رعاك الله ياذاك الوصال ومنبع التحنان
رعاك الله ياأجمل من سكن فيني وهو فيني

رعاك الله ياوقتن غدا في سالف الازمان
بداياته … تفرّحني … نهاياته… تبكيني
غدت ذكري من الماضي ولكن يعقب النسيان
وذكراها علي رف المشاعر مايخلـيني
انا الغرقان في بحر الهوي والشوق للخلان
ولاعندي سفينة نوح تاخذني وتنـْجيني
حزن يعقوب في صدري وصدري موطن الاحزان
الا ليت القميص اليوسفي ياتي ويبريني
ولا ابيّضت عيوني من فراقه ؟ قلبي الوجعان
وِصاله نبض يحييني وبُــعده موت ينهيني
عليك اللــــه ياجرحي فلا تشره علا الغلطان
وانا جرحي من اسبابه ولاغيره يداويني
ترا شوقي مثل طيرن يغرّد بــ اعذب الالحان
علي غصن الوله مكسور ولاعنده جناحيني
ياكم ارسلت مرسول الغرام وقلبي الشفقان
واشوف الصمت سيّـد موقفه والبين يطويني
وعطيته من قصيدي ماعطاه انسان لاي انسان
واشوفه ساكت وكنّه علي الهجران يدعيني
واذا ناوي علي الهجران انا ناوي علي الهجران
ولكن لانويت ارجوك !! لاتنوي تخليني