بقايا أنثى مجروحة / الكاتبة : سحر الاحساس ، الجزء التاسع
 

%%البارت التاسع%%

ما بي جرح..ولا ابي خوف..ولا أحزان..أبي موقف..أبي كلمة..تهز أوطان..دخيل الله أبي إنسان..أذا طحت من طولي يفز ويسند حمولي..يحس فيني قبل لا أبكي..يواسيني قبل لا أشكي..ومن قلبه إذا حنيت ألاقي بداخله أحضان..دخيل الله أبي إنسان!!
بعد الغداء طلعت لجناحي..وأطلقت العنان لدموعي الكل يلوموني ويرمي الغلط علي ولا هم حاسين بجرحي ومعاناتي..
انفتح الباب ومسحت دموعي بسرعة..ودخل فارس واتجه لغرفة النوم من دون ما يعبرني..
..رح الله يسامحك ما عاد باقي وقت للتفكير..
يجي لك يوم تعرف فيه من يندم على الثاني؟؟؟
..شغلت التلفزيون على قناة المجد للقرآن الكريم ونزلت رأسي عالكنبة ودموعي مازالت على خدي..وأخذت استمع للقارئ سعود الشريم حتى هديت ونمت..
قال تعالى((ألا بِذِكْرِ اللَّهِ تَطْمَئِنُّ الْقُلُوبُ))


===========================

صحيت على صوت المسج..وطالعت الساعة وكانت أربع العصر..
فتحت المسج~~سأظل احبك وأن طال إنتظاري...فإن لم تكن قدري فقد كنت إختياري~~
أوووف وش قصة هالرقم كل يوم والثاني يرسل لي مسجات حب وغرام..شكله غلطان أو أنو واحد فاضي..
مسحت الرسالة ودخلت الغرفة ولا حصلت فارس..توضيت وصليت..وبعدها اتصلت علي سجى عشان نجتمع عندها..بس اعتذرت عشان ما يشوفون علامات الضرب اللي بوجهي..نزلت تحت لكن رجعت لفوق ألبس شالي بعدما سمعت صوت سعود بالصالة وبعده نزلت تحت وحصلت الكل مجتمع عمي وخالتي وفارس وسعود ونورة..
جلسنا لحد المغرب وبعدها طلعت فوق أصلي..

=================================..

وأنا ألف سجادتي وشرشف صلاتي بعد ما انتهيت من صلاتي سمعت ضرب عالباب..
فتحت وكانت نورة..
نورة:ممكن أدخل..
:أيه..حياك تفضلي ..
جلست نورة:مشاعل أنا بصراحة ما كان ودي أدخل في حياتك مع فارس..بس أنها توصل للضرب أكيد في بينكم شيء كايد..مسكت يدي وبحنان..مشاعل أنا مو قادرة أسكت أكثر من كذا وأنا أشوفك كلما لك وتضعفين وتذبلين..أنا حاسة من البداية أنك مو مرتاحة مع فارس..مشاعل افتحي قلبك لي..يمكن أقدر أساعدك..
دمعت عيوني ..
مليت أجامل وأكتم الجرح بسكات!
وأنا هواجيسي تروح وتجي!
إلى متى عايش أسير المعاناة؟؟
إلى متى الشقاء تحتوني؟؟
مسحت نورة دمعة تمردت على خدي:وهالدموع دليل أن اللي بينكم مو شيء عادي..
:راح أقولك يا نورة بس لا يطلع هالكلام لحد..
نورة:ولا يهمك..وعد ما قول لحد..
:فارس يا نورة ما تزوجني ألا لأن عمي جابره علي ..
نورة وهي مصدومة:وأنتي كيف عرفتي..
قلت لنورة اللي سمعته من مكالمة فارس مع سعود..
نورة وهي متنرفزة:وما دام أنك عارفة من البداية ليه ما رفضتيه..
تقوس فمي معلن بداية انحدار دموعي من جديد:أبوي أهو اللي جبرني مع أني قلت له أنو فارس يحب بنت خالته..وكملت بألم..نورة أنا أحب فارس وحبه لغيري متعبني ومعذبني كثيـــــر..
وبديت ابكي..
خذتني نورة لحضنها:خلاص يا قلبي هدي..كل مشكلة ولها حل..
وبعدها بفترة هديت..ورفعت نورة رأسي عنها:أقدر أتكلم معك ألحين..
هزيت رأسي بالموافقة..
نورة:مشاعل أنا عارفة أن هالشيء صعب..والطلاق وأنتوا لسى ما صار لكم ألا شهرين أصعب..مشاعل ما في ألا أنك تحاولين تجذبني قلب فارس لك بأسلوبك وتصرفاتك بكل شيء..ولا تنسين أن غادة خلاص تزوجت..يعني فرصتك ذهبية في أنك تخلين فارس ينسى حب غادة..بس يبيلك تتحملين وتصبرين
طالعت نورة بعيون حايرة ويأسة:ما أعتقد أن فارس بيوم راح ينساها..
نورة:أنتي سوي اللي قلت لك وصدقيني راح ينساها وينسى اللي جابوها بعد..
ومن كل قلبي قلت:يــــــــــــا رب..


=============================================
الساعة11بالليل..
بعد ما لبست لي بيجامة طلعت من غرفة التبديل..ولما جيت أفتح باب غرفة النوم فتح فارس الباب بسرعة وكنت راح أطيح لكن فارس مسكني ورفعني له..ولما وقفت سحبت أيدي منه وابتعدت..وكنت راح أطلع لكنه وقف قدامي وسد علي الطريق..رفعت رأسي وطالعته..
شفته يطالعني بتمعن..
:ممكن تبعد..
رفع يديه لخدي اليسار وأخذ يتلمس العلامة الخضراء اللي فيه..
صديت بوجهي عنه وأنا أحاول ابعد عن يده..وكررت وأنا فيني غصة:فارس ممكن تبعد..
مسكني فارس مع ذراعي ولفني له:مشاعل أنا إنسان عصبي جــداً لا تحاولني تنرفزيني بكلامك مرة ثانية عشان ما أمد أيدي عليك..
نزلت رأسي وأنا أقول بنفسي بالأول طالع كلامك اللي يجرح..
رفعت رأسي:إن شاء الله..بس ممكن تبعد ألحين..
ابتعد وعلى طول طلعت..


~~لا تجبر الناس ينسون أخطائك~~
~~علم نفسك وشلون ما تخطي عليهم~~

==============================..

مر أسبوع وأنا وفارس ما بين أي احتكاك يذكر..
المغرب..
كنت أتجهز لحفلة زواج مرام..اللي رفضت أنها تكون كبيرة وعملتها بقصرهم..وكنت جالسة قدام المراية وأحط اللمسات الأخيرة لمكياجي..وكانت مسوية مكياج سموك ومكثرة من البودرة على وجهي عشان تخفي الآثار البسيطة اللي بوجهي..
دخل فارس:على وين أن شاء الله..
وقفت:بروح لزواج وحدة من صديقاتي..
فارس وهو يتكف:يا ســلام كاشخة وجاهزة من دون ما تأخذين الأذن مني قبل..
:وليه أستأذن..
فارس:ناسية أنك متزوجة..والزوجة ما تطلع من بيتها ألا بأذن زوجها..
قلت بضحكة استخفاف:مصدق روحك أنك زوجي بالفعل..حبيبي أحنا متزوجين بالاسم وبس..وكلها بالكثير عشر شهور ونتطلق..
فارس وهو يشد ع أسنانه:عناد فيك ما راح أخليك تحضرين..
قلت بعناد أكبر:مو بكيفك تمنعني..وغصب عنك راح أحضر..
مسكني مع أيدي وبهاللحظة رن جواله وطلع من جيبه ورد: ألو..هلا..أنا بالبيت..أوكي جايكم ألحين..مع السلامة..
سكر الجوال وطالعني بملامح معصبة:شوفي مشاعل أنا اطالع ألحين وأذا عرفت أنك حاضرة وربي ما تلومين ألا نفسك أنتي جربي وشوفي وش راح أسوي..
رماني بعيد عنه وطلع..صحيح خفت من تهديده بس بروح للزواج..مو كافي يجرح فيني ولا يهتم بمشاعري..بيتحكم فيني هذا اللي ناقص..

==================================

أول ما سلمت على خالتي أم جاسم طلعت لفوق عند مرام..
ضربت باب غرفتها..
مرام:مين..
:مشاعل..
فتحت مرام الباب..وعلى طول طاحت بحضني وهي تبكي..سحبتها لداخل الغرفة..وجلستها ع السرير..
مسحت دموعها والكحل السايح ع خدها:مرام حبيبتي خلاص كافي بكي عشاني أمسحي دموعك..
مرام وبصياح يقطع القلب:آآآآآه يا مشاعل يا ليتني أموت قبل ما أنزف لراجح يا رب أموت..
ضميتها ودموعي تنزل بهدوء:بس يا مرام لا تدعين على نفسك..استغفري ربك..
مسحت دموعي..ورفعتها من على حضني ومسكت وجهها:مرام خلاص البكاء ما راح يجيب نتيجة ألحين..قومي خليني أعدل كحلك اللي اخترب..عشان ننزل وحاولي تكوني طبيعية عالأقل عشان خاطر أمك..باين عليها متضايقة..
مسحت مرام دموعها وعدلت لها الكحل والشدو..ونزلنا وسلمت مرام ع الحاضرات اللي كانوا عمات مضاوي وبناتهم وخالتها الوحيدة هناء.. والساعة تسع وصلت سجى ورغد..وبعد ما جت الساعة11طلعت مرام مع زوجها..وكان شكلها يحزن كثيــر وهي تودع أمها..


===============================


دخلت الغرفة وأنا متضايقة كثيــر عشان مرام وبنفس الوقت متندمة أني حضرت..لأني طلعت وزوجي مو راضي..والزوجة ما يجوز تطلع من دون أذن زوجها..أنا الغبية لو ما عاندته..حسبي الله عليك يا إبليس..دخلت وأنا أنزل نقابي وطرحتي حصلت فارس جالس بالصالة وملامحه غاضبة..
مسكني من شعري وسحبني معه لغرفة النوم وحاولت أسحب أيدي بس ما قدرت..
رماني على السرير
فارس:أنا مو محذرك أنك ما تروحين..
قلت بسرعة وبعصبية ودموعي على وشك تنحدر:أنت وش يخصك فيني أنت زوج بالاسم ما تفهم..مالك دخل بحياتي
قرب مني ومسكني مع شعري:ألا لي دخل ونص..وأذا مديت لسانك مرة ثانية قصتيه لك..بس والله لأخليك تندمين..وشد شعري بقوة..ونومة في الصالة ما فيه

==========================================

~~أنا عمري بقايا شمع~~
احرقني الاسى والدمع~~
~~إذا ما فيك ترحمني~~
~~احرق ما بقى مني~~


اليوم الثاني الساعة تسع الصبح كنت فاتحة الشنطة وأرمي ملابسي بشكل عشوائي فيها..ما أبي أشوف فارس بعد اللي حصل أحس بجواتي نار تحرقني..بعدها انهارت جنب الشنطة أبكي..
سكرت الشنطة وأرسلت لفارس..أنا طالعة لأهلي أجلس عندهم كم يوم..وطلعت لأهلي..


=======================================

مر اليوم علي كئيب وكنت أحاول أني ما أبين لأهلي شيء..وأما فارس لا اتصل ولا أرسل..
دخل علينا خالد وما كان بالصالة معي ألا أمي وشجون..
خالد:السلام عليكم..
..وعليكم السلام..
خالد:كيفك ميشو..
:الحمدلله بخير أنت كيفك..
خالد:أنا تمام الحمد لله..والتفت على أمي..أقول يالغالية صديقي زياد طالع اليوم مع أهله لجدة وعزمني أجي بالشاليهات عندهم وأخذكم معي..وأنا بصراحة ودي أطلع لجدة من زمان عن البحر..وش رأيكم نطلع بكرة..
أمي:كيفك ياولدي..
شجون:أيه ماما خلينا نطلع لجدة أنا مشتاقة للبحر..
أمي:خلاص بس شوفوا أبوكم أذا وافق طلعنا..
شجون:أوكي اتركوا دادي علي..
خال:طيب أنا أستأذن بطلع فوق أرتاح..
أمي:أذنك معك..
كنت أطالع أهلي وهم يتكلمون وأنا عقلي سارح في نظرات زياد..
قطع علي سرحاني صوت امي:مشاعل يماه بتطلعين معانا أذا وافق أبوك..
:ان شاء الله اذا كان فارس ما عنده مانع..
وبصراحة أنا نفسي بالسفرة هذي..منها أكون بعيدة عن فارس..ومنها أفأجى رغد بجيتي






تحس او ما تحس فيني
ترى صار الامر عادي
صدى صوتك يبكيني
ويملي حزني فؤادي

كان الكل يتجهز عشان السفر بكرة أن شاء الله لجدة..
أرسلت لفارس وأنا أدعي ربي انو ما يعاند ويرفض(فارس بكرة أهلي طالعين لجدة أقدر أطلع معهم)..
أرسل بعدها بثواني(بكيفك)..واااااااااو مو مصدقة..نقزت من السرير فرحانة وفتحت الشنطة وبديت أرتب ملابسي فيها..
طرى في بالي نظرات زياد..نظراته يا ناس مو طبيعية تسبب لي التوتر أذا طرت ع بالي..
سمت ضرب عالباب..
:أدخل..
دخلت شجون وقالت:اتصلتي ع فارس عشان السفر..
:أرسلت له..
شجون:وأن شاء الله وافق..
:أيه ما تشوفيني جالسة أرتب شنطتي..
شجون:قلت يمكن عشانك بترجعين..
:المهم ما تدرين منى راح نمشي بكرة أن شاء الله..
شجون:خالد يقول بأذن الله ع العصر بنسافر بالسيارة..
تنهدت:تعب بالسيارة..
شجون:أنتي تعرفين خالد يحب السفر بالسيارة..
وفعلاً أخوي خالد دائماَ يحب سفرياته داخل السعودية تكون بالسيارة..


=========================

اليوم الثاني بعدما جهزنا طلعنا متوجهين لمكة قاصدين العمرة وبعدها بنطلع جدة..
وكنت راكبة بسيارة بندر..وأما المامي وشجون وخلدون والخدامة مع خالد..وأبوي ما رضى يروح لأنو مشغول..
:بندوري..
بندر:هلا..
:وش صار على موضوع زواجك من جمانة..
بندر:الوالد يقول بعد زواج خالد راح نخطب جمانة من عمي سالم رسمي أن شاء الله..وتنهدت تنهيدة تعب..
:سلامتك وش فيك تتنهد..
بندر وهو يأشر على قلبه:اللي هنا متعبني..
عقدت حواجبي:ليكون تحبها..
التفت علي بندر:قصدك جمانة..
هزيت رأسي بالأيجاب..
صد عني يطالع الطريق..وقال:لا..
عقدت حواجبي أكثر:أجل مين..
بندر:عبير..
ابتسمت بمكر:وين اللي ين يقول شكلك متأثرة بالقصص والروايات..وما في حب من مجرد نظرة..
بندر:مشاعل لما قلت لك هالكلام كنت اعتقد أنو بس أعجاب ولكن اكتشفت مع الأيام أني أحبها..خاصة بعد ما شفت أبوي جاد بموضوع زواجي من جمانة..مشاعل جمانة ما أحس بناحيتها أي حب أو مشاعر مثل عبير..
:طيب ليه ما تقول لأبوي أنك ما تبي جمانة وتبي تخطب عبير..
بندر:قلت له يا مشاعل..لكنه عصب وقال ما راح تأخذ غير بنت عمك سالم..
:طيب حاول مرة ثانية وثالثة لحد ما يوافق..
بندر:حاولت أكثر من مرة لكن من دون فايدة..
:لا تيأس يا بندر..باقي على زواج خالد ثلاث أسابيع..يعني راح تقدر فيها انك تقنع أبوي..وان شاء الله يوافق..
بندر:يـــــا رب يوافق..بس مشاعل..
:هلا..
بندر:أتمنى هالكلام ما يطلع لحد..
:لا توصي حريص..
يالله ليه أبوي يجبرنا علي شيء ما نبياه ويتحكم بحياتنا..
كنت طول الطريق سرحانة بحالي وحال أخوي..بصراحة أتمنى يأخذ عبير..وأنا متأكدة بأذن الله راح يسعدها بندر ويقدر ينسيها سامي..
قطع سرحاني صوت بندر اللي وقف عند محطة عشان البنزين..
بندر:أنا نازل السوبر ماركت وش تبين أجيب لك..
:اممم على ذوقك بس أهم شيء ما تجيب لي مشروب غازي..تعرفني ما أحبها..
:أوكي..
نزل بندر وما اخذ ألا دقايق ورجع..ركب السيارة وعطاني الكيسة..
فتحتها ومديت لبندر فطيرة وعصير وأخذها وأخذت لي بالمثل وجلست أكل فيها..
بعدها بفترة التفت ع بندر:بندر..كم باقي ونوصل أن شاء الله..
بندر:باقي خمس مية كيلو..
:وااااو تعب..الله يهديك بس يا خالد لو حجزنا بالطيارة كان أحسن..
بندر:أيه والله..بس شنسوي بأخوك دامه يحب السفر بالسيارة..
مر الوقت وحسيت فيها بالنوم..
رفعت رجولي لحضني وسندت رأسي ع ورى ونمت..

=======================================

انتيهنا من عمرتنا الساعة وحدة ونص وحجزنا في فندق قريب من الحرم عشان نستريح..وجلست لحد الفجر قضيتها ما بين صلاة وقرأت قرآن..وبعدها نمت..
شجون وهي تهز كتوفي:مشاعل ميشو بسك نوم أصحي..
صديت بوجهي للجهة الثانية عنها:يووووه شجون أتركيني أنام بس شوي..
شجون:وش شوي..أحنا ألحين بنطلع لجدة يله أصحي..
:طيب الساعة كم..
شجون:سبع الصبح..
:يووووه في حد يمشي بهالوقت..
شجون:وش أسوي عاد أنا بأخوك خالد هو اللي قال نمشي ألحين..
صحيت وأنا أتأفف من زمان ما نمت بارتياح مثل كذا وهذي خربت علي نومتي..خذيت شاور ع السريع ولبست وبعدما انتهيت..شفت شجون تلبس عبايتها:بنمشي ألحين..
شجون:أيه خالد وأمي وخلدون مشوا قبلنا من زمان..وبندر يتنظرنا ألحين..
لبست عبايتي وأنا أحس أني لسى ما شبعت نوم..

===================================

وصلنا للشهاليات..واتصل بندر على خالد يسأل عن مكان الشاليهات..
وأول ما وصلت جلست مع أمي وخالد..
خالد وهو يوقف:أنا طالع أمشي شوي ع البحر مين راح يمشي..
بندر:أنا ما فيني حيل بنام..
شجون:وأنا بعد..
:أنا بطلع معك..
خالد:أوكي يله لبسي عبايتك..
طلعت مع خالد أمشي وأخذنا نمشي بهدوء..

~~أبعرف يا بحر وش اللي بس سويته !
أنا لا عمري جرحت إنسان ولا عمري بكيته !
أبسكت يا بحر وأمشي وأخلي ضيقتي فيني
أبسكت وأبتعد عنك وأدور من يواسيني
تصدق يا بحر إني توقعتك تشيل الهـــــم
ولكني انصدمت أنك غرقت بدمعه من عيني~~

..رن جواله وقف لما رن جواله ورد..
خالد:هلا زياد..لا الحمد لله وصلنا جدة وعلى فكرة أخذت شاليه قريب منكم..
ما أدري ليه توترت وارتعبت لما قال خالد أننا قريب منكم..
خالد:لا على البحر..أوكي انتظرك..
وبعدما سكر خالد التفت علي:ميشو رجعي..زياد راح يجي ألحين عندي..


=====================================

العصر..اتصلت على رغد اللي فرحت كثير لما قلت لها أني جاية جدة عشان أخوها اللي مقترح ع أخوي نطلع معهم الشهاليات..
واتفقنا نطلع مع بعض..وفعلاً طلعنا نتمشى وما كان معاهم ألا عمتها وبنتها سوسن بعمري أنا ورغد..
وكنت أمشي مع رغد وسوسن وشجون وداخلين جو ضحك وسوالف..رن جوالي وكانت نورة وابتعدت..
:هلا النوري..
نورة:هلا فيك كيفك..
:الحمد لله بخير..أنتي كيفك وكيف سعود..
نورة:كلنا بخير ولله الحمد..ألا أقول ما شاء الله عليك قبل أيام أعطيك نصايح كيف تجذبين قلب فارس وما مر يومين ألا تركتيه وسافرتي..
:نورة قلت لك فارس صعب ينسى حبه لغادة..وبعدين أنا ما عاد أبي حبه بعد اللي حصلي معاه..خسارة بس حبي فيه..
نورة:ليش وش اللي حصل..
ارتبكت:هــا أيــه تصرفاته هالأيام وكيف أنه يحقرني ومطنشني يقهر..
نورة وبعدم تصديق:أكــــيد..
:أيــه أكيــد..
نورة:طيب مشاعل أكلمك بعدين سعود جاء..
سكرت من نورة..وسمعت صوت من وراي..
:دام أنه ما يحبك ليه ما تطلقين منه..ترى في ناس غيره يحبونك..
التفت عليه وكانت صدمتي لما شفته,,,,,,,,,,,

سلمت يمناك
طرح جميل جدا

يعطيك العافية على اختيار الموضوع
وحرصك على اختيارك مادة مفيدة

الله يكثر من أمثالك
وشكرا

نجم

اقتطافة أنيقة
لاعدمنـآ هذا الجمال بالطرح..
بإنتظآرجديدك بكل شوق..
ودي وشذى الورد..

يسلمو ع المرور