صفحة 1 من 2 1 2 > عرض 40 مشاركات من هذا الموضوع لكل صفحة

نظرة الحب 07-08-2011 09:00 PM قصايد الشاعر بديوي الوقداني   القصيدة الأولى : يقول الشاعر بديوي الوقداني العتيبي في قصيدته الرائعة التي اشتملت علىجميع اغراض الشعر من الغزل والمدح والحكم وغيرها ، أول استبـداي باسمـك ياحـنـون ياكريـم مـا تخالـفـه الظـنـون امرك المحفوظ في كـاف ونـون وانت لي فـي كـل مغـواة دليـل هيج اشواقي حمام فـي الغصـون بات ساجع فـي بديعـات اللحـون بيـن تغريـد وترجـيـع يـهـون مادرى اني في الهوى مثلـه عليـل ياحمـام الـدوح هيجـت الغـرام ما سبب نوحك ومالك مـن مـرام اعطني عهدك وخـذ منـي ذمـام بيعني شوقك وخـذ شوقـي بديـل ان فـي قلبـي جـروح ماتطيـب مابـدت حتـى يداويهـا طبـيـب من هواجس جات من فرق الحبيب باح مكنونـي وصبـري مستحيـل كلمـا هـب الصبـا قلبـي صبـا من غزال في الحمـا فـاق الظبـا ظبي جازي يرتعـي نبـت الربـا يسلب العشـاق بالطـرف الكحيـل مـال عنـي بالتجافـي والصـدود مابقي غيـر الحسايـف والوجـود كم رعيت النجـم والعالـم رقـود والمحاجر دمعها الصافـي يسيـل زارني طيفه كمـا طيـف النسيـم جـدد الاشـواق والعهـد القـديـم وانثنى فـي داجـي الليـل البهيـم قلت زدنـي قـال يكفيـك القليـل آه مـن هـم شـوى قلبـي بنـار وان طلبـت الصبرماالقالـه قـرار كيـف ابـا صبروالحشـا للهم دار صار مالكني وانـا عنـده نزيـل قمت مما حسنـي عنـد الهجـوع يـوم كـل نـام ولعـت الشمـوع والهواجس جاتني تمشـي جمـوع مثل ورد النحل فـي وادي طفيـل أو كما سيل تسايـل مـن مضيـق يقلـع الحيطـان والسـد الوثـيـق يأخـذ الاشجـار ويسـد الطريـق زاد عن حده وضاق بـه المسيـل طار نومي يوم نامـت كـل عيـن بت ساهـر مـع نجـوم الفرقديـن من هواجس من جفا من جور ديـن ما بقا الا البعـد عنهـا والرحيـل صوب ارض الشام أو ارض العراق عـل يـوم فيـه ينحـل الوثـاق كم نقاسـي والقسـا مـر المـذاق ربما نلقـى عـن المنـزل بديـل دع بـلاد الـذل وارحـل يالبيـب واغترب فالكـل بالدنيـا غريـب القضا مكتـوب والداعـي نصيـب اركب الاخطـار والهـول المهيـل وان جفتك الدار أو مـال الزمـان لاتعيـش بــدار ذل أو هــوان لو يظلـي نبتهـا مـن زعفـران صاحب الاخطار واجعلهـا دليـل شد عن ارض الاعـادي والحسـود واطلـب العليـا وبالـغ بالجهـود لو يكون العز فـي غـاب الاسـود خير مـن دار تعيـش ابهـا ذليـل كل مـن رام العـلا يرقـى لهـا سلـم الاخطـار فــي اهوالـهـا مـن تراخـى عزمتـه مانالـهـا دونهـا يقصـر البـاع الطـويـل اقطع البيـدا علـى عـوج النضـا لو يكن تمشي على جمـر الغضـا مـا يفـوت العمـر قـدام القضـا دين عنـدك ليـن ياتيـك العميـل عاشر الاحرار مـن اهـل الرتـب تستفيـد العـقـل منـهـم والادب حيث هم اهـل المـروة والنسـب واترك الانذال مـا منهـم حصيـل سل عن الجيـران قـدام النـزول وان سمعت الناس تهـرج لاتقـول تكتسـي ثـوب المعـزة والقبـول والخلايـق يذكرونـك بالجمـيـل كم كـلام راح فـي نقلـه نفـوس وانت ماتاخذ علـى نقلـه فلـوس لاتفتش كـل حـب فيـه سـوس كم تخوض الناس في قـال وقيـل صون عرضك من ملاغات السفيه واترك الكذبـان سـودان الوجيـه من حكى عنهم يعود الكـذب فيـه كيف تاخذ هرج مـن بايـر هبيـل اترك البيت الردي وانص الرجـال خذ عريب البيت من عـم وخـال يوم تنظـر فـي ولدهـا كالهـلال وان مشى بالدرب ما يغوى الدليـل خذ عزيز البز من زيـن القمـاش والردي لو كان يعطونـك بـلاش ما يفيدك كيف تاخـذ شـي مـاش بيعـة المغبـون منهـا يستقـيـل دور الطيـب لـو وغـال الثمـن لو يكون القصد في صنعـا اليمـن لا تغرك صقلـة الوجـه الحسـن ابـذل المجهـود بالمـال الجزيـل الذهـب مـا يخلطونـه بالنحـاس غير بعض الناس ما عنـده قيـاس خذ نصايح ما حواهـا بـو نـواس مثل نظم الـدر واللولـو الأصيـل وان ملكت المال لاتغـدي شحـوح اطعم الجيعان واكسـي كـل روح الدبـش والمـال لابـده يــروح والثنا والمجـد جيـل بعـد جيـل هم روحك واغتنم عصـر الشبـاب ان لـلأيـام مـيـل وانـقــلاب ونت فيها تنطـوي طـي الكتـاب لاتغـرك صحـة العمـر الطويـل اترك الدنيا ليـا جاتـك ضحـوك لا تغـرك بالملاعـب والشكـوك كم غرر فيها وكم غـرت ملـوك ضحكها غرار ما اسرع مـا تميـل والعدو لا تأمنـه لـو بعـد حيـن لو حلف بالبيـت والركـن اليميـن الحقد والبغـض فـي قلبـه دفيـن وان ضحك بالوجه قلبه لك غليـل خـل عنـك الكبـر فالله الكبـيـر لا تحاقـر عـاجـز والا فقـيـر واعلـم ان الأمــر لله الخبـيـر يقصـم الجبـار ويعـز الذلـيـل

نظرة الحب 07-08-2011 09:01 PM القصيدة الثانية وهي المشهورة بين العرب وهي لوحة فنية رائعة يرسم الشاعر فيها طبيعة الوقت الذي يعيش فيه من الفقر والحاجة والعوز ويتحدث عن جفاف الارض وعدم نزول المطر ويتألم من الحالة التي وصل اليها بالرغم من انه ينتمي الى قبيلة عتيبة وانه عريب الجد والخال. يقـــــول بديوي الوقداني ايامنـا والليـالـي كــم نعاتبـهـا شبنا وشابت وعفنا بعـض الاحوالـي تاعـد مواعيـد والجاهـل مكذبـهـا واللي عرف حدها من همهـا سالـي ان اقبلت يـوم ماتصفـي مشاربهـا تقفي وتقبل وما دامت علـى حالـي فـي كـل يـوم تورينـا كبايبـهـا واليوم الاول تراه احسن مـن التالـي ايـام فـي غلبهـا وايـام نغلبـهـا وايام فيهـا سـوى والدهـر ميالـي جربت الايام ومثلـي مـن يجربهـا تجريب عاقل وذاق المـر والحالـي نضحك مع النـاس والدنيـا نلاعبهـا نمشي مع الفي طوع حيـث مامالـي كم مـن علـوم وكـم اداب نكسبهـا والشعـر مـازون مثقـال بمثقالـي اعرف حروف الهجا بالرمز واكتبهـا عاقل ومجنون حاوي كـل الاشكالـي لكن حظـي ردي والـروح متعبهـا مافادني حسن تأديبـي مـع أمثالـي ان جيت ابي حاجة عـزت مطالبهـا العفو ما واحد في النـاس يـا والـي قـوم ليـا جيتهـا رفـت شواربهـا بالضحك وقلوبها فيها الـردى كالـي وقوم ليا جيتهـا صكـت حواجبهـا وابدت لي البغض في مقفاي واقبالـي ما كني الا اسمـوي حـال مغضبهـا والكل في عشرتـه ماكـر ودجالـي يا حيف تخفىامـور كنـت حاسبهـا والاهل واصحابنا والـدون والعالـي والروح وش عذرها في ترك واجبهـا راح الحسب والنسب في جمع الاموالي نفسي تبى العز والحاجـات تغصبهـا ترمي بهـا بيـن اجاويـد وانذالـي المـال يحيـي رجـال لاحيـاة بهـا كالسيل يحيي الهشيم الدمـدم البالـي عفت المنازل وروحي يـوم اجنبهـا منها غنيمة وعنها البعـد اولـى لـي لاخير في ديرة يشقـى العزيـز بهـا يسشي مع الناس فـي هـم واذلالـي دار بهـا الخـوف دوم مـا يغيبهـا والجوع فيها ومعها بعض الاحوالـي جوعى سراحينهـا شبعـى ثعاليبهـا الكلـب والهـر يقـدم كـل ريبالـي عز الفتى راس مالـه مـن مكاسبهـا يا مرتضي الهون لا عـز ولا مالـي دللت بالروح لين ارخصـت جانبهـا وان عتيبي عريـب الجـد والخالـي قوم تدوس الافاعـي مـع عقاربهـا ولها عزايـم تهـد الشامـخ العالـي خل المنازل غـراب البيـن يندبهـا يبكي عليهـا بدمـع العيـن هطالـي لاتعمـر الـدار والقـلات تخربـهـا بيع الردي بالخسارة واشتـر الغالـي ماضاقت الارض وانسـدت مذاهبهـا فيها السعـة والمراجـل والتهفلالـي دار بدار وجيران بجيـران نقاربهـا وارض بارض واطلال بـا طلالـي والناس اجانيب لين انـك تصاحبهـا تكون منهـم كمـا قالـوا بالامثالـي الارض لله نمشـي فــي مناكبـهـا والله قـدر لـنـا ارزاق واجـالـي حـث المطايـا وشرقهـا وغربـهـا واقطع بهـا كـل فـج دارس خالـي واطعن نحور الفيافـي فـي ترايبهـا وابعد عن الهم تمسي خالـي البالـي مـن فـوق عمليـة تقطـع براكبهـا فدافـد البيـد درهــام وزرفـالـي تبعدك عـن دار قـوم ودار تقربهـا واختـر لنفسـك وللمنـزال منزالـي لو مت فـي ديـرة قفـرا جوانبهـا فيها لوطي السبـاع الغبـس مدهالـي اخير مـن ديـرة يجفـاك صاحبهـا كـم ذا الجفـا والتجافـي والتعلالـي دوس المخاطر ولا تخشـى عواقبهـا تسعى على الرزق ماحـت للاشبالـي والشمس في برجها والغيـم يحجبهـا قفي وتقبل لها في العـرش مجدالـي رب السمـاوات يامحصـي كواكبهـا يا مجري السفن في لجات الاهوالـي ضاقت بنا الارض واشتبـت لهايبهـا والغيث محبـوس يـارزاق ياوالـي يالله مـن مزنـة هـبـت هبايبـهـا رعادها بات له في البحـر زلزالـي ريح العوالي مـن المنشـا تجاذبهـا جذب الدلي من جبا مطويـة الجالـي ديمومـة سبلـت والاخـت ذوايبهـا وانهل منهـا غزيـر الوبـل همالـي تسقي ديار شديـد الوقـت حاربهـا ما عاد فيها لبعـض النـاس منزالـي يـا جاهـل اسمـع تماثيـل مرتبهـا فيها معانـي جميـع القيـل والقالـي مثل المحابيـب زادت فـي قوالبهـا في صرفها زايدة عن قرش وريالـي يـارب توبـه وروحـي لاتعذبـهـا يوم القيامـة اذا ماضاقـت اعمالـي وازكي صلاتي على المختار واوهبها شفيعنا يـوم حشـر فيـه الاهوالـي

نظرة الحب 07-08-2011 09:01 PM تفكر بديوي الوقداني في زمانه وفي دنياه التي يعيش فيها والتي شبهها بالعجوز المتقلبة المزاج وفي الارزاق الشحيحة والاسعار الغالية ، وقال هذه القصيده الرائعة التي تصلح لكل زمان ومكان آخر زمان وكل مـن عـاش خبـر وبغيت اقول الميت ارجى من الحـي ورد حبالـه فـي زمانـه وصـدر ان كان اهو ضميـان ولا روى ري ما عاش في هـذا الزمـان المغيـر واحوالـه اللـي ماعرفنـا لهـا زي دنيـا عجـوز وغيهـا مـا تغيـر تضحك مع الجاهل وتعجب هل الغي جار الزمـان وسـل نابـه وكشـر واسعار طارت والمخاليق فـي لـي وقام الامـام وسـل سيفـة وكبـر واهتز من صنعاء ليـا بـاب منبـي والشمس دارت وجهها واقتوى الحـر ما عاد يمنع من لضا حرهـا الفـي والطير الاصفر عاشر الطير الاخضر بطيور ما نعرف لهـا وجـه وقفـي والنار شبت والحطـب سـاع جمـر واللي يدوس النار يصبر على الكـي والنيل فاض وظنتـي يخـرب البـر واهل البيوت الطارفـة مالهـا تـي بعنوانها باخبرك عن كـل ماضمـر شبت وشابت وابدلت عـود بصبـي وراع النصيحة ضاع نصحه وعـذر قال اسمعوا لكن مـا يسمـع الحـي وريح العوالي قابلت ريح صرصـر وكل مافيها جـرى شـوف عينـي والنمل جالـه ريـش نسـر وعمـر وان استمر الحبـل لابـد مـن لـي والنمـر حنـب والحصينـي تنمـر حاسب حساب الغاب من جملة الفـي وان كان الافعى نابهـا مـا تكسـر عضت وسار السم لاصق مع الـدي وان كان عظم الداعيـة مـا تحيـر اذا اظلمت ماعاد يبقـى لهـا ضـي واللي حكم في سابق العصـر عبـر تعبير يعقوب ابن اسحـاق يـا بنـي الظلم ظلمـة وان دخـل دار دمـر ودنياك ما دامت لحاتـم ولـد طـي منها السلامـة راس مـال ومتجـر والقول كنـي لازم الشمـس بايـدي واختـم كلامـي بالنبـي المـنـور صلى عليـه الله مـا سيـر الحـي

نظرة الحب 07-08-2011 09:01 PM وقال بديوي في قصيدة أرسلها لشريف مكة وفيها يتبين ان الشاعر كان يتمتع بعلاقة قوية مع اشراف مكة وانه كان يتعامل معهم بعزة نفس وأنفة الشاعر الذي يعتز بأصله ندا بند يتبين من خلا ل هذا البيت: وابدي لك البيضا عدد ريح الافواج وتمشي ركاب المدح بينك وبينـي أي ان الشاعر والشريف يتبادلان المدح والثناء وتمشي ركائب الفخر بينهما . ياراكب اللي ياخذ الحـزم مـواج مـواج دار وتـاه فـي الغبتينـي يوم استشد الريح ترميـه الامـواج أمـواج بحريضـرب الجالتينـي ضاري على قطع الفيافي وسجـاج سجاج بيـن الشـرق والنقرتينـي محنوني كالقوس منعـاج منهـاج مثل الهـلال اللـي ولـد ليلتينـي والا كما سرحان مع فج الافجـاج والا الغزال اللـي رمـى مرتينـي يجفل ليا ماشاف ظل العصا مـاج راعيه مـا يقـدر يمـد اليدينـي كوره عقيلي مشترينه من الحـاج والميركـة والخـرج والغرتينـي ضرب عليه اليا سجا الليل وانساج وزارت مراسيل الكرى كل عينـي خله مع الريعين والـدرب مدهـاج والسيل مره ما مضـى ساعتينـي واحرم بعمره واقطع الدرب منهاج منهاج من يمشي على الفرقدينـي تصبح بمكة حزة الصبـح منبـاج واسع وطف وصل لك ركعتينـي وانص الملوك اللي لهم نور وهاج نور من المشـرق الـى القبلتينـي تلقى الوفود الهم كما وفد حجـاج يوم الثمـان ومصعديـن القرينـي سلم عليهم واخرج الهرج مخـراج واعرف مقام الملك في الحالتينـي واخرج لهم خط طوى طي ديبـاج هديـة مـن باشـة المحمليـنـي منظوم فيها ابيات من بحر عجـاج نظم الجواهر في سلـوك اللجينـي يا عون يا سيدي وصلت انت فراج وانا تراني عند سيـدي الحسينـي حيث ان له عادة وله جود ثجـاج من معصـرات الجـد والوالدينـي يا ما عطوا من واسع خيل وابراج دهم جمـاح محجـلات اليدينـي وان جا نهار فيه للخيـل مسهـاج ونادى بشير الموت في الجمعتينـي ركبوا على ضمر بشادن الابـراج مصقـلات لبسهـا كـل زيـنـي وظلا غبار النقع من فوقهـم تـاج وتصادم الهندي وسمـر الردينـي كم جندلوا من فارس غير مزعاج حامت عليـه الطيـر بالخافقينـي ورماحهم روس الاعادي لها ازراج ضد الرماح اللي لهـا زوجتينـي يا بن محمد يا غنى كـل محتـاج ياعيـد مديـون تحمـل بديـنـي خدامكم شفه مـن المـال سيـراج والا فرنجيـه لـهـا جبدتيـنـي حتى يودي ذكرهـا كـل هـراج واخبارهـا تـاصـل والعديـنـي وابدي لك البيضا عدد ريح الافواج وتمشي ركاب المدح بينك وبينـي ويفرح صديقي والعدو صاده افلاج من غبنها دمعة من العيـن عينـي وصلوا على من خصه الله بمعراج محمـد المختـار جـد الحسينـي

نظرة الحب 07-08-2011 09:02 PM وقال بديوي الوقداني كم فقيـر مـات قـدام الممـات موت بعض الناس خيرمن الحيات ان بكن أو مـا بكـن النايحـات البكا خسران في بعض الهزيـل والف صلوا ماسجع با لاشتـراك ساجع القمري على غصن الاراك في رياض علها نـوء السمـاك كل يوم الركب له فيهـا مقيـل تبلغ المختار والصحـب النجـوم ما سعى أو طاف بالبيت القـدوم والمصاحف والمكاتـب والعلـوم والحصا والرمل ميل بعـد ميـل

نظرة الحب 07-08-2011 09:02 PM وهذه من روائع بديوي الوقداني : انفكت السبحة وضاع الخرز ضاع وبغيت ألمه يا سليمـان وازريـت صار الذهب قصدير والورد نعناع أنكرت ريحه مختلف يوم شميـت الباب طايـح والمساميـر خـلاّع والحَبّ فيه السوس والفار في البيت أمسيت أكيل الراى بالمد والصـاع قست الأمور وعفتها مـا توريـت لا فاقد الحيلة ولا قاصـر البـاع ويا الله يامولاي فيـك استغريـت الذيب رزقه فـي مباديـن الأرواع وانا برزقي فـي زمانـي تعنيـت وانا مربّى من زمانـي ومطـواع ربتنـي الأيـام حتـى تربـيـت

نظرة الحب 07-08-2011 09:02 PM وهذه قصيدة ينصح فيها ابنه عبد العزيز : أنا بوصيك ياعبد العزيز ان سمعتنـي ترى الصقـر يسمـع مايقـول ابـاه إذا مانصاك الضيف رحب وهـل بـه ترى الرحب يقري الضيف دون اقراه وقدم له الميسـور وزيـن لـه النبـا واعز العرب مـن هـو مليـح انبـاه ولا تندرق عنها ليـا جاتـك ناصيـه ولـو كـان عـودك ماعليـه الحـاه ولا تعترضهـا ون تعـدت مجنـبـه كمـا معتـرض سيـل يجـر انحـاه وابا اوصيك صون الجار واصبر لزلته ولوكـان تسمـع كـل يــوم ازراه ترى الجار ستر الجار يحمي سرايـره وعــزى لـجـارٍ مايـظـل اذراه وابااوصيك بنت اللاش والمنبت الردى وبيـت الـردا خطـرٍ علـيـك ارداه يجيك الولد من بنتهـم خايـب النبـا كـمــا زرع ودن مـايــرد اذراه حذارا اتعدى عـن بيـوت الشجاعـه وبيـت الشجاعـه مـا يطيـح ابنـاه وعز الرفاقه لو تـرى منهـم الجفـا عسى لك رفيـق ولـو يزيـد اجفـاه رفيقك سلاح الضيق تلطم بـه العـدا ومن قـل جيشـه يطمعـون اعـداه وضيـم الرفاقـه علـةٍ مالـهـا دوا يكـون الرجـا والصبـر هـو ا ادوه تصبر عليهم وارجهم مثل مـن رجـا حيا الصيف حتـى يرتعـي مرعـاه وقْف دونهم لو كان ماقفـك فالصفـا وموت الفتـى مرحـوم دون اعـزاه وخصمـك لياجـا منتحـي للطلايـب تنقـى لـه الخصمـه وحيـر مــاه لياجاك ضامي غلـق ابـواب حجتـه وخلـه يمـوت ابعلـتـه وضـمـاه ولاتأمـن الطلبـه لياجـات فلوجهـا ولو كان خصمـك نصلـة المحـلاه تراهـا كمـا بنـت الزنـا شقلبـيـة يقـع ينبنـي سـد وثـيـق ابـنـاه وحذرك من حلـف اليميـن المضـره تـلـزم بحـبـل الله ولا تـنـسـاه ترى الدنيا تقطع كـل عصبـه قويـه ومـن يتقـى فالله مايخيـب رجــاه ولا تكره اللي ينصحونك عـن الغـوا تـرى كـل غـاوي ينشبـه اغـواه ولاتاخذ الاشـوار مـن عنـد جاهـل يقـع عاقـل تلقـى الزمـان اربـاه وضـم اللـوازم كلهـا ثـم ضمهـا بحبـل مـن العـزم الوثيـق اقـواه وصلو على المختار ماهبـت الصبـا وماحـج مـن فـج بعـيـد امــداه

نظرة الحب 07-08-2011 09:03 PM وقال بديوي الوقداني :- دنيـاك هـذي كلهـا هَـزِّ قـاروق ما تعرف الصاحب من اللي معاديـك واكثر كلام الناس بالمكـر والبـوق يهرج معك واليـا تِقَفَّيـت يرميـك المال دايـم صاحبـه مرتفـع فـوق والقل خايب لـو تَرَفَّعْـت يرْخِيـك عزِّي لمن دَوَّرْ لهـا عنـد مخلـوق إما بخـل ولاّ مَنَـن يـوم يعطيـك أوصيك بالطيِّب إذا كـان لـك ذوق إرمـه وراك ولازمٍ إنـه يلاقـيـك يا العبد هوِّن كل مطـرُود ملحُـوق لا تِشْتَحِن لك رَب ما هُـو مخليـك اللي جعل لك رُوح جاعلك مـرزُوق كما تَكفَّل بـك مـن الخلـق كافيـك يعطي وباب الرِّزق ما هُو بمغلـوق واليا طلبته وانـت محتـاج يعطيـك الرِّزق له حبسه وله وقـت مطلُـوق وإن مت ظل عنـد قبـرك يناديـك والموت جايك لو تقع جوف صندُوق دع عنك ما بك من حـذر لا يعنيـك لا تشتغل بالمال ترى المال ممحُـوق مـا مالـك إلاّ مـا تمـده أياديـك إن كان مالك يا فتى ضيـق السـوق تراه عند الموت مـا هـو منجيـك الجار والعاني لهُـم شـرط وحقُـوق والضيف واجب تكرمه يوم يلاقيـك وان كان تبي تأخذ المـدح مطبُـوق خلك مشمر دُون ضيفـك وعانيـك صُون الأمانه واظهر الهرج بصدُوق ولا تعاشر صاحـب البـوق يعديـك لا تصحب الخاين ولا تامـن النُّـوق وان لاح براق الحيا عَـذَّرَت فيـك والدرب لا تامنه لو كنـت مرفُـوق إلا بِحـدٍّ فـي يميـنـك يبـاريـك أترك طريقة كل عاشِـق ومعشُـوق ترمي برُوحك في الشرك ثُم يرميـك والكلب ما يتبعك لـو تلبسـه طـوق ولا خلاخيل الذهـب مـا يراعيـك وبالصبر تغلب صاحب العزم يا شوق والعزم طيب مَيْـر حـزات يرميـك وافرح ليا منك عن الشـر مـدروق واحذر صديقك واحذار اللي يُواليـك هذا كلام الصدق ما هُـو بمسـروق وابيـات يـا قلبـي بِناَهَـا يسَلِّيـك من هاجسٍ يطمي كما بحر صافـوق احذر على القلب الشقي يوم يِطْريِـك يا رَبِّ تجعلني مـن النـار معتـوق واجعل ختامي طيبـاً يـوم الاقيـك

نظرة الحب 07-08-2011 09:03 PM وللشاعر بديوي الوقداني قصائد بالفصحى ومنها : 9)- قصيدة رثاء المـلـك لله والدنـيـا مـداولــةٌ ومـا لحـيٍّ علـى الأيـام تخليـد والناس زرع الفنا والموت حاصدهم وكـل زرع اذا ماتـم محـصـود النـاس ذا فاقـد يبـكـي أحبـتـه وذاك يبكـى عليـه وهـو مفقـود وذاك أبـدت لـه الأيـام زينتـهـا وذاك ايـامـه هــم وتنـكـيـد ان سالمت غدرت أو وههبت رجعت ظل يـزول ومـا تعطيـه مـردود والدهر وجـه عبـوس فـي تقلبـه وللمنايـا سهـام صيدهـا الصيـد تصطاد ما لا تكاد الأسـد تنظـره وحيلهـا لاصطيـاد الكـل ممـدود لو يمنـع المـوت سلطانـا بقوتـه لكـان حيـا سليمـان بــن داود

نظرة الحب 07-08-2011 09:03 PM وقال من الفصيح : مـا يعطـي الله الا مستحقينـا سبحان من سبقت احكامه فينـا كل الامور التي تجري بقدرتـه يقضي بما شاء لايقضي بما شينا اختار للملك عبدالله عـن ثقـة الله راض وكان الناس راضينـا والملك لايبتغي يوما به عوضـا وان ارادوا وان كانـوا محبينـا اقـام اركانـه عـدلا وشـيـده ونحن في ظله والامـن راعينـا

الساعة الآن 01:10 PM

صفحة 1 من 2 1 2 > عرض 40 مشاركات من هذا الموضوع لكل صفحة

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية