البارح أطلقت رمشي لك جنون وهيام

معشوق بين المحاجر يستلذ الدفا
وأشعلت لك من قناديل الرضا والغرام
صباح ليل (ن) يعاند ظلمتين الجفا
لاحت بروق القوافي وإستراح الغمام
مابين مزنة وجودك والوعد والوفا
ياطول صبر الدقايق وإنتظار الكلام
لويفضح الشوق لهفاته عظيمه خفا
تعال وإسمع عتابي قبل عيني تنام
تعال شوف الضماير جرحها ماشفا
والوقت مشعل حروبه في دروب السلام
والحلم ماتت عصافيره بطعنة قفا
ياللي غلاتك بي أكبر من قلوب الأنام
أبيك تحفظ وعودك لوزماني هفا
أبيك همس (ن) يداعب غربتي بإهتمام
وأبيك بحر (ن) على شاطيه طرفي غفا
وأبيك لاغاب صوتي بين صمت وظلام
تشعل مصابيح ليلي يوم نوره طفى
وإن شفت خيل المفارق تستبيح الحطام
والدرب خان المسافر والزمن ماصفا
تلقى المشاعرمراسي والقوافي وسام
صدري وطن وإهجره عمر الوطن مانفى
خذ من جنون القصايد شهدها كل عام
وإسكن بيوت المحاجـر بين رمش ودفا