01-22-2013
|
#11
|
 |
|
 |
|
((البارت العاشر))
في مجلس الرجال في بيت ابو نواف..............
ابو نواف:حيا الله من جانا تو مانور البيت
ابو بدر:الله يحيك البيت منور باهله
ابونواف:هاه ياولدي بدر شخبارك
بدر:بخير عمي عساك بخير
ابو بدر:ابونواف جاين لك بطلب
ابو نواف:امرني يابو بدر
ابو بدر:مايامر عليك عدو بس والله انا شارين قربك وجينا نخطب ولدي بدر لبنتك يارا
ابونواف:هاذي الساعه المباركه وين القى لبنتي يارا احسن من بدر ويارا مثل ماهي بنتي هي بنتك وانشاءالله ارد عليك بالخبر الي يسرك
ابوبدر:لاتستعجل بالرد يابو نواف خلي البنت تفكر وانشاءالله تصير الامور مثل مانبي
ابونواف:انشاءالله
ابو بدر:يالله اجل انا استاذن
ابو نواف:وين يابوبدر تو الناس
ابو بدر:تعرف المكتب مافيه احد اخوي مسافر
بو نواف:اجل على راحتك
بوبدر وبدر:فمان الله
بو نواف:فمان الكريم
*******************
دخل بو نواف الغرفه الموجوده فيها التلفزيون كانت يارا وامها جالسين يتابعون برنامج
بو نواف:السلام عليكم
ام نواف ويارا:وعليكم السلام
بو نواف جلس جنب يارا:هاه كيف دلوعتي اليوم
يارا:الحمدالله تمام
ام نواف:من كان عندك من شوي
بو نواف:ابو بدر وبدر معاه
يارا من سمعت اسم بدر قلبها يدق بسرعه وماتدري ليش جسمها طلع حار
ام نواف نواف:وش عندهم
بو نواف يطالع بنته بكل حب وحنان:بو بدر خطب يارا لبدر وينتظرون موافقتنا
ام نواف "بفرحه":هاذي الساعه المباركه الي نناسبهم فيها وين نلقى ليارا احسن من بدر
مادري وشلون اوصف لكم شعور يارا تحس بفرح ماصدقت ابوها .......بدر الي من شافته وهي تفكر فيه بدر الي انعجبت بااخلاقه وتصرفاته وشخصيته من سوالف اخوانها قبل ماتنعجب بشكله ..........الي كل بنت تشوفه تنجن عليه
كانت سرحانه فيه ماسمعت ابوها يناديها واخيرا انتبهت
يارا:سم يبه
بو نواف:هاه وش رايك
يارا:يبه انت شرايك فيه
بو نواف:والله يابنتي لو اتكلم عنه من اليوم لبكره ماوفيت بحقه هو رجال ولد رجال بس يابنتي خذي راحتك في التفكير ومتى ماقررتي قولي لي
بدون ماتحس يارا:الشور شورك يبه ومافي احد يعرف مصلحتي كثرك انت وامي
بونواف:اجل يابنتي الف مبروك"باس جبينها"
قامت ام نواف تحظن بنتها ودلوعتها :الف مبروك ياحبيبتي الله يوفقك ويسعدك "بكت:
يارا دمعت عينها:ماما لاتبكين ترا اهون خلاص اقعد عندكم
وطبعا الكل عرف بزواج يارا وبدر وباركو لهم وحددو موعد الزواج بعد ماطلعت التحاليل وكان موعد الزواج بعد شهرين ونص من الخطبه علشان اماني اختها على وشك الولاده
كانت قبل ليلة الزواج نامت عندها ريما وريناد وسمر وطبعا اماني علشان يخففون عليها من التوتر شوي ويقضون اخر ليله مع بعض
ريما:يالله يرو والله من جد راح نفقدك
يارا:ريوم لاتخليني ابكي الحين
ريناد:طيب وش شعورك الحين وبكره زواجك
ريما:والله يااخت ريناد شعورها مثل شعور أي مواطن سعودي
الكل:هههههههههههههههههههه
ريناد ضربتها بعلبة البيبسي الفاضيه:تتريقين على انتي وخشمك
ريما:مادري عنك سؤالك غبي
دخلت عليهم ريماس بدون مايدرون بس لفت ريما وشافتها
ريما "بصرخه":ريمــــــــــــــــــــــــــــــــــا س
قامت ريما بسرعه وحظنتها
والكل قام يسلم عليها متفاجئين توقعوا انها بتجي للزواج على طول بس كانت ريناد عارفه بالسالفه
جت يارا على طول بعد ريما وحظنتها:يالدبه توقعتك ماراح تحضرين زواجي
ريماس: افا مااحضر انا زواج حبيبتي يروالف مبروك ياقلبي
جلست ريماس مع البنات سوالف وضحك ثم جاء فيصل راحت لبيتها والبنات نامو عند يارا
*****************
في غرفة بدر ................
كان بدر ماجاه النوم يتقلب يمين وشمال يفكر في عروسته الي اخر مره شافها في الملكه اشتاق لها وده يسمع صوتها بس الوقت متاخر
فارسل لها رساله
استلمت يارا الرساله كانت وسائط من "حبك يدفيني"
كانت اغنية احلام:
تدري يالقلب الحنون انت بالنسبه لي ايش
وانا بعدك كيف اكون وليه احس و ليه اعيش
يالي شفت احلامي فيه والتقيت بااحلا جنه
ادعي ربي وارتجيه ربي لا تحرمني منه
والله احتاجك انا خلك بجنبي قريب
وان حصل شي بيننا عن حياتي لاتغيب
الرساله:
ليت الورق يعرف وش اللي انكتب فيه
وليت القلم يدري وش الي جرى به
اه من جرح عجزت القى مداويه
واه ياقلب كيف اقوى عذابه
لي صاحب ماغاب عن الفكر طاريه
ماقل قدره لو يطول غيابه
ماقل قدره لو يطول غيابه
......لك اشتااااااااااااق
كثر "مابااااعدت الايام"الايام بيني وبينك
كثر كلمه قلناها
وكل الحكايه حكيناهااااا
وكل ضحكه ضحكناهاااا
وكثر شوقي ...
اذا طولت في غيابك
وكثر فرحي....
اذا وصلني بعد الغيبه مرسالك
"باقي 16 ساعه وااكون انا وانتي في غرفه واحده"
استحت يارا مرره وشفتها ريما:من الفاضي الي مرسل في هالوقت
يارا:هاذا بدر
صحصحت ريما:كذابه عطيني اقرا قرتها ريما لحد اخر شي:ياهووو وش قصده في غرفه وحده
ضربتها يارا على كتفها:اقول اخمدي بس نومة الظالم عباده نومي
ريما"تضحك":هههه طيب شكرا على التهزيئه المحترمه
**************
@@@@@@@@@@@@@@@@@@
@@@@@@@@@@@@@@@@@@
في يوم الزواج
انطوانيت:حبيبتي خلاص مايصير هيك والله نشفت دموعك
يارا "تصيح":خايفه
ريما وريناد:خلاص يارا خليها تبداء فيك الحين الساعه 8
جت سمر معاها ام نواف جابتها علشان تهدي بنتها الي من الصبح وهي تصيح
قامت يارا وعلى طول حظنت امها
ام نواف:يرو حبيبتي وش فيك ماكنتي مبسوطه امس وش الي غيرك
يارا:ماما خايفه
جلست ام نواف وبنتها:قولي لي وش خايفه منه
يارا:من كل شي
ام نواف:شوفي حبيبتي الي في بالي وبالك ماراح يصير اليوم لاتخافين
استحت يارا من كلام امها:لاماما موقصدي هاذا
ام نواف:طيب ياحبيبتي روحي غسلي وجهك علشان انطوانيت تبدى فيك
يارا:طيب
وطبعا كل وحده من البنات كاشخه اخر كشخه
اماني كان فستانها مصممته ايلا زحلان خصيصا لها وام نواف كانت من تشكيلات زهير مراد اما يارا فكان مطلوب لها من تصاميم جان فارس
نجي الحين للعروسه الي كانت قمر ماشاءالله بمكياجها الذهبي والوردي وتسريحتها الي كانت كلها مرفوعه على فوق
صعدت لها ام بدر وعهد ونادين ورنيم
ام بدر:الف مبروك يار الله يوفقكم
يارا:الله يبارك فيك خالتي
عهد:مبروك يارا
يارا:الله يبارك فيك
رنيم:انتي عروثة بدر
نادين :انتي اسمها عروسه موعروثه
يارا تبتسم لهم يشابهون بدر:أي حبيبتي انا عروسته
ام نواف:يالله يارا استعدي الحين بتطلعين
اماني:خلاص يمه لاتشيلين هم
طبعا اول شي كانو حانو حاطين بروجكتور عن حياتها من يوم صغيره لتخرجها من المتوسط والثانوي وايام المخيم ومع بنات عمها لحد يوم ملكتها مع بدر
فتحت الابواب طلت عروستنا الحلو بااغنية ماجد الرومي
طلــــــــــي بالابيض طلي يازهرة نيسان ..طلي ياحلوه وهلي والوجه الريان
واميرك ماسك ايديكي وقلوب الكل حوليكي... والحب يشتي عليكي ورد وبيلسان
قلبي بيدعيلك يابنتي بهالليله الشعلانه...يااميرة قلبي انتي سلمنا الامانه
ماتنسي اهلك ياصغيره بعينينا ماصرتي كبيره....ضلي معنا وطيري عالجناح الامان
طلــــــــــي بالابيض طلي يازهرة نيسان ..طلي ياحلوه وهلي والوجه الريان
شاعي مثل هالطرحه يااغلى البنات..صلي تعيشو بهالفرحه لباقي الحياة
وربي من السماء يباركون كيف ماتوجهتو يرافقكون بايام الصعبه ينصركم
عالكل الاحــــــــــزان
قالك نعم من قلبو فرح كل الناس...رديها عاقلبه وحب شعلانه احساس
طلــــــــــي بالابيض طلي يازهرة نيسان ..طلي ياحلوه وهلي والوجه الريان
*********
كان كل الحضور عيونهم على يارا والكل يسمي ويذكر الله
جلست يارا على الكرسي المخصص لها الي كله ورد واوراق خضراء تكمله لكوشتها الي كان طابع عليها وراق خضراء وورد وردي
كانت في وحده من الحاضرات تطالع في يارا بنظرات كلها حقد وكراهيه
منيره:ماشاءالله اروى العروس تجنن صدق عرف يختار بدر
اروى"بكل عصبيه":انا اوريها بنت الذين اذا ماتطلقو بعد شهر ماكون اروى بنت عبدالرحمن
منيره:اووووص وجع وطي صوتك لااحد يسمعنا بس بعدين انتي لحد الان متوقعه انه بيحبك لاياماما اصحي اول ماقدرتي عليه تبين الحين بعد الزواج يحبك هاذا بدر مو أي واحد من الشباب الي تكلمينهم لاتلعبين على نفسك
اروى والدمعه تنزل من عينها:ااااااااااه مشكلة القلب الي ماحب غيره ولاراح يحب احد بعده
منيره:اجل اذا كنتي من جد تحبينه ادعي ان الله يوفقه
رجعت اروى لشعرها:منتقمه منتقمه الايام بيننا
جت امهم :يالله يابنات قومو سلمو على العروس قبل لايدخل بدر
البنات:انشاءالله
سلمت منيره ثم اروى
اروى بدون نفس:الف مبروك
يارا:الله يبارك فيك
ناظرت اروى يارا من فوق لتحت يارا استغربت من هالنظره مع انها مالها صله لها ابدا
المطربه:يالحاضرين المعرس بيدخل
دخل بدر بريحة العود سلم على يارا وباس جبينها
ريما:ياويل قلبي يوو وشذا الزين لو انا مكان يارا بيغمى علي
ريناد:أي ماشاءالله انا ودي اشوف عيالهم ماشاءالله يارا جميله وهو جميل
ريماس:الله يوفقهم يارا تستاهل كل خير
وعلى جنب كانت اماني وسمر جالسين
سمر:اقول اماني من هاذي"تأشر على اروى"
اماني:انها وحده من بنات عمه
سمر:ماشاءالله حلوه بس غريبه شوفي نظراتها ليارا وبدروساقها من ساعه وهي تهز
اماني:حتى انا لاحظت عليها بس مادري وش قصتها
جت ام بدر وام نواف عند المعاريس
قام بدر وباس راس عمته
ام نواف:بدر حط يارا في عيونك
بدر:مايبيلها كلام ياعمه"يطالع يارا"يارا في القلب والعين
المطربه بصوت عالي :الاغنيه الجايه اهداء من العريس بدر لعروسته يارا
الكل في القاعه يصارخ اما اروى بغت تموت من القهر ويارا كانت مبسوطه من حركته
كــــــــــذا من ربي حبيته .............. بسرعــــه يوم لقيته
ياناس هاذا الي تمنيته...................... اخيرا صار محبوبي
فاهمته وهو فاهمني............................. قبل حتى يكلمني
.لقيت الي ينادمني.............................. دوبي همت به دوبي
حبيبي وشمعة ايامي ............................ثناي وكل احلامي
سكن في عييوني الثنتين........................وين مااروح قدامي
امير الذوق والرقه.......................... لو يتباهى من حقه
واذا جاني الحلا والزين.........................حبيبي ماخذ حقه
رقصت عليها ام بدر وام نواف وعهد وكل مايتغطى من بدر ....وبدر كان يطالع في يارا وهي مستحيه
بدر:يارا
يارا:سم
بدر تخدر عليها "ياربي وش هالملاك":يالله نمشي
يارا:على راحتك
قام بدر ومسك يد يارا طلعو قبل ماتركب السياره سلمت على البنات وحظنت امها واماني وقامت تصيح بدر تعاطف معها
في الفندق:كان بدر جالس جنب يارا وهي مانطقت ولاحرف وبدر متشوق انه يسولف معاها خذ يدها وغطاها بيدينه الثنتين
يارا المسكينه استحت مرره
بدر:تصدقين ياقلبي من متى وانا احلم بهاليوم الي جمعنا مع بعض واخيرا تحقق الحلم وصرتي لي وانشاءالله ربي يقدرني واخليك اسعد وحده
يارا واخيرا نطقت:الله يخليك لي ولايحرمني منك
"هالجمله هزت زعزعت قلب رجال"
بدر:ولامنك انشاءالله
وصل عشاء يارا بس يارا ماطب في فمها ولاشي غير ورق العنب الي بالياالله كلته علشان بدر اكلها بعد ماخلصو العشاء وسولفو مسك بدر يد يارا:حبيبتي انا طالع شوي بخلص كم شغله وراجع لك
يارا:انشاءالله
طلع بدر برا الغرفه علشان تاخذ راحتها في اللبس وحمدت ربها على ذوقه وطلع برا علشان تاخذ راحتها في تغير ملابسها....غيرت يارا لبسها ولبست قميص نوم اورنجي طويل بس فيه تعليقات من فوق خفيفه يالله تنبان .......خففت يارا من مكياجها علشان مايطلع وجهاا كله مكياج فكت شعرها طالع جنان طولان لحد اخر ظهرها ......جلست تتامل في الغرفه الي كانت اغلبها شموع وورد احمر وموسيقى هاديه ابتسمت يارا على رومنسيته وسرحت فيه ماحست الابضربة بدر الباب
يارا:نعم
بدر:ادخل
راحت وفتحت يارا الباب دخل تفاجا بهالمزيونه الي قدامه ابتسم لها:انا داخل الغرفه غلط
ابتسمت يارا:لاهي نفسها
دخل وسكر الباب مسك يدها وجلسها على الاريكه شافها متوتره يدها ترتجف شوي
بدر:شفيك بردانه
يارا:لاعادي موبرد
جاء بدر في باله انها خايفه من ذاك الشي فحاب يقطع توترها ضغط على يدينها بقووه حست يارا براحه كبيره
قرب بدر منها مرره حتى صار ملاصق فيها وحط يده على كتوفها والثانيه لف وجهاا من ناحيته يارا انقلب وجهاا احمر نزلت عيونها
بدر يبتسم:انا الحين الف وجهك عندي وانتي تنزلين عيونك يالله ارفعي عيونك خليني اشوف عيون المها
رفعت يارا عيونها بدر راح فيها يوم شاف عيونها تخدر بدون شعور {{(*_^)مشفــ ـ ــ ــ ــ ـــر(^_*)}}
**************************
@@@@@@@@@@@@@@@@@@
@@@@@@@@@@@@@@@@@@
في الصباح في الفندق
بدر:يارا حبيبتي يالله اصحي الساعه2
يارا قامت بسرعه:يالله فاتنا صلاة الظهر
بدر يبتسم لها:اكيد راح تفوتنا شوفي متى نمنا البارحه"يغمز لها"
يارا قب وجهاا احمر وراحت ركض للحمام وبدر يضحك عليهاجلس على الاريكه اتصل على امه
بدر:السلام عليكم
ام بدر:وعليكم السلام هلا باابوي كيفك يمه وكيف يارا
بدر:بخير الله يسلمك انتي كيفك وكيف ابوي والحلوتين
ام بدر:كلهم بخير الله يسلمك والله البيت طافي بدونك
بدر:والله انتم نوره يمه
ام بدر:طيب متى مسافرين انشاءالله
بدر يطالع في يارا الي كانت توها طالعه من الحمام:انشاءالله اليوم الساعه ثلاث الفجر
ام بدر:الله يوصلكم بالسلامه
كانت يارا تاشر لبدر انها تكلم خالتها :يمه هاذي يارا بتكلمك
يارا:السلام عليكم
ام بدر:وعليكم السلام هلا بيارا كيفك
يارا:الحمدالله بخير كيفك انتي وكيف عمي والبنات انشاءالله بخير
ام بدر:والله كلهم بخير الله يسلمك يالله يمه اجل ماطول عليك
يارا:سلميني على عمي والبنات
ام بدر:يوصل انشاءالله يالله نشوفكم الليله انشاءالله مع السلامه
يارا:مع السلامه
سكرت من خالتها
يارا تاشر في وجه بدر:بدر
بدرانتبه لها:هلا
يارا:وين وصلت
بدر وبدون شعور ضمها بقووه:معاك انا على طول
خافت يارا عليه:بدر شفيك؟
بدر بعد عنها بعد ماانتبه لنفسه:احبـــــــك يابعد هالدنيا انتي
استحت يارا
بدر:ياربي هالحياء ياقلبي الليله بنروح الوالده تعرفين العزيمه بعدين على طول شهر العسل ياعسل"قبص خدها"
**************
@@@@@@@@@@@@@@@@@@
@@@@@@@@@@@@@@@@@@
في بيت بو بدر كانو الحريم متجمعين العائله كلها من عماته وحريم عمانه وخالاته..............الى اخر.
والكل كان يستنى العروس توصل وكانت منيره مع عهد تجهز الاغراض اما اروى مع بنت عمها فهده عمرها 18 سنه مرجوجه تحب الهبال والمزح والمقالب هي بوي بس اشباها مايعطيها انها بوي ابدا كلها انوثه وجمال بس علشان هي الوحيده من اخوانها بنت تعودت تكون ولد مثلهم
صح انسيت اعرفكم على الشخصيات الجايه:
بو سالم اخو بو بدر وعندهم اخت اسمها نهله الي بنتها فهده
بوسالم عياله :سالم عمره 24 يدرس برا
منيره عمرها :23
اروى: 19
احمد :13
***********************
فهده:اروى متحمسه ابي اشوف يارا يقولون عنها صاروخ"طاحت على كتف اروى من المبالغه"
اروى عصبت:من قالك اقل من عاديه تعرفين المكياج ومايسوي بعدين انتي ليش ماجيتي امس الزواج
فهده:تعرفين مااحب الزواجات
جتهم منيره:يالله بنات قومو وقفو عند الباب يارا وصلت
قامت فهده متحمسه:يالله اروى خلينا نروح
اروى حطت رجل على رجل:روحو انتم ماني رايحه
منيره عصبت:يالله فهده خلينا نروح مع الحريم
فهده:يالله
استقبلو يارا الي كانت جنان بفستانها النيلي وشعرها الي كله ستريت سلمت على الكل واخر وحده سلمت عليها يارا اروى
جت فهده عند اروى تركض:اروى وش تصير هاذي بنت ولاملاك
اروى:عاديه ماشفت فيها زود
فهده:عاديه في عينك الاتلقين بدر متخدر عليها بس مايلام
اروى"عصبت مررره منها":اسكتي بس
ام سالم<<ام منيره واروى:كيفك يارا
يارا:الحمدالله بخير
عهد كانت جنبها تعرفها على الموجودين .....وتعرفون الحريم سوالفهم كانهم في سوق البطحاء
فهده:اروى قومي نروح عند يارا نسولف معاها
اروى:ماني رايحه روحي انتي من زينها ومن زين سوالفها
منيره"ترقعها":اقول ماعليك منها مزاجها مو رايق اليوم خلينا نروح عندهم
راحو عندهم:
راحو عندهم.........
عهد:يارا اعرفك عليهم هاذي منيره وهاذي اروى"تاشر على اروى"اروى تعالي معنا ليش قاعده لحالك
جت اروى وهي مالها خلقهم
عهد:وهاذي فهده بنت حبوبه لااخر درجه
منيره:ترا فهودي اذا جلستي معها ماراح تملين من جلستها
استغربت يارا توقعت ولد
عهد:يارا ترا فهودي هي فهده بس تحب نسميها كذا
ابتسمت يارا:انا امس ماشفتك في الزواج
فهده:أي انا مااحب اروح الزواجات
عهد:منيره تروحين معي تساعديني في ترتيب الاعشاء
منيره:يالله
راحت عهد ومنيره برا عند الطاولات علشان يرتبون باقي الاشياء وجلست فهده تسولف مع يارا واروى قعدت تلعب بجولهاثم جاء اتصال على جوال فهده من زميلها طلعت برا طبعا اروى استغلت الفرصه قربت من عند يارا
اروى:شخبار بدر
يارا:الحمدالله بخير
اروى:مرتاح معاك
يارا مستغربه من سؤالها:الله يقدرني انشاءلله اريحه
اروى:تصدقين ماتوقعت بدر ياخذ برا العائله
يارا:نصيبه كل واحد ماياخذ الانصيبه
توها بتتكلم اروى جتهم فهده:هااي بنات تاخرت عليكم
يارا:يعني شوي
اروى:ليش انا مو ماليه عينك
يارا خافت:لا والله مو قصدي......
قاطعتها فهده بجديه:خلاص اروى ماصار شي
جت ام بدر في المجلس :يالله تفضلو على العشاء
بعد العشاء جاء بدر علشان يسلم على خالاته واخته وامه قبل لايسافر
بدر يكلم يارا بصوت خفيف:استناك في السياره لاتتاخرين ماباقي شي على الطياره
يارا:انشاءالله
طلع بدر من عند الحريم وقبل مايركب سيارته في احد مسك بدر مع يده
لف بدر تفاجا
اروى تبتسم:سوبرايز صح
بدر بعد يده منها بقوه:نعم وش تبين بعدين تعالي قولي انتي ماتستحين على وجهك طالعه لي كذا "ياشر باصبعه من فوق لتحت"
من جد اروى كان لبسها فاضح من فوق توب ومن تحت قصير مرره لحد فوق الركبه بس كان جنان عليها
اروى"بدلع":ليش مو عاجبك
بدر بكل عصبيه:اقول ضفي وجهك الحين لايصير لك شي مو طيب فـــــــاهمه
اروى:يعني وش بتسوي بتصارخ علي وبيسمعونك وفي الاخير انت بتاكلها
بدر كان ماسك نفسه بالقوه:اروى اقصري الشر وادخلي بالطيب
اروى:اوكي انا راح ادخل بس ترا لنا موعد ثاني مابعد خلصت كلاميsee you letter
راحت اروى من عند ه قابلت في طريقها يارا وهي طالعه لابسه عبايتها وابتسمت ابتسامة خبث
اروى: باي يارا "قربت من عند جهها":انتبهي على بدر اوكي
راحت من عند يارا وهي تبتسم اما يارا مارتاحت لها ابدااا وخصوصا انها كانت جايه من parking البيت
((اروى شيطان على هيئة انسان وش راح تنتظرين من مفاجأتها يايارا))
التكمله في البارت الحادي عشر |
|
 |
|
 |
|
|
|
|
|