسكينه وش ذنبها ؟؟؟
دانه ـ انتي متأكده خالج مسافر لمدة أربعة أشهر؟
قمر ـ اييه سافر .. حتى ابوي وصله .. ومايا معاي من العصر من سافر ..
رضت دانه بهالخياركحل مؤقت ... لانها كرهت بيت ناصر .. وماعندها أي طاقة حتى تتحمل هناء ..
صورت قمر .. اللي كانت بأحلى حلة لها .. دخل حمد مع نايف وناصر .. وصوروا .. طبعا كانت دانه تبي تموت من الضحك .. كان ويهه قمر لليمين ويهه حمد لليسار .
ونايف وناصر بينهم ..............صورت معاهم .. حضنوها نايف ووناصر. وسطهم .. بعد اقناعات قوية من دانه رضى حمد يمسك يد قمر (بالاحرى اصبع قمر لان الاخيرة ما اعطته يدها كنها تقول له اظفر قمر وايد عليك ..(
دانه ـ كأن بينكم ثار .. شالسالفة حمد ابتسم .. افرد هالويهه .. وأنتي قمر لاتييبين الحجي لعمرج عطيني ضحكة شقاقية .. وريني ضروسج ..
ابتسمت قمر .. وابتسم حمد شوي ..
دانه ـ خلي مايا عندج الليلة .. بكره بمرج وآخذها ..
قمر ـ زين ..
رجعت دانه مع حمد اللي كان ساكت ..
دانه ـ شفيك ..
حمد ـ ما اصدق أني غبي لهالدرجة علشان اتزوج هال..
دانه ـ هههههه انت للحينك ؟؟ حمد .. قمر والله زينه .. ما بتندم على هالزواج .. صدقني ..
حمد ـ أحسها شايفة عمرها علي .. شفتي شلون رافعه خشمها ؟
دانه ـ شي طبيعي ترفعه .. هذي بنت عمك من لحمك ودمك ..
حمد ـ أنتي شتخرفين ؟؟ شوفي اختها تطلقت بسرعه .. اكيد شينه ..
دانه ـ وأنا عمتك تطلقت بسرعه ..يعني أنا شينه ؟؟
حمد ـ لا لاتفهميني غلط . والله ماقصدي انتي زينه المزايين .. ولاحد يقدر يقول عليج كلمة يابنت حسن ..
دانه ـ وبدور بعد .. بنت ولد حسن .. بنت عمك .. مايصير تتكلم عنها جي .. هذا عرضك ..
حمد ـ اسحب كلامي يالعمة ..
دانه ـ خذ ..
حمد ـ شنو ذي ؟
دانه ـ رقم قمر .. دق عليها غلس اليوم في الليل ..
حمد ـ انتي من ص ؟؟ مستحيل ..
دانه ـ واذا قلت لك علشان خاطري .
حمد ـ بس أنا ما أطيقها ..
دانه ـ حمد .. خلاص .. تزوجتها .. تطيقها ما تطيقها .. عيب هالحجي .. أقلم نفسك لايسمعونك أخوانك الخبول ..
حمد ـ اسكتي أنا اليوم أشك طق لي عرج من عيال اخوج هالحمير .. خاصه حسون زوجيه وفكيني منه ..
دانه ـ من أزوجه ؟؟
حمد ـ أي فلبينية ولاسيريلانكيه علشان أستلمه عدل ..
دانه ـههههههههههه .. شسوى لك هالاهبل ؟؟
حمد ـ طول الوقت في الميلس يتمصخر علي انا اراويه هالقرد التعبان .
ددانه ـ ليش ؟؟
حمد ـ حيوان .. أنا أراويه .. اليوم الا اقنع ابوي يزوجه ..
***************
حسن ـ هلا بحمد هلا .. هلا ..
حمد ـ ابعد عني ..
حسن ـ ليييه؟؟ يا خوي شفيك ؟؟ هذا وأنت تزوجت القمر مكتئب .. عيل لو أخذت وحده عادية شبتسوي ؟؟
حمد ـ فارج ..
دخل حمد لغرفته وسلمان وحسن ميتين ضحك عليه ..
هناء ـ سكتوا عن أخوكم يامال العافيه ..
دانه ـ وين خالد ؟؟
هناء ـ في قسمه مع زوجته .. الظاهر انه تعب فدخل ينام .خنت حيلي .. من الدوا اللي ياكله ..
سلمان ـ وين هالبزران نوره ومريم ؟؟
هناء ـ ناموا .. خذتهم الخدامه داخل ..
دانه ـ شخبار الجامعه يا حسن ؟؟
حسن ـ ليش ما قالوا لج ؟
دانه ـ لا ما قالوا . شفي ؟؟
حسن ـ يسلمون عليج ..
دانه ـ بايخه ...
سلمان ـ انفصل عن الجامعه أخييرا .. بعد أربع سنوات خطوبة ..
ضحكت دانه لكن حسن ماضحك ..
ـ شفيك نادم ؟؟
حسن ـ
موب أنا اللي اتحسف على وحده اهجرتني .. اللي عاوزني يجيلي يجيلي أنا مابروحش لحد ..
ضحكت دانه على حسن ..
ـ وانا على بالي صج متحسف ..
هناء ـ هذا هو .. كله سفر مع ربعه . وكله مطيح في هالشاليهات .. والجامعه وتركها ..
سلمان ـ لايمه .. هي تركته...
هناء ـ خوز عن اخوك ..
دانه ـ هناء خلي سلمان ينتقم لحمد .. حسن طول اليوم غلس على راسه .
حسن ـ دانه .. دامج بعباتج قومي نطلع ..
دانه ـ وين أطلع وأنا بهالكشخه ؟؟
كانت دانه لابسه فستان وحاطه ميك آب ..
هناء ـ وين رايحين في هالليل ؟؟
حسن ـ اليوم عيد .. والناس صاحيه لين الصبح .. قومي دانه غيري ثيابج وتعالي ناطرج في الصالة ..
سلمان ـ زين عزموني .. خلوا لي حشمه وجلاله ..
حسن ـ أنت روح لكتبك وادرس يالمصري ..
سلمان ـ كوني شاطر ومجتهد هذي موب عياره ولا مسبه ..
حسن ـ زين .. آسفين يالشيخ .. تفضل معانا لو تحب ..
سلمان ـ طابت نفسي من الطلعه معاكم ..
دانه ـ يلاسلوم .. حتى أنا مصريه .. لاتزعل من هالخبل ..
حسن ـ من تقصدين بالخبل؟؟
دانه ـ من غيرك؟؟
حسن ـ ما خبل الا ريلج . لا تدرين . ما أعتبره خبل .. كان عنده وجهه نظر يوم عافج ..
انصدمت دانه من كلام حسن ... سحبت نفسها غصب من الصالة .. وطلعت لبرا ..
حسن؟؟ حسن يقول لها كذا ؟؟ حسن ؟؟ كانت الصدمة من مصدر الكلام أكثر من الكلام نفسه .. حسن اللي في لحظة من اللحظات حسته ولدها هي ؟؟ من كثر معزته وحبه لها ..
وقفت عند السيارة .. كانت في صدمه أكثر من أي شي ثاني ..
طلع سلمان ..
ـ دانه ..
دانه ما قدت تمسك عبرتها أكثر . .
ـ أنا رايحه بيت ..
ـ مابتطلعين من هنا في هالليل ..
ماكانت دانه تبي تراويه دموعها .. دارت ويهها عنه ..
سلمان ـ مابتطلعين ارجعي ولايهمج كلامه ..
طلع حسن ـ من اللي ولايهمها كلامه ؟؟
سلمان ـ أنت .. من غيرك ..
خلال ثواني الامور بينهم زادت .حده .. زاد النقاش وزاد الكلام الماصخ حاولت دانه أنها تفرق بينهم.. لكن حسن عنيد .. وسلمان أعند ..
في دقايق استوت خناقه بينهم . وتعالت أصواتهم .. طلعت هناء للحوش .. وطلع خالد وحاول يفرق بينهم.. مسك حسن سلمان واطرحه على الارض ونزل فيه طق وسلمان احتراما لخوه الاكبر منه ما مد يده بس حاول يتصدى لضربه وحاول انه يوقف على حيله .. طلع حمد وحاول يفرق بينهم بعد مافشل خالد اللي كان ماعنده أي طاقه ..
حتى الواقفين طلعوا على الصوت وصاروا يتفرجون .. دانه كانت بس تصيح .. تبيهم يوقفون عن هاالهواش ..
ولما امسكوا حسن عن سلمان طلع ناصر .. وكان موقف تمنت دانه أن الأرض تبلعها ولا تم واقفه ..
ببرود ـ ادخلوا داخل البيت ..
دخل حسن بعدين سلمان .. وكان واضح أن سلمان وحسن هم اللي كانوا يتهاوشون من أشكالهم .
ليلى كانت واقفه عند السلم .. أشر لها خالد روح الغرفه فدخلت ..
خذ ناصر نفس عميق.. وبلحظات نزلت يده على ويه سلمان .. وفي نفس اللحظة على ويهه حسن.. جمدت الصدمه دانه .. وهناء حالت بين ناصر وبين عيالها .. اللي نزلوا راسهم في الارض .. موب هينه أبد في هالعمر ويمد أبوهم يده عليه ..
ناصر ـ هذا لانهم ما احترموا البيت اللي هم عايشين فيه ..
دخل ناصر لغرفته .. طلع حسن برا البيت .. وطلع سلمان لغرفته خذ مفاتيحه .. وطلع هو الثاني بسيارته .. حاولت هناء أنها توقفهم لكنها ما اقدرت.. كان خالد واقف وهو منصدم وحمد ماتكلم ..
حمد ـ شصار ؟؟ شصار بينهم ؟؟
خالد ـ شسبب الخلاف ؟؟
هناؤء طالعت دانه ـ كله منج أني يا ويهه النحس كل ما تيين بيتنا تصيير لنا مصيبه كله بسبتج كله بسبتج .. ما ألوم ريلج اذا طلقج .. أكيد ويه نحس عليه كنتي ..
كانت هناء تصرخ بقوة.. ودانه مابقى فيها أي صبر .. طلعت برا البيت وحاول حمد يمسكها لكنها طلعت .. ركبت السيارة وأشرت لراجو.. اللي شغل السيارة و طلع من البيت ..
ذبحت عمرها من الصياح ..
ـ بيت ضاحي ..
ما تقدر تروح بيت منيرة .. وماتقدر ترجع لبيت ناصر .. ولابيت ثامر ولا بيت سعود .. خلاص .. مافيها صبر على المذله ..
وصلت البيت وفتحته بمفاتيحها .. راحت للغرفة على طول .. حذفت عمرها على السرير ..وانهارت صياح وبجي ....
**********
تجاهلت اليوم الثاني اتصالات حمد .. كانت حابسه عمرها في الغرفه طول اليوم .. وعيونها اجحظت من كثر الصياح .. طلعت من الحمام بعد ما تسبحت ..
لقت مايا في الغرفة ..
شالتها وحبتها ..
ماياــ أنتي وين رحتي ؟؟
دانه ـ أنا موجوده .. كنت أتسبح ..
لقت قمر في الصالة اللي برا ..
قمر ـ اتصل فيني حمد يدور عليج .. حرام طيرتي له عقله من كثر ما يدورج ..
دانه ـ شخبارج ؟؟
سلمت عليها ببرود ..
قمر ـ انتي سمعتي شقلت لج ؟؟ وبعدين من أعطى حمد رقمي ؟؟
دانه ـ هو كلمج ؟؟
قمر ـ أنتي سمعتي شقلت لج ؟؟ أقولج دق يسأل عليج وهو مثل المينون .. طمنته وقلت له أكيد أنج هنا .. وسألني السبب وقلت له عن سفر خالي ..
دانه ـ بس هذا اللي تكلمتوا يه ؟؟
قمر ـ دانه انتي انهبلتي ؟؟ وشفيه عيونج جي ؟
دانه ـ ما فيها الا العافيه .. شوفي انا قررت اذا خلصت عدتي يعني بعد شهرين وشي .. اتزوج ..
حطت قمر يدها على راس عمتها تشوفها مصخنه ولا لا ..
ـ موب مصخنه ..تتزوجين من ؟؟
دانه ـ راجو ....
ضحكت قمر ...
دانه ـ انا من صجي ...ما امزح معاج..
قمر ـ حلال عليج بس ما فكرتي انه كافر وان مايصير زواجكم؟؟؟
هنا دانه اضحكت ..
قمر ـ ليش تضحكين ...
دانه ـ عادي أخلي مهري أنه يسلم ..
قامت دانه وخذت مايا للغرفه حضنتها حيل وحطتها على السرير .. ونامت بقربها ..
دخلت قمر ـ شفيج ؟؟ .. انت مو على بعضج ..
دانه ـ مو على بعضك حبيبي .. وين سمعت هالجمله ؟؟
قمر ـ دنه شفيج ؟؟
دانه ـ مافيني شي ..
قمر ـ براحتج .. أنا بروح الحين.
حضنت دانه مايا بقوة وماقدرت تكتم دمعتها .. لانها شمت فيها ريحة ضااحي ..
مايا ـ ليه بتبكي؟؟
دانه ـ قلبي يعورني ..
مايا ـ روحي الدكتور ..
دانه ـ زين .. بروح ..
مايا ـ روحي الحين ..
دانه ـ بعد شوي .. لما نصحى من النوم ..
مايا ـ بنام ؟؟
دانه ـ اييه ..