رونق .
من قالي فيصل إن نهى تزوجت عزام و أنا موب مصدقه ,, خلاص ما عاد أقدر أنقذه ,, لأني لو تكلمت أبدمر حياته ,, ناظرت فيصل بحزن و عيوني تقول لو تدري يا فيصل إنه أتعس خبر مر عليّ !!
ــــــــــــــــــــــــــــــــــــــــــــــــــ ـ
فيصل
بعد ما دخل النوم لعيونه انسحبت من الغرفه بهدوء و طلعت أمشي بالممرات و فكري سارح ....
انتبهت من أفكاري على صوت أعرفه و رفعت راسي مستغرب ....
أنا : يبه أنت هنا !!
رفع أبوي راسه و طاحت عيني بعينه ,, أنهى المكالمه بسرعه و رد : فيصل !!
أنا : يبه من متى و أنت هنا ؟!
أبوي : من فاقت رونق أنت وش اللي جابك هالحين ..
رديت : توي طالع من عند رونق .
أبوي : وشلونه الحين ؟!!
أنا : بخير الحمد لله ,, ما تركته إلا يوم نامت ..
تنهد أبوي من قلبه ...
و تكلمت أنا : و الله إنه بخير يبه لا يضيق صدرك ..
أبوي : أجل يله مشينا ..
تنهدت و رديت : مشينا .
اتجهنا أنا و أبوي لبوابة المستشفى و أول ما طلعنا من البوابه افترقنا و كل واحد ركب سيارته أنا الكامري و أبوي جيب الفكس آر ...
توجهنا للبيت بأجسادنا أما أرواحنا فهي تعانق روح غالية علينا على السرير الأبيض .
ـــــــــــــــــــــــــــــــــــــــــــــ
خالد
من بعد صلاة الفجر ما جان النوم ,, كل ما غمضت عيني جت صورة رونق قدامي ,, يا الله موب متخيل إنه صحت بعد ما كنت أبفقده ,, فعلا الواحد ما يحس بقيمة الشي الا اذا فقده ,, قمت بنشاط غير معهود ,, خل أروح له أكيد هي الحين صاحيه ,, أخذت شور على السريع و لبست ملابسي و طلعت ,, ايه نسيت أقولكم أنا الحين ساكن ببيتنا يعني بيت ابوي المعروض للبيع ,, و إلى الآن ما انباع نظرا لأن البيت قديم شوي ,, هو صحيح ما فيه أثاث بس حطيت لي فراش على الأرض بنفس غرفتي و حطيت فرشه بالصاله آكل عليه ,, حاولوا أخواني يبونن أقعد عندهم بس أنا ما رضيت ,, أحب علي هالبيت أشم به ريحة أمي و أبوي ..
وقفت عند كوفي و أخذت منه كوب قهوه ,, و كملت طريقي للتخصصي ..
وصلت للمستشفى و وقفت سيارتي بالمواقف ,, نزلت و مشيت متجه للبوابه ....
: ويييين وصلت يا شيخ !!
رفعت راسي و غصبت نفسي على ابتسامه لما شفت الشخص اللي قدامي ,, مديت ايدي و صافحت ايده الممدوده ..
تركي : الساعه سبع وش جايبك هالوقت ؟!
أنا : ما جان النوم ..
تركي : وش أخبارك ؟؟
رديت و أنا حاط ايدي فوق عيوني عن الشمس : بخير دام أخيتي بخير ..
رد تركي متجاهل نغزتي : ترانا طلعناه من العناية للترقيد .
أنا : كم رقم الغرفه ؟!
تركي : 213 الدور الثاني ..
ابتسمت و رديت : الله يجزاك خير يا ولد العم سلم على مي .
رد تركي و هو طالع : يبلغ ان شاء الله .
تركت تركي اللي توجه لسيارته و توجهت لغرفة رونق ....
دخلت لقيته جالسه على سريره و الفطور قدامه ,, جلست بالكرسي اللي جنبه بعد ما سلمت عليه ..
سألتن رونق : الحين موب وقت زياره وشلون دخلت ؟!
رديت : الواسطه و ما تسوي !!
ردت رونق : و من اللي توسط لك ان شاء الله .
تحاشيت نطق اسم تركي و رديت : صديقي !!
أخذت قطعة خبزه و أكلته و حطيت قطعه ثانيه بإيده و قلت له : أتوقع الحين إنتس اشتهيتي الأكل يوم شفتين .
ردت رونق بعد ما شقت الإبتسامه وجهه : يا وآآآآآثق .
رفعت حواجبي و تكلمت : يحق لي موب أخو رونق !!
رونق : اذا كذا يحق لك ..
أنا : يله عاد ترى عطيتس وجه خلينا نفطر ..
ملت ضحكته المكان و قبله ملت صدري و ابتسمت و أنا أهمس بداخلي : دووووم ياآآآ رب .
من بعده تشاركنا بالفطور لحد ما قلت له ..
تكلمت و أنا مبتسم : يله عاد ما بتس الا العافيه لا تتدلعين ..
رفعت رونق راسه و شهقت : أنا أتدلع !!
كتمت ضحكتي و كملت : ايه أجل وراتس ما تتحركين و الا صدقتي انتس مريضه .
عضت على شفته و تكلمت : تدري اني ما أقدر أصلب طولي أحس بدوخه ..
حطيت ايدي على ايده أواسيه : كله أيام و ...............
قطع كلامي الطرقات اللي على الباب ,, تغطت رونق و كأنه عارفه اللي بيدخل ,, عقدت حواجبي مستغرب من هاللي جاي هالوقت لكن من شفت اللي دخل راحت الدهشه ....
دخل الدكتور و وقفت أسلم عليه ,, كشف على رونق و سأله عن حالته اليوم و ردت عليه بكل حشمه و حياء ,, يوم عن يوم يتبين لي من أفعال رونق إنه بريئه لكن دليل ادانته موجود و هذا اللي يوسوس لي بأشياء ما أدري هي صدق و لا كذب ..
حسيت بإيد رونق تنغزن ,, انتبهت له و سمعته تهمس لي بكلام غير مفهوم ,, قربت اذني لأفمه و سمعته تقول : اسأله وراي كل ما قمت أدوخ !!
رفعت راسي و عدت السؤال على الدكتور بصيغه ثانيه : دكتور رونق اذا قامت واقفه تحس بدوخه ..
الدكتور مصطفى : دا شيء عادي مش هيا صار لها 3 شهور متنومه ,, يعني لازم تبأ عندنا لحد ما تأدر توقف على رجليها .
أنا : طيب و بعدين ..
الدكتور مصطفى : من بكرى رح تبدأ بالعلاج الطبيعي و حنديها شوية فيتامينات تقويها لأنها فقدت كتير من وزنها ..
أنا : طيب متى بتقدر تمشي ..
الدكتور مصطفى : هي كم يوم بس لحد ما تسترد عافيتها .
و كمل الدكتور : يله أنا أستأزن دلوأتي و ان شاء الله تقومي بالسلامه ..
رديت : الله يسلمك .
طلع الدكتور و جلست بمكاني ,, ابتسمت لما شالت الغطا و بانت حمرة وجهه و تكلمت : أوخس يا بنت الشامية وش هالحمار ( حمرة الوجه ) ..
التفتت علي رونق و ردت بزعل : و الله لو تقولي مرة ثانيه يا بنت الشاميه ان لساني ما يلاقي لسانك .
رديت : اوف لهالدرجه كارهه الشاميه ,, تدرين أجل أبقولتس يا بنت عبدالله !!
ردت و هي معصبه أكثر من قبل : لا تربط اسمي باسم أحد أنا رونق و بس !!
أنا : أفاااااا تبرّيتي منّا .
تفشلت و ردت : لا موب كذا بس ... خلاص خااااالد غير السالفه .
سندت راسي على السرير و تكلمت : أغير السالفه و ماله .
رونق : خلصت دراستك ؟!
رديت : لا باقي لي سنه و نص .
ضربت على راسه بإيده : أوووووف و أنا اللي شاده بك الظهر ..
رحمته من قلب على كلمته و تكلمت : و أنا سند ظهرتس سواء بالقصيم و الا برا .
رونق : طيب أ أ .... أنا ... اذا طلعت من المستشفى وووين أبروح ..
من تردده عرفت إنه خايفه من هالدنيا و تكلمت أغير عليه الجو : شكلي أبسفرتس لديرتس !!
رفعت حواجبه و شهقت ,, انفجرت ضحك لما شفت ردة فعله و ملت قهقهتي المكان ...
حسيت بإيده تضرب كتفي و رفعت راسي و بقايا من الضحكه ما زالت مرتسمه على ملامحي ..
تكلمت رونق : قالوا لك شغاله تسفرونن .
تكلمت : وش أسوي بتس أنتي و سؤالتس الغبي !!
رونق : صدق عاد قل وين أبروح !!
رديت بجديه : بنسكن أنا وياتس ببيتنا .
شهقت بفرحه : بربّـــك تقول الصدق ..
حسيت بفرحته و رديت : و الله إني صادق .
عضت على شفايفه تفكر و رجعت تسأل بعد ثواني : تهقى محمد و عبدالرحمن يبي يطيعونن أسكن معك .
سندت ظهري و رديت بثقه : ما علي منهم كافي اللي صار لتس بغيابي و بعدين اللي يسمعتس يقول إنتس ما تعرفين خالد و عناده .
تنهدت و هي مبتسمه : اذا على العناد اسأل أمي موضي ..
ضحكت لما تذكرت أمي موضي و حنته على راسي تبين أعرس بس أنا موب راضي ,, يا ليتي حققت له أمنيته قبل لا تفارق هالدنيا !!
|
|
|
ٳل̨هي جملني بحلتين قلب رحيم وعقل حكيم ...
|
|