الحلو بالاغاني القديمة طبعا انه اكثرها غنيت على قصص حب حقيقية وتعرفون طبعا حب اهل قبل شلون كان صادق وجياش يعني اذ سمعت اغنية وانت تعرف قصتهااو على الاقل على منو غنيت اكيد راح تكون احلى والها طعم ثاني.....واليكم اغنية الريل وحمد للفنان الكبير ياس خضر بس ...هذي الاغنية كتبها شاعرنا الكبير الله مظفر النواب لقصة حقيقية عن لسان فتاة من اهل الجنوب اوتحديدا تسكن منطقة الاهوار قصة هذي الفتاة تبتدي بحب شاب من قريتها وبعد ان تطورت العلاقة بينهما ووفقا للتقاليد والاعراف العشائرية العراقية قررو اهلها قتلها حتى يتخلصون من العار الي اصابهم وفي احدى اليالي اخذوها بالقطار حتى يبتعدون عن المنطقة ويقتلوها بعيدا عن انظار الناس فصادف بالطريق ان مرو على مضيف حبيب هذي البنت الي هو حمد فلما انتبهت هي لهذا الامر وسمعت كلامهم وصوت دك الكهوة الي كانو يقدموها بالمضيف بدت تنشد هذي القصيدة.....والي تبتديها ب(مرينا بيكم حمد واحنا بقطار اليل واسمعنا دك اكهوة وشمينا ريحة هيل) وتنتقل لمخاطبة القطار وتطلب منه انه يمشي ببطء حتى تظل اطول فترة ممكنة بقرب حبيبها بحجة انها خايفة من القطار لايكعد السمك ( الكطه )الي عايش تحت(حدر) السنابل من النوم وتكله (ياريل صيح بقهر صيحة عشك ياريل....هودر هواهم ولك حدر السنابل كطة). تستمر بمخاطبتها القطار لان ماعدها شخص اخر تحجي وياه عن قصتهة وتبدي تشكيله من حبها الي طلع كذاب (دغش)وحبيبها الي تركها تتحمل ثمن حبهم لوحدهاطول العمر(ياريل طلعوا دغش والعشك جذابي .....دك بيه كل العمر مايطفة عطابي....تتوالف وية الدرب وترابك ترابي ....هودر هواهم ولك حدر السنابل كطة ).وبعدين وبرغم العذاب الي حملته ترجع تحن لحبيبها وتسولف للقطارعنه وعن خوفها الدائم(انة ارد الوك لحمد مالوكن لغيره.....يجفلني برد الشتا وتلجلج الليرة...ياريل باول زغرته لعبته طفيرة....هودر هواهم ولك حدر السنابل كطة)
القصيدة
مرّينه بيكم حمد , واحنه ابقطار الليل واسمعنه , دك اكهوه ...
وشمينة ريحة هيل
يا ريل ...
صيح ابقهر ...
صيحة عشك , يا ريل
هودر هواهم ,
ولك ,
حدر السنابل كطه
يا بو محابس شذر , يلشاد خزامات
يا ريل بللّه .. ابتغنج
من تجزي بام شامات
ولا تمشي .. مشية هجر ...
كلبي..
بعد ما مات
وهودر هواهم
ولك
حدر السنابل كطه
جيزي المحطة..
بحزن ..
وونين ..
يفراكين
ما ونسونه ,ابعشكهم...
عيب تتونسين
يا ريل
جيّم حزن...
اهل الهوى امجيمين
وهودر هواهم
ولك
حدر السنابل كطه
يا ريل
طلعوا دغش...
والعشق جذابي
دك بيّه كل العمر...
ما يطفه عطابي
تتوالف ويه الدرب
وترابك ..
ترابي
وهودر هواهم
ولك..
حدر السنابل كطه
آنه ارد الوك الحمد .. ما لوكن لغيره
يجفّلني برد الصبح ..
وتلجلج الليره
يا ريل باول زغرته...
لعبته طفيره
وهودر هواهم
ولك .. حدر السنابل كطه
جن حمد....
فضة عرس
جن حمد نركيله
مدكك بي الشذر
ومشلّه اشليله
يا ريل....
ثكل يبويه..
وخل أناغي بحزن منغه...
ويحن الكطه
كضبة دفو , يا نهد
لملمك ... برد الصبح
ويرجنك فراكين الهوه ... يا سرح
يا ريل....
لا.. لا تفزّزهن
تهيج الجرح
خليهن يهودرن..
حدر الحراير كطه
جن كذلتك...
والشمس...
والهوة...
هلهوله
شلايل برسيم...
والبرسيم إله سوله
واذري ذهب يا مشط
يلخلك...اشطوله !
بطول الشعر ...
والهوى البارد....
ينيم الكطه
تو العيون امتلن ....
ضحجات ... وسواليف
ونهودي ز مّن...
والطيور الزغيره...
تزيف
يا ريل ...
سيّس هوانه
وما إله مجاذيف
وهودر هواهم
ولك...
حدر السنابل كطه
كل مااسمع هالاغنيه ابجي تصدقون عاد ..!!
|