منتديات قصايد ليل - عرض مشاركة واحدة - لحظات غريبة بين اثنين ...خلقت الحب في قلبين "

11-07-2016

الدانه ــ ها ..هالحين خفت عوارض الحزن؟
قمر ــ مو وايد ..بس ..أنا نادمه على شي واحد .
الدانه ــ وشو هالشي ؟؟
قمر ــ أن علاقتي ببدور ماكانت قويه لدرجه اني أقول لها اللي في قلبي ,,على الاقل ..لو تدري ما رضت بخالد كزوج..
الدانه ــ أرجوج يا قمر ..لاتحطين في بالج هالافكار وهالندم ..ويلا عطيني رقم خالج ..
قمر ــ شتبين فيه؟
الدانه ــ أبيه ..
قمر ــ زين لحظه ..خذي هذا هو الرقم *******
الدانه ــ رقمه مميز ..
قمر ــ اييه ..عنده ثلاثه غير هالرقم ...كل رقم يقول الزود عندي من حلاتهم .
الدانه ــ تمدحين في خالج؟
قمر ــ خالي ضاحي غير ..أحس أنج بتحبينه بعدين ..صج انه مو وسيم ..بس لاركزتي فيه..ملامحه مملوحه ..صج مو بحلاة خالد ..ولا بحلاة بوي ولاعيال عمي ..بس مو سيء ..اللي مآخذ الحلاه كلها خالي فيصل..يانه قمر..أحلى شاب شفته في حياتي .ياليته ماكان خالي ..بس ..خلاص ..بس خالي ضاحي زين ..صج انه مو حيل معانا أنا وبدور ..بس زين ..من بعيد لبعيد ..
الدانه ــ خلصتي مديح؟
قمر ــ عمتي ..والله انه موب سيء ..انا اللي معور قلبي انج خذيتيه بدون ماتشوفينه ..
الدانه ــ أصلا ملجوني بدون ما أدري ..هناء خذت بطاقتي وراحت معاهم ..وماأدري شاللي صار بالضبط ..انتحلت شخصيتي..توكيل غيابي..ماعندي خبره في هالاشياء ما أعرف شلون صار اللي صار ..بس اللي اعرفه قانونا ..صرت زوجه ضاحي .شرعا..الله يعلم .لاتمدحين لي خالج ..تراني مكتفيه منه ..
قمر ــ ما كنت بقول لج ..بس ..أنا مستغربه انه مثلج ...مايبي كلام في هالموضوع .
الدانه ــ خليني أتصل فيه ..
قمر ــ بروح أييب لج نسكافيه ..
اتصلت دانه من جوالها على ضاحي وهي تحس أن مع كل رنه قلبها يدق مية مره ..حاولت تبضبط تنفسها بس ما اقدرت ..
ــ الو ..
الدانه ــ ,.........................
حست انها تتراجف وماتقدر تقول كلمه ...
ضاحي ـــ ألــو ..
كان صوته خشن ..وقوي ..ودانه بروحها كانت مرتبكه ..صج مو اول مره تكلمه ..بس أول مره تعرف ان هو اللي على الخط ...مو حد غريب ..ما قدرت . تتكلم ..فصك هو التلفون ..
دخلت قمر ــ كلمتيه؟
دانه ــ لا .
قمر ــ ليش؟
دانه ــ كان خارج التغطيه ..
قمر ــ مستحيل ..خالي مايطلع لمكان بعيد في هالوقت ..أصلا بتلاقينه في شغله ..
دانه ــ ماقلتي لي شيشتغل؟
قمر ــ له مكتب في وزاره الخارجيه .. شغله بالضبط ..مثل العلاقات العامه الخارجيه ..تصدقين ولامره سألته ..بس ما أكثر ما يسافر . مع السفراء والوزرا ..اللي اعرفه انهم ما يستغنون عنه ..
دانه ــ اسألج سؤال صغير ..تمدحين لي سلطان بروناي ,
قمر ــ اقولج ..
رن تلفون دانه .. طالعت الرقم كان رقم ضاحي ...
دانه ــ ....
قمر ـ أذكر أنج قلتي انه كان خارج التغطيه ..
دانه ــ ها ؟ ...صراحه ماكانت عندي الجرأة أكلمه ..
قمر ــ هاتي أنا أرد ..
دانه ــ لاتردين ..ما ....
قمر ــ ما بتملين من هالخوف ؟؟ ردي عليه .كلميه ..
دانه تتت بكلمه ..بس مو اليوم ..
قمر ــ بروح أييب فهادي وأيي .. واتخذي قرار ..تكلمينه ولا ا ..العرس عقب اسبوعين ..وأنت تقريبا ماتعرفين عنه شي ..يساعدج لو كلمتيه ..
دانه ـــ شوفي قمر ... كل ما اتذكر اللي صار في المستشفى أنحرج ..
قمر ــ هو مالاحظ اللي صار ..قالوا له انج كنت تعبانه من الامتحانات..وبعدين هو ماشاف ويهج كان منزل راسه ..
دانه ــ أتذكر اني ماشفت عيونه ... خليني من سلطان بروناي ..ماقلتي لي ..وين فهد؟
قمر ــ بروح أييبه ..امي نايمه وهو صحى ..ماشاءالله يا عمتي صغيير ..ويشبه ابوي وايد .
دانه ــ هاتيه ..
صحيح ان دانه كانت ماتطيق لامنيره ولاهناء ..بس تموت على عيال اخوانها ..وبناتهم ..تحسهم قطعه منها رغم انها من عمرهم تقريبا ..رن التلفون مرة ثانية..طالعت دانه الرقم ..ما اقدرت ترد عليه ..بس بتكون في موقف محرج ..اذا عرف انها ماردت .
تركت التلفون في الغرفة وراحت غرفة بدور ..
بدور كانت يالسه تقلب في قنوات الريسيفر .
الدانه ــ عطينا ويهه قولي أيلس مع عمتي ولا صرتي مدام خالد ماتحاجينا ..
بدور قام وسلمت على عمتها ..
بدور ــ هلا دانه ..ماتصدقين توني هاللحظه صكرت من عند خالد ,,وكنت افكر فما سمعت اي صوت ..
الدانه ــ ها ..وشلونه هالخالد ..شخباره؟
بدور ــ ما أدري ..أحسه ...مدري ..بس اول مكالمة بينا كانت فاشله ..ما عطاني فرصه اسأله بحجة مايطول علي في الكلام .
الدانه ــ أول مكالمة لاحقه على الباقي ..
بدور ــ شوفي ..
ضحكت دانه لما شافت ورقة الاسئلة اللي مسويتها بدور لخالد ..
بدور ــ أمي قالت لي اسئله نص هالاسئله ..واذا سألني عن اسئله هي متوقعتها كتبت لي الاجابه ,,
ماتت دانه من الضحك ..كانت الاسئله خمس وثلاثين سؤال ..تقريبا نصها عن العرس ونصها عن البيت وجزء بسيط عن شغله وراتبه ..
دانه ــ زين انه صك في ويهج التلفون ..ولا ماخلص المسكين من طلباتج .وأسئلتج ..
بدور ــ أنا ما ابي شي ..هذي امي تبي تعرف هالاشياء ..عمتي شفيها قمر علي؟؟ من رجعت من السفر تكلمني بالقطاره .
الدانه ارتبكت ــ ها؟؟ قمر ..ما أدري ..بس عادي ما ..أشوفها متغيره .
بدور ــ ما أدري أكلمها ..ماتقول شي ..اليوم اول مكالمة بيني وبين خالد ..كنت أتمنى أقول لحد اللي صار ..بس قمر ما تشجعني اني اتكلم ..
الدانه ــ قمر اعذريها تراها لها مزاج ..بس انا موجوده ..قولي شصار؟
بدور ــ عمتي اشك انه ماكان يبيني ...
اسكتت دانه وهي شاكه ــ شالكلام لو مايبيج ماخذاج ..
بدور ــ ما ادري عمتي رفيجاتي كانوا يكلموني عن اول اتصال..والكلام اللي سمعته منهم غير اللي صار بيني وبينه .. حسيت في برود ..
الدانه ــ لاتصير أفكارج بهالسوداوية ..شبروده وانتوا اسم الله عليكم توكم ملجين ..وهو اختارج بنفسه ..ويا خطبج بنفسه بس تلاقينه مرتبك ..وبعدين اذكر مره رجع من الدوام لما كنت ادرس عندهم ..وكان تعبان بالمره ..اكيد مافضى يكلمج براحه وبال مرتاح .
بدور ــ عاد تدرين شفت ابن خالتي نوره ..علي ..
داانه ــ أذكره لما كان هنا قبل لايسافر ..كان كبير..
بدور ــ اييه يا وبارك لي..وكان كله يحاول ييلس معاي ..ماحبيت هالشي وظليت لاصقه في امي ..وكله اشيل فهادي ..خفت وايد..خفت وتمنيت اعرف ليش يدتي كله هناك في البحرين ..ماتتي وتظل هنا عيالها هنا وبناتها .. زين ان خوالي يوا هنا بعد ماخلصوا الثانوية وكملوا هنا ...اللي اعرفه اني مابرجع لهناك لو بموت ..
دانه ــ ما اعتقد نيته كان سيئه ..
بدور ــ ما ادري بس هو يخوف ..نظراته تخوف ..
دانه ــ قومي زين طرشت قمر تيب فهد من تحت ..يلا تعالي ايلسي معانا ..
بدور ـــ لا عمتي ..بروح أتسبح وبعدين أنام ..خذوا راحتكم ..
دانه ــ كيفج ..
*********************
هالشهر خالد اندمج في الشغل أكثر وأكثر ..وتقريبا اسلوبه تحسن مع الاطباء الثانين لانهم خذوا عليه ...بس الكل ما يعجبه تسلطه ,,
فارس ــ صدقني بيعجبك الفيلم .
خالد ــ لا ..ماعندي وقت بعد الدوام يدوب احط راسي وأنام بعدين أكلم المدام ..وأشوف شناوية حق العرس .
فارس ــ ماشاءالله كتبت شعر .
خالد ــ ماكتبت شعر كل اللي صار اني لصقت الكلام في بعض ..بس .
فارس ــ زين الطبيب خالد اترك واروح البريك خلص ..
خالد ــ انت متأكد الفيلم حلو؟
فارس ــ يمدحووونه لي .
خالد ــ خلاص ..الليله نتواعد .
فارس ــ انشاءالله ..
خالد لقى في فارس الرفيق المثالي ..والزميل المتعاون ..خذ قلاس الجاي ورجع لمكتبه ..واستقبل المرضى ,,
******************
ايلست على سريرها والافكار تآخذها وتجيبها ..تكلمه الحين؟؟ الساعه عشر في الليل ..ماعندها سالفه لو كلمته هالحزة ..المصيبه العرس بعد اسبوعين ..تذكرت مريم اللي دست بين اغراضها كيس ..استغربت منه دانه ..ولما فتحته اكتشفت انه كله قمصان نوم..عصبت وايد على مريم اللي ابتسمت وماعلقت ..تقريبا هي خلصت جهاز في نظرها لكن مريم كله تصارخ عليها انها ماخلصت شي معقول ..الذهب مريم سافرت الامارات واشترته على مزاجها ..الدراريع والشيل واغراض البيت يابتها مريم كلها من الامارات ..العطور تكفلت فيها قمر ..واشترت احلى العطور ودهون العود ..وساعدتها منيرة في هالشي .,,الاكسسوارات والمفارش والديباجات يابتها لها هناء كلها من الكويت ..الميكياج يابته لها بدور ..والبدلات الكشخه والاحذية ..تقريبا هي ماسوت شي الا اختيار فستان العرس وفساتين بسيطه ثانية . ..طالعت اغراضها وملابسها وذهب امها اللي رفضت تبيعه وخلته مع ذهبها ..طالعت ملابسها الوايد .. بتاخذها معاها بس مع الملابس اليديده مالها مكان ..عطورها مالت المدرسه وعباياتها وشيلها ..اللي تعرفه انه بعد زواجها .. انقطع عنها راتب ابوها التقاعدي ..اللي كانت تعيش منه بشكل يخليها ما تحتاج للناس . ..صج بس من سنتين وشي فقدت امها بس تحس انها ماتت من زماااااااااان ...يمكن لان اخر سنينها كانت تتنقل من مستشفى لثاني ..وكانت كله تعبانه ..بس هي محتاجتها وايد ..وايد ..وكرهت الدنيا لانها تحس ان ماعندها مكان تعيش فيه وتحس انه لها ..
طالعت التلفون ..اذا ماعندها الجرأة تتكلم ..عندها لاجرأة تكتب مسج ..
وكتبت ..
(السلام .انا دانه.اذا ماعندك مانع ياليت تسمح لي اجهز اوراقي لدخول الجامعه (
حست ان المسج جاف بالمرة ..وخالي من اي ذوق ..بس ماعندها حل ثاني .,, ارسال .
ثواني ووصل تقرير بالاستلام ...دقيقتين ووصل مسج .
(ليش ماكلمتيني يوم دقيتي علي؟(
ارتبكت الدانه..على الاقل رد السلام .
(كنت مرتبكه .وماكان عندي الجراه (
وصل تقرير الاستلام ..وبعدين مسج اني
(أي تخصص تبين؟(
دانه ـ(اداره واقتصاد (
ضاحي( ( ماعندي مانع ((
دانه (( شكرا ((
مارد ضاحي بعد هالمسج ...حطت التلفون على جنب ..وحطت راسها تعبانه الصبح لازم تروح السوق ..شي واحد قررته انها تكره السوق ..
**********************
مر أمه المسكينه ..اللي اعتزلت في غرفتها من يوم ملجته ..من شهر ..
خالد ــ يمه ..
أم خالد ــ هلا ولدي .ادخل ..وينك ما أشوفك ..
خالد ــ في دوامي يمه ..
أم خالد ــ ها ..ربت منيرة ؟؟
خالد ــ يابت ولد ..
ام خالد ــ ما بغت ..مسكين نايف ..كبر على ولده ..
خالد ــ انشاءالله يعيش ويربيه .
ام خالد ــ كلمت حرمتك؟
خالد ــ اييه ..
ام خالد ــ متى تبي العرس؟؟
خالد ــ ما سألتها وهي ما قالت
.ام خالد ــ البنت انشاء الله زينه ..بس خلها بعيد عن منيرة ..
خالد ــ أشوف ..
ام خالد ــ كلمت ابوك ؟
خالد ــ عن ايش ؟
ام خالد ــ عرس عبير ..بعد ثلاث شهور ..وأبوك يبيه بعد سنه ..
خالد ــ بس انتوا اتفقتوا مع الريال بعد ست شهور شغير هالكلام؟
ام خالد ـــ ابوك يبي عرسك قبل عرسها ..عبير الوحيده من خواتك اللي موب مشغوله بريل وعيال ..وانا كبرت ..وأبوك يبيها تشيل العرس ..
خالد ــ بس يمه ..الريال متفق مع ابوي ..
ام خالد ــ العنود بتولد ..وصالحه ماتقدر تهد ولدها ..توه صغير ..وبشاير متغربله في شغلها وزوجها مثقل عليها بطلباته هو والعيال,,,
خالد ــ انا ما ابي أفشل أبوي جدام ريل عبير ...الريال وهله حاجزين ..
ام خالد ــ دبر نفسك عاد ..عرس عبير شهر احدعش ..تقدر تعرس قبل هالتاريخ؟؟ تفاهم مع ابوك وقول لنا شرايك ..
ارتبك خالد..مافي غير هالحل ...طلع لبوه وتناقش معاه ..
***************