منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-06-2016

الحلقة العشرون
ماتدري دانه شلون وصلت بيت ناصر .. ماتذكر شصار .. ماتذكر أي شي .. يات بعباتها وقرآنها .. لكنها بجت دموع أكثر من أي حد بجى في يوم من الأيام .. الشي اللي تذكره أنها انخرست بعد انطق ضاحي بالطلاق .. الكل في غرفة حمد يبون يعرفون شصار .. شاللي ياب دانه لهم هالحزة بهالحاله وهالدموع .. دانه كانت بس ماسكة القرآن بيدها تقرا بقلبها والدموع في عيونها .. ماردت على أي حد فيهم .
ناصر ـ شفيج ؟؟ أدق على ضاحي مقفل جواله ..
لفت دانه ويهها ..
حمد ـ شفيج ؟؟ شفيج ؟؟
هنا ـ يمه الدانه شفيج ؟؟ شاللي كدر خاطرج جي .
دانه آخر شي كانت تبيه هو التفكير .. كان كلامهم يدخل من أذنها اليمين يطلع من أذنها اليسار بدون مايترك أي أثر فيها ..
مانامت .. تمت طول الليل حاضنه هالقرآن وتصيح ..
حاول حمد يتودد لها ويخليها تتكلم .. لكن محاولته كانت عقيمة ..
ارتاحت دانه لما سمعت المقرئ وصوت الآذان الفير .. غمضت عيونها أخيرا ..
صحت بعد ساعات ..
دخلت هناء وحاولت تكلمها .. لكنها مانطقت بغير كلمة وحده ..
ـ طلقني ..
انصدمت هناء .. حاولت تستفسر لكن دانه ما نطقت بحرف ..
طلعت هناء للجمعية الظهر . وتركت الدانه بروحها في البيت مع الخدامة ..
رن جرس الباب .. وراحت الخدامة تفتحه ..
دخلت قمر لى دانه .
قمر ـ حاولت أتصل فيج أمس .. حاولت بس ما لقيتج ..
دانه ـ خلاص ..
قمر ـ أمي وبدور ناوين لج على نية ..
استغربت دانه ـ بدور ؟؟ وامج ؟
قمر ـ اييه .. البدور لقت ملفج عند خالد .. واتصلوا في خالي ولا خلوني أعرف شصار ..
انصدمت دانة.. لا .. لالالا.
البدور + خالد + منيرة + الملف الأسود = طلاقها من ضاحي ..
هالمعادلة ما قدرت تفهمها ..
ـ هـــــــــــا؟؟؟؟
قمر ـ اييه . أمي وبدور يايين وراي .. دانه .. اشردي ..
دانه ـ خالد ؟؟
قمر ـ ما أدري ..دانه الله يخليج خل نطلع من هنا ..
لكن الدانه ماتحركت خطوة.. ماقدرت توقف من فظاعه اللي سمعته .. الدموع جرت على خدودها .. الحين تبينت الصورة.. بهارات وفلفل منيرة وبدور.. ووجود أوراقها وخواطرها عند خالد هاللي خلى ضاحي يتأكد من شكوكه .. هاللي خرب حياتها ..
رت بجسمها لأقرب كرسي قربها ..
دقايق ودخلت بدور ومنيرة .. بدور اللي دخلت الغرفة وهي معصبة وقفت دانه وهي منصدمة .. لكنها تفآجأت بكف نازل على ويهها ..
بسرعه دزت قمر البدور عن دانه وصرخت فيها ..
ـ شلون تمدين يدج على عمتج ؟؟
تحولت فجأة قمر لوحش مفترس فجرت كل اللي كتمته في قلبها من كره لبدور من زواجها لخالد لليوم في كف نزل على خد البدور بغضب ..
منيرة ـ قمر .. شلون تمدين يدج على أختج ؟؟
قمر ـ مستحيل تكون هذي أختي مستحيل .
انبهتت البدور .. وارتبكت ..
ـ بدل ما تساعديني في اللي قاصه علينا كلنا ..
قمر ـ شتقولين ؟
منيرة ـ بروح أييب الثلج .. خدج انتفخ ..
بدور ـ هالخايسه تبي تسرق ريلي مني ..
قمر ـ أي ريل ؟؟
بدور ـ خالد ..
قمر ـ خالد كان جدامها من كانت ياهل .. ما اسرقته من قبل عشان ترجع وتسرقه هالحين ؟؟
بدور ـ خالد لي أنا .. أصلا ماكان يبيها .. والا شتفسرين شلون قطت نفسها عليه وطرشت له رسايل الغرام.. ماكان يبيها ماكان يبيها ..
قمر ـ وماكان يبيج أنتي بعد ..
دانه ـ قمر .. لا ..
بدور ـ شقصدج ؟؟
داانه ـ ماتقصد شي ..
قمر ـ لاء أقصد .. أصلا خالد ماكان يبي يخطبج أنتي كان يبي يخطبني أنا ..
بدور ـ انتي شتقولين ؟؟
قمر ـ اييه .. هذا اللي أقوله .. خالد كان يبيني أنا .. أنا اللي شافه في بيتهم . أنا اللي أعجب فيها .. يوم راح لبوي وخطب كان قصده أنا ..
بدور ـ انتي شتخرفين ؟؟
قمر ـ أنا ما أخرف ..
دانه ـ قمر . خلاص .. قمر تخرف ماعليج منها .
قمر ـ لا ما أخرف .. بس .. يالدانه .,. خل تتأدب .. قالت لي عبير أنه خطب بنفسه واستحى يطلبني بالاسم ونسى أن عندي أخت .. وكانت الصدفة أني سافرت مع عمتي .. والا كان تغير كل شي ..
كانت قمر تتكلم بكره وغضب ماله حدود ..
بدور انصدمت ..
قمر ـ عمتي سألتني عن أوراقها وخواطرها .. اللي ضيعتهم أيام الثانوية .. وتمت تدور عليها أسابيع مالقتها.. والسبب بان هالحين .. دانه تذكرين يوم قلتي لي أنج لقيتي خالد يدور في غرفتج ؟؟ أيام ماكنت تسكنين عندهم وأخذ منها ملفات ؟؟ أعتقد انه خذ ملفج مع الملفات اللي باقيه .. تميت طول الليل أفكر .. واتصلت في عبير .. وأكدت لي هالشي لانها شافت ملف الدانه عند خالد ..
لكن بدور ما علقت .. كانت منصدمة من سالفة قمر ..
ـ علشان جي ما حضرت عرسي ؟؟وكنت تتهربين مني ؟
قمر ـ اييه ......... ماقدرت أستحمل ..
دخلت منيرة وبيدها صحن ثلج ملفوف بمنديل ..
مدته لبدور .. اللي دزته عنها فطاح على الارض وطلعت ..
منيرة ـ بدور .. ماخلصنا ..
بدورـ لايمه خلصنا .. وخلصنا من زمان ..
لحقت منيرة ببنتها ..
دانه ـ كنت قاسية عليها ..
قمر ـ لكنها دمرت حياتج ..
دانه ـ حياتي دمرت .. ماله داعي حياتها هي بعد تتدمر ..
قمر ـ كان لازم .. لازم .
خذت قمر المنديل اللي فيه الثلج . وحطته على خد الدانه .. اللي قالت ..
ـ ضاحي يقول اني كلمته .. أنا ماكلمته ..ولاقد مرة صار بينا كلام حب وغزل شلون ؟؟ شلون؟؟
صاحت بقوة وارتمت في حضن قمر ..
*******************
طالع التلفون للمرة الألف .. كل مرة يبي يتصل في بدور .. لكن يتردد .. هو في دوامه .. اللي بتروح فيها هي الدانه.. الدانه .. اللي مالها خص في شي .. بدور ومنيرة قلوبهم قاسية ماترحم .
أخيرا مسك التلفون وطلب رقم بيت نايف ..
كانت ضربات قلبه تزدد مع كل رنه .. وصدره يرتفع وينزل من شدة توتره وسرعة نفسه ..
ثواني مرت ..
ـ ألو ..
كان صوت منيرة ..
خالد ـ وين بدور ؟؟
منيرة ـ خالد الحق بدور ..
خالد ـ شفيها ؟؟ لايكون صار لها شي ..
منيرة ـ البنت موب طبيعيه ..ماتتكلم ولاتتحرك .. .. البنت موب طبيعيه .. الحق خالد.. الحقني بنتي يا خالد ..
صك التلفون بسرعه . وهو متشتت .. بدور لايصير لها شي .. ما بيسامح نفسه إذا صار لها شي .. لاء ..
**********

الحلقة الحادية والعشرون
اذا كانت في وكالة أنباء أسرع من رويترز فهي ........هناء ..
دانه احبست نفسها في غرفة حمد وسط دموعها متجاهله الوفود اللي ذبحها الفضول تبي تعرف شصار ..
مريم ـ روقي يالدانه .. هو اللي خسر ضيعج من يده .. صدقيني بكره يتقدم لج أحسن منه وأحلى منه ..
هناء ـ اييه يالدانه .. ناصر معصب .. بس هو اللي خسران ,, بكره الله يعوضج بواحد أحسن منه . مايستاهلج .. ما تصدقين أن الخطاطيب طقوا باب ناصر يخطبونج .
دانه زادت في الصياح .. وحست أنها بتنهار ..
مريم ـ والله مايسوى تصيحين عليه هالردي .. خل يولي .. الله يقلعه في ستين داهية .
دانه ـ لاتدعين يا مريم لاتدعين ..
محد فاهم سبب دموعها .. محد فاهم ان هالدموع سببها حب كبير في قلب دانه لضاحي ,, أن فكرة أنها ابتعدت عنه تقطعها مية قطعه .. محد بيفهم أن سبب هالدموع الحب .. محد بيفهم ..
مريم ـ الله يهده . .. والله طرف ظفر يده ماتسوى دمعه من دموعج .. خليه يذلف .. الله فكج منه ومايبتي له ظنى ..
هناء ـ اييه والله .. تدرين ام ظبيه قالت لي ان لما تنتهي العدة تبي دانه لسلوم ولدها ..
مريم ـ تدرين ثامر شقال لي ؟ قال لي ان فيصل اخو ضاحي تقدم لها تخيلي ؟؟
هناء ـ قال لي ناصر انه رده .. وانه مايبي من ريحتهم أحد .
مريم ـ منيرة ما طلت أكيد مالها ويهه .. بعد سواه اخوها الردي ..
هناء ـ اييه مايندرى ..
**
رن جرس الباب .. وانتظر ..
ـ سيلينا افتحي الباب .. سيلينا .. صج حماره .. يعني أنا أفتحه ؟؟
فتحت الباب بعصبية ..
خالد ـ بدور ..انتي بخير ..
ارتبكت .. ونزلت عيونها ..
ـ بدور في غرفتها ؟؟
خالد ـ شلونها هي بخير ..
قمر ـ في غرفتها ..
أشرت له لغرفة فوق .. كانت لابسه عباتها وشكلها تبي تطلع ..
خالد ـ وين رايحه ؟؟
قمرـ أشوف الانسانه اللي دمرت حياتها ,
خالد ـ من تقصدين ؟؟ دانه ؟
قمر ـ الظاهر قائمتك مليانه .. ناسي مين ..
خالد ـ شفيها دانه؟؟
قمر ـ تطلقت .. والبركه فيك وفي مرتك ..
صكت الباب بقوة وراها ..
طالع خالد بيت بدور .. أشرت له قمر على غرفة ..راح لها بسرعه .. خوفه على بدور خلاه ينسى كل شي .. ويقص تذكره ويرجع الدوحه ..
دخل الغرفة .. كانت البدور ممده . ويهها خال من أي لون . وعيونها في السقف ..
ـ بدور .. بدور ..
قرب منها ومسك يدها من الخرعه .. لفت ويهها عنه ..
ـ بدور .. والله مابيني وبين الدانه أي شي ..
ـ بدور .. ردي علي شفيج ؟؟
كانت ماتبي تطالع له . تنهد .. طالع الادوية اللي على الطاولة اللي عند راسها .. كانت مهدئات ,,
دخلت منيرة ..
ـ شتسوي هنا ..
خالد ـ زوجتي شفيها ؟
منيرة ـ شفيها ؟؟ ما أدري . الدكتور يقول انهيار عصبي .. وهي مانطقت كلمة من يومين . ولا تآكل حتى الأدوية ترفضها .. شسويت في بنتي يا خالد شسويت ؟
خالد ـ ماسويت شي .. الملف موب حقي ولاكان بيني وبين الدانه أي شي .. بالعكس هي حلفتني اني ما اتزوجها علشان مايرغمونها اهلها .. والملف وجوده كان بين اعراضي بالصدفة .. بعدين دريت من قمر ان الدانه تطلقت ؟؟ ليش ؟؟ ليش ؟
منيرة ـ أنا ماتهمني الزفته دانه .. أنا تهمني بنتي .. بنتي شفيها ؟؟ انطفى نورها شفيييييييييييييها ..
بدت منيرة تصيح وقلبها يتقطع على بنتها اللي ماتتكلم ولا تسوي أي شي يدل على الحياه ..
لفت بدور في هالحظة لخالد ,,
ـ يمه أبي أكلم خالد على انفراد ..
احضنت منيرة بنتها اللي انطقت أخيرا .. وتركتها وطلعت ..
خالد ـ بدور .. زين ..
بدور ـ بسألك سؤال ..
خالد ـ ؟؟؟؟
بدور ـ يوم ييت تخطب من ابوي .. ييت تخطب بدر البدور نايف ؟؟؟
ارتبك خالد وتفاجأ .. وبدى يتأتأ ..
خالد ـ ييت أخطب منه بنته . وهو زوجني اياج.
بدور طالعت له بخيبه أمل ..
ـ يعني صج ..
خالد ـ شاللي صج ..
بدور ـ كنت ياي تخطب قمر ..
كأن حد حذفه في بركه من الماي المثلج .. وتركه بلا عوامه ..
شيقول ؟؟ شلون يبرر لها ؟؟ الاحرف تجمدت على لسانه .. كان في موقف ماتوقع ابد أنه يكون فيه ..
بدور ـ خلاص خالد انتهى اللي بينا .
خالد ـ شتخرفين ؟
بدور ـ خلاص خالد .. ما أقدر أتم معاك دقيقة زياده وأنا أعرف انه اللي هواها قلبك واللي حبيتها كانت أختي ..
خالد ـ بس . بس .. لا .. بدور انت شتقولين ؟؟ أنا أعجبني جمال قمر وأنتي وهي نفس الشي ..
بدور ـ لاياخالد .. موب نفس الشي .. كم مرة شفتها قبل قرار الخطبه ؟؟
خالد ـ كذا مرة بس هذا مايعني أنه ..
بدور ـ خالد .. ما أقدر أكمل معاك دقيقة .. وأنا أعرف أنك تفكر في أختي ..
خالد ـ قمر انتهت من حياتي في اللحظة اللي دخلت فيها انتي ..
بدور ـ لاء .. بالعكس .. أنا نسخة القمر .. يعني ماانتهت من حياتك .. كل مابتشوفني بتشوفها ..هي القمر وأنا البدر . حتى في الاسم .. حتى في الاسم
لفت ويهها عنه ..
خالد ـ بدور .. أنا أحبج أنتي .. أنا عشت معاج أنتي ..
بدور ـ للاسف .. كلام ماله أي معنى .. كلام في الوقت الضايع.. الحين فهمت سبب حيرتك وتوترك لما قلت لك عن خطبتها .ز ياني غبية شلون مالاحظت شلون ؟ أختي اللي تهربت مني من تزوجت لدرجة انها ماحضرت عرسي.. .. خلاص خالد .. انتهى كل شي بيننا ..
خالد ـ والمعنى ؟؟
بدور ـ ناطرة ورقتي ..
ما كان يبي يستسلم .. لكن بدور كانت مكابره حيل .. كانت قوية . طول عمرها قوية ..
خالد ـ بس أنا ما أبي أتركج ..
بدور ـ لاتعذبني زياده .. لاتعذبني .. يكفيني ماياني منك حد الآن .. ما تقدر تمتلكني .. أنا بدور موب قمر .
خالد ـ انا ابيج انتي .
بدور ـ انتهى النقاش يا خالد ..أنا النسخة المزورة .. وبتم .. اذا ظليت على ذمتك .. آسفة .. أنا أكبر من تزويرك .. ناطرة ورقتي منك ..
********