منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-06-2016

لحلقة الحادية عشر
ــ ما شاء الله ..ماشاء الله ..
حطت ليلى يدها على حلجها كاتمه صرخة اعجاب بصديقتها الدانه ,,الفستان كان روعه ..ودانه بمكياجها وتسريحتها ورقتها وجمالها وعذوبتها ..كانت رائعه ..
دانه ــ خلاص ؟؟ ..
المزينه ــ ماشاء الله عليك ..بتجنني ..سبحان الله اللي خلقك ...
دانه ــ خلاص ..
ليلى ــ اي خلاص ..
دانه ــ أبي قلاس ماي ..ليلى ..ماعليج أمر ..
ليلى ــ الحين أييبه لج ..وين المطبخ؟؟
أشرت لها الدانه وين المطبخ ..
طلعت ليلى اللي كانت بكل أناقتها وجمالها ..
قمر وبدور راحوا لصالون ثاني ..بس اتفقوا مع الدانه انهم يتلاقون عند باب الفندق ..دانه ..من الصبح اول ما صحت حست انها في صدمة ...وماقدرت تطلع من الشقة فالكوافيره والمزينه اللي اتفقت معاهم ..يوا الشقة ..
…
خذت الكوب وطلعت من المطبخ وانصدمت ..كان في شخص عند الباب يطالعها بانبهار ..اركضت داخل المطبخ من الحيا ..
ويهها صار احمر من الاحراج ..
خالد طلع ..
فدخلت هي منحرجة ..
دانه ــ شفيج؟
ليلى ــ أعتقد اني طلعت جدام خالد بهالشكل ..
دانه ــ وشدراج انه خالد؟؟
دانه ــ عطيتيني صورته ..نسيتي؟؟
ابتسمت دانه ..
بعد ربع ساعه ..استأذنت ليلى ..وسبقت الدانه للعرس ..الساعه كانت عشر ..واتفقت مع عيال اخوانها انهم يزفونها الساعه عشر ونص ..
دخل خالد ــ من هذي المزيونه اللي كانت عندج؟
الدانه ــ هذي خطيبة المستقبل ..
خالد ــ هذي هي؟؟
الدانه ــ هي ..شرايك؟
خالد ــ مزيونه ..
طالعت دانه خالد اللي سرح شوي ..شكلها اعجبته ..
دخت الشلة ..والكل يمدح فيها ويصور معاها صورة ..الكل منبهر في شكلها ..ماهان عليها تتركهم ..ونزلت دمعتها ..
حمد ــ القطيها ..لا ..لا تطيح ..انتي عروس ...
دانه ــ انا ؟؟
حمد ــ لا حسن ..اي انتي ..
حسن ــ حتى أنا عروس .
دانه ــ بس عن الطنازة البايخه ..هاذا وانا بفارقكم ..شلون أهون عليكم ؟؟
مشعل ــ لو عندي سيارة كان شردت معاج ..بس ماعندي ..اشتري لي وأنا اشرد معاج هاللحظه .
صالح ــ انا بعد ما عندي سياره ..والا شردت معاج ..
دانه ــ الحين تكلمتوا؟؟ ماقلتوا من زمان يالحمير ؟؟
سلمان ــ دانه ..طالعيني ...
دانه ــ انت تصور؟؟
سلمان ــ لا أرقص ...اي اصور ..طالعيني ..
دانه ــ ارجوك ...سلمان ...لا تصور ..
حسن ـ آآه يا عمتي الوحيده ..
دانه ــ انا موب عمتك الوحيده .بكره تتزوج ..وتصير لك عمه ..
حسن ــ تفي من بؤك ...فال الله ولا فالك ...آآآلت اييه أتجوز ..بش بش بش الشر برا وبعيد بش بش ..
ضحكت الدانه غصب عنها ....
سلمان ــ اييه .هالضحكه بتكون لقطة نادرة ..
دانه ــ عيال اخواني ..المحترمين ..قبل كل .شي ..أشكركم ..هالشهرين اللي راحوا ..كانوا ..الافضل ..
حسن ــ تحلين كلمات متقاطعه ؟؟
دانه ــ لا ..بس احاول اخنق هالعبره ؟؟
اضحكت شوي وشوي بدت الصياح ..
اللي فاجأها ..ان حسن هو من ضمها ..ــ دانه ..ماتبين المكياج يسيح صح؟؟
مسحت دانه اثر الدموع ..وابتسمت وهي في حضن حسن ..
حسن ــ لو ما تبين العرس الحين افركش كل شي ..ولايهمني حد ..
دانه ــ ..............................
حسن ــ والله يالدانه ..لو ماتبين العرس الحين اكنسل كل شي واتصل بضاحي واقوله ماعندنا بنات للزواج ...
حست الدانه ان حسن يتكلم بجدية ..وهالدور موب لايق له ..
دانه ــ مو لايق لك الجد ..
حسن ــ انا من جدي ما امزح ..
حمد ــ كلام حسن أنا معاه ..
خالد ـ وأنا ..
الدانه ـ فديتكم ..ابطال اللحظة الاخيره ..خلاص ..يلا نروح القاعه؟
الكل كانوا يطالعونها بحزن ..يحسون انها خلاص بتروح عنهم ..عمتهم هي الشخص الوحيد اللي كانوا يشكون له ..واللي كانت معاهم القلب الحنون ..
سحبها حمد من حضن خالد ..وحضنها بقوة .. وبالدور كل واحد فيهم حضنها وسلموا عليها وباركوا لها ..
في السيارة فتحوا المسجل اغاني كلها فرح ..لراشد الماجد ..وربع الشباب مسوين زفة السيارة يدقون عالهرن ..وصار الشارع كله يزفها ..حتى اللي ما يعرفونهما يدقون لهم الهرن .
..
دانه ــ شكلي مضبوط؟
خالد ــ تجننين ..
دانه يوم طالعت خالد..ما قدرت تمسك دمعتها ..
خالد ــ آفا ..ليش يالعمة؟
دانه ــ دموع حزن وعتاب وفراق ....دموع مظلوم باجر لكم يشتاق ..
دموع انكتمت سنين باوراق ...واليوم توسعت لها كل الآفاق ..
خالد ــ بنزفج بدموع ترى ..كاتمين دموعنا ..
دانه ــ عمري يفداكم كلكم ..خالد ..دير بالك على نفسك ..أرجووك ...
حسن ــ وليش توصينه على نفسه شفيه؟ مثل الحصان مافيه شي ..
دانه ــ وانت حسنسن ..
حسن ــ بشتاق لها الاسم وايد حتى راجو المسكين ..مابغى يخليني اسوق ..يبي يزفج بنفسه ..مسكين ..حتى هو تأثر ..تعالي ما سألتج ....شبتدلعين ريلج؟؟ ضحضح؟؟
ضحك سلمان وخالد وحمد ..وابتسمت دانه ..
ــ بدلعه ضحضوح ..أو داحي ..
ماتوا عليها من الضحك ..
ابتسمت ..
خالد ــ وصلنا ..
نزل خالد وسلمان ..وكان حسن هو اللي يسوق السيارة مثل ما وعد ..
مسك يدها حمد ..ومعاه خالد وسلمان يصور ..المسكينه كانت ترجف ..وخطوواتها بطيئه ..علق حسن ..
ــ امشي بسرعه يالسلحفا ..
دانه ــ الفستان ثقيل ..
طلعت لها المصورة وخرعتها ..وصورتها والشباب وهم يزفونها ..وصلوها لين باب القاعه ..
خالد ــ بنروح الحين ..
دانه ــ لا ..
(كانت خايفة وايد) ..
حمد ــ دندون ..بنرجع بزفة المعرس مع اخوانج ..لاتخافين ..
دانه ــ حسن ..سلمان ..
حمد ــ هذي مريم وهذي امي يو يرتبونج ..يلا ..حنا طولنا ..بنروح خيمة الرياييل ...
حست دانه بالوحده .. يوم راحو ..يات بدور وقمر ..
وكانوا نسخة من بعض ..يجننون..انه وين قمر..خصوصا انهم لابسين نفس اللبس .. وماسكين سلال الورد والشمام والفل ..بيرمونها عليها .
ــ عمتي تهبلين ...تهبلين ..قمر ..
دانه ــ مشكورة بدور .
قمر ــ صج دانه تهبلين ..تهبلين ..الحين بنرميج بالورد لما تدخلين القاعه اوكي ؟
دانه ــ بتذبحيني تفلعيني بهالورد ..
قمر ــ لا ..الورد كله ورق ..الله على الريحه ..غاويه ..يرميني بسهام الغدر ..بورود الوفا ارميه ....
وقفت قمر على يمينها وبدر على اليسار .. تذكرت دانه خالد ..ابن خالها ..ماتدري ليش ..بس طرى على بالها ...وبعدين حست انها وحيده ..لام ولا اخت ..صج عيال وبنات اخوانها ماقصروا .بس محد يحل محل الام ولا محل الاخت ..
قمر ــ دانه يلا قربي ..الناس تنتظر والشموع شبوها .. وطفوا الثريات والضوا كله .
حست ان ريولها ما بتشيلها ..فجأة لقت يد تمسك يدها ..التفت لقتها وحده ما شافتها من زمان ..وتذكرتها بالغصب ..
ارتجفت ــ عمتي زينب ؟؟
زينب (كانت عيوز كبيره ..ستينية متزوجة في السعودية من اربعين سنه..ومايات الدوحه الا اربع مرات ولا خمس ..بعد الزواج ..(
زينب ــ اتصل فيني نايف ..وقال ..وحلفت محد يزفج الا انا ...
حست دانه بالعبرة تخنقها ..ومسكت بيد عمتها ..دخلت قمر وبدور ..ووراهم دانه ..وعمتها..قمر وبدور كانوا يرشونهم بالورد ..ودانه منزل راسها مستحية ..وميته خوف ..ووجود عمتها ..ساعدها وايد ...البخور والاغاني ....والحريم اللي منبهره فيها سووا لها توتر قوي ..هذي اللحظة هي اقسى لحظة على العروس ..وتبي فيها سند ..رتبت لها قمر وبدور مكانها ...وجلسوها ..
بعد ربع ساعه ..صعدت ليلى وسلمت عليها ..
ليلى ــ تدرين أن الحريم منبهرين فيج؟؟ يقولون من هاذي القمر ..الظاهر انج ما تطلعين لهم دايم ..
دانه ــ صراحه أنا ما احضر مناسبات عائليه ..نادر ..من عرس نويروانا ما احتك في الناس ..
زينب ـ الله يرحمها ..
دانه ــ الله يرحمها ..حتى عزا الوالده ما حضرته ..كنت في المستشفى ..
زينب ـ خلاص ..لاتقلبين الاحزان ..أنا ماصدقت يوم قال لي نايف انج بتعرسين ..تخيلتج صغيره مثل ماشفتج من عشر سنوات ..بس ما شاء الله غديتي حرمه ما احلاج لا عنج ولا دونج ..
ليلى ـــ كلام العمة صحيح ..الحريم هنا كلهم منصدمين هالعروس وين كانت عنهم؟
دانه ــ خلاص تمدح فيني ....
ليلى ــ عبير يات ..وبتمرج بعد شوي ..بس تسلم على الحريم ..
دانه ــ اوكي ..
تذكرت دانه خالد ولد خالها ليش طرا في بالها ؟؟حست قلبها يدق بقوة ....قمر وبدور ماشاء الله عليهم يرقصون ويهبلون ..ومنيرة مب مقصرة بالنقوط والتصفيق لهم ..وهي شايله فهد الصغير ..استجابت للمصورة ..وهي تحس انها بتختنق ..حاولت المصورة تخليها تبتسم ..بس محاولاتها كلها فشلت ..
عبير ـ فستانج وايد حلو.. والمسكه رووووعه ..شكلج كله روعه ..
دانه ــ عبير ..خلاص .جي استحي ..
عبير ــ أحلى مستحى ..بصور معاج ..
دانه ــ فستانج وايد حلو ..أول مرة أدري ان الازرق ينور عليج جي ..
عبير ــ بس انتي نجمة الحفل ..لايعلى عليج حد ..
دانه ــ بس عاد ..والله انج طالعه كوول ..
قربت قمر ..وهمست للدانه ــ هذي خالاتي ..يبون يصورون معاج ..
دانه ــ ما يحتاج بطاقة دعوة ..خلي يصورون على راحتهم ..
....