الزمن صلب , وانت انسان حسّـاس
لازم انـك تغيّـر مــن صفـاتـك

لو جبرك الزمن .. لاتحنـي الـراس
غـيـر لله .. اذا كـنـت بصـلاتـك

ولاهـو ايّـة يديـن تمـد , تنبـاس
( عن عدا والديـك) اكـرم شفاتـك

ولو يقولون مفلس , قول الافـلاس :
لاخسـرت الكرامـه فـي حيـاتـك

بالامـل تقـدر انـك تهـزم اليـاس
اغتنـم كـل فـرصـه دام جـاتـك

دوس روس المصاعب قبـل تنـداس
واسلك الدرب الاصعب فـي جهاتـك

لايميل غصونـك كـل نسـنـاس
خلـك اقـوى بعزمـك , وبثبـاتـك

ولاتعامـل بطيبـك كـل الاجـنـاس
حسـب الاشخـص خـل معاملاتـك

وان حكت في ظهرك ( قلوب الانجاس)
ابتسـم .. واعطهـم مـن سيئاتـك

لاتمـر البشـر مــرور الانـفـاس
حـط بصمـه قبـل لحظـة مماتـك

كن ذهب .. لاغـدوا قدامـك نحـاس
كن لهب .. لاغـزا البـرد امنياتـك

ولا تضايق وتزعل .. قول : لابـاس
لاخسـرت ايّ حاجـه فـي حياتـك

خون حزنك , و همّك .. الا الاحساس
لاتخـونـه , تخـونـك ذكريـاتـك

مايروح الفرح , لـو راحـوا النـاس
انـت مـن تصنـع الفرحـه لذاتـك

,,,,,,,,,,,,,,,,,,,,,,,,,,,,,,,,,,,,,,,
الشاعـــر/محمد الوسمي.