منتديات قصايد ليل

منتديات قصايد ليل (http://www.gsaidlil.com/vb/index.php)
-   …»●[الرويات والقصص المنقوله]●«… (http://www.gsaidlil.com/vb/forumdisplay.php?f=12)
-   -   رواية / غالبا مايكون الحب قدر لاخيارا/ البارت الحادي عشر (http://www.gsaidlil.com/vb/showthread.php?t=154993)

ضامية الشوق 03-05-2019 04:17 PM

رواية / غالبا مايكون الحب قدر لاخيارا/ البارت الحادي عشر
 
-11-


العصر اللكل صحى الا وجدان وريوف والهنوف ورهف

ام عبدالله : مانامو معكم ؟
مشاعل : لا حنا نمنا بالمجلس ولما صحينا بنروح الغرفه ماشفناهم
ام فيصل : تكفين يامشاعل صحيهم
مشاعل تقوم : ابشري
ام محمد : اجلسي يامشاعل انا بروح اصحيهم
ريناد : امي لطيفه قامت عليهم الله يعييينهم
مشاعل : ههههههههههههههههه الحمدلله اني ماسهرت معهم
هيفاء : والله رحمتهم

الجده دخلت الغرفه معهم ومعها عصاتها وهم بسابع نومه
قعدت تطق الباب بقوه بعصاتها

ريوف صحت : وجع ان شاااءالله وش هالازعاج
ام محمد : يوجعك يالفاهره احد يقول وجع لجدته ؟
ريوف توها تفتح عيونها : اسفه يمه والله مادريت انه انتي
الهنوف اكره ماعندها احد يصحيها من النوم صحت وهي متنرفزه وبصوت واطي لريوف : ليته مو عيب عشان اقوم اضربها
ريوف ماتت ضحك
ام محمد :اتركو عنكم الضحك وقومو عمكم خالد ينتظركم برا كلكم بتسوون الغدا
وجدان : تستهبلون مقوميني من النوم عشان اسوي غداكم ؟
ام محمد : ايه بتقومين ورجلك فوق راسك
وجدان بصوت واطي : بيطلعون اللحم من عيونا بس هين ان ماسممتكم ما اكون وجدان
رهف : ههههههههههههههههههههههههه تعوذي من الشيطان وقومي
وجدان : والله يقهرون زياده على اني ماشبعت نوم بيخلوني اشوي معهم

قامو البنات

بعد نص ساعه كلهم طلعو برا

كان عمهم خالد جالس على كرسي جنب الشوايه ويعطي اوامر

خالد : يالله حي بنات اخوي واختي وصديقتهم يالله كلكم بتنكرفون اليوم
وجدان : لييه وين العيال هم اللي دايم يشوون
خالد : عبدالعزيز وسيف بالبر وعبدالله وسعود وسلمان رايحين القصيم يزورون واحد مافيه الا ماجد وفيصل ومشعل وعبدالرحمن
الهنوف : فيهم خير 4 خلهم يطبخون لنا وحنا ناكل بس
خالد : مشعل شغلته يدق عود ويغني وماجد بالبقاله يجيب باقي الخضار وفيصل بالمخزن يجيب حطب
ريوف : ودحيم ؟
عبدالرحمن كان جنب خالد
خالد : عبدالرحمن يقول نكت ويضحكني هذي شغلته الوحيدة
مشاعل : عمي تستهببللل ؟
خالد : كبرك انا عشان استهبل ؟
مشاعل : ياربيه ياشينكم شمس وحر وانتم رايقين

بعد ربع ساعه ماجد كان داخل المطبخ ومعه الاغراض

كانت وجدان بالمطبخ تسوي لها كوب قهوة


ماجد : وانتي 24 ساعه بالمطبخ ؟
وجدان : ترى مو ناقصه والله
ماجد وهو يضحك : وش فيك من مزعلك
وجدان : امي لطيفه مصحيتنا بطريقه همجيه انقهررت
ماجد : ههههههههههههههههههه ليه شلوون
وجدان : لاتضحك مره مايضحك !
ماجد وهو يحاول يكتم ضحكته : طيب ماراح اضحك بس علميني كيف
وجدان اللي كانت جد معصبه : بالموووت نمت 11 وجايين من 2 يصحوني خييير لا وتخيل امي لطيفه تطق الباب بالعصى بقوه
ماجد : احمدي ربك مو مثلنا جدي يصحينا بالمويه
وجدان : وش هالعايله اللي ماتحترم النايم !
ماجد : حتى وانت صاحي مايحترمونك تبينهم يحترمونك وانت نايم
وجدان : من جد !
ماجد : يلا عاد وريني صفه اسنانك
وجدان ابتسمت غصب
ماجد ابتسم : اييييييوه كذا



بعد ساعه تجمعو كلهم البنات فرشو لهم فرشه وجلسو يتقهوون
وخالد جالس يعطي اوامر
وماجد هو اللي قاعد يشوي
ووجدان بالمطبخ تقطع الخضار وتسوي شاهي لعمها
وريوف تتبل اللحم
ومشاعل جالسه مع عمها خالد




وباقي البنات يتقهوون

عند البنات

هيفاء : بنات ماتدرون متى بنرجع من المزرعه ؟
ريما : بكره
مشاعل : من جدددك ؟
ريما : والله امي امس تقوله

ريوف خلصت وجت جلست معهم

ريوف : الحلوين شيسولفون فيه ؟
هيفاء بحزن : تخيلي بنرجع بكره
ريوف : وييين ؟
نورة : الرياض
ريوف : لااااااا خلصت الاجازه !!!
نورة : ايه الدوامات تبدى الاحد
ريوف : اليوم ايش اصلا !
نورة : الاربعاء
ريوف ترفع جوالها تشوف التاريخ : كويس لسى باقي لنا اسبوع ونصف
هيفاء : ليه تاريخ كم تبدون ؟
ريوف : تبدا الدراسه 5/5 وحنا الحين 25/4
هيفاء : اليووم 25/4 !
ريوف : ايييه
هيفاء : اوووه بعد بكره البيرث داي حق ميش
الهنوف : صددق
هيفاء : اي والله
ريوف : اسكتو خلونا نسوي لها مفاجأه
هيفاء بحماس : قبلللللللللل ماتقولون شي انا بجيب لها الشنطه اللي امس تقول انها عاجبتها
البنات قعدو يصارخون وكل وحده تقول وش تجيب لين صار كلامهم مو مفهوم

جتهم مشاعل بسرعه
مشاعل : شفييييييكم تتهاوشون خير
البنات سكتوو يوم جت
ريوف : تحمسنااا بنقاش
مشاعل : عن وشو ؟
الهنوف: يالقف هالبنت جايتنا من اخر الدنيا بس عشان تعرف وش السالفه
مشاعل : الشرهه مو عليكم والله على اللي يترك سالفته ويجي يشوف وش فيكم
ريوف : يالله توكلي
مشاعل عصبت : ياكرهي لكم بس

راحت

ريوف : لايكون عصبت صدق
هيفاء : لا بتزعل نص ساعه وبتنسى

رجعو يكملون نقاشهم

عند ماجد

ماجد : مالك بالاجنبي ابد ابد ؟
مشعل : لاوالله مو مره يعني اغنيه اغنيتين بس
ماجد : يالله سمعني
مشعل : مو حافظها مره وغير كذا استح على وجهك عود واغنيه اجنبيه ؟
ماجد : وش يعني واذا ؟
مشعل : اختار اغنيه عربيه ولا باخذ راي عمي خالد
ماجد يفكر : اممممم طيب
خالد من بعيد : مشعل عطنا مذهله
مشعل : بشطه ولابدون ؟
خالد رمى عليه المركى نط بسرعه مشعل وهو يضحك
مشعل يبدا يعزف : لعيون العم خالد اغنيه مذهله مرتين ورا بعض

وبدا يغني


رهف بانبهار وبسرعه : بنااات اسكتووو
ريوف : له 3 ساعات يغني ماشبعتي من صوته
رهف : لااحرام عليك صوته حلو والله ومرررره احلى يوم بدا يغني مذهله
الهنوف بصوت عالي : طول صوتك لك معجبين هنا

ابتسم مشعل وهو يغني

رهف : هذا اخوك هيفاء ؟
هيفاء : ايه
رهف : ممكن اتزوجه ؟
وجدان : ههههههههههههههههههههههههه رهوف صارت نفس نوره ماتقدر تخبي مشاعرها
نوره تتصنع الحزن : المشكله محد اعطى مشاعري وجه
هيفاء تضحك وتوجه الكلام لرهف : المشكلة انك اكبر من مشعل عاد
رهف : عادي راضيه دام اني بسمع هالصوت كل يوم
هيفاء : اجل خلاص خذيه هههههههههههههههههههه


مشعل خلص

مشعل : يالله عندكم طلبات ثانيه ؟
الهنوف : نبي المعازيم
مشعل التفت عليها : بيأذن الفجر وانا ماخلصت منها ,, بس يالله بغني مقطع احبه منها

بدى يعزف

ياعيون الكون غضي بالنظر اتركينا اثتين عين تحكي لعين اتركينا الشوق ما خلى حذر
بلا خوف بنلتقي وبلا حيرة بنلتقي بالتقي بعيونها وعيونها احلى وطن وكل الامان

البنات يصفقون وصرااااخ

ريوف بصوت عالي : ومجيد ماغنيت له
مشعل : ولايهمك نغني له


بالبر

عبدالعزيز وسيف يقومون
عبدالملك : وييين بدري ؟
عبدالعزيز : والله ودنا نقعد بس مضطرين نمشي بكره بنرجع الرياض بدري
سليمان : ياثقل دمكم توها تحلى الجلسه
سيف : الجايات اكثر ان شاءالله

سلمو على العيال وركبو السياره بيرجعون

بالسياره

سيف باستغراب : ترى كان عندنا وقت زياده ليه قمت بدري ؟
عبدالعزيز : والله احس ضايق صدري ماانبسطت
سيف باهتمام : ليه وش فيك ؟ صايرشي ؟ محتاج شي ؟ انا اخوك ترى
عبدالعزيز : ماتقصر والله بس ماحتاج شي اللي مضيق صدري موضوع صاير
سيف : اقدر اعرف وشو ؟
عبدالعزيز كان محتاج يتكلم وقال لسيف سالفته مع الهنوف كلها
عبدالعزيز : ماكنت مغبون لين سمعتها تكلم واحد وهي على ذمتي !!! متخيل انها تقريبا على ذمتي !!!!!
سيف : مو على ذمتك
عبدالعزيز : تخيل انك مكاني ! خاطب وحده وتنتظر ردها عليك وتسمعها تكلم حبيبها !
سيف : اوكي المووضوع يقهر بس المفروض تنبسط انك اكتشفت هالشي عشان تسحب نفسك
عبدالعزيز : بالعكس صممت اكثر اني اتزوجها عقب ماسمعت المكالمه
سيف : من جدك ؟
عبدالعزيز : ايه بكسر راسها واعلمها من عبدالعزيز اللي هي مستهينه فيه وتكلم واحد وهي على ذمته انا كنت جدآ معجب بشخصيتها وحابها لكن مجرد ماعرفت عن حركاتها كرهتها جاني شعور ودي انتقم منها واكسر خشمها بعدين اطلقها
سيف : والله عيب ياعبدالعزيز انك تفكر كذا
عبدالعزيز عصب : سيف اترك عنك المثاليات وحط نفسك مكاني
سيف : انت الطريق قدامك مستقيم وتقدر تنهي الموضوع بسهوله وتريح دماغك بس انك معقدها على عمرك
عبدالعزيز : دراستك برا اثرت على مخك
سيف تنرفز : ماله دخل انا اكلمك بمنطقيه
عبدالعزيز : حتى لو ماهي على ذمتي غيرتي عليها بكونها بنت عمي تخليني اسوي شي اما اني اسكت لا والف لا
سيف : انت وش دخلك الحين ؟ البنت عندها ابو واخو انت وش موقعك بالضبط ؟ ولد عمها على عيني وعلى راسي لك حق في كل شي الا انك تتدخل بحياتها وتحاسبها اترك البنت بحالها نصيحة ياعبدالعزيز ولاتسوي شي ممكن تندم عليه بعدين
عبدالعزيز : كلامك ابد مو منطقي ولاعجبني
سيف : اللي يريحك بس صدقني راح يجي يوم وتتندم

نزل سيف من السيارة ودخل المزرعه وقعد عبدالعزيز يفكر بكلامه
عبدالعزيز بقلبه : معقوله اللي اسويه غلط ؟ ..لاعبدالعزيز لاتخلي كلام احد يأثر عليك البنت غلطت وهي على ذمتي ومن ابسط حقوقي اني اربيها من جديد .. بس هي رافضتني من الاساس وماتعتبرني خطيبها .. بس ولو اقلّها تحترم ربط اسمها بأسمي حتى لو بالعايلة ..
قطع حبل افكاره صوت طق عالشباك

مشعل بصراخ : عزيّزززززززز
عبدالعزيز : ووجع
مشعل : لي ساعتين اناديك بسرعه انزل لايخلص عنك الغدا
عبدالعزيز : غدا الساعه 6 المغرب !
مشعل : غدعش
عبدالعزيز : طيب جايكم
مشعل : تراه بالحوش اللي قدام قسم الحريم
عبدالعزيز : وش الطاري ؟
مشعل : يحق لك ماتدري محد كرفك من الظهر
عبدالعزيز : وش السالفه
مشعل بكذب : غداكم كله انا مسويه تعال بس بسرعه
عبدالعزيز نزل معه


عند البنات

حطو عشاء للحريم والرجال وطلعو للحوش يتعشون

ماجد : ياليت تقولون تسلم يدك ماجد
وجدان : تسلم يديني انا والله 3 ساعات بالمطبخ اقطع لكم
خالد : الصدق تسلم يد بنت اخوي جايب لها خضار سلامه كله ومقطعته انت بس تقلب اللحم
ماجد : اتوقع والله اعلم يالخال ان بنات اخوك ساحرينك
خالد : انا مع الحق
ماجد : لا لا صدق الله يفرجها عليك قلبي معك

عبدالعزيز جاهم
عبدالعزيز وهو يجلس : وين سلمان وباقي العيال
فيصل : شكلنا ماملينا عينك
عبدالعزيز : لاوالله مالينها وزياده بس مستغرب ان عددكم قليل
خالد : بالقصيم
عبدالعزيز : زين الله يستر عليهم

مشاعل : عزيز تبي احط لك بصحن ؟
عبدالعزيز : لاياقلبي ماشتهي شي والله ( ويلف على البنات وبصوت عالي ) اهم شي اللي فيهم سوء تغذيه ياكلون
ماجد : افااا يدي الكريمه شاويته وانت تقول ماشتهي ! مالك حق بصراحه
عبدالعزيز : الحين من مسويه انت ولامشعل قلبتو راسي
ماجد : يخسسسسى مشعل
مشعل : الزم حدودك اخ ماجد

قعدو يتهاوشون ماجد ومشعل

عبدالعزيز : الحمدلله والشكر بس
تركهم وراح يجلس مع خالد

خالد بصوت واطي : وش مضيق صدرك ؟
عبدالعزيز : مافيني شي
خالد : كذاب
عبدالعزيز يتغصب الابتسامه : لو فيني والله بقولك ماعليك

سيف جا وجلس معهم
سيف وهو ملتفت على ماجد ومشعل : وش فيهم ذا المهابيل ؟
خالد : ليتهم يتذابحون ونفتك من الازعاج
عبدالعزيز : ما اشره على مشعل اشره على مجيدوه اكبر مننا كلنا ويتلاقط مع ورع

مشعل وماجد وقفو طقاق وغمزو لبعض

بثانيتين كانو فوق سيف وعبدالعزيز وخالد

عند البنات

رهف ضايعه بخلاقينها من بعد كلمه عبدالعزيز وماتعرف وش تسوي
ووجدان شكت ان الكلام موجه لرهف بس ماتدري

مشاعل : الحين عزيّز من يقصد جا سيف واستحيت اسأل
هيفاء : هنوووف انتي فيك سوء تغذيه ؟
الهنوف :بسم الله علي لا
مشاعل : شكل اخوي دايخ
مشاعل لفت على العيال : شوفووو انهبلو عيالنا
البنات التفتو
وجدان : ياعمري سادحين عمي خالد
ريوف : والله اخوي المسكين نايمين عليه صححح
وجدان : والله سيف دافنهم كلهم
ريناد : خل نشوف نتايج النادي الحين يجلدهم كلهم ولالا
هيفاء : شوفوو شووفو جدي جاي من بعيد هههههههههههههههههه الله يعينهم على الهواش

ابوو محمد جا عند العيال وبعصاته طق ظهر اللي فوقهم كان ماجد

ماجد : اححح جدي حرام عليك
ابومحمد : عيب عليكم كل واحد شنبه خاط وتتطاقون بهالشكل
خالد قام حب راس ابوه : معليش يبه بس كله من ماجد ومشعل
ابومحمد : افا ياماجد وانا اقول ماجد اعقلكم طلعت خرطي
ماجد : كله من ولد ولدك مشيعل ولا انا عاقل
ابومحمد : اعقلو بس
خالد : حياك ابوي اقلط
ابومحمد : لا بس جاي اعلمكم اننا بنمشي الساعه 9 نامو بدري
عبدالعزيز بصوت واطي : اخر مره سمعت هالكلمه بخامس ابتدائي
ابو محمد سمعه : ترى بقومكم تنامون الحين
عبدالعزيز : وش فيك متسلط علينا اليوم ياجدي
ابو محمد : عيالي كلهم رايحين لواحد يعرفونه قلت مالي الا اجلس مع عيالهم ولقيت عيالهم بزران
سيف : افا ياجدي
خالد : من مسيرين عليه اخواني ؟
ابو محمد : المزرعه اللي جنبنا يقال لهم ال.... من الجنوب مسيرين عليهم
مشعل بغباء : كان رحت معهم ياجدي وخليتنا نكمل هوشتنا وحنا مرتاحين
ابومحمد : وانا ولددد ابوووي انت تقول لي كذا ؟
مشعل قام بسرعه وقعد يركض ويتأسف بصوت عالي

البنات والعيال ميتين ضحك عليه


يوم الخميس الصبح

كانو كل البنات نايمين الا الهنوف صحت من جوالها
رفعته تشوف من المتصل وشافت اسم ابوها وفزت
طلعت من الغرفه وردت

الهنوف : اهلين
ابو عبدالله : هلابنتي اخبارك
الهنوف : الحمدلله انت اخبارك واعمامي شخبارهم
ابوعبدالله : الحمدلله , مالقيت وقت اكلمك فيه عن موضوع عبدالعزيز .. متى تردين علي ؟
الهنوف سكتت دقيقة ثم قالت : الجمعة اقولك قراري
ابوعبدالله : اكيد ؟
الهنوف : ايه اكيد
ابوعبدالله : زين يالله ..
الهنوف : مع السلامه
ابو عبدالله : مع السلامه

بعد ساعتين الجميع متوزعين بالسيارات ومتجهزين للرجوع للرياض ..


اتمنى اشوف تفاعلكم . وتوقعاتكم لأبطالنا

مجنون قصايد 03-05-2019 08:25 PM

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

الغنــــــد 03-05-2019 09:19 PM

جميل ماطرحت

سلمت أنااملك

يعطيك العااافيه


شكرا لك

ضامية الشوق 03-05-2019 11:34 PM

حضورك شرف لي
نورت أخي الكريم
مجنون قصايد

ضامية الشوق 03-05-2019 11:34 PM

حضوركي شرف لي
نورتي عزيزتي
الغند

إرتواء نبض 03-06-2019 12:00 AM

سلمت يمنآكـ على مآحملتهـ لنآ
موضوع عآلي بذوقهـ ,, رفيع بشآنه
مودتي

نجم الجدي 03-06-2019 12:07 AM

يسعدك الله على الموضوع
وعلى اختيااااره الا كثر من رووووعه

شكرا يعطيك العااافيه

نجمكم

ضامية الشوق 03-06-2019 12:42 AM

حضوركي شرف لي
نورتي عزيزتي
ارتواء نبض

ضامية الشوق 03-06-2019 12:43 AM

حضورك شرف لي
نورت أخي الكريم
نجم الجدي

ملكة الجوري 03-06-2019 03:57 AM

سلمت الآكف ومَاجلبت
إبداع دآئم وتميز مُستمر
لا عدمنَاك
قوافل شكري وتقديري لك
http://up.gnon1.com/uploads/155087980332862.png


الساعة الآن 07:15 AM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية