لاتخدعك همتي والعزم واصراري
نفسي على ما يجمّل بي مروضها
اخايل الطايله واسري مع الساري
ودروب الايام خابرها وحافظها
ما اجاوب الناس قبل اقلّب افكاري
وقدام عين العقِل في صمتي اعرضها
اقرا الحروف الخفيه وانشد اشواري
والعاطفه عن مقدّم قولي انفضها
وآحيد عن كلمةٍ ماتقضي اوطاري
واختار بين اسود البيبان وابيضها
ولاّ انت لو تشغل العالم مع اخباري
لا تنشغل بك هواجيسي ولا امرضها
اغض عن زلّتك عيني وانا داري
انّي على جرحها الدامي مغمضها
لكني آحب تبقى فيني اسراري
ماكل ضيقه على صدري افضفضها
مليون حاجه تركها قلبي الضاري
وبغفلة الناس رب الناس عوضها
وعدايه اللي من اول تهتك استاري
للذود عنّي نهار الموت قيّضها
الصبر ثوبي ترى مامثلي بعاري
والكف عن رجعة الرفقان ما اقبضها
وجنبية العفو لو يطمع بها الشاري
ما ابيعها لاحمى الموقف ولا اقرضها
اطوي بها محزمي وآذود عن جاري
وارفع بها الناس يوم الصدق واخفضها
امّا يقولون حيّا عين ذا الطاري
ولاّ احتمي عزتي عن هرج مغرضها

احُب كل شي كان رحمه لي من الله