ومرت الأيام ووصل اليوم المرتقب لعبدالله ونوال.. الكل مرتبش ومتفاعل.. وطبعا احلى من في ذاك اليوم كانت نوال.. طالعه جميله وحلوه وبسيطه..
نوال: يالله... شو هذا مب شي شعري.. قلت لها اتسوي لي جيه.. بس غيرت وسوته جيه مب شي
نوره: انتي بلاج... والله انج حلوه والله.. شعرج طالع وايد حلو ومرتب.. صدقيني
نوال: اففف.. انزين الساعه كم بيون.؟؟
نوره: ريم احين كلمتني قالت ان مالت الصالون يالسه اتعدلها وونوف جاهزه واول ما تخلص بيون ان شاء الله لأن مرت عمها والباقي جاهزين بس ريم..
نوال: يالله انا وايد مرتبكه..
نوره: لا ترتبكين.. خلج عاديه...
نوال: انزين والقاضي وصل ولا بعده..؟؟
نوره: ابوي قال ان القاضي بيي الساعه 7 ان شاء الله ..
نوال: الله يعين.. انزين تعالي جوفي الشادو نفس الشي في العينين.. احسهم فرق
نوره: لا فرق ولا شي انتي تتوهمين.. خلج عاديه بلاج انتي
نوال: ما عليه.. بييج يوم وبتحسين .. مب وايد .. الا هو اسبوع وبتحسين بالي احسه
نوره: ااااااااااااه متى متى.. اتريا بفارغ الصبر
نوال: الله على الحب ما انروم..
نوره: انتي ما تتخيلين اشكثر مستانسه ويا خالد مونسني في حياتي وايد.. مرتاحه وايد له
نوال: الحمد لله عسى دوم..
في بيت علي المزروعي الكل في الصاله يتريا الطله البهيه ريم.. اتخلص.. كانت ريم وياها نوف عشان اتقول لها الي تباه حق الكوافيره..
ريم: انزين... نوف والله اذا كان شكلي مو شي وحد علق بذبحج..
نوف: والله يا ريم انج طالعه قمر 14
ريم: هههه من يومي قمر 14 ولا نسيتي..
نوف: وحد يقدر ينسى.. اقول اهني غمجي الجحال شوي... وانتي عدلي شعرها من تحت
ريم: بلاج تتأمرين عليهم
الكوافيره: لا ما عليه خليها.. لك هي بدها اياكي تطلعي احلى من العروس كمان.. وهيك والله .انتي طالعه كتير كتير ناعمه وحلوه..
ريم: تسلمين.. خجلتيني الصراحه
نوف: عدااااااال من متى انتي تستحين
ريم: مادري لحظه خل اتذكر..ز مادي البارحه ولا الي قبله
نوف: عن الملاقه يلا عاد.. خلصنا.. تعالي ننزل..
ريم: شو لون الفستان لايق علي.. اول مره البس فستقي
نوف: فستانج ومكياجج وشعرج الأسود الطويل.. طالعه اتهبلين يالله الكل يتريانا تحت
ريم: انزين منو تحت؟؟
نوف: عمو.. وراشد وعبدالله وخالد وو و
ريم: يوسف..
نوف: هيه
ريم: افففففف هذا شو يايبنه بعد
نوف: ريم انتي هدي.. تراه ولد عمه لا تنسين
ريم: يالله عطيني عباتي وخل ننزل
نوف: هل تسمحين لين بمرافقتك ايتها الأميره..
ريم: ههههههه.. يشرفني ذلك
تموا يضحكون ونزلوا تحت واول ما شافها يوسف ما صدق عيونه.. معقوله هالجمال كله ريم.. وتباه يتخلى عنه.. مستحييييل.. ما قدر يوقف على حيله ارتبك ما عرف شو يسوي... وقام راشد والباقي عشان يروحون السياره ويروحون بيت العروس
راشد: جاهزين؟
ريم: لا خل اتبخر ..
عبدالله: هي والله انا بعد ابا اتبخر احس ريحه البخور راحت عني
ريم: ما احيدك جيه وسواسي من متى ما شاء الله
عبدالله: سكتي عني مرتبك.. حاس عمري ما عرف شو بسوي
ريم: انزين محد فيكم نطق وقال رايه بشكلي اكيد مو شي؟؟
ام يوسف: لا والله يا بنتي .... انتي بتغطين على العروس بعد... ماشاء الله عليج وايد حلوه.. تعالي خل اقرا عليج عن الحسد
راشد: والله طالعه احلى من القمر بعد
عبدالله: يلا عاد حدكم .. حرمتي بعد حلوه
ريم: لو ما كانت حلوه مثلي جان ما اخترتها لك
خالد: اقول ريم.. تعالي وياي ابا اختق فيج اقول عندي بنت عم قمر..
يوسف: محد بيروح ويا ريم غيري..
ريم: لا ما بيي وياك.. بسير ويا خالد..
راشد: لا يا ريم.. اذا تغليني بتسيرين ويا يوسف..
ريم: شو عناد السالفه..
يوسف: خلها على راحتها الظاهر انا بغث عليها
ريم: لا.. انا الي بخليك اتمل مني.. يلا تعال ودني..
يوسف ما صدق ريم اتقول هالكلام ركض صوبها ومسك ايدها وراح وياها والكل لحقهم لسياييرهم عشان يتوكلون ويروحون..
في سياره عبدالله وخالد الربشه والأغاني على اعلى ما يمكن.. الإثنين مستانسين .. وراشد ويا عمته ونوف وساره ياسين يسولفون ويتفقون.. واما سياره يوسف فالهدوء مخيم المكان.. يوسف ما قدر يتحمل فقرر انه يطول الدرب عشان ينتهز الفرصه ويرمس وياها..
يوسف: ريم.. ممكن اسألج؟؟
ريم من غير نفس: خيييييييييير
يوسف: ليش ما تبيني..؟؟
ريم: هذا سؤال احين.. ياخي ماباك ما ادانيك ما احبك.. اففف
يوسف: هذا مب كلامج وانا متأكد.. انتي ياسه اتعاندين نفسج واتعانديني وياج... ريم انا عايش عذاب حسي بحالي ارجوج
ريم: احييييين انت تبا اتوصلني ولا تبا تقول كلام تافه..
يوسف: احين صار كلامي تافه.. انا كنت قاصد هالشي ومتفق ويا اخوج.. لأني محتاج ارمسج وافهم الموضوع
ريم: كل شي واضح.. انت الي مب راضي تفهم
يوسف وبعصبيه: هيه انا مابا افهم .. لأن مافي شي ينفهم... انتي تطلبين شي واتبررين طلبج بأشياء مالها اساس
ريم بتدت تدمع عيونها ويوسف لو يموت اهون له من انه يشوف دموعها وقف على اقرب موقف سيارات وتم يمسح دموعها..
ريم: يوسف افهمني... انا احبك اكثر من حبك لي.. بس غصبن عني.. انت تبا اتعيش وياي انا بعد ودي.. بس حياتنا بتكون جحيم.. كيف بتعيش ويا وحده فيها عاهه.. والله بتتعذب انا مابا لك العذاب..
يوسف: ريم ها مب سبب.. لو انا ما خدمتج منو بيخدمج قولي لي.. وانا ما اتذممت على هالشي ولا اثر فيني.. انا الشي الوحيد الي في بالي انج تكونين زوجتي.. فاهمه
ريم: يوسف افهمني.. مستحيل ... انت احين الحب مالك راسك بس يوم بتعيش الواقع راح اتعيش بعذاب..
يوسف: ريم وقلوبنا
ريم: القلب بينسى هالحب لأنه لازم يقتنع انه قراري هو الصح.. لمصلحه كلا الطرفين
بعد ما سمع هالكلام فضل انه يسكت وحط شريط فيه اغنيه قاصد انه يهديها لريم..
بكيتك لين ملتني عيوني .. صبرت و طال صبري و انتظاري
حرام النوم ما قرب جفوني .. و انت للأسف منته بداري
أناجي غربة الليل و شجوني .. و أراجع في هوى قلبي قراري
عسى ما تكون خانتني ظنوني .. أو إنه خاب في الحب اختياري
عساهم يذكروني ما نسوني .. مثل ما ذكرهم في البال طاري
أزعلهم مثل ما زعلوني .. و أراظيهم بعد رد اعتباري
أبي تختار بي و لا بدوني .. كذا ولا كذا والليل ساري
حبايبنا عساهم يفهموني .. انا مابيع دومه دوم شاري
ريم وهي مرتبكه من بعد ما سمعت هالإغنيه: متى بنوصل تأخرنا..
يوسف: خلاص وصلنا.. دقيقه احين بنزلج..
ونزل يوسف وسار صوب ريم ونزلها وطلعت نوره عشان اتساعد ريم تدخل الميلس.. وكانت ريم متأخره شوي لأن يوسف كان يرمس وياها ومر الوقت وتأخروا شوي.. وعبدالله ملج.. واول ما دخلت ريم الحريم كلهم تموا يهللون ويدعون الله يحفظ ريم من جمالها..
وحده من المعازيم اترمس الي حذالها: اقول من بنته هاي... ؟؟
الثانيه: والله مادري.. بس الي اعرفه انها اخت المعرس..
الأولى : اها... من قوم منو هم؟؟
الثانيه: اسألي ليلى اتعرف..
الأولى: ليلى من بنته هاي.. ؟؟
ليلى: هاي بنت علي المزروعي..
الأولى : ماشاء الله عليها واااايد حلوه
ليلى : هي ما شاء الله عليها.. بس يحليلها ما تستاهل الي صار لها .. انعمت
الأولى: والله ... حليلها... عين ما صلت على النبي..
ليلى : هي والله.. الله يستر على عيالنا.. ناس ما ترحم
الأولى : هي والله..
نوف: هلا والله .. وينج يالقمر محد طايع يظهر نوال لين ما تيين.. ليدي ديانا تراج..
ريم: توج تدرين... انزين وديني عند نوال عشان اظهر وياها..
نوف: افا عليج تامرين امر.. قمر قمر عندنا نحن
ريم: وحده تسوى الكون..
نوف: ههههههه.. يالله عاد عن الخقه الزايده.. قلنا حلوه ما قلنا اختقي علينا
ريم: يلا وديني بلا كلام زايد..
وراحت ريم ويا نوف عند نوال ودخلوا عليها وسلموا عليها ومشوا وياها عشان ينزلونها تحت..
ريم: الله .. منو قدي .. امشي ويا مرت اخوي الحلوه..
نوال: لا انا الي لي الشرف ان اجمل وحده في الكون اترافقني..
ريم: يلا عاد كلها اصباغ لو امسحهم الكل بيشرد من الحفله..
نوال: الله يسعدج مثل ما اسعدتيني اليوم الي اخترتي لي فيه اخوج
ريم: لو ماكنت ادري ان اخوي بيسعدج جان ما بيوزج اياه.. وانا اعرف ان محد بيسعد عبدالله كثرج
نوال: مرتبكه الله يعين
ريم: خلج عاديه دام انا الي وياج
دخلت نوال ويا ريم الصاله وقعدت على القعده الي كانوا مسوينه للمعاريس الكل كان معجب في جمال نوال.. كانت طالعه جميله فعلا.. ورقيقه.. يلست وبعد نص ساعه قرروا يدخلون عبدالله عشان يلبس نوال الشبكه.. اتصلت نوف لراشد وبلغته .. وراشد راح عند محمد وسعيد اخوان نوال عشان يدخلون عبدالله
راشد: يالله .. منو قدك معرس..
عبدالله: راشد اسكت عني روحي مرتبك.. استحي ادخل كله حريم..
خالد: حاس فيك.. لأني لاحقنك بهالموقف.. بس يالله خل تفكيرك في نوال وبس
عبدالله: يلا محمد انا جاهز
سعيد: اي جاهز وانت ترتقل جيه
محمد: ههههه.. عاد لا تحرج الريال مسكين
عبدالله: اووووه.. يالله عاد دخلوني روحي الي فيني مكفيني
سعيد: اخبرك ترا اختي ماشي احلى عنها في الكون.. اخاف يوم اتشوفها يغمى عليك ولا شي عاد انت خذ احتياطك
عبدالله: نوال من يومها حلوه واحلى وحده..
راشد: بخبر راعيه حقوق الطبع محفوظه
عبدالله: لا دخيلك ما فيني على لسانها... سحبناها خلاص
محمد: منو هاي..
راشد: انت سير وده .. ويوم ترجع بخبرك منو
محمد: ههههه.. تعال يا معرس..
راح عبدالله ويا سعيد عشان يدخلونه على العروس.. في الصاله.. عبدالله كان مرتبك مب قادر يشوف جدامه لأنه الصاله كانت متروسه حريم.. حس انه شكله غلط.. دخل وباس راس نوال ووقف حذالها.. كانوا طاعين ثنائي حلوين .. كانوا لايقين على بعش واااايد.. ملامحهم قريبه وكأنهم أهل.. الكل تم يمدح عبدالله وجماله.. وراح محمد وسعيد ردوا ميلس الرياييل وودروا المسكين عبدالله تايه ويا الحريم.. ونوف ما قصرت كانت اتسوي كل شي بحكم حاله ريم لأنها ما تقدر اتسوي شي كانت واقفه حذال نوال.. ونوره كانت وياها... ويابوا الشبكه عشان يلبسها... وعبدالله رغم الإرتباك الي فيه الا انه قدر يتمالك نفسه ولبسها الشبكه وقعدوا.. ولما قعدوا قدر عبدالله يشوف نوال عدل.. انبهر ما كان مصدق عيونه.. معقوله هالقمر حرمتي....
عبدالله: ماشاء الله عليج نوال.. وااايد حلوه ما توقعتج لهالدرجه حلوه
نوال : يلا عاد لا تبالغ مب لهالدرجه...
عبدالله: بالعكس والله..
نوال: بغيت اشكرك الصراحه والله ما توقعت اتسوون كل هذا عشاني... صدق مستانسه
عبدالله: اااااه.. افففف متى بنعرس.. احبج.
نوال: ايه عن حد يسمعك
عبدالله: منو الي ما عنده سالفه وبيسمعنا.. كل واحد لاهي بالسوالف شو فيهم اتقولين راديو
وتموا يسولفون ويرمسون ولما فضى البيت قرر عبدالله انه يرد البيت وبيزورها اليوم الثاني.
وريم طبعا ردت البيت بسرعه لنها كانت تعبانه وايد نفسيا وجسديا ما كان لها بارض تسهر زود.. وراشد ونوف راحوا البيت ويوسف وخالد وامهم بعد ساروا البيت..
ابو محمد يرمس عبدالله: والله ما قصرتوا.. رايتكم بيضه الصراحه
عبدالله: افا عليك عمي.. نحن ما سوينا غير الواجب..انا الي لازم اشكركم
ابو محمد: على شو.؟؟؟
عبدالله: على القمر الي عطيتوني اياه
محمد: هههههههه.. اعترفت...اخيرا
عبدالله: انا من يومي اعرف انها قمر..
ابو عبدالله: والله انت ريال والنعم فيك ويشرفنا اناسبك.. فليش بنرفضك؟؟
سعيد: لا لا .. انا مب موافق..
نوال: ليش ان شاء الله..
محمد: اوووووووب .. طلع لسانها.. اقول عبدالله ترا هاي ملسونه الله يعينك عليها
عبدالله: برايها.. خلها تاخذ راحتها انا مستانس..
سعيد: مانروم مانروم على الحب..
ابو محمد: استحوا على ويوهكم انتوا ..
عبدالله: لا عمي خلهم.. سوالف.. المهم تامروني بشي.. برد البيت وباجر بييكم ان شاء الله
محمد: انت ما تستحي.. كل يوم طايح عندنا.. افف .. لا اتي باجر..
ابو محمد: محمد .. اتشوف هالخيزرانه.. بسطر ظهرك فيها
سعيد: هههههه.. هي والله دخيلك ابوي.. ترا انا من سنه ادور على شي اكتب عليه.. فيوم بتسطر ظهره انا المستفيد.. بروم اعبر عن مشاعري في الكتابه عقب
محمد: لا والله.. احلف انت بس
ابو محمد: بس انت وياه.. جنكم يهال.. ولا كنكم غديتوا رياييل احين
عبدالله: ويييييييو هزئوهم..
سعيد: اخبرك.. انت مو جنك من اشوي قلت بتسير بيتكم.. وين ما اشوفك روحت.. بعدك مخيم اهني؟؟؟
ابو محمد: لا اله الا الله.. ام محمد.. تعالي ادبي عيالج دخيلج..
سعيد: اقول تصبحون على خير بسير ارقد..
محمد: حتى انا..
نوال: هههههه.. جان من الصبح قلت جيه وفكيتنا منهم
ابو محمد: ههههههه .. يخافون من امهم اكثر عني والله دنيا
عبدالله: برخصتكم.. مع السلامه..
نوال: الله وياك
يتــــــــــــــــــــــــــــــــــــــــبع
|