03-19-2016
|
#15
|
أوووووف أحس رجليني توجعن من الدوران ,, و الله إني
تعبت و هذا ما جاء يطمنن ,, رفعت ايديني و أنا أدعي : ياربي
تشفيه يا رب !!
سمعت صوته و بدأ قلبي يضرب طبول ,, عارفه إني غلطانه يوم
تركت رونق بس و الله إني ما تركته إلا بعد ما وكلت ندى تجلس
معه ...
كان شكله تعبان لما مر من عندي أزاريره مفتحه و ماسك شماغه
بيده و يسحب رجلينه تسحيب ,, ألقى علي نظره خاطفه و كمل
طريقه لغرفته ,, شكله مستغرق بالتفكيييير ..
لحقته و سألته : فيصل كيف رونق ؟!!
ما رد علي و تابعت و أنا ألحقه : و الله إني كل اليوم و أنا معه
و ما قمت منه إلا شوي و وكلت ندى تجلس معه ..
التفت علي بسرعه و تراجعت لورى من الخوف : راسي مصدع
مالي خلقـــتس ..
تكلمت برجاء : طيب قل لي وش به ؟!! و وشلونه الحين ؟!!
رد بعد ما تكتف : وش به موب مهم لأنه راح ,, و وشلونه الحين
الحمد لله تمام !!
اقهرتن نبرة الاستهزاء بصوته و رديت : فيصااال تكفى قل لي
وش به؟!!
تنهد و رد : انخفاض بالضغط نتيجة قلة الأكل ..
ضربت صدري و شهقت : بسم الله عليه وش ضغطه و ما ضغطه !!
رد بملل : قصري صوتس و بعدين الانخفاض يجي نتيجة لسوء
التغذية ,, يعني لأنه مهمله نفسه بالوقت الأخير ..
أنا : صح حتى كل شي ما تشتهيه ..
و تابعت : طيب الحين وشلونه ؟!!
رد فيصل عليّ : حطوا له مغذي و يوم خلصنا وديته لبيت عمي
عبدالرحمن ..
أنا بقهر : ليش ما جبته هنا نكون كلنا حوله ..
فيصل : لا خليه هناك ميب ناقصه قهر ,, و على الأقل معاملة
عمي عبدالرحمن أهون من سياسة التطنيش عند أبوي !!
أنا : طيب وشلون نتطمن عليه ...
فيصل : لا صار بكرى الظهر أبروح له ..
و اتجه لغرفته للدرج ,, و هو يرقى الدرج تذكرت شي و تكلمت ..
أنا : فيصل ترانا شرينا جوال لرونق ..
التفت فيصل بسرعه و رد : نعم ؟!!
أنا بثقه : شرينا لرونق جواااال .
فيصل : و من أنتم ؟!
أنا : أنا و ندى .
فيصل : ايه افلقين اذا رضت تاخذه ..
أنا : لا أخذته غصبن عليه ..
فتح عيونه على وسعهن و رد : احلفي !!
أنا : و الله العظيم ..
فيصل : طيب عمي عبدالرحمن .
أنا : موب مكتشفه إن شاء الله ..
تنفس بارتياح : إيه الحمد لله على الأقل الواحد يتطمن عليه ,,
تدرين و الله إن هالفكره دارت براسي بس خفت يكشفه عمي
عبدالرحمن و تنقلب على راسه !!
رديت و الخوف تسلل لقلبي : لا تتشائم إن شاء الله إنه موب
داري !!
|
|
|
ٳل̨هي جملني بحلتين قلب رحيم وعقل حكيم ...
|
|