على همس الشفق تكتب حروفي رحلة الاحزان
يجددني غروب الشمس وابدا رحلة احزاني

اسامر شوقي الظامي اعاني لوعة الكتمان
سكون الليل يملكني بصمته وازعج الحاني

اقلب صفحة الماضي ليالي عشتها حرمان
تعاندني ظروفي واتجاهلها بنسياني

هلابـك يالقصيد اللي ترنم مثل غصن البان
تقادح بالورق قصة غياب البوح والجاني

هلابـك كثر ماحن الغريب لديرته شفقان
هلابك كثر ماضج المسافر بعد الاوطاني

هلابك كثر ماحل الفراق وشتت الخلان
هلابـك كثر تفكيري ولوعاتي وحرماني

قصيدي يوم جيته ما خذلني فجر القيفان
خذل كل المصاعب والظروف وفزلي عاني

توارى فوق هامات الورق يعزف شقاي الحان
تغنى بالبيوت بكل طرق وكل الاوزاني

بدا من منطلق حب(ن)قديم وكان ياماكان
محبه بعثرت سير الصفوف وهزت اغصاني

كتبها وجه عثرات االزمـان وملها النسيان
وخطبها الموت لدروب الهلاك وقلت من شاني

حضنت الحب في صدر(ن) يضيق ويشتعل نيران
واعرف الحب مايرحم حياة فلان وفلاني

تخيرت الطريق الصعب الاضيق في رجا الرحمن
زبنت اضيق منافذ للحياه وربي انجاني

تخيل كنت احبه حب ماينكال بالميزان
تصدق كنت اعزه عن جميع اهلي وخلاني

ولكن للآسف جازاني التقدير بالنكـران
وتركني للدروب العوج تلعبي وتشناني

قطع حبل الوصل في صمت لا راضي ولا زعلان
زرع في الشكوك وشتت افكاري وخلاني

قصيدي فك ستر الصمت عني وافضح الكتمان
ترى طالت وانا عايش بلوعاتي وحرماني

ابيك اكبر من الفرقا ابيك اقوى من الحرمان
ابيك تبوح دام البـوح بأمكانك وبأمكاني

انا هقواتي ابعد من خيالي واكره الخوان
واحب الوافي اللي ماكذب عمره ولا خاني

وانا ماهوب انا اللي لا هرج في هرجته نقصان
انا دايم صريح ولاهرجت الساني حصاني

حبيبي ليه تتركني بلا مبدا بلا عنـوان
ترى محد(ن) يسد بغيبتك لو كانوا اخواني

انا لو قلت ماحبك تراي اخفي شعور انسان
مشاعر صادقه حلت تفاكيري ووجداني

عشقتك كثر ما اشتقت لدفاك وجيت لك ولهان
كثر ما اشفق عليك وكثر ما احبك وتجفاني

انا اللي ضعت لجلك واختفى ظلي ورى القضبان
تخيل بعد كـل الضيم واللوعات تجفاني

اعيش اسير بيدين الغريب ورحمة السجان
وانا اللي كل ماجيت اكتبك بيديك تمحاني

تعذر بالزمان وبالليالي والظروف احيان
وانا ماسامحك لاصرت بأعذارك تحداني

امانه لا تقول الحظ خانك والزمن خواااااان
تراك انت الخيانه والزمن مظلوم بأعياني

احبك لو تقول ابعـد احبك والعذاب الوان
احبك لو تعذبني وتتركني وتنسـاني

وعلى جرد الورق جيت اكتب القصه بلا عنوان
عبث فيها الزمان وضاع فيها البوح والجاني

مما راق لي لـ /عادل الرشيدي