اليوم يوم عهد جديد في حياة شخصين منعطف اخر في خريف اخر ...اليوم زفاف خالد وشيخه ..زفاف عائلي في بيت حمد بعد
اصرار شيخه وتقبل خالد بقهر ..وكان سفرهم في نفس اليوم .. شيخه هاليوم كانت غير كانت تحس انها انسانه خاليه من روح انسانه
غادرتها الحيويه تحس شيخه الاوليه ماتت واللي ذبحها خالد وابوها اللي ارغمها على هالشئ ...كانت اطالع نفسها في المرايه
واللبنانيه مزينة الشعر تعدل شعرها الطويل اللي طلبت منهم يسون تسريحه ينلم شعرها فيه ...كانت ملامح ويهها ذابله ماكأنها
عروس كان دوائر سودا تحت عيونها ويهها متهدل من الضعف ...شيخه خسرت الكثير من وزنها واسمرت من ضعفت ...طالعت
الساعه مابقي شي وانزف لقبري ...انحدرت على خدها دمعه ساخنه ...
-----------------------
واقفه جدام المرايه تعدل فستانها الحريري الاحمر وتعدل سيور حملات الفستان العاري الظهر والايدين كان بس اللي ماسكه من فوق
سيور رفيعه ..رجعت شعرها الحريري المسرح بالاستشوار على شكل مدرج وممسوك بطرف بشباصه حمراء مزينه بورود ..فتحت
صندوق مجوهراتها وطلعت خواتمها الالماس وطقمها ...
طالعت نفسها مره ثانيه .. اففف خساره هالتعدل وفهد محد ...للاسف تعدلت وفي النهايه مب جاي لاهي في الشغل ..من ذاك اليوم
اللي طيحها فيه انقطعت سبل الحديث بينهم صار مايكلمها ويم تكلمه يرد بأختصار وبرود ..ويوم رجعوا نفس الشي مايكلمها ويطلع
من الصبح ولايرد الا بعد ماتنام ...نور كانت تقوم معاه من الصبح تحط ريوقه وملابسه ...بس اللي اكتشفته فيه انه مايحب ياكل اول
مايقوم شي بس يكتفي بقلاص حليب جاي ...وماتتغدا الا لين يي ...بس هو من يتغدا يدخل مكتبه ويسكر على نفسه لين المغرب
ويرجع لشركه مره ثانيه ...
طلعت عبايتها وشيلتها وحذفتها على السرير ...دقت على الريم تبي تشوف خلصت من رجعوا من الصالون كلهم ركيض على غرفهم
عشان ام فهد محرصه عليهم مايتأخرون ...ريم قالت انها جاهزه ونزلت تحت تنطرها ..
نور بسرعه راحت للأستراحه اطلع صندلها ..وقفت تلبسهم رفعت ريلها تسكره ..وهي تنزل ريلها وتمشي ظربت كتفها في صدر
عريض ..ووقفت بصدمه ..فهد كان واقف واوراق في يده يطالعها بصمت ...
قال : شوي شوي شعندج مستعجله ..
نور وهي تبلع ريقها ..: امي تنطرني تحت ...وراحت تاخذ عبايتها ...
فهد وهو يطالعها وهورافع حوجبه ..: بتروحين جذي ...؟
نور وهي تلبس العباه ..: شلون جذي ...اكيد بروح ...
فهد بقهر : اقصد فستانج ..ماكأنه مفصخ ...
نور بقهر : عادي مافيه شي بعدين كله حريم ..
فهد : يعني عادي تتفصخين جدام الحريم ..
نور : لا ..بعدين ليش ماقلت من قبل ..ماقدر ابدل الحين ..فهد ..عاد اليوم عرس اخوي ...
فهد بغيره مستغربها من نفسه : زين ..شاسوي ..جذي مب طالعه ..
نور والدمعه شوي تفر منها ..: فهد تكفى حرام عليك ...
فهد : مالي دخل ياتبدلين ياتقعدين ..
نور : والمكياج ....زين اسمع ..بحط شيله ماراح يبين شي ...
فهد : وايش اللي خليني اصدقج ...
نور بثقه : لاني قلت ...
فهد وهو يحوس شفايفه : معليه ...بس ماتروحين مع الدريول انا بوصلج ...نزلي لامي قولي لها ..
نور ببتسامه ارتياح ..: ان شاء الله ..مرت من جنبه بسرعه وقربت منه وحطت ايدينها على رقبته عشان ينزل راسه اللي بعيد عليها
وباست خده ..وطلعت بسرعه ...
فهد وقف مكانه مشدوه من منها ..كل تفاجاءه بشي ...كانت مثل الهديه وهو مثل الطفل كل يوم يعرف شي حلو فيها وتخليه يتعلق فيها
غصب ....
وصلوا بيت خالتها وضحى على المغرب ...وقبل لاتنزل ..: فهد بترجعنا ..؟
فهد : ماأظن ...بسلم وارجع الشركه ..
نور : وحن ..؟
فهد كان يكلمها وهو يطالع جدام : أتصلوا في الدريول ...
نور بعد ماتأكدت ان عمتها نزلت ..: زين ممكن امسي في بيت ابوي ..
فهد التفت لها لورى كان ويهه قريب من كانت تحس بأنفاسه على نقابها ...: لا ..ولاتفكرين ..
نور بترجي ..: فههههههههد ...
فهد : انزلي ولارجعتج الحين البيت ..
نور وهي تنزل ..: زين خلاص ...وبعد مانزل من السياره وسكر الباب ...قالت له : اوكي حبيبي انتبه لنفسك ...وراحت من غير
لااطالع وراها ...لااطالع فهد اللي وقف من سمع حبيبي ..شكثر عذبته هالكلمه ..كانت مثل ملمس الحرير على قلبه ...
رسمتك صوره للفرحـه ولَونتـك بنـور الحـب
خجل من صورتك همي دقايـق شفـت راحاتـي
خسارة روحي وارباحي في ضحكاتك ترى المكسب
في قربك يهتنـي قلبـي وبعـدك هـم وآهاتـي
على شانك حلـف قلبـي يشيـل الهـم مايتعـب
وروحي عاهدت عينـي تعانـق مـوق عبراتـي
عشانك ياذهب وافـي حنـان الـود لـو يلهـب
أحبك وازرعـك ورده جميلـه بمنتـزة ذاتـي !!
حبيبي يانظر عيني غصب عنـك تـرى تنحـب
عيونك .. بسمتك تجـذب وتبعـد كـل علاتـي
عشان عيونك الحلـوه بنيـت بداخلـي منصـب
وفي قلبي اعتلـى حبـك وخـاوا كـل نبضاتـي
فداك الروح ياروحي وعينـي والعمـر والقلـب
(من اشعار شاعر الغربه محمودالشاهين )
دخلت الصاله وسلمت على الوجودين وقعدت معاهم شوي وطلعت لشيخه اللي كانت لابسه فستان فستان ابيض حريري ناعم وتسريحه
مرفوعه ناعمه مزينه بورود طبيعيه ...سلمت عليها وخذتها في الاحضان ..ومسكت نفسها عشان شيخه ماتصيح وتخرب المكياج ..
نور : مبروووك عليج خويلد ...الله الله شهالزين ..
حصه بلقافه : قولي ماشاءالله لاتحسدين اختي ..
نور : جب انتي ..شدخلج في مرة اخوي مب حاسدتها المشكله اللي بيحسدونها المغلوثيين على العرس ..
حصه : بسم الله علي ...
نور : شيوخ يالخاينه ..شهالضعف ...
شيخه من الهم اللي ماحد يعرفه ..: رجييم بعد ..
نور : اييييه ..لوت عليها مره ثانيه وهمست في اذنها ..: شيوخ لاتنسين ترى بعدني موجوده ..
شيخه وهي تحاول تمسك دمعتها ..: ان شاءالله ..
نور : مجهزه شناطج ..
شيخه : ايه منزلينها من امس تحت في غرفة الضيوف ...
مها وهي تسلم على نور ..: شيوخ خلصتي ...
شيخه وهي تهز راسها موافقه ..مها ...: زين يله بلا هذره خلصوا عشان الزفه الحين 8 عشان تصورين بعد ...
شيخه حست ان ساعة الصفر ابتدت ...وانتهت حياتها في هالبيت وانتهت شيخه ...وابتدت حياه مخيفه مع خالد في غربة مكان وزمان
وغربة مشاعر ...الجو المتحاولها ضحك وسوالف وهي كانت بينهم غريبه ماتحس بشي كانها متخدره ...
وزفه بسيطه وشمل عائلي بسيط مكون من الاهل والاصدقاء...دخل حمد مع خالد وصور معاهم وخالد غائب عنه مشاعر شيخه
المتبنجه ..ورجحه انها مرتبكه ...بعد الرقص والضحك والتبريكات والتصوير والذكريات الي متدت لين الساعه 12 قبل موعد
الطائره بساعتين ...شيخه صعدت لغرفتها بمساعده نور وغلا وريم ومها وبدلت وتسبحت ولبست لها بدله بيج وازرق ..ونزلوا تحت
يسلمون على الاهل ..وشيخه مازالت كاالعايش في غيبوبه ..ماتحس بشي ...سلمت على ابوها وعيونها كلها لوم وعتب ..وطالعت امها
نفس الشي لانها سكتت ولا ساعدتها ...سلمت على البقيه وركبت مع محمد وخالد في السياره من غير لاتتكلم ...
خلصوا اوراقهم من الجوازات وركبوا الطياره والحديث مغلق بينهم ...قعدوا في مقاعدهم وشيخه اختارت اللي جنب الدريشه ...اللي
من طارت الطياره عرفت ان مافيه مجال لتراجع لحياتها القديمه سكرت عيونها ودموعها تنزف بغزاره وطالعت الدريشه.....
من يواسيني .. ويبادلني الشعور
من يحسس خافقي بطعم الحياه
من بيجبر خاطري بعد الكسور
من يراعيني .. ويعطيني وفاه .!!
الألم فيني ولاتارك قصـور
منهي الأفراح .. وهمي ياقساه ؟
(من اشعار شاعر الغربه محمودالشاهين )...
|