هب الجنوب وطاح برد المكاتيب=وياكثر ماهب الجنوب وذكرته
يملا حضوره من حضوري ,, وأنا أغيب=وياما غيابي في غيابه حضرته
إن جا مطر ,, صارت له أضلوعي شعيب=وإن راح ريح(ن) طير إللي بذرته
طال السكوت ومال صمتي مطاليب=غير الكلام إللي وقف وإنتظرته
جنبت لو مالي عن الدمع تجنيب=من وين ماصديت فيني شعرته
واا اصمتي إللي صار فعيونهم عيب=واااا جرحي إللي لو فضحني سترته
لي صاحب(ن) يملا كفوفه تراحيب=لولا الحيا من ضحكته ,, ما إعتبرته
ياصاحبي ماهي عليا مقاضيب=عذروبي إنك ذخري إللي ذخرته
عذروبك إنك شوهتك الأكاذيب=عذروبك إنك جاك طيب ونكرته
إن جيتني بفراق زود العذاريب=لأجيك أنا من زود صبر صبرتــه
للطير جنحان وريش ومخاليب=لكن يضيع صيدته في غبرته
ومن جزم نفسي يوم صار الردى طيب=حلمي قبل لا يكسرونه كسرته
ومن راح مني قـلت ياعله مصيب=دورت له عذر(ن) كريم وعذرته
للي يبي بعدي ,, أنا ماني قريب=أما ربحني ,, ولا أنا مـاخسـرتـه
قلبي خويي ما لقلبي معازيب=وإللي حقرني من رداه إحتقرته
رغم الجروح إللي بقلبي معاطيب=حبيت كفين الزمــان وشكــرته