رغــبة

أنا أبيك .. وحش يحتوي داخله عصفور
وانا ابيك .. طفل يحتوي داخله رجال

أبيك .. الأب بالعطف والأخ بالمعسور
أبيك أمي بالتدليل ومداعب الجهال

انا أبيك .. تاج الستر ياعاري المستور
أعاف العقل وانجن مادامهم عقال

أبيك .. المطاع الطايع المنذل المغرور
انا أبيك .. جوعي وشبعتي والفقر والمال

أنا أبيك .. تشكيلة عواطف كما البلور
أبي تحتوي كل التناقض مع الاشكال

أباصير انا وياك.. داخل بعضنا ندور
ياحتى نضيع وين كنا مع المدخال

خلاص انتهى صبري وتلاشت خيوط النور
أبعلن جنوني وش نلت من عالم العقال؟؟