(صعب أسهل ) بدايات الرجـوع لـسكـة المجهـول
بعيني والرجوع (اصعـب) بداياتـي مـن (اسهلهـا)

من اول رحلتي فيني ,, طعن زهـر الشبـاب ,ذبـول
وش آخرها.؟ مدام اقسى طعوني جت , مـن اولهـا!!

(خيالي , واقعي) شفتـه يحيّـر فـي فضـاه عقـول
مـن المعقـول يرسـم لـي حقايـق.. مـا تخيلـهـا

ترى ما يجرح العاقل من الدنيا ,, سـوى المعقـول!!
وانا المجروح مـن دنيـاي ,,لـو مـا كنـت عاقلهـا

ورى مستقبلي الماضي إلى الحاضر , وش المحصول
إذا الماضي مـن ايامـي أشـوف الظلـم بـاعدلهـا

هنا.. ضمّتني احزاني ,,بعد ما غبت لـي كـم حـول
هنـا.. سكّيـن لـمعانـق شراييـن الـفـرح ولـهـا

هنا.. علّقت دمعاتي على اقـدام الليـال ,, حجـول!!
هنـا .. مـا حنّـت البسمـة علـي وقلـت ازعلّهـا

هنا.. والا (هنا).. يكفي , عجزت اوصف , عجز آقول
عجزت اجمع ألـم بابـل ,, حـزن دجلـه واموّّلهـا

عجزت آروّض بـصدري صدى جرح وجموح خيول
أنـا مـدري غضـب والا بـقلبـي تلعـب وتلـهـى

وقفت ..ومـا وقفـت الا .. ادوّر للحلـول ..حلـول
ابعثـر مـا ورى نفسـي ..إليـن اثقـلـت كاهلـهـا

تعبت احمل من الذكرى على المتن النحيـل ..حمـول
وانـا نفسـي وهـي نفسـي وربـي ..مـا تحملهـا

لأني كل مـا أقـرب , اشـوف ان الطريـق يطـول
وهو صعبٍ علي ارجع ,, والاصعب كيف اكمّلهـا؟!!

أخاف ارجع والاقيني على هـاك الـ(هنـا) مقتـول!!
واخاف امشـي لآخرهـا واشوفـه ,, يشبـه اولهـا


* * * * * * * * * * * * * * * * * * * * *
الشاعر/ عبدالله الكايد