احشم خويك عن دروب الرزاله
دخيل خذ من والدك لك مسالة ** مسالة ما يفهمه كل رجال
احشم خويك عن دروب الرزاله ** ترى الخوي عند الاجاويد له حال
والمرجلة بالك ترخي حباله ** حذرا تعيل ولا ترخي لمن عال
ان كان ماتدعى على كل حالة ** تراك من حسبة هدوم به ازوال
وان كان دلوك ماتموحه شماله ** ترى النشاما ينسفونه على الجال
رفيقك الداني ليا شفت حاله ** احمل عليك من المعاليق ما شال
ياعل رجل شوفته قد حاله ** عسى تدور زوجته فيه الابدال
الحمرة تدرك معوشة عياله ** والا الرجل يبغى منه بعض الاحوال
خله مع الديان تمشي لحاله ** ياصار ما انت المسة الخشم حمال
تر ربع يوم مقعدك بالشكاله ** يسوى حلال عايشه فيه الأنذال