دامك تعرف إنك بعد صدك تعود
وش جابرك تمشي طريق المذله

ترى الكرامه يارفيقي لها حدود
ودرب الثقل ياخوك منته تدله

صعبه تعوض نقصك بشي مفقود
من شان تاصل شي غيرك وصله

ترى التطبع بعض الاحيان منقود
لو عشت جو الدور تفضحك زله

باقولها من دون تلميح وقيود
وكلن مع التوضيح يعرف محله

ترى التغلي يعتبر عندي جحود
ومن شاف نفسه عفت بعضه وكله

من غاب ليله صار ماهو بموجود
اقدر بدال الشخص آجيب شله

ياما نصحتك والبشر كلها شهود
درب الثقل بالله ياخوك خله

ترى العمر وان طال ياخوك معدود
وإنت بعنادك زايد الطين بله

إلا تبيني اربط القلب بقيود
واصير شخصن يتبعك مثل ظله

بدري عليك انهد وآصير مهدود
وبدري على شرواك قلبي يذله

شوف النهايه صرت تبكي ومكيود
وصرت اتمنى شوفتي لو بطله

هذي علومك ماورها ولا فود
ومن هالرجاوي صابت القلب عله

لتذل نفسك والامل صار مفقود
جرحت خدك يوم دمعك تهله

ولتقول بفرش دربك ازهار وورود
فرقاك عندي عيد والعيد فله