ماني وانا بندر براعٍ ولد راع = انا الحصان اللي طوالٍ حباله
إبن سلايل خير من شالت القاع = المصطفى الهادي وديع الرسالة
ماني وانا بندر ببيّاع دمه = يقطعك يا بياع دمه و مهفيه
اللي يبيّع لابسات الأزمه = ثورن يبي بيض العماهيج تغنيه
ماني وانا بندر بهيسن ولد هيس =هيسٍ يدنع عند حرمة قصيره
ليا بغيت اجلس ترى لي مجاليس =وليا بغيت انهج دروبي عسيرة
ماني وانا بندر بهيتٍ ولد هيت =هيت مقابل خمّةٍ يكرهونه
من كثر ما جرّبت وأقبلت و أقفيت =قولة هلا من لا يودّك مهونة
ماني وانا بندر على درب الأنجاس =اللي قريبٍ تفلها من لحاها
أنا بدرب الصيرمي عدم الأجناس =زيزوم روق ليا تنصّت عداها
ماني وانا بندر بنصّاي جابان =شوخ الجموس مناقرين الحليلة
ليا صار لي لازم نصيت ابو فيحان =شيخ الشيوخ مكمّلين الجميلة

صوتي وانا بندر طويل ليا بان =إن ما خشيت الرب ويش اختشي له
ما ينرمي قولن على غير نيشان =و من لا يثبّت حجته ويش هي له

أنا الذي ما ابدي على الناس سرّي =من خوف سودان الوجيه تحكي به
أصبر على ظيم الدهر و التعرّي =من شان من يرضى عليّ الغليبة
و ابعد مجالي عن عيال التزرّي =من لا هوى قلبي دواه المغيبة
واخاف لي من مجلسٍ ما يذرّي =في جانبه بومٍ حساسه صليبه
و سوالفٍ مابين بحث و تحرّي =يجرح فؤادي عيّه و ابتلي به
يرضيني المقسوم خيري و شري =سبحان من لا تعلم الناس غيبه
أحدٍ على ربعه يحب التحري =للشر بلاس و خيره بجيبه
هذاك يالربع انا منه متبرّي =لو عضّني ناب الدهر ما انتخي به
من خوف يضحك لي و هو يستغرّي =يفتل حبال السّوْ ما يندري به
يفرح عليّ بكل شيٍّ يمرّي =و ان شاف يمّي خير عنّي نهيبه

الله من عينٍ ليا عسعس الليل =عافت لذيذ النوم ما تهتني به
يا وين انا القى من يحب التعاليل =يبدى بزين القول والا ابتدي به
الله من عينٍ تزايد صلفها =بيّن كداها بالعروق الصخيفة
كم واحد له حاجة ما صرفها =يصد عن صرّافها لا يظيفه
الله من عينٍ طرقها صواديف =عميت و يبسن العروق الصخافي
شفت الوزا بالعين من عرض ما شيف =شفته و غيري ما فطن له و شافي