قصيده للـ شاعر محمد جارالله السهلي
،، عنق المها ،،

تدور الأرض و تدور السوالف و السنين تدور
وأنا لو أعرف اللي راح ماني بعرف الباقي

يقولون القصيد شعور و الشاعر بدون شعور
و أقول الله يعاقبني إذا ماهو من أعماقي

أنا لو أكذب بشعري وقف نبض و يبس حنجور
و قادر أخسر الدنيا و عاجز أخسر أخلاقي

و لأجل عنق المها و الصوت الأدفى و العيون الحور
وقف عمري و لا أدري ويش أنا من وقفته لاقي

قسم بالله .. ما قبلك غياب و لا بعدك حضور
ولكن ودي بفرقاك .. لو ما ودك فراقي

تعاتبنا بما فيه الكفاية من ثمان شهور
و سالت دمعتين و طاح قلب و ماتت أشواقي

تعدتك المشاريه و جفاك اللوم و المستور
إذا ما يكشفه صوتي كشفه الحبر بأوراقي

تعبت أضحك على نفسي و أبرر لك و أعيش الدور
و تعبت أجامل ظروفك و أصدّق كذبك الراقي

يكفّيني أغيب و خافقي ما جاك منه قصور
و يكفّيك اتّذكّر كل ليلة .. لهفة عناقي

تذكّر يوم أخليك اتباهى كبرياء و غرور
يوم إني أتحدابك و أخيّب هقوة الهاقي

و تذكّر يوم أعذرك و انت لا صادق و لا معذور
أدور لك عذر و أصدقه .. و أكذّب أحداقي

و تذكّر يوم جيت من الحزن متضايق و مكسور
فرشت لك الضلوع و قلت لك.. : يا سيد عشاقي

خذ اضلوعي و ابن فيها يسار الصدر بيت و سور
ترى ما فيه قبلك من سكن صدري و خفاقي

و بعد هذا رحلت و لا بقى إلا بيتك المهجور
و ألا يا كبرها لا من رحلت و منزلك باقي

وسلامتكم