منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-07-2016

حست دانه انه موب طايقها ...احساسها انه يبي يبعد عنها هو الاصح ..
اسبوعين؟؟؟؟ زين ..فرصه تتأقلم ..بس هو ما بيكون موجود ..يمكن تكون فرصه افضل ..أنها تآخذ على هله ..وماتكون مشغوله فيه ..
راحت الحمام وخذت حمام ريحت فيه جسمها ..
بعد ما خلصت ..ياتها المزينه اللي اتفقت معاها ..وسوت لها شعرها وحطت لها ميك آب ..لبست بدله .واتصلت في حمد ..
******************
دانه ــ جب ..
حمد ــ قولي ..قولي ..
دانه ــ جب ..جب ..
ضحك حمد ..ــ حليلج عرووس ..
دانه ــ حمود ان ما سكت أقول لهناء تزوجك بنت منيرة ..
مسك بريك قوي بغى ينصدم راسها بالزجاج ..
ــ حمار ناوي تذبحني ؟؟ ..
حمد ــ ان يبت هالسيرة مرة ثانية ..اييه..
دانه ـ صج حمار ...
حمد ــ قولي لي ..شسويت أمس ؟
دانه ــ مالك شغل !
حمد ــ يالله قولي .. أكيد فارق العمر بينكم سوى توتر.
دانه ــ هو الحمد الله ..مو كبير وايد أكبر مني بسبع سنوات بس ..
حمد ــ كم؟
دانه ــ عمره اربع وعشرين صح؟
حمد ــ من قص عليج؟؟ الريال عمره ثمان وعشرين ..
سكتت دانه ..
حمد ــ شفيج منصدمه ؟
دانه ــ ناصر قال ان عمره اربع وعشرين؟
حمد ــ اييه من اربع سنوات كان عمره اربع وعشرين .
دانه ــ يمكن تكون مغلط؟
حمد ــ لا ..أنا أكبر منج بثلاث سنوات صح؟
دانه ــ اييه ؟؟
حمد ــ هو أكبر مني بثمان !
دانه حست بخيبه ..
ــ كملت ..أكبر مني بحدعش سنه ..
ضحك حمد ..
دانه ـ ليش تضحك ..
حمد ــ كنت أجذب عليج!!!هو عمره ست وعشرين موب اربع وعشرين ..
دانه ــ يعني افرقت سنتين؟
حمد ــ اييه ..يمكن ..ما ادري !
دانه ــ موب مشكل ...
حمد ــ مشكل؟ سافرت لبنان اسبوعين موب اربعين يوم!
دانه ــ شمعنى اربعين يوم؟؟ يعني من عاشر القوم ؟
حمد ـــ اييه يالعروس ..شفيج اليوم متضايقه؟؟ ليش علشان المعرس سافر؟
دانه ــ لاء ..بس ما ادري ..عمتي زينب وين؟
حمد ــ في بيت اهل ريلج ..بتظل يومين وبعدين بتسافر ..شكلج ما نمت امس!
دانه ــ حمد ..جب !!نمت مانمت مو شغلك؟ على بالك تقص علي تجرجرني!!!
ضحك حمد ـ صج منتي هينه!! ما قلتي لي عريس الغفلة وين سافر؟
دانه ــ ما قال لي ..لا ..لحظه!..قال لي جنه تايلند أو كليفلاند ..
حمد ــ كليفلاند؟؟
دانه ــ تايلند .. انسى كليفلاند .
حمد ــ كليفلاند هاذي وين؟
دانه ــ ما ادري ..يمكن في امريكا !
حمد ــ الظاهر ما نمتي عدل علشان جي ما ركزتي وين راح ..
دانه ــ بالعكس شبعت نوم ............................حم ــــــــــــــــــــ ـــــــــــد ..
حمد ــ هههههههههههههههههههههههههه ..وصلنا ..
طالعت دانه بيت أهل ضاحي ..كانت فيلا عوده ..وفي سيارات وايد جدام البيت .
حمد ــ يلا انزلي .
دانه ــ اوكي ..مرني موب تقطع.
حمد ــ الشقة بنطلع منها بكره .بترجع البيت ..تعالي بين فتره وفتره ..اوكي؟
دانه ــ يعني ما بتمروني؟
حمد ــ ما أعتقد ..مثل ما فهمت البيت فيه بنات ..وانتي تزوجتي الحين موب حلوة كلب يوم مزعجينج ..
دانه ــ شالسالفه ..أنتوا تزعجوني؟ بالعكس احس اني انا مصدر الازعاج لكم .
حمد ــ بالعكس ..بس مابيكون عندنا ذوق اذا رزينا الفيس طول الوقت ..تعالي انتي ..وأنا بين فتره وفتره بمر آخذج من هنا ونتمشى .
ابتسمت ــ مع السلامه ..
باسته ..
حمد ــ هييه انتي صاحيه؟؟ وسط خلق الله ؟
دانه ــ من شا يفنا ؟؟ وبعدين خل يتكلمون بس ..وأنا أراويهم .

انزلت دانه ودخلت البيت ..وكانت قمر في ويهها ..
قمر ــ اله ما قدر يتركج الا ببوسه؟؟ وينه خالي ؟؟
دانه ــ خالج مسافر ..
قمر ــ عيل من هذا اللي بستيه في السياره؟
دانه ــ حمود ولد أخوي ناصر نسيتيه؟
قمر ــ قطيعه !
كانت عايشه وهدى وساره واقفين يضحكون على قمر ..
قمر ــ عمتي ..عهذي عايشه ..تراها مشكلجيه وخري عنها ..
عايشه ــ ومرض ..ويهج المشكلجي ..
كانت عايشه أقصر من دانه .. وشعرها أسود ..وبيضا عكس اللي واقفه جنبها اللي شعرها كستنائي وسمره ..
قمر ــ وهذي خالتي ساره ..حبوبه ..مصرقعه ..
ساره ــ مصرقع ريلج..
قمر ــ وهذي خالتي هدى ...مينونه بس عبقرينو ..
كانت تلبس نظاره وشعرها اسود فحمي ناعم ..بس سمره شوي وأطول من دانه ..
هدى ــ قمور أرويج يالخايسه .
سلمت عليهم دانه كلهم ..السبب اللي ما خلا دانه تعرفهم من قبل ..انهم عيال منى مرت ابو منيرة ..وماكانوا يطبون بيتها .بس البنات قمر وبدر دايم يروحون لهم ..
عايشه ــ ضاحي سافر؟؟
دانه ــ اييه اليوم الصبح ..
عايشه ــ هو دايم جي .. ماتصدقين انه كان يسافر ليله العيد..ولا يقول لحد انه سافر ..وبعض الاحيان نشوفه الصبح و العصر يكون مسافر ..شغله وما يقدر يرفض لانه يبي يترقى ..بس ما توقعنا يسافر صباحيه عرسه ..
دانه ــ عادي ..مافي مشكله كلها اسبوعين ويرد ..
الكل= اسبوعيــــــــــــــــــــــــ ــــــــــــــــن؟؟؟
دانه ــ هو طلب مني اسافر معاه ..بس انا رفضت .
الكل=ليش؟
دانه ـــ كنت مستعده . ..
****************************** ****

الحلقة ال 12
***************
عجبها قسمها ..كان حلو وعلى ذوقها ..
هذا اليوم الثالث لها ..
زينب ــ جوفي يا بنتي ..ما بوصيج ..كوني مره سنعه .
دانه ــ مايحتاي توصيه عمتي ...انشاءالله أسوي اللي اقدر عليه ..
زينب ــ هذي ام ريلج وسافرت عنج .. ..وحموواتج معاج لاتخافين ,,
دانه ــ حطي بالج على نفسج ..
زينب ــ ماتوصين حريص ..ابني صار جد و آنه اسم الله علي فيني روح اطرد وراه ..
دانه ــ الله يطول عمرج عمتي ..
ودعت عمتها بدموع ..وشكرت لها وجودها ..
*
قمر ــ عمتي ..
التفت لقمر اللي كانت نايمه معاها في الغرفة ..
ــ نعم ؟
قمر ــ قولي شعر ..
دانه ــ شعر ؟
قمر ــ شي حافظته ..ولا شي مألفته ؟؟
دانه ــ قمر ..أنا مضيعه ملف فيه كتاباتي ...وينه جفتيه؟
قمر ــ لاء ..بس بسأل بدور ..قولي شعر ..
دانه ــ ما فيني مزاج ..لا أقول ولا أسمع ..
قمر ــ عمتي .. شـالسالفه بنام هالليله بهدوء.؟
دانه ــ شلون تنامين كل ليله؟؟
قمر ــ على ضجة التلفزيون ...أنتي تلفزيونج ممل ..كله أخبار مافي قنوات أفلام ولافيه قنوات أغاني ..
دانه ــ أنا ما أحب أطالع تلفزيون ..
قمر ــ خل نطلع الصاله العوده ....يمكن خالاتي صاحيات ..
دانه ــ اوكي دقيقه بس أعدل هالشيله وأحط شي على ويههي ما يصير عروس ويههي تعبان وهالات سود تحت عيوني .
طلعت الدانه مع قمر ..وكانت ساره ومنى في الصاله .
منى ـ تعالوا ..دامكم سهانين ..خلي نسهر معاكم ..
دانه ــ قمر متململه مني يا ام فيصل .. ما تبي تنام بهدوء ..
منى ــ حنا نطالع فيلم مصري ..ايلسوا معانا ..
ساره ــ يمه ..ممل !
منى ــ أنا أحب افلام صباح ..ما تبين تشوفين كيفج روحي غرفتج .
ساره ــ الشيخه عايشه تطالع حفله ايهاب توفيق ..وع .
بعد عشر دقايق ..
قمر ــ وين خالي تركي؟
ساره ـ وين يعني ؟ في غرفته ..
دانه ما شافت حد من خوال قمر غير سالم ..اللي سلم عليها بسرعه وطلع .
قمر ــ تعالي ..
طقت الباب ...
ــ ادخل .
قمر ــ هاي اونكل .
تركي ــ هلا تعالي .
قمر ــ موب بروحي معاي العمه .
تركي ــ ها؟؟ خليها تدخل ..
انتبهت دانه انه ضبط شعره .. ورتب الاغراض اللي جدامه ..
شبت الليت ..
انصدمت دانه ..كانت غرفة عوده ..فيها تلفزيونين وأكثر من ريسيفر وأكثر من فيديو ..وفيه كمبيووتيرين ولاب توب ..كان جالس جدامهم ..تركي كان وسيم ..بس صغير ..عمره ما يزيد عن سبعطعش ..
قمر ــ عمي ..مشرف في ثلاثة أرباع المنتديات للي في النت وصاحب أكثر من موقع للشات .. هو مشرف فيها .
استغربت دانه انه ما وقف لها ..
لكن استغرابها انحل لما شافت الويل تشير( كرسي بوعجلات ) .
كان متفاجأ ...أول مره يشوف دانه ..وشكله انبهر فيها ...
دانه ــ شخبارك؟؟
تركي ــ الحمدالله ..تفضلي ..
خلال ساعه كامله راقبته دانه بهدوء وهو يعلم قمر بعض الاشياء بالكمبيوتر ..
ولما طلعوا من الغرفه ..
دانه ــ من متى ؟
قمر ــ من سبع سنوات ..حادث سياره وخطأ طبي أعدم فرصته في المشي ..يدي ما قصر ..ما خلى مكان ما سافر له للعلاج ..لين السنتين الاخيرتين ..تركي نفسه تعب ..وطلب من يدي ينسى سالفة العلاج ..فقد الامل ..بس لقى له عالم هو قادر انه يمشي نفسه فيه ..عالم النت ..يدي ما خلى شي في خاطره ..وما اكذب عليج اذا قلتلج انه ما طلع من غرفته من يومين؟
(plus today),,,,
دانه ــ ما قد مره قلتي لي.. ليش؟
قمر ــ موب كل شي ينقال ..وبعدين من سبع سنوات انا وانتي كنا يهال ..وكانت يدتي كله هواش مع امي ..ما كنا بنت وعمتها الا من اربع سنوات بس..
دانه ــ خل نتمشى في الحديقة ..
قمر ــ أمانه ..اشعري ..
دانه ــ مافيني مزاج .
قمر ــ أمانه دوين .
دانه ــ قمر ..صار لي ثلاثه أيام ما نمت ..
قمر ــ أدري ..ماتقدرين تنامين في مكان غريب ..بس هذا صار بيتج ..ولامانمت شوق للغائب؟؟
دانه ــ خالج ما عرفته لين الحين علشان اشتاق له ..
قمر ــ ممكن ..ما بتقصدين ؟
دانه ــ انتي مصممه؟
قمر ــ اييه ..
دانه ــ اوكي ..عطيني ثواني افكر في شي ..ما في شي أقدر أفكر فيه .
قمر ــ تكلمي عن الحب ..
دانه ــ الحب؟؟
قمر ــ اييه ..
دانه ــ زين ..بس بقول خاطره ..
((حب؟؟
شالكلمة الصغيره؟؟
حب؟؟ ...
من أي بلد؟؟ ومن أي زاوية؟؟ من أي ديره؟؟ ))

دانه ــ كافي ..مافيني أقول شي زياده لاني موب مركزه في شي ..
قمر ــ قولي لي بيتين ..بس بيتين ..وتكلمي فيها عن الحزن والحب والقدر ..والجروح ..
طالعت دانه قمر ..اللي كانت سرحانه ..واستنتجت انها تفكر في خالد ..

دانه ــ مافيني . ..ما اقدر ..خلي نروح ننام ..
قمر ــ هذا خالي فيصل ..
شافته دانه ..كان صج وسيم ..وطويل طول ضاحي ..نزلت راسها ..
فيصل ــ السالم عليكم ..
قمر ــ هلا خالي ..
فيصل ــ هلا ..
وأشر لها من هاذي؟؟
قمر ــ عمتي ..هذا خالي فيصل ززخالي ..هذي عمتي الدانه ..زوجه خالي ضاحي ..
فيصل ــ ضاحي تزوج؟
قمر ــ كنت مسافر صح؟
فيصل ــ اييه ..كنت في دبي ..اليوم العصر رجعت ..
كانت عيونه على دانه ..اللي رفعت راسها بهدوء ووابتسمت بخفيف ..
فيصل ــ .....................زوجه ضاحي؟؟؟
ما ارتاحت دانه لنظراته ..
قمر ــ سرينا يا عمتي؟
دانه ــ سرينا ..
بعد ما وصلت الغرفة ..ــ معقوله ما يدري بعرس اخوه؟؟
قمر ــ عمتي ...خوالي ما يكلمون بعض ..نادرا ..خالي ضاحي كله مسافر ..والوحيد اللي يكلمه في اليت هو تركي ..وخالاتي بعض الاحيان .

***************