ياللي غلاك القلب من قال انساك

=== انسى حياتـي لو بلحظــة نسيتـــك
انته بقلبي تحــت لضلاع مرسـاك
=== وش لون باتناســــاك والقلـــب بيتــك
ياراس مالي يارصيدي والاملاك
=== ياليلي اللـــي همت فيك وسريتــك
دامك حبيب الروح هالروح تفداك
=== وانا بكلي ياهـــــــوايا فديتــــــــــــــك
حبك ترى بالقلب مشبوك لسلاك
=== من قبل سن الرشد وحـدك هويتــك
ياكثر اشواقــي لك وياكثر ماهـواك
=== وياكثر ماحنت خفوقــــي وجيتــــــك
في ليل مظلم داعساً فوق لشواك
=== وياكثر ما أكتـــب حـــروف وقريتـــك
في صفحة الاشعار احساس وادراك
=== أكتب وأمحي وانت ماقد محيتـــك
انت الوحيد اللي مع الحرف اقراك
=== وترقـص حروفي شعــر لامــن طريتــك
اصيد بك لفكـار من بين لسمــاك
=== من غبــة البحـــر العميـــق وبنيتـــــك
صورة خيالية ولا الوقت يمحــــاك
=== يالغالي اللـــي من فـــؤادي غليتــــك
حبي ورب الكــون لاماتخطــــــاك
=== رغــم الفـراق المر ماقـــد جفيتـــــــك
عن درب غيرك اعلن القلب لمساك
=== يادربي اللــي عالطوالــــع مشيتــــك
دارت بي الدنيا كما دور لفـــلاك
=== ياحب في دنيا الشقـاء ماهنيتــــــــك
حظــي تعثر وانت لاويــــن وداك
=== عسى إلهي يعطيـك حسـب نيتــــك
وعسى يصبرني على طول فرقاك
=== وعسى يخفــــف لوعتــي لابكيتـــــك