بدري من عمرك جناب الفجر داهمنا جنابه
وين راح الليل ؟ مدري! ليلة البـارح غريبـه


من كثر ماكنت افكر فيـك فرفـرت الكتابـه
راحت الشمس لمغيبه ورحت اجيبه من مغيبـه


جبت لك حل السؤال الفاخر وجبـت الأجابـه
( فاخره ) مثل السـؤال وسائلـه واللـي يجيبـه


باذخ الحسن القصيـد بخيـر والدنيـا خرابـه
ضيقوها بعندليبه .. ليـن .. هاجـر عندليبـه


ناعس الطرف انتهكت بطرفك الناعس غيابـه
ماتركته في غياهب غيبته مـدري شتبيبـه ؟


لين العود الجفـاف ذنـوب ساعـي ماسعابـه
لاتحملني ذنوب الحب واسبـاب المصيبـه


لاتقول انك قطعت الشـك بهطـول السحابـه
صاحبك يسعد صباحك مادرج مبطي شعيبـه


وانت ( يامال الذهاب )..الشعر تسعى في ذهابه
كل ماهبت هبـوبٍ منـك قلـت الله حسيبـه


تدري اني من عرفت الشوق والعشق وعذابـه
مافتحـت القلـب مـره مالقيتـك مرتكيـبـه


يارديف البال حـول مابقـى بالحبـل مابـه
حيل حمل هموم جذب العـذب والدلـو بقليبـه


تلها واشـرب زلال المختلـف عـن التشابـه
التشابـه مايبـل الكبـد والتربـه خصيـبـه !


لاتقول انك عطشت البحر مخرلـك عبابـه
انت لو تعطش سقيتك من عصافيـري حليبـه!!


شاربٍ فنجان بنٍ فيـه اصابيعـك مذابـه
وشتوقـع مـن حبيـبٍ كثر السكـر حبيبـه


كل ما الشوق استباح الروح وغيابـك عثابـه
كل كنز اكـز بابـه يجهـر الناظـر لهيبـه


فارع الغصن التناسق بين طولـك وانسيابـه
يسلب اللـب ويجيـب العيـد ويجيـد الغليبـه


( عندما يأتي المساء ) وتعلن الشمس انسحابـه
نور فانـوس النفيـس يبـدد الظلمـا الكئيبـه


مرهف الحس القصيد اوراق تتحـدى الرقابـه
مارضت تخفض جناح الذل وترائـي رقيبـه


صاحب الصبح الفخامه شي مايلغـي المهابـه
النحيف اللي تشوفه شايـف النحـف بنصيبـه


وانت كل اللي عليك اعطيتني قـوس الربابـه
لاتمايل خايف انسى نفسي يتقطع سبيبه