كيف تخلين ريحه العطر تثبت
 

بسم الله الرحمن الرحيم

السلام عليكم يا حبوبات وشحالكم؟؟

اليوم قررت واخيرا اكتب طريقة عطري فالمنتدى والسموحه اني ما اكتب او ارد على مواضيعكم الحلوة نظرا لانشغالي باعمالي الخاصه بس هذا ما يمنع دخولي المنتدى وتصفح مواضيعكم المفيده...

المهم بنبدى بالخلطه ..

*الملابس

المواد الاساسيه:

دخون
عود (بس ما يكون معطر)
مجموعه العطور اللي تستخدمينها كلها حتى الرجالي اذا تبين بس لاتزيدين منه
مبخر عشان تحطين عليه الثياب
كيس بلاستيكي
الطريقه:

_اغسلي الثياب بس لا تخلينها تنشف عدل يعني خليها مبلولة شوي.
_ ولعي الفحم وحطي العوده عليه وبخري الثياب بما فيهم ملابسج الداخليه.
_ بعدين حطي الدخون ونفس الشي بس حاولي تخليهم فترة اطول شوي بس قبل لا تخلص العوده او الدخون عشان ما تحلق ريحه الفحم عالثياب..
_ والحين كل العطور اللي عندج عطري الثياب كلها
_ وحطي الثياب فالكيس واربطي الكيس عدل وحطيه فكيس ثاني واربطيه عشان ما تتسرب الريحه..
_ واخيرا حطي الثياب فالفريزر لمده فوق ال5 ساعات..

الحييييييين خلصنا من الثياب ويفضل تسوين حركه الثياب قبلها بيوم عشان تنشف قبل المناسبه وتعلق فيها الريحه

*الجسم
عند الاستحمام..
المواد
_شور جيل من ديتول
_ ليفه خشنه
_ ليفه صابون ناعمه
_اي شور جيل من العطور اللي تحبيها انا احب اخلط شور جيل عطر بريتني سبيرز مع جينيفر لوبيز القديم
_ ملح خشن
_زيت اطفال
_سطل ماء بارد
_ غرشة ماي ورد
_ غسول كير فري الحميم
_ شامبو وبلسم (انا احب هيربل لانه ريحته حلوه)
الطريقه:
_قبل الاستحمام اخلطي الملح اللي بيديج مع الزيت عشان تسوين سكراب للجسم والوجه
_وافركي جسمج فيه عدل اما الوجه يفضل فرك خفييف عشان ما تجرحينه
_ الحين تمخطري واهجمي عالمسبح اغسلي جسمج من السكراب عادي (وفي الايام العاديه استخدمي السكراب اخر شي يعطي نعومه حلوة للجسم وتصير بشرتج مثل الاطفال)
_الحين اغسلي جسمج بصابون ديتول باستخدام الليفه الخشنه عشان يتطهر الجسم خاطه الثنيات بين المناطق الحساسه ويفضل استخدام الماي الساخن عشان يفتح مسام الجسم.
_ واغسلي المنطقه الحساسه بغسول كير فري لانه احسن من الصابون.
_ وبعد ما تخلصين اغسلي شعرج( واذا فيج قشره استخدمي نقطتين من ديتول الاخضر للاستعمال الشخصي روعه للقشره) وبعدها حطي الشامبو والبلسم( البلسم يستخدم بس لاطراف الشعر ابعدي عن الجذور احسن)
_وبعدها نييب الصابون العطري ونحطه على الليفه الناعمه وحطي على جسمج بنعومه كانج تسبحين بنوتج الصغيرة..
_وبعد ما نغسل الجسم بالماي نلم شعرنا عدل ..
_ نخلط الماي البارد مع غرشه ماي الورد ورشيه على جسمج وويهج ما عدا الشعر ( انا عن نفسي اخلي اي حد يرشني لاني ما اقدر اتحمل برررررررد وفايده ماي الورد و الماي البارد غير الريحه الحلوة انا يسكر المسام عشان ما تدخل الجراثيم ويشد الجسم بعد الحمام الساخن

ونعيما يا حلوة

الحين بنرووح لتعطير الجسم بعد الحمام:

المواد
_ بخور
_ مجموعه لوشنات او لوشن واحد كيفج (انا احب اخلط لوشن دهن العود من اجمل مع لوشن سكادا الوردي ولوشن بلاك اكس او لانكوم البيج القديييييم ريحته روعه حتى لو تستخدمينه روحه)
_ عطر زيتي اما مسك روز او اي عطر ( انصح وبشده تجربون خلطه عبدالصمد القريشي للجسم ريحتها خباااااااااال وتخلي بو الشباب ما يخوز عنج)
_مزيل رائحه(انا استخدم مزيل الالوفيرا من ماركس سبنسر )
_بودره ( جربي بودره روز من ماركس سبنسر)
_ كريم شارلي (متوفر في اي سوبرماركت قيمته درهمين)
_ لبس الصلاه او عباه مسكره (مش فووووطه).

الطريقه:
_تلبسين العباة او لبس الصلاه بعد ما تنشفين جسمج وما تكونين لابسه اي شي تحت حتى الاندر وير عشان تعطرين كل شي..
_ تحطين المبخر تحتج وتتدخنين ودخني شعرج بعد وهو مبلول.
_ عقب ما تخلصين شيلي العباة وتعبلي بعمرج.
_ حطي كريم شارلي تحت الابط وبين الارجل ( يبيض المنطقه السوداء وريحته حلوه ويساعد في منع التعرق شوي.)
_ ادهني كل جسمج باللوشن ما عدا الوجه.
_ حطي مزيل الرائحه اذا حبيتي
_ رشي جسمج كل بالبودر خاصه تحت الابط وبين الارجل وتحت الصدر.
_ واخيرا تيبين العطر الدهني وتحطينه على اماكن النبض وبين الثنيات ( تحت الاذن, على الانف , الرقبه, اعلى الصدر يعني القلب, ثنيه الرجل فوق بطه الرجل, ثنيات اليد)


وننتقل للشعر:

_ دخون
_مخمريه
_عطر دهني روز او خلطه عبدالصمد القريشي
_ دهن عود
_ عطر فرنسي رش (اي عطر تحبينه على شعرج انا احط بربريز الوردي حلوه ريحته مع دهن العود او موسكيني الجديم الاحمر احس ريحته ريحه نظافه)

الطريقه:

_ طبعا احنا غسلنا الشعر وبخرناه مع الجسم عدل وهو مبلول
_ ننشفه بس بدون شسوار يعني تنشيف فووطه خفيف خليه شوي مبلول عادي
_ نحط المخمريه على شعرنا بعد ما نمسحها بايدنا ونفرك ايدنا عدل مع مساج خفيف للشعر عشان يشرب الشعر الريحه.
_ نحط العطر الزيتي تحت الجذور يعني اعلى الرقبه مع دهن العود وعلى الاذن واللي بيتم فيديج امسحي فيه الشعر
_ ورشي العطر اللي تبينه من بعيد عليج وعلى شعرج

اللي تخاف شعرها يبيض لا تحط غير المخمريه (عن نفسي الحمد لله من كم سنه وانا احط الخلطه ما طلعتلي ولا شعره بيضه)


الفم:

المواد
_ شويه قرفه
_هيل
_سنوت (يانسون)
_عوده صغيررررررررررررة خذي شويه منها بس شوي
_ قطرة دهن عود
_ماء ورد
الطريقه:
_ نطحن القرفه والهيل والسنوت والعود ويا بعض ونخلي البودره فعلبه نستخدمها كل ما نبي
_ نحط وياهم نقطه دهن عود
_ بعد غسيل الاسنان عدل واللسان اللي يطنش الكثير غسله باستخدام فرشاه خاصه له ( وعلى فكره السبب الاكثر لريحه الفم اما البطن او اللوز او اللسان لانه تتجمع عليه البكتيريا والفطريات)
_ خلي بحمامج دبه ماي ورد دايما للوجه والفم
_لما تخلصين غسيل اسنانج عدل بعد استخدام الغرغره بعد
_ تمضمي مرتين بماي الورد اول مره تفيه برع وثاني مره شربيه عادي
_ استخدمي الخلطه بدعك الاسنان واللسان فيها ممكن بلعها عادي ما تضر (ابلعها من سنين والحمد لله ما صا لي شي)
_ واللي ما تقدر تبلعها تخليها فتره في فمها وبعد ما تخلص منها لا تغسل فمها بالماي العادي تغسله بماي الورد.


اما الوجه
فما يحتاي غير انج تبلين قطنه بماي ورد بارد وتحطينه على ويهج قبل الميكب بس لا تمسحينه خليه يجف روحه (فوايده مع استمراريه الاستخدام يعني نضارة ويرطب الويه )


والسموحه على الاطاله او التقصير

واللي بتسوي الطريقه وبتظهر او في مجالس الرجال غير المحارم اللهم اني بريئة منها لانه ما في منا من ترضى ان تكون زانية ..
منقول للفائدة

منتهى الاهميه




بورك في طرحك ياعسل

,
مووضووع مهم و مفيد وطريقه حلوة و رآئعه لتثبيت العطر
يعطيك العاافيه يآقلبي ع الطرح الرآئع و الجميييل
ننتظر جديدك الشييييق و المفيييد يــــــــــــآعسسسسل :msn-35197ce05a:
..............................
تقييييم + يثبت لأهمية المووضوع و فآئدته :msn-35197ce05a:

منوره عوفك يارب

منوره غلوي

ومشكوره ع التثبيت والتقييم ياقلبي

صراحه خطير ومهم

ويفيد بنااااااااات كثير مايعرفوا شي

يسلمو قلبي

منوره وصوفي

طرح جمييل جدا
بس حركة انه يدخلوون الملابس فالفريزر قويه احس بيتجمدوا ههههاي
تسلمين يا قلبي
لج مني كل ود
واحلى ورد
:rose::rose::rose:

منوره انجوله