>><البـ الثامن ـارت
و الاخير ><<
تعدلت لمى بشكل خفيف يبرز جمالها بشكل طبيعي..و شعرها كانت فاجته(فالته)..مشطته بسرعه ورفعته وثبتته بالشباصه(يسميها البعض عضاضه)
شافتها دانه ابتسمت ابتسامه تشجيعيه للمى..
دانه:ايه جذي..لا يهمج احد..تكلمي بهدوء ولا تنفعلين انزين..
لمى"من غير نفس":انزين..
دانه:لا لا اهم شي الابتسامه..
لمى""تنرفزت":اللحين انا بقولله طلقني ولا بقوله امتى الزواج..انا ابي اطلق ..مب يعجب فيني..
دانه:يا الواثقه داريه انه بيعجب فيج..
لمى:الله يعافيج لا تحنين فوق راسي..و تنرفزيني خليني احافظ على هدوئي..
دانه:اوكي ..مستعده؟.
لمى:ايه..
دانه:جددي الهوا اللي في رأتينج عشان تتحسن نفسيتج..
لمى:هههههههه..تحسني اني بدخل حرب ..توتريني جذي..
دانه:توكلي على الله..وروحي..
لفت على راسها حجابها بإحكام..دانه شافتها واستغربت بس قالت اخليها على راحتها احسن لحد هني ينتهي دوري.
طلعت لمى من الحجرة وتلحقها دعوات دانه لها بالتوفيق..لقت في طريجها ابوها اللي استغرب تعدلها ..
بو زياد"بجفاف":زين منج لفيت حجابج .."مشى قدامها وهي تلحقه"..تسلمين على عمتج ام جاسم..بعدها بتطلعين وياه..
لمى"بدون نفس":و منو هذا..
بو زياد"وقف ولف عليها":زوجج بعد منو..
----------------
قال مثل اليهال:لا يمه ما ابي..انزين..
ام جاسم "تمثل الزعل و مخفضه صوتها":هذا وان امك ..و الرسول قال امك ثم امك ثم امك ..تبي تعصاني لاني ابي لك الخير..؟
جاسم:ما ابي اطلع وياها ..انا اصلا من ادخل بيتهم تيين كتمه..و ضيقة خلق..
ام جاسم"بحزم":الضيق فالانفس يا ولدي..و ان جانك ما تبي تطلع وياها ..تطلع ويا رفيجاتك ليه ..احسن منها..ولا الحرام ..ولا اقول اصير ساكته احسن لي ..
بو جاسم:ياى الريال..تناقشو بعدين..
جاسم كان معصب وهو يشوف امه وابوه يدخلون بحياته واللي حارق دمه انهم توهم يتذكرون يدخلون في حياته وقبل تاركينه عكيفه يروح ويرد يوم صار ريال عود تحكمو فيه!؟..
جاسم"قال لا اراديا و على دخلت بو زياد و كانت لمى بعده ":والله حاله..
بو زياد"منحرج":السموحة منكم تأخرنا عليكم..
بو جاسم:لا عادي..
ام جاسم"وقفت بابتسامه واسعه":الله بالخير ..شخبارج مرت ولدي..
لمى"كانت تناظر ام جاسم ومتحاشية تناظر الكل":الحمد لله..
ام جاسم:تعالي حبيبتي يلسي عدالي ..قريتي عيني الله يقر عينج..آمين..
شافت لمى ابوها وهو كان منشغل عنها يسولف اهو ويا بو جاسم اللي عداله جاسم..
*****
ما تدري كيف طاوعت دانه وراحت معاه..كاهو يالس جدامها وتشوف علامات التأفف منه..شدعوه يعني اهي اللي ميته عليه..دارت بعيونها عالمطعم الراقي..كانت تتمنى تدخله و يكون معها خواته..يارا كانت تتمنى تدخل هالاماكن..ابتسمت رصد ابتسامتها بس اهي ما اهتمت حبت تكون على طبيعتها فتجاهلته..ياى الجرسون..
جرسون:اي خدمه ..شو بد كون عالعشاء..؟.!
طلب جاسم لهم الاثنين بدون ما يشاورها حتى وهي كانت في هالوقت تتصفح المنيو..
جرسون"يوجه كلامه للمى":أي حاجه تانيه..
جاسم:مشكور..
لمى"بلا مبالاة لكلام جاسم":ابي عصير برتقال لو سمحت اللحين..
راح الجرسون..و جاسم كان يشوفها بقهر..حست انها اخلت باتفاقها اللي اتفقت عليه مع دانه..
جاسم"باستحقار":شوفي انتي..على ما اذكر اسمج لمى..(لمى كانت تسمعه و ماقدرت تخفي اشمئزازها من سماع صوته تحس بلوعه منه)..
جاسم:مهما كان اسمج ما تهمني..راح اقولج شي "و بكل ثقه قال"ادري بتتحطمين..بس حاولي تكملين حياتج..بعد كلامي..
لمى"قاطعته لوع جبدها بثقته الزايده":و انا بعد ابي اقولك عشي اهم من حجيك..
جاسم كان يشوفها باستخفاف وهو من داخله يغلي يبي يجتلها ويرتاح من دون أي حجي وياها..ياى الجرسون في هاللحظه و وياه عصير البرتقال..حط عالطاوله وراح وهو مستغرب حرب النظرات القائمه بيناتهم..
جاسم"وحده من حواجبه مرفوعه": شنو كنتي بتقولين يالمهمه..
رشفة لها رشفة من العصير..يبرد اعصابها .خاصه انها من النوع العصبي اللي يتنرفز بسرعه..
لمى ملت صوتها باكبر قدر من الثقه بحجم ثقته وقالت وهي تناظر كوب العصير اللي على الطاولة
لمى:احنا للحين عالبر ..عشان جذي انا ما ابيك.."قالت بكل هدوء يتناقض مع توترها"
ابي الطلاق.."رفعت عيونها وحطتها بعينه تنتظر اجابته "ظاهريا" ببرود العصير اللي في حلقها .."
جاسم انصدم:شنو!!
لمى بإصرار و بصوت هادي: ا..لـ..ـطـ..ـلا..ق..الطلاق..
جاسم مايدري كيف انفعل ..عيل ما بقى الا هالصعلوكه ترفضه؟؟..!!!
جاسم بانفعال:لا والله و الخطبه و الملجه والمهر و الى آخره ؟..شنو تسمى "باستخفاف" بر و لا شاطئ ؟؟..!!!
لمى:انا قلت ابي اتطلق ..و مهرك بيرجع لك مب محتايه له و كل شي جدمتوه لنا بيرجع ..بس ابي..الطلاق..
جاسم بتحدي وعناد يهال:واذا قلتلج لأ..
لمى عصبت و صوتها بدا يرتفع:شلون يعني مب مطلق؟!
جاسم:لأ شنو عندج من حجي بعد..
لمى:بتندم..و تعض اصابعك ندم ..و هذا ويهي ..
طلعت بسرعة البرق من المطعم و ركبت لها تاكسي وهي متغيضه منه عالآخر..هذا اللي ناقصها تتزوج فاجر..و تييب منه سفاحين..
جاسم قام بعدها في نفس اللحظة اللي جابها فيها الجرسون العشاء طلع و تركه
تحمس للزواج بشكل غير طبيعي.. يبي يتزوجها عشان يكسرها ويعلمها من هي و من هو!!..
================
ما تدري اهي فحلم ولا في علم ..اليوم اللي تنزف فيه لجاسم ياى..حاولت بشتى الطرق تتملص من هالمصير..استعدت لرفع قضيه خلع.. لكن..ابوها كان لها بالمرصاد.هددها..بانها بتفقد كل شي تحبه وتعزه..راح يعاقبها عن طريق اخواتها..وهي تعرف ان اخواتها ما عندهم قوه للمواجهة خاصه اذا كثرت الصدمات اهي بعد بتضعف قوتها وتستسلم بشكل مخزي..تفكيرها كان في اخواتها في ليلة عرسها..ما تدري من اللي جهزها..هل هي مرت ابوها؟؟..! اللي قالهم عنها ابوها ويابها هي وياى ولدها "اخو لمى" وياهم في البيت..ما تدري..
جاسم يالس عدالها..صار واقع لازم تقتنع به..
همس لها جاسم بسخريه مستنزفه :مبروك عليج يالعروس..
لمى:......
جاسم : مستخسره فيني الكلمه..انا بوريج..انطريني ..
بهمس لمى وهي تصر على اسنانها:قل آمين..
جاسم:مب قايل..
لمى وهي تصر اسنانها:جعلك تموت الليله ..
جاسم:بتصيرين ارمله..
حقرته ..و حاولت تفكر في شي..يساعدها على تقبل الواقع..
هي صحيح عالكوشة ..لكنها مب قادره تستوعب الى الان تحس انها في حلم
اقتربت منها دانه و همست في اذنها : شكلج مو حلو بالمره ماكنج عروس..ابتسمي عن خاطري..
لفت لمى على دانه ابتسمت لها ابتعدت دانه..فجأة حست لمى انها بتبجي اشتاقت لامها ..يا ترى شنو بتسوي امها لو كانت موجوده..رفعت ايدها ومسحت بداية دمعه ..
جاسم شخر بسخرية:دموع الفرح ولا العزا على نفسج..؟
++
طلعوا من الفندق وبدلوا ملابسهم وعالمطار سيده ، تخللها لحظات وداع ودموع من اخوات لمى دون استثناء و حتى لمى! ..شهر العسل او مثل ما تقول لمى شهر البصل..
في فيينا..صعدوا الطيارة..و طول هالوقت كانت لمى متجهله جاسم وجاسم بالمثل..
هاجمها النوم اللي كان مجافيها من عرفت بالعرس و محولاتها الفاشلة بتوقيفه..
نامت..جاسم كان يقرا احدى المجلات اللي لا تفيد و لا تنفع لاحظ ان اللي على يمينه راحت في رحلة عميقه مع النوم..بلا مبالاة ابتسم ابتسامة لؤم..صكر المجلة و حطها في ظهر الكرسي اللي قدامه ..و لف بعيونه ..على الجامه اللي عداله..
************
قامت من النوم على صوت الكابتن اللي يأمرهم بربط الاحزمة استعداد للهبوط في مطار
بدت تصدق اللي يصير لها و ابتسمت بسخرية لواقعها..
جاسم يتطنز: ليش ما كملتي نومتج..
لمى بتجاهل لسخريته : اتمنى.. بس صوت الكابتن خلاني انش..
طلعوا من المطار متجهين للفندق الموجود في شارع بكيرنتين شتراسه .. تاهت لمى في تأملاتها بين الاشجار و الزهور المنتشره في كل مكان .. وصلوا للفندق فتوقفت السياره..
نزلوا للفندق ..تقدمها جاسم متجهلها..اما لمى فكانت تجول بعيونها عالفندق..شكله فخم وحلو و تحس فيه حميمية متناقضه مع احساسها بالخوف من جاسم ..ياى من وراها جاسم ..
جاسم بتطنز: جدامي ..عجناح الرومانسيه.. "لف عشان يكمل طريجه
فاجأها بشكل ارعبها ..تبعته وهي بودها لو تيلس اكثر بس اللحظه الحاسمه يت للأسف ما تقدر تيلس هني اكثر.. فتح باب السويت حامل الجناط دخل الجناط و طلع بعد ما عطى المفتاح لجاسم..
دش السويت و لمى واقفه جدام الباب و تفكر بخوف هالخطوه اللي بتسويها بيكون لها نتايج مثل ما تتمنى ..تتمنى..
جاسم بلهجه جافه: شنو مب داشه ..يا سنيوربتا..؟!
دش مره ثانيه و ما صكر الباب..سمت بسم الله ودشت لمى..دارت بعيونها عالسويت الفخم..
استقبلها المدخل اللي جناطها موجوده فيه..تجدمت شوي شافت الصاله جدامها و عن يمينها حجرة وعن يسارها حجرة واقف عندها جاسم يجر جناطها..يحاجيها وهو داير لها ظهره
جاسم :انا بنام مابيج تزعجيني ولا حتى تدخلين الحجرة ..سوي اللي تبينه ان شاء الله تنتحرين بس مابي ازعاج دش حجرته و صكر الباب بقوه..
لمى :بسم الله..
حست بالفرحة ..ما تزعجه..تسوي اللي في خاطرها ..من عيونها ..
جرت جناطها اللي ما تصورتها بهالثقل دشت الحجرة اللي على يمين الصاله و قفلت الباب ..
تحس بالنشوة و السعادة ..فجه فجه يبي الفجه منها "يامنت كريم يارب"
فجت حجابها الاسود و بدلت ملابسها لبست لها بنطلون ابيض و بلوزه سودا مطرزه باللون الابيض باكمام طويله توصل البلوزا لتحت الركبه.. لبست لها حجاب ابيض ..و جهزت شنطتها السودا و تأكدت ان فيها الفيزا و الاشياء اللي تحتاجها أي بنت..
صارت اللحين جاهزه للمشي في شارع بكيرنتين شتراسه المنتشره فيه المقاهي و المحلات المشهورة و المتاحف قريبه منه ..
تجولت فيه بحريه ..لين المتها رجلينها من المشي جلست على وحدة من الكراسي الموجودة على طرف مقهى ..جاها الجرسون و طلبت لها قهوه تروق فيها زيادة ..تأملت منظر المتجوين و اللي يشترون و الطبيعه الساحرة عجبها المنظر حيل ..اهي نامت بالطيارة فتحس بنشاط غير طبيعي يغمرها و الشي اللي اطلقها في اجواء السعادة ان جاسم نايم واعطها مطلق الحريه في الخروج ..( وااااو ) قالتها لمى من دون ما تحس فيها..كل شيء توقعته ياى ضده.. شتبي اكثر من جذي ؟!!!..
شرت كل شيء كان بخاطرها بالفيزا اللي فيها نص مهرها .. يا الليل واهي تدفع آخر شي شرته توجهت للفندق تصلي الصلاة اللي فاتتها ونستها وتمت تستغفر ربها ..
طلعت من اللفت و الاكياس مليانه .. فتحت باب السويت و هي تفكر هل بيمديها تصلي ولا لا ..
تجدمت ووقفت عند الصالة بذهول وصدمة !!! و الاكياس افللت و انتثرت من ايدها ..
جاسم وقف وحاول يعدل طوله و كان يميل كل ما حاول يتوازن ..
جاسم يطالعها و قال بلسان ثجييل : شفيـ..ج.. ط..ـالعـ..ـيني.. جـ..ـذي..؟..!
لمى بصوت مرتعب مب مصدق: سكران .. و هني.. ؟
آخر شي كان في بالها انه بتيي و تقابله سكراان!!
انصدمت .. في شهر العسل واهي اللي كانت تظن انها بتحل مشاكلها بشكل سلمي!!..
اقترب منها خطوه جمعت اشيائها و اتجهت لغرفة بأقوى شي تمتلكه من سرعه ..قفلته بالمفتاح مرتين سحبت المفتاح و حطتها تحت مخدتها ..سمعت طقات عالباب .. وكلام مب مفهوم ابدا ..
تعوذت من الشيطان الرجيم ..توجهت للحمام توضت "تجددت" للصلاة
وصلت الصلاة اللي فاتتها ..
..
سلمت و قعدت تستغفر ربها وتناجيه ييسر لها امرها ..
سمعت صوت طرق عالباب مرة ثانية .. متابعدة و ثجيلة .. و صوت سكران خرعها ..
جاسم : فتحي الباب .. انتي شقاعده تسوين ..؟؟.. سكرانه !!
بدلت ملابسها بعد ما انتبهت انها ما بدلت للحين لبست بجامة و استرخت على سريرها تحاول تنوم .. متجاهله الاصوات اللي توصل لها من تحت الباب ..
|