****
دخل تركي البيت اهو ونهى لقوا الدنيا هاجدة .. صعدوا بهدوء وكل واحد اتوجه لغرفته .. دخل تركي الغرفة وهو بداخله يحس بعواصف من المشاعر لا وأعاصير بعد .. أخذله دش دافي يهدي أعصابه وطلع ولبس وحس بالجوع قارصه.. طلع من غرفته ومر على غرفة منال لقى نورها مفتوح .. دق الباب بخفة وشوي الا فتحت منال وشافت تركي وقالت : هلا تركي متى جيتوا ؟؟
تركي : من شوي ..
منال : ماحسيت فيكم !
تركي : حسبناكم نايمين وحاولنا مانطلع صوت وتوني مريت على غرفتك شفت النور وعرفت انك صاحية
منال : اي توني مانمت
تركي : زين منال سويلي شي آكله تكفين
منال : ابشر اخوي (( وصكت نور غرفتها وطلعت ومشوا للدرج ومنال تقول : هاه شلون عبير الحين ؟؟
تركي : طيبة الحمدلله عدت على خير
منال : ياعمري إهي الي حريصة وتخاف ماسلمت ليتها باختها الي ماتتسمى !
تركي : أفا منال شهالكلام ! الله لايكتبها على أي عزيز
دخلو المطبخ ومنال تقول: هذا انت قلتها " عزيز" وفتونوه ماتعنيلي شي سبحان الي فرقها عن اختها
تركي بابتسامة عشان لايزعلها : يالله يامنال انتي الي تحبينهم بهالدنيا معدودين معقولة كلهم مآذينك ؟؟
منال : تصدق إيه !!
تركي بضحكة : أجل الله يعينك !
سمعوا هاللحظة خبطة الباب بقوة .. التفتوا لقوا نوال توها داخلة من برا .. انحمق تركي من ازعاجها يعني اهو ونهى يوم دخلوا راعوا الهدوء بهالوقت واهي بهمجيتها ماتراعي أحد !! جتهم وقفت عند باب المطبخ وقالت براس مرفوع : السلام !
منال طنشتها وكملت شغلها ولاكنها سامعة .. وتركي رد بهمس : عليكم السلام
نوال : شلون طلعتكم؟؟
تركي بضيق : تمام
نوال : ابوك فيه ؟؟
تركي : مادري ..
نوال بسخرية : مع بعض بنفس البيت وماتدري ؟؟؟
تركي اتنرفز منها بعد اهو مو طايقها من بعد الي صار بينهم آخر مره وقال : ايه ماردي انا توني جاي من برا وبعدين هذا زوجك المفروض مايجي الا وانتي بالبيت تستقلبينه مو جاية آخر الليل كن ماوراك أحد !!
نوال ببرود يقهر : أعصابك تركي شفيك كليتني بقشوري ؟؟
اتأفف تركي ومارد ونوال طالعت بمنال وقالت بحاجب مرفوع : شلونك منال ؟؟
طالعتها منال بنظرة مقت وكملت شغلها بدون ماترد ..
نوال : ياويلي شهالنظرة لايكون قايلة شي غلط وانا مادري تراني أسأل شلونك بس !
منال بانفعال : انتي الحين شتبين ؟؟؟؟
نوال : لاتصارخين الحين هذا جزاي أسأل عنك ؟؟؟
منال : وسؤالك مردووود والحين فارقي عن وجهي تكفين
كتفت نوال إيدها وسندت جبمها على باب المطبخ واهي تقول : مو مفارقتك وريني وش بتسوين ؟؟؟
تركي واهو يخبط على الطاولة : بـــس !! (( والتفت لنوال وقال : وانتي يالفاهمة بدال هالعناد والمناجر ليه ماتروحين وتشوفين زوجك الي جاي من البر تعبان !!
نوال : والله محد ظاربه على ايده وقاله يروح !!
تركي فار دمه واهو يقول : بيروح غصب عليك !!! وغصب عليك بتروحين تشوفينه وتلبين احتياجاته هذا واجب ماتشكرين عليه !!
نوال وهي تنفض ايدينها فيهم : اوووووووف ! انتوا الحكي معكم يرفع الضغط ! والله جبتولي المرض أعوذ بالله منكم
منال بصراخ : أحسن عسى المرض يطيحك طيحة مابعدها قومة يارب
ماوتعت الا على كــــــــــف طيرها من مكـــــــانها على الأرض !!!!!
توسعت عيونها بصدمة واهي تمسك خدها وتطالع ابوها بذهووول وتقول بخنقة : تضربني يبه ؟؟
أبو تركي والشرار يتطاير من عينه : أضربك وأذبحك بعد .. بس كافي كافي !! ليل نهار صراخ ليل نهار هواش .. ودي أدخل يوم ألاقي الامور صافية .. يرتاح بالي وأتهنى ..محد منكم متحمل وطايق الثاني لمتى هالحال .. (( وصرخ : لمتى ؟؟؟؟؟
منال انفعلت : اسألها إهي يبــــــه لا تسألني أنا !!
نوال بمسكنة : والله انا الي جاية أسأل عنك بكل طيبة وقبيتي فيني وانا ماسويتلك شي!
منال : لانك مناااااااااافقة وطول عمرك كذااااااااابة !!
أبو تركي بصرااخ : انطــــــــــمي !!!
قام تركي ومسك منال من ذراعها واهو يقول : خلاص يامنال امشي اطلعي
منال انهارت وصارت تبكي وتقول : وليييييييييه مو اهي تطلللللع ... ليه أنا الغلطانة دااااايم .. لازم يبه تعرف حقيقة زوجتك هذي .. هذي منافقة وكذابة وتكرهنا وتكرهك انت بعــــــد !!
نوال سحبت نفسها .. وهجت لفوق وصارت تتسمع عليهم من أعلى الدرج !!
وبنفس الوقت ثار أبو تركي على الآخر وجا لمنال يبي يضربها الا تركي وقف قدامها وعطاها ظهره واهو يقول برجاء : طلبتك يبه تكفى لاتلمسها !!
منال : خله ياتركي يذبحني ويرتاح مني دامني علـّـة على قلبه .. أنا الظاااااالمة وأنا المظلوووومة بهالدنيا .. موتني يبه وريحني وارتاااااح
تركي واهو يطلعها من المطبخ : منال ماله داعي هالكلام اتعوذي من ابليس وامشي معاي
منال واهي تبكي وتصارخ بهستريا : ماااااااابي أقعد بهالبييييت .. اليوم ظربني عشانها بكرا وش بيسوي ؟؟؟؟ مابي اقعد هنا والله لا أنتحر اذا قعــــــــــــدت !!
ابو تركي : منال اقصري الشر وانطمي وانقلعي على غرفتك قلع الله هالوجه !
تركي بقهر : يبه حرام عليك خف عليها شوي !
أبو تركي : حرام علي أنا ؟؟ مو سامعها شقاعدة تقوول ؟؟
تركي : اهي منهارة الحين خلاص لاتحاسبها على كلامها
منال : مااااابي أقعد بهالبيت ماااااابي .. خذني ياتركي لخوالي خلني اقعد عندهم مابي أبات الليلة هنا والله لا أنجن !
أبو تركي : نجوم السماء اقربلك من بيت خوالك !! بتجيبلنا الفظايح انتي لا بارك الله فييك !
منال : وانت هذا الي همك !! الفظايح وحكي الناس .. وبنتك ماهمك وش تحس فيه ووش يصير فيها !!
أبو تركي وهو بالقوة ماسك نفسه لايذبحها : انتي الي جبتيه لنفسك ولا شوفي نهى كافة عافة مابها شي
منال وهي تخبط على صدرها : نهى ياعمري كاتمة بقلبها .. وبيجي يوم وتنفجر فيكم وبتدفع ثمن الي بيصير فيها غااااااالي !
تركي : خلاص يامنال كافي الله يسعدك امشي اطلعي غرفتك خلاص
منال واهي ترمي نفسها على الارض وتشاهق : آآآآآآآآه .. مااابي أقعد بهالبيت .. آه ياقلبي مو قادرة أنفس .. طلعني من هالمكان تركي
تركي انهبل وقعد جمبها واهو يقول بخرعة : منال شفيك شتحسين ؟؟؟
منال بصوت منتهي : تعبانة ياتركي .. مخنوووووقة وقلبي ينغزني
طالع تركي بأبوه بنظره فيها اللوم والرجاء .. كنه يترجاه يخليها تطلع من البيت وترتاح
أبو تركي رق قلبه على بنته وقال بهمس ماخلى من الصرامة : تبي تروح مكان خلها تروح بيت أبوي .. روحة لبيوت خوالها مافي !
وتركهم وصعد الدرج .. وتركي مسك منال يوقفها ويقول : خلاص منال اجهزي وبوديك بيت جدي وان شاء الله ترتاحين هناك
ماردت منال لانها ماعاد فيها ترد وتتكلم .. انصدمت بموقف أبوها معها .. ضربه لها قدام نوال وهالشي كسر عنفوانها قدام عدوتها .. قهرها موقفه من خوالها وهالشي الي صارت تلاحظه من دخلت نوال حياتهم .. جرت جروجها وراها واهي تعبي عفشها بدموع صامتها وشهاق مكتوم .. ونزلت ووداها تركي لبيت جده ..
أما نوال فكانت بارعة بتمثيل دور المسكينة المظلومة ..
والي حتى بعد الي صار مثلت ان منال كسرت خاطرها يوم طاحت وتعاتب ابو تركي على ضربها !! وصار الي كانت تتوقعه من أبو تركي .. صدقها وصدق مشاعرها !!
::
كان صالح بالحوش يكلم الحارس لما انتبه لسيارة واقفة قدام باب بيتهم هالوقت !!! عقد حواجبه باستغراب .. ومشى للباب وفتحه وشاف تركي نازل ومعاه منال وشنطة صغيرة بإيده !!
صالح وهو ينقل بصره بينهم : هلا والله .. عسى ماشر !
تركي : الشر مايجيك
فتح لهم الباب ودخلوا ومشوا بالحوش بصمت لين دخلوا الصالة وكشفت منال غطاها وشاف صالح أثر الكف الأحمر الممزوج بالزراق على خدها وانصدم !!!!!!
تركي : منال شصاير !!
انهارت منال وطاحت بحضن عمها تبكي وتناهج وتقول : عمي ابوي يكرهنا .. اتخيل عمره مامد إيده علي والحين ضربني كف وعشان مين بعد .. عشان بنت الـ .....
تركي اتنهد واهو يقعد ويفرك وجهه بتعب وضيق .. وصالح ضمها واهو يهديها ويسمي عليها لين هدت وقعدت .. وحكوه شصاير وطلعت منال كل الي بخاطرها ..
صالح : ياعمري يامنال بيفرجها ربك انتي الحين اهدي وارتاحي والبيت ذا كله تحت امرك وان بغيتي اعطيك غرفتي نامي فيها وانا اطلع
منال : ماتقصر ياعمي وانا بنام بمجلس الضيوف مكان ماكل من يجي ينام هنا
صالح : براحتك منال قلتلك سوي الي يريحك ..
تركي واهو يوقف : زين انا بامشي ..
صالح واهو يغمزله : ماودك انت تنام هنا بعد !
تركي يتنهيدة : والله ان كان تبي الصراحة ودي .. بس بخلي نهى ووائل لمين انا متأكد بكرا بتقوم النسرة تحط حرتها فيهم
صالح : ياشينها عاد شكلها مايعطي أبد انها نجسة
تركي : مو هذا الي خادع أبوي .. يالله ماعلينا بيجي يوم يبان فيه كل شي .. (( وقرب لمنال ورفع راسها بدقنه وابتسم لها بحنيه .. بادلته الابتسامة بخفة واهو مسح على خدها المورم .. واتنهد من خاطر وقال : يالله اجل .. ماوصيك على اختي يالحبيب ..
صالح : ورني عرض اكتافك بس
تركي : زين يالله سلام
وطلع عنهم واهو يحس بالهموم مثل الصخر على قلبه .. ركب السيارة وخبط الباب بكل قوة واهو يمسك نفسه بقوة لايصرخ .. ابتسم بسخرية واهو يفكر بالظروف الي صارت بوقت ماداعبت خواطره أجمل المشاعر .. هذا وانا الي ناوي أفاتح أبوي بموضوع بنت عمي وأخطبها يالله خليني اشوف ان كان عطى أحد منا وجه طول الفترة الجاية ..ايييييييه ماقول غير مالت على هالحظ !!
::
منال شالت شنطتها وراحت لمجلس الضيوف الي مخصص لاستقبال الضيوف وطلعت شراشف جديدة من الدولاب غيرت فيها شراشف السرير .. حست راسها بينفجر من الصداع .. أخذت من شنطتها حبتين بندول بلعتهم بدوم موية .. ربطت راسها بطرحتها واتمدددت وبكل تعـــ ــ ب نـ ـامت
****
معاي على أول طيارة رايحة لابريطانيا .. (( طيارة المشاعر بس ))
طلعت وعد من شقتها وقفلت الباب واهي تمشي مسرعة وتطالع الساعه .. يووه تأخرت !! أسرعت بمشيها لين وصلت الباب وفتحته وطلعت الشارع مسرعة ..
بهاللحظة كان سعود موقف السيارة بالمواقف ونازل واهو يكلم بالجوال : هاه شلونك حبيبتي الحين ؟؟؟ أكيد أحسن ؟؟ والله قلقان عليك حياتي .. أفا عليك شلون ماغليك ! ماعليك منها هذي داخله بين البصل وقشرتها .. ياعمري عليك ..
انصدمت وعد واهي تسمع هالكلام وعيونها معلقة فيه ..
واهو شافها وأشرلها بإيده الي ماسكة جاكيته من خلف كتفه وكمل كلام بالجوال واتعداها .. عصبت ليه بعد مايسلم ؟؟
واتذكرت انها متأخرة عن الدوام ودورت بعيونها سيارة شهد لقتها رااااحت !! لاااااااااااء شهد ويييينك ؟؟؟؟ اتمنت لو معها جوال تتصل عليها بس آآآآخ ياحظي انا الي حتى جوال مو قادرة أحصل عليه .. مشت شوي تدورها ومالقتها وخلاص عصبت وماتحملت كل الي يصير عليها مره وحده وضربت الأرض برجلها بقوة واهي تصرخ :
I haaaate yooou
سعود وقف فاجأة ودار واهو يقول : وي وي وي مين ذا الي تكرهينه !
طالعته وعد بعصبية وماردت وصارت تمشي بين المواقف تدوّر شهد وترجع وتلف وتدور وكل ماجت عينها بسعود أبعدتها بعصبية .. وسعود واقف مكانه يطالعها واهي معصبة ويبتسم !!
وعد : الحين بدال ماتضحك ليه ماتساعدني !
سعود بابتسامة ساحرة : آمريني وعد !
وعد : جوالك لو سمحت !
سعود واهو يمده لها : اتفضلي
ذابت خواطرها من تعامله الساحر ومشت بحرج وأخذت الجوال ودقت على شهد وأول ماردت عليها قالت : شهد فيييييينك ؟؟؟؟
شهد : انتي الي فينك صارلي نص ساعه انتظرك واتصل على تلفون بيتك مايشبك
وعد : سوري شهد تلفوننا مفصول .. بليز الحين تعاااالي
شهد : ماقدر وعد انا الحين بالمحل !!
وعد : هو ماي قاد .. أوكي باااي !
سكرت واهي تتنهد بقهر .. وسعود فهم ورطتها وقال : أي خدمة وعد !
وعد : نو ثانكيو سعود ..((وعطته الجوال ..
سعود : والحين شلون بتروحين الدوام ؟؟
وعد : باتصل على سيارة أجره !
سعود وهو يرفع حواجبه : أوووه !! ومن وين بتتصلين ؟؟
وعد واهي تمشي لباب العمارة : من تلفون بيتي
سعود : كني سمعتك تقولين لشهد ان تلفونكم مفصووول !
وقفت وعد فاجأة واتذكرت هالشي وخبطت الأرض برجلها واهي شوي وتبكي وقالت واهي ماسكة جبهتها بحيرة : ياربي اش اسووووي (( وقعدت على مركن زرع تهز رجلها بتوتر
ابتسم سعود واهو يشوفها معصبة على الآخر وقال : يا الله ياوعد كل ذا عشان ماتطلبيني أوصلك ؟؟
وعد : سعود خدمتني لمافيه الكفاية .. وهمست : خلاص !
سعود : اوكي اعتبريني سيارة أجرة وعطيني قيمة التوصيلة !!!
وعد : جد ؟؟؟
سعود بسخرية : عشان لاتجرحين كبريائك !
وعد : عارفة انك مستحيل حتاخدها
سعود واهو يطالع الساعه : فاتت ساعه على دوامك .. ومخصوم من راتبك 10 % .. وكل دقيقة بتتأخرينها بينخصم عليك أكثر .. (( ورفع عينه يطالعها وقال : والحين برضو ماتبيني أوصلك ؟؟
وعد وقفت واهي تقول بضيق : اوكي اوكي .. يالله بسرعه !
ابتسم سعود ومشى لسيارته واهي لو ماحاجتها للهللة الوحدة كان غابت اليوم وماراحت معاه .. ركبوا ومشى سعود بالسيارة .. وطول الوقت يلمح وجهها المولع .. ورجلها واهي تهزها بعصبية .. ومع حرصه انه مايحاكيها أبد بالسيارة بحكم خلوتهم الا انه قال بهدوء : ريلاكس وعد !
طالعته وعد وخفق قلبها من نظرته الحنونه .. ودارت وجهها للشباك تتجنب نظراته الي بتذبحها .. وكل شوي تطالع الساعه وتحسب قد ايش اتأخرت .. لين وصلت أخيرا .. فتحت الباب واهي تقول : مره شكرا سعووود ..
سعود : العفو وعد ..
نزلت وصكت الباب واهو انتبه لشنطتها ناسيتها بالسيارة .. فتح الشباك ونادها
التفتت بسرعه وشافت الشنطة ضربت على جبهتها واهي تندب غبائها ..
أخذتها بسرعه وشكرته .. ومشت بسرعه لباب الفندق .. ومن عجلتها طاحت الشنطة.. انحنت بسرعه وأخذتها ويوم وقفت وجت تمشي طاحت ورقة من الشنطة صرخت : نووو واااااي !!!
وسحبت الورقة بسرعه واهي ماتدري شهالحظوظ النحسة الي جاتها ورى بعض اليوم وركضت لداخل الفندق !
كل هذا تحت نظر سعود الي شافها وهز راسه وضحك ..
ورجع تارك قلبه طاير مع صاحبة الأعصاب الثايرة الي داخل الفدق !
وصل الشقة ودخل واهو يفكر بالمواقف الي صارت بينه وبينها من سكن العمارة ..
يحس بتقارب كبير بينهم .. يحس انه يعرفها من زمااااااااااااان ماكنه عارفها من شهر بس .. ! وأنس الي بكل مره يستلمه بمحاضرة طويلة عريضة ويذكره بأهله ويذكره بمنال ..
ليه أنس تحسبني ناسي !! منال الي مادري خطوبتي لها هي صح ولا خطأ .. بنت عمي على عيني وراسي بس ماحس بأي ميل لها !! يالله ياعسى الاوضاع تتغير بعد الزواج ..
وعصر الألم قلبه من طرا على باله الزواج .. ومايدري ليه مر طيف وعد قدامه .. وعد هذي الي ماعرفتها الا من فترة بسيطة سوت فيني الي ماسوته منال سنين .. !!
هل باقدر أبعد عنها وبساطة أروح وأتزوج واهي وش بيصير فيها ؟؟ وانا الحين ليه شايل همها مو كانت عايشة من الاساس بدوني .. غلط الي قاعد يصير بيننا اذا مو عشاني عشانها .. حاس اني علقتها فيني بلا فايدة .. ان كان باتحمل بيوم فراقها هل اهي بتتحمل ...؟؟؟ انا شلون سمحت لنفسي أسترسل بمشاعري وأظلمها معاااااي .. حد من نفسك ياسعود ترا البنت مو ناقصة معاناة الي فيها كافيها ..
(( يالله !! بدري ياسعود .. توك تنتبه ؟؟؟ بعد ماعلقت وعد فيك وصرت هاجس حياتها .. حتى واهي بدوامها الحين مو قادرة تركز بشغلها بسببك .. تنام على ذكراك وتصحى على ذكراك وكل شي حولها صار مختلف بعيونها من بعد ماسكن قلبها ......... اسم من أربع حروف !! ))
*******
اليوم الوطني
يجسد اليوم الأول من الميزان 23 سبتمبر من كل عام مرحلة فاصلة في تطور المجتمع السعودي الحديث ، شكلت في مضمونها وحدة وطنية رسم معالمها ووضع أسسها الملك عبد العزيز - رحمه الله - بتوحيده وإعلانه للمملكة العربية السعودية ، هذا اليوم يحمل رؤية خاصة ترتبط فيه خصوصية الذكرى بنمط الاحتفال وذكرى التوحيد الذي أرسى قواعده الملك عبد العزيز.
دفنت مرام وجهها بالمخدة والبطانية تبي تسد آذانها من صوت التلفزيون العالي .. لكنه اخترق اذنها أكثر .. والصوت كل ماله يعلي .. عصبت وقامت ونفضت البطانية .. من الي رافع صوت التلفزيون كذا .. أعوذ بالله عجزت أنام .. وفتحت باب غرفتها تبي تصارخ عليهم يقصرون الصوت .. وسمعت :
إن قصة حياة وجهاد وانتصارات الملك عبد العزيز بن عبد الرحمن آل سعود - رحمه الله - تعتبر ملحمة تاريخية وقصة كفاح فريدة وأسطورية ، ذات فصول متعددة كتب أحداثها بكل اللغات ، ومعجزة نادرة جرت أحداثها الأولى في منطقة نجد قلب الجزيرة النابض ومن ثم تمددت إلى أطرافها الشرقية عند ساحل الخليج العربي ، لتصل غرباً إلى ساحل البحر الأحمر تضم أرض الحجاز مهد النبوة ومهبط الوحي ومقر الحرمين الشريفين وانطلقت في بسط سلطانها جنوباً إلى مناطق عسير وتهامة الجبلية والسهلية. ولقد تعرضت بلادنا كغيرها من الدول لعمليات إرهابية قوضت الآمنين وقتلت المعصومين ، ولكن عين الله تحرس بلد الحرمين الشريفين ومهوى أفئدة المسلمين مع يقظة رجال الأمن التي حالت دون تحقيق أهداف هؤلاء المجرمين ورد الله كيدهم إلى نحورهم ..... "
شخص بصرها بابتسامة لانها استوعبت أخير ان اليوم سبت .. هاليوم الي عادة يكون يوم كرييييييه على الكل
لكن هالسبت غيـــــــــــر !!
كانت فرحته غامرة كل بيت .. الكل مأجز ببيته .. طلبه وموظفين ..
لأن هاليوم اهو ............. ((( اليوم الوطني للمملكة العربية السعودية )))
طار النوم من عيونها فاجأة ورجعت غرفتها ودب بجسمها النشاط .. اليوم إجازة مابي أظيعه بالنووم .. أخذت ملابسها ودخلت الحمام وأخذتلها شور ولبست وطلعت تمشط شعرها عند المراية .. لفت نظرها حرف " K " مكتوب بالمناكير أسفل المراية .. جمدت ايدها واهي تشوف الحرف وتتذكر اليوم الي كتبته فيه..
+++
قبل أربع سنوات .. ياويلي أنا لي كم سنة ميته بهواك ؟؟؟ المهم كان خالد ببيتنا وأنا مادري .. كنت عند صديقتي ويوم رجعت لقيته يكلم بالجوال ويدور بالصالة وماشافني .. اتسمرت مكاني وأنا أشوفه وأذكر قلبي وقتها بغى ينط من مكانه .. وقفت ورى الباب أتأمله .. كانت ملامحه ذايبة وابتسامتة الي تطير العقل مرسومة بكل ابداع على وجهه .. كان يضحك وآخ شكثر هوستني ضحكته .. وبالآخر قبل مايسكر الجوال سوى حركة !!! يوووووووووه أنا شلون مانتبهت لهالحركة !!! كنت وقتها غبية ولا افهم شي غير اني أحبه وبس .. الحين اتذكرت انه قبل مايسكر قرب الجوال من فمه وباسه !! كيف فاتتني حركته هذي ؟؟ وقتها ماصدقت طلع طرت على غرفتي أفكر فيه بحبور وحب وبلا شعور كتبت هالحرف على المراية ..
+++
ابتسمت بمرارة واهي تستوعب : كنت تكلمها أجل ذاك الوقت !!
تأججت نيران الغيرة بقلبها ورمت الفرشة بقوة على الطاولة ومسكت مناكير بلون أقوى وشطبت على الحرف .. هالمرة شطبت حرفك من مرايتي ياخوفي يجي يوم أشطب اسمك كله من حياتي !! اتنهدت بضيق .. بس مرام اتركيه عنك وانبسطي اليوم إجازة .. دارت بالغرفة واهي تحاول تهدي نفسها خاصة بعد ما استرجعت هالذكرى القديمة .. وعدتني تفهمني كل شي ياخالد .. وبعدها بشوف ان كان قدرت أعذرك أو لاء .. جرحتني ياخالد جرح بتتعب عشان تداويه .. بس مرااامووه فضيها سيرة وروحي رجي البيت خلينا نتونس بهاليوم .. لمت شعرها كله على فوق وطلعت من غرفتها متناسية همومها ..
دقت على غرفة منى : منــــــــــــــــــــــــى .. منووووووووووو .. افتحي بسرررررررعه
منى : مفتوووووووووووووح
فتحت مرام الباب ودخلت لقت اختها تحت البطانية بسريرها ..
مرام واهي تسحب البطانية : منى قوووومي اليوم سبت مافي دراسة مافي دوااااام اجااااااااازة قومي ننبسط
منى : مرام اطلعي تكفييييين بنااااام
مرام وهي تجر البطانية بقوة : مافيه نووووم منى بليز قوووومي خلينا نطلع
منى : بعدين يامرام بعدين
مرام : مافيه بعدين احنا ماصدقنا اليوم اجازة تقولين بعدين لا والله قووووومي
وراحت صكت المكيف وفتحت الستارة يعني أنواع التخريب !
تركتها وراحت لحنان دقت الباب ..
حنان الي على النت: مييييييين
مرام : حنان صاحية ؟؟؟؟؟
حنان : ايه شتبين مرام ؟؟؟
مرام: بغيت أصحيك بس رحمتي نفسك وصحيتي قبل أجيك هههههههههههههه
راحت وحنان ابتسمت ورجعت على النت تكمل كتابة خاطرتها .. تمت آخر كلمة فيها وبعدها أضافتها ضمن خواطر المنتدى الي يغلب عليها الحزن
" هل من مفر ؟؟ "
أكاد أختنق .........
نظراتهم تُحرّ قلبي أحـرّ من الجمـر
همساتهم طعنات تطعن روحي طول العمر
محطمة أنا
في ليالي عشتها وحدي تحت ضوء القمر
تمنيتُ لو غيرتُ حالي وقلبتُ القدر
وعشتُ دوما سعيدة بلا كدر
بلا حياة بؤس وعيش الضجر
ليلة لن يمر مثلها طول الدهر ......... !!
حاولتُ خنق روحي بوشاحي وأنتحر !
وأسقط بين رماد مشاعري على الممر ...
ويرآني كل مجروح أرغمه جرحه على السهر
لأصبح على آخر عمري عبرة لمن اعتبر
يالسخرية القدر ..
كرهتُ حالي الذي سيلحق بي الخطر !
فهل من مفر ؟؟
قرت موضوعها والحزن يعصر قلبها .. وراحت لقسم الخواطر لتتفاجأ بموضوع نزل بنفس اللحظة الي نزلت موضوعها وللعضو " لجل جروحك "
أشوف الحزن بعيونك فلا استمتعت ولا اتهنيت
لأنك عايشة بهمك بعيدة عن من حولك
يابنت الجود تراك أحلى بلا كلمة " أنا عانيت "
ترا كل الي يطالعونك لأنهم سمعوا قولك !
ولو عشتي مثل غيرك تقولين أنا اتمنيت
وأنا أقوى وأنا أجمل ترا تتغير فصولك !!
ترا بتنسين ليالي الجرح ولاتقولين ليت وليت
وتبتسملك ليالي الفرح والي تبينه ينولك
بس انتي امسحي الدمعة ترا بالأمل غنيت
فهمتيني يابنت الناس ؟؟ دخيلك غيري قولك
عادت حنان قراية الكلمات عشر مرات واهي مو مصدقة شكثر أثرت فيها وغيرت من نفسيتها وبدلت حزنها الي من لحظات لفرح خلى حتى دموعها انحبست بعيونها ومانزلت !
وعادت قراية آخر بيت :
فهمتيني يابنت الناس ؟؟ دخيلك غيري قولك
اتذكرت الخاطرة الي كتبتها من شوي .. رجعت لها وقرتها مره ثانية وحست بالجرح بااااارد هالمرة !!
أرسلت رسالة للمشرفة المتواجدة هالوقت وطلبت منها حذف الخاطرة ..
ومامرت الدقايق الا والخاطرة محذوفة
ابتسمت واهي تقول : خلاص غيرت قوولي ..
واهو بعد ابتسم لأنه كان مراقب الي صاير لحظة بلحظة .. !!
سكرت النت وقامت وهي حاسة بحبور .. هالشخص قلب كيانها وحسسها بأشياء ماتوقعت بيوم ممكن تحس فيها .. هذا من وين جاني ومن وين طلعلي ..
اهو شخص واحد بس الي كان من زمااااااااان يحس فيني بدون ما اتكلم ويفهمني من نظراتي !!!!
كنت وقتها أتضايق لا فهمني ووصلي كلام .. !!
أتضايق شلون يعرف عني وعن أحاسيسي .. !!
بس هالشخص ماعاد له وجود بحياتي خلاص .. مادري أهو الي رااااح .. ولا أنا الي رحت .. مرات أحسه قريب .. ومرات أحس اني أتوهم وأقتنع ان ماعاد له وجود ..
اتنهدت ونفضت عن بالها الأفكار .. خليني أستانس اليوم دام الكل مأجز ..
طلعت من غرفتها ونزلت الدرج واهي تسمع ضحكهم واصل من تحت .. نزلت الصالة وركضت عليها ساره .. فتحت حنان ذراعينها وطاحت ساره بحضنها واهي تضحك وحنان شالتها وباستها وقالت : شلون بنتي اليووووم ؟؟؟
ساره : طيبة ..
حنان : أفطرتي حبيبتي؟؟
ساره : ايه أنا وفيصل أكلنا بطاطث شبث .. " بطاطس شبس "
حنان : شبس على الريق ؟؟؟ ومشت لهم واهي تقول : وغريبة فيصل صاحي بدري !
فيصل : مواصل مانمت
حنان : يوووه ليه كذا .. (( وابتسمت للكل واهي تقول : السلام عليكم
ردوا السلام وأبو فيصل قال : اقعدي يمه اتقهوي وانتي ساره انزلي عن خالة حنان
ساره : هذي ماما حنان مو خالة حنان ..!
ضمتها حنان بقوووة وباستها وقالت : عساني فداك ياعمري
قعدت معهم وصبتلها ام فيصل شاهي .. ومرام قالت : لا تشبعون الحين وخلونا نتغدا برا
ساره : برا بالسارع ؟؟؟؟؟؟؟؟؟
ضحكوا كلهم عليها ..
مرام : هههههههه ياخبلة مو بالشارع بنتغدا برا بمطعم
ابو فيصل : هالاجازة استغلوها بمذاكرة دروسكم ولا نومكم مب بالهجهجة
منى : وانا ماعندي دروس وشبعانة نوووم خلاص باطلع انا وحنان
مرام : مسكييييييينة انتي واهي والله رجلي على رجلكم بلا دراسة بلا هم!
فيصل : الحين من جدكم تطلعون اليوم ؟؟؟؟
منى : ايه ليه لاء !
فيصل : الدنيا بتصير خبصة وزحمة كل الناس بتطلع وانتو وجيهكم طالعين بينهم !
مرام طالعت ابوها الي مندمج بالتلفزيون وهمست لفيصل بقهر : فيصل تكفى اسكت لا يعيي علينا أبوي الحين بعدين احنا بنطلع بدري مو بالليل عشان تقول زحمة
فيصل : حتى لو بدري اليوم كله زحمة
ساره : بنروووح مطعم احنا مو بالسارع عشان تقول ذحمة
فيصل طير عيونه فيها وقال : حتى انتي يالمفعوصة تبين تطلعين ؟؟؟
ساره : أنا مو مغعووووووثة !!
فيصل يعاندها : الا مفعووووصة ودوووبا بعد خلصتي شبسي اليوم
ساره نطت عليه وضربت صدره بإيدها الرقيقة واهي تقول : انت الدوووب انت المفعووووث
فيصل يقلد عليها : انا مو مفعووووث انتي المفعوووثة يامفعوووثة يامفعوووثة
ضربته ضربات متتالية على صدره قام شالهاااااااا وطيرهاااااااا واهي تضحـك وحنان وام فيصل خافوا عليها وقالوا يوقف
نزلها وقال : يالله انا طالع تبون شي ؟؟
مرام : على ويييييين ؟
فيصل : شدخلك ؟؟
أبو فيصل : لا اله الا الله خلونا نسمع !
وابتدت أغنية انهبلوا عليها البنات وصاروا يصفقون ويغنون معها ..
وأم فيصل مسكت إيد ساره ترقصها ..
ومشعل استخف وقام يرقص :
يادار لاهنتي ولاهان راعيك
ولاهان شعب كرموا راية الدين
حب وكرامه دارنا اليوم نحميك
ونروي ترابك من دمانا نباهيك
حنا لآل سعود دروع لأراضيه
حنا اذا صاح المنادي نلبيه
حنا لبو متعب دروع لأراضيه
حنا اذا صاح المنادي نلبيه
ابو فيصل ضحك عليهم وقام وطلع .. ومرام قالت بصوت عالي : عاااااااااشت حكووومتنا عااااااشت ..
فيصل : أعلى بعد ماسمعوك ..
مرام : ههههههههههههههههه مو لازم يسمعوني انا أتكلم جد ما أنافق
فيصل : اوكي انا طاااالع تبووون شي ؟؟؟
ساره : انا أبي حلاويااااات
فيصل وهو يمشي للباب : لا مافيه انتي مفعوصة تضربيني ..
ساره تركض وراه : لاااااا خلااااص آثــفة .. " آسفة "
انحنى فيصل قدامها وقال : اوكي عطيني بووسة
ضمته صاره من رقبته وباسته بقووووووة وفيصل ضحك وقال : بس خنقتيني كل ذا عشان الحلاو
ساره : اي الحين ابي حلاو وشوكلاااات
فيصل واهو يوقف : ههههههههههههههههه ان كيدكن عظيم
أم فيصل واهي تتأمل ولدها وحنانه على ساره : يمه وين بتروح ؟؟
فيصل : باطلع أنا وخالد وشكلنا مو مطولين لان كلنا مواصلين
أم فيصل : انتبهوا على أنفسكم أجل ولا تطولون
فيصل : ان شاء الله .. يالله سلام
وطلع عنهم ومرام تعلق ذهنها بآخر كلام سمعته .. خالد شعنده مواصل ومانام ؟؟ ياربي مو قلت مو مفكرة فيه اليوم .. آخ بس كل ماجا طاريه فزيت حسبي الله على ابليسك ياخالد !
منى : تسمعييييين ولا لاء ؟؟؟؟؟
مرام انتبهت : هاه !
منى : ليه ماتردين أقولك لينا بتجيني بعد شوي ونطلع سوى
مرام : اووووكي حلووووو أجل قومي نجهز
منى : اي يالله ..
قامت والتفتت لحنان واهي تقول : تطلعين ؟؟؟
حنان رفضت .. بس هالمرة عشان تبي تقعد على المنتدى تقرا كل مايتعلق بذاك العضو الي قلب كيانها
ومحد جادلها لأنهم اتعودا ماتطلع معاهم .. وقاموا وجهزوا وجاتهم لينا .. وسلمت على أم فيصل الي تحب هالبنت حيل وتعرفها من وهي صغيرة اهي وأهلها وأنس أخوها الي كنه واحد من العيلة ..
طلعوا كلهم وركبوا السيارة ومشوا .. وبعد فترة دقت مرام على فتون وأول ماردت
مرام : فتووووون احنا بالطريق
فتون بضيق : ياربيييي ..
مرام : شفيييييك ؟؟؟
فتون : ياختي مابي أخلي عبير لحالها !
مرام : بس يافتون يعني وش بتسويلها انتي ان شاء الله ماتحتاج شي وبعدين امك ماتقصر
فتون : أدري انا مو قصدي أخدمها بشي لا يعني أونسها مو تضيق لحالها واحنا مبسوطين !
مرام : يوووه يافتون محنا مطولين وبعدين هي قالتلك شي ؟؟؟
فتون : لا بالعكس أصرت علي أروووح
مرام : أجل خلااص ياشينك لا مثلتي درو المضحية مب حلو عليك أبد
فتون : هههههههههههه أوريك يالنحسة ..
مرام : هههههههههه يالله ترا قربنا
فتون : يالله استناكم .. باي
مرام : باي
وصلوا بيتها ونزلت فتون وركبت وراحوا كلهم سوى للمطعم الشهير " تشيلز "
كانت قعدتهم رايقة وحلوة وكونهم طالعين عز الظهر فكان الوضع مو مره زحمة ..
فتون : يعل ابليسهم شوفوا البيبسي بكم ؟؟؟
مرام : اي والله استغلاااااااال هذا
فتون : والله مو دافعتلهم نروح نجيب من ماكينة البيسبي أصرف
منى :بلاهبال وانا بادفع على حسابي
فتون: لا والله ماتدفعين تراني مقرشة يكون بمعلومك بس لعانة فيهم مو شارية منهم
مرام : يعني شلووووون
فتون : من معاها ريالات .. !
لينا : هههههههه من جدك بتجيبين من المكينة ؟؟
فتون : اييييييه شوفيها جمب المطعم ..
منى : وكيف بتدخلين البباسي والله بتفظحينا انتي ترا ممنووووووع
فتون : يطقون روسهم بالجدار .. هاتوا الحين ريالات وبدخله بطريقتي
ضحكوا وعطوها ريالات من هنا ومن هنا لين صارت بعددهم ..
طلعت وسحبت مرام بالقوة معها
راحوا المكينة وشروا بباسي ..
فتون : يالله دخلي واحد تحت ذراعك اليمين والثاني تحت ذراعك اليسار
مرام : هههههههههه فتوووون والله فشششششلة
فتون : ههههههههه ياشيخة عادي
وسوا كلهم نفس الشي ومشوا بشويش
مرام : ياربي بيتزحللللللق
فتون : ياغبية اضغطي عليه بقووووة
مرام : ههههههههه حسبي الله على ابليبسك احس الكل يطالعنا
فتون : كيفهم وتشوفين اذا ماسوا مثلنا
وصلوا الطاولة وقعدوا ماكنهم مسوين شي وطلعوا البباسي وضحكوا وفتحوها وشربوها ولامن شاف ولا من درا ..
قاموا من الطاولة وشالوا جوالاتهم .. جوال لينا ومنى نفس الشكل ونفس اللون فتلخبطوا وكل وحده اخذت جوال الثانية ..
طلعوا وركبوا السيارة ومشوا واهم بالطريق رن جوال لينا بشنطة منى .. النغمة كانت للارقام الغريبة و منى حاطة نفس النغمة للارقام الغريبة
طلعت الجوال وشافت الرقم خارجي استغربت وردت : الووو
ـ : هلاااااااااااااا
منى باستغراب : أهلين مين معاي !
ـ : أفاااااااا نسيتي صوتي يالخسيسة
منى : هي انت احترم نفسك ولا تسب ..
ـ : ياويلااااه وليه معصبة عيب عليك كم لي ماكلمتك أنا !!
منى بنفخة : ترا شكلك غلطااااااان
ـ نعم !! اقول مين معاي ؟؟؟؟
منى : انتي الي داق وتسأل مين معاك صدق ناس فاضية
وسكرت بوجهه ورجعت الجوال شنطتها
مرام : مييييين
منى : واحد يستهبل ويمون بعد ياشين هالاشكال
دق الجوال مره ثانية راحت طلعته وحطت نو بوجهه ورجعته
وخلاص ماعاد دق
فتون : لاتروحون البيت بالله خلونا نمر على السوق
منى : تبين شي ؟؟؟
فتون : لا بس نفر فرة ونطلع
مرام : اي والله وش ورانا ..
منى : لاتنسون ترا امي محذرتنا مانتأخر
فتون : يوووه حتى امي .. بس مو متأخرين ان شاء الله
وراحوا للسوق ونزلوا يدورون .. وسرقهم الوقت لين بدا يتزاحم السوق وخافوا وقرروا يرجعون ..
واهم طالعين من السوق دق الجوال بشنطة لينا بأغنية : انت غير الناس عندي انت عندي شي كبير ..
استغربت لينا من الاغنية لأنها مو حاطتها بجوالها .. ويوم طلعت الجوال لقت الاسم : "شيخهم" استغربت من هذا ؟؟؟
منى : شفيك ماتردين ؟؟؟
لينا : مادري شهالاسم ماعمري حطيته ولا هالاغنية !
منى : اشوووف .. (( وشافت الاسم و .. استوعبت أخيرا .. !!!
منى : لااااااااا هذا فيصل المتصل الي معاك جواااااااااالي
لينا : وشوووووووو؟
منى : جوالي الي معاك وجوالك معااااااااي .. يافشلتيييييييي شكل اخوك اهو الي دق واحنا بالسياااااااارة !!
لينا : واااااااااااااااااااااااه !!
البنات : هههههههههههههههه شالغبااااااء الي فيكم !
منى وهي تعض فمها بقوة : ياربي شهالفشششششلة وقاعدة اصارخ فيه انا ووجهي واهو مستغرب مني شفيني اتكلم بهالطريقة وأخانق
لينا : هههههههههههههههههههههههههه بعد عمري يا خووووي والله لا اقوله تراها الخبلة منى
منى شوي وتبكي : لااااااااااااا تكفييييييين لاتفشليني
لينا واهي تغمزلها : شدعووووووة ؟؟؟
منى حمر وجهها وضربتها وأخذت جوالها ورجعت تتصل على فيصل ورد : الوو
منى : هلا فيصل دقيت ؟؟؟
فيصل : اي وينكم ؟؟
منى : امممممم .. تونا طالعين من السوق ورايحين البيت !
فيصل : طالعين من السوق ؟؟؟؟ مو قلتوا تتغدون وترجعون ليه رحتوا السوق؟؟
منى : فتون بغت غرض و .. رحنا بسرعة ماطولنا وخلاص الحين راجعين
فيصل : ايه قولي ان فتون معاكم ذي خراب السفية دايم ..
منى : هههههه حبووو بنت خالتووو
فتون : أدري انه يسب فيني ..
فيصل : الشوارع زحمة يامنى ماينفع ترجعون هالوقت مع السواق !
منى يعني شلون ؟؟
فيصل اتأفف وكلم خالد شوي بعدين رجع وقال : خلاص قولي للسواق يرجع البيت وانا جايكم الحين .. وين السوق ؟؟؟
قالتله منى مكان السوق .. وراح السواق وجاهم فيصل معاه خالد
فتون : أوووووووف شهالنشبة !
مرام : اقول اركبي وانتي ساكتة عاد أنا الي طايقة أركب الحين !
ركبوا البنات وسكروا الباب ومشوووا
لينا كانت منحرجة حييييل من تواجدها بينهم فكانت مغطية وجهها وكاتمة أنفاسها
فتون لاحظتها وضحكت واهي تقول : شفيك خانقة عمرك ؟؟
لينا بهمس : اسكتي ..
فتون : هههههههههههههههههههه شفيه صوتك كنها دجاجة مذبوحة
منى : ههههههههههههههههههههه وانتي من وين سامعة صوت الدجاجة واهي مذبوحة
فتون وهي تضحك : مادري بس حسيت صوتها مثله ..
خالد : منهي هذي ؟؟
منى : لينا اخت أنس
خالد : أنــــــــس !! خوي سعود ؟؟
منى : اييه
خالد : هلا باخت الغالي شلونك ؟؟
لينا بهمس : الحمدلله
فتون ضحكت عليها : هههههههههههههههههههههههههه
قرصتها لينا بقوة وفتون صرخت : آآآآآآآآآآآآآي وجع !
اثنين كانت النار شابـّةفيهم لو طلعت كان أحرقت السيارة بالي فيها !!!
فيصل الي مولع من حركات فتون واستهبالها ولاهي مراعية وجوده ولاهي معبرته أصلا وحاسة فيه ..
ومرام الي ولع وجهها من الغيرة وخالد يسأل عن لينا ويكلمها .. ثارت أعصابها واهي تهز رجلها بقوة .. على طول شال الميانة ويسألها عن احوالها .. اي مالومك دامك خبرة ماشاء الله عليك !!
وخالد طالعها من المراية وشاف وجهها شكثر مولع ولاحظ عصبيتها وأنفاسها المتسارعة .. شفيه القمر معصب !! لايكون عشان ركبت معاي ! آه مالومك دامك للحين مصدومة مني والله ما أتحمل هالنظرة الي بعيونك .. شتفكرين فيه يامرام هاللحظة !!
سكت شوي وفاجأة لمعت عيونه بفكرة حس انها كفيلة بقلب موازين الأمور من الى .. !!
ارتاح لهالخاطر .. ومد ايده لشريط وشغله واشتغلت أغنية :
انت العزيز انت
انت المهم انت
انت اغلى ناسي كلهم
قلبي واحساسي معاك
لا تظن قلبي عندهم
مشيت في كل الدروب
ومرت على قلبي قلوب
بس انكتب اني اذوب
واختارك انت بينهم
اخذتني مني اليك
حببتني بجنون فيك
الله عليك الله عليك
اشرقت وغابت شمسهم
تلاقت عيونهم فاجأة وتبادلت نظراتهم معاني يعجز القلب يعبر عنها ..
ومرام استجمعت قواها لاتضعف .. اهو لازال بنظري خاين لين أفهم كل شي ! أبعدت عينها بسرعه وخالد اتنهد واهو حالف ينفذ الفكرة الي بباله أول مايوصل بيت خالته !!
وصلوا البيت ونزلوا وفتون قالت : خالد ليه ننزل ؟؟
خالد : بسلم على خالتي ونمشي ..
فتون : اوكي .. (( ودخلت
سبقوها كلهم لداخل واهي لفت نظرها ورد بالحوش راحت عنده وقطفت منه أشكال مختلفة .. ويوم وقفت ودارت شافت فيصل توه داخل من الشارع وسكر الباب
اتوقعت يجي يناكفها كالعادة ولا يهاوشها على الورد ولا أي شي .. لكنها انصدمت يوم مر من قدامها ولا عبرها !!!
غريبه !! شفيه هذا مطنشني ولا كني آدمية عنده ؟؟ .. فكرت لحظات وبالآخر قالت .. بالطقاق بعد هذا الي ناقص أشغل نفسي فيه .. وفعصت الورد بإيدها بدون سبب مقنع ودخلت البيت !!
خالد بالمطبخ : بسرعه خالتي مابي أحد يدري اني بكلمك
أم فيصل : شعندك ياحافظ عسى ماشر
خالد بابتسامة: الشر مايجيك ياعمري بس شي لا يحتمل التأجيل
أم فيصل واهي تمسح ايدها بالمنشفة : الله يستر .. يالله تعال المجلس الي ورى محد داري عنا
خالد : يالله ..
ومشوا للمجلس ودخلو وسكروا الباب وقعد خالد مع خالته وفتح الموضوع .
|