. يالساهرة طال فينا الليل وأسهرتك
جعلني الموت لين ألحين سهرانه ! .

. نسيت نفسي بصوتك ثم تذكرتك
وإنتي بعد ماعليك خلاف .. نسيانه .

. لا قلت : أخليك ؟ قلتي : ليش أخرّتك ؟
خلّك حبيبي معي من جد ولهانه .

. وإن قلت لك : زين خلّصتي مذاكرتك ؟
قلتي لي : بليز مالي خلق طفشانه .

. الظاهر إن هذرتي زادت وكدّرتك
أهلي يقولون عني (بنت زنّانه) .

. قلت : إهذري وإملي عروقي بثرثرتك
هذا هو الموت (نبرة بنت نعسانه) .

. تدرين ؟ ياما على نفسي تكاثرتك
ماكنت باقول بس الحين خربانه .

. ياحلوتي قبل أعرفك ماتصوّرتك
كنتي لي المستحيل بهيئة إنسانة .

. حتى قبل ما أعرفك في البال حضّرتك
ركّزت ثم قلت : لا لا تشبه فلانه .

. هدّيت عرش الصبايا بك وعمّرتك
ماتشبهك بنت يا ام عيون خدرانه .

. أحس من كثر ما حاولت جرجرتك ..
للواقع .. الله وهبني إيّاك سبحانه .

. من قبل ترتيبك لمّا بعد بعثرتك
يالمترفة وأشهد إنك صدق فسقانه .

. كلّك مزايا من أولتك لآخرتك
يا أقصر طويلة ويا أنحف بنت مليانه .

. في كل ذرة بجسمي قمت نثّرتك
لين أصبحت كل ذرّة فيك هيمانه .

. شربتك البارحة فتنة وكثّرتك
شوفي عروقي بحسنك كيف سكرانه .

. كنتي سجينة خيال وجيت حرّرتك
وأصبحت أسيرك وأبيك اليوم سجّانه .

. إلا تعالي .. متى تبدأ محاضرتك ؟
طيّب أخلّيك .. شكلك جد تعبانة .