 |
منتديات قصايد ليل
(http://www.gsaidlil.com/vb/index.php)
- …»●[الرويات والقصص المنقوله]●«…
(http://www.gsaidlil.com/vb/forumdisplay.php?f=12)
- - وانك بداخلي رغم الحواجز والمُدن/ 8
(http://www.gsaidlil.com/vb/showthread.php?t=151384)
وانك بداخلي رغم الحواجز والمُدن/ 8
الجـزء الـ 8
. . . على طاولة العشاء ... ريم وهي ماسكه تلفونها وتاكل: أحلام تخيلي منو ضفت في سناب؟ أحلام بملل من سوالف أختها: منو؟ ريم: عاليه أحلام: وليش ضافتج شو لقت فيج! ريم : لا حبيبتي أنا اللي قلت لها عادي اضيفج وعطتني أحلام بصدمه: ما تستحين! تلاقين أحرجتيها عشان جيه عطتج سلمى: لو ما تبا تعطيها عادي ما بتعطيها ريم بغياض لأحلام: شفتي!! أحلام: ومب من زود العلاقة تضيفينها يعني ريم: ياخي كيفي لقافه أحب اشوف كيف الناس عايشين سلمى: الله يشغلج في نفسج صدق ويشغلج بعيالي ريم: آمين على الأولى بس سلمى: واذا سميتها ريم ؟ ريم: عبالج بتيبين راسي جيه!! ترا لو سميتوها ريم صدق بزعل ما أبا حد نفس اسمي قاطع سوالفهم صوت أحمد: السلام عليكم كلهم: وعليكم السلام أحلام: تعال كل ويانا أحمد: وين أمي؟ أحلام: رايحه عند جارتنا ريم: ليش تسأل؟ أحمد: بقولها أني بسافر ريم: سافر الله يحفظك شو نسوي لك أحمد: يا أم لسان محد كلمج مب مسافر دوام بروح العمره ريم بوناسه: الله أحمدوه خذني وياك الله يخيلك أحمد: الله يخليج أنتي وفكيني من صدعتج أحلام: أنتي مب وراج جامعه؟ أحمد: حتى لو فاضيه منو قال باخذها رايح ويا الشباب انا بالسياره ريم: منو الشباب؟ أحمد: شو يخصج أنتي؟ أمي ولا حرمتي؟ ريم: اختك ولي الحق أني أسألك أحلام: خلاص عاد ريم سكتي من قعدنا نتعشا ما سكتي أحمد: عشان جيه معصقله من كثر الكلام تحرق بسرعه ريم: عن تحسدوني قولوا ماشاء الله سلمى سمعت صوت باب البيت ينفتح: عموه يت أم علي: السلام عليكم أحمد قام وباس أمه راسه: وعليكم السلام توه ما نور البيت أم على طالعته بطرف عينه وراحت جلست على الكنبات تفصخ برقعها أحمد: أمايه أنا بروح ويا الشباب السعوديه أم على: شو تسون هناك؟ أحمد: بروح ويا هزاع وعبدالرحمن رايحين يشوفون محل في جده بيشاركون واحد في مطعم وبنعتمر وبنرد ريم: أحمدوه يمكن تلاقي لك من حسنوات جده وتاخذها ونجدد الدماء في العائلة أحمد: الله عليج اول مره تقولين شي عدل أم علي: روح الله يحفظك لانه بس بتروح ويا عيال خالتك أحلام: هيه مع اخوان زوجة المستقبل أحمد بنرفزه من كلامها: أحلام بسج قعده ويا ريم خربتج ريم : ليش إن شاء الله شوفيني أنا أحمد طنشها وراح فوق يسوي شنطته --------------- في المجلس الرجالي الكبير بديكوراته الفخمة عاليه بترقب تنتظر أجابه أمها على سؤالها عاليه: شو مستوي؟ أم عاليه "مريم" بنرفزه: أنا شغلج مب عاجبني سكت عنج ثلاث سنوات قلت بْتكون خبره وبيفيدها. بس إلى هنا وخلاص. تسوقين خطوط كل يوم ودوام ست أيام في الأسبوع وغير التأخير. أنا أمج أأمرج تقدمين استقالتج الأسبوع الياي أول ما تردين من اجازتج عاليه بصدمه ماعرفت شو تقول انربط لسانه وعبرتها بدت تخنقها وما تبا تصيح قدامهم وخصوصا قدامه هو لأن هو السبب. بلعت ريقها عشان تتكلم عدل وشافت قدامها غرشه ماي بطلتها وشربت شوي ورجفة ايدها كانت واضحه لسيف فابتسم بسخريه على حالها. عاليه: أحم ماما تذكرين يوم خيرتيني على سالفه الخطبه مريم باستغراب: هيه عاليه سكتت فجأه انحرجت من اللي بتسويه خصوصا قدام سعيد وولده سيف مريم فهمت: واخترتي؟ مثلت الثقة بكل ما أوتيت من قوه: أنا موافقه على فيصل قامت وشلت شنطتها وتوجهت فوق بدون أي كلمه انطفت ابتسامة سيف ومريم اسود وجها من الصدمه فهي في قراره نفسها تتمنى سالم لعاليه. هل عاليه تبا تجازيني على تدخلي في شغلها في أنها توافق على فيصل!! سعيد وقف بعصبيه: عسى بس ارتحتوا وقام وخلاهم .. أول ما وصلت عاليه غرفتها عقت عمرها على شبريتها ووتمت تصيح طلعت كبت الشهر كله في تلك الساعات اللي قهرها أن أمها ما حافظت على وعدها من ست سنوات وزاد قهرها ابتسامة الشماته اللي على وجه سيف صباح اليوم التالي قامت مصدعه لانها قضت بدايه الليل صياح وآخره تفكير وتخطيط شافت أنها تقدر تستغل سلبيات شخصيه فيصل اللي مب عاجبتها لصالحها ووقتها محد له كلمه عليها غيره هو وأول قراراتها هي تمديد الاجازه حتى ولو بدون راتب بعد ما خذت لها شاور ينشطها تلبست عشان تروح تتسوق شافت أنها الساعه عشره ونص الصباح وغالباً هالوقت يا طالعه أو راقده فعشان تقلل احتكاكها فيها قررت تطلع الحين حتى بدون ريوق وتتريق برا. وهي نازله كتبت لأمها مسج أنها طالعه السوق تشتري لها كم غرض ضروري شافها سعيد وهي نازله وهو من قام الصبح بعد ما رد يرقد من الصلاه الفجر وهو قاعد يترياها تنزل من نفسها وما احب يصحيها. يعرف أنها أكيد بتنزل بتطلع ولا بتشغل نفسها عشان ما تقعد ويا أمها في نفس المكان. سعيد: عاليه عاليه لفت عليه: هلا سعيد: صَبحج الله بالخير تعالي يابوج اباج شوي عاليه توجهت صوبه وقعدت في الكنبه المقابله له: آمرني سعيد: ما يآمر عليج ظالم، يابوج ما يهون علي زعلج نزلت راسها سكتت ما تبا تتكلم هي بالكاد سكتت عمرها امس من الصياح سعيد قام وجلس عدالها: أنتيم ب صغيره محد يقدر يمنعج من شي أنتي تحبينه، أنا ما أقولج لا تسمعين كلام أمج وتمردي عليها بس قعدي وياها تناقشوا وتفاهموا بالهداوه وبدون طرف ثالث. عاليه: بس هي كانت موافقه أني يكون هذا شغلي من البدايه وفي حياتي أصلا ما يبت طاري أن هالشغل بيكون مؤقت! سعيد: في النهايه هذي أمج انتي وأنتي أكثر الوحده المفروض تعرف شخصيتها وأكيد تعرفين شو اللي تحبه وتكره وشو اللي يقنعها ! عاليه: أن شاء الله بكلمها بس مب اليوم ما أقدر اليوم سعيد: على كيفج بس كل ما أطول السالفه كل ما تمصخ عاليه: أنا بقوم أروح توصي على شي سعيد: يلسي بعدني ما خلصت كلامي عاليه ردت تجلس وما تكلمت سعيد: يابنتي الزواج مب لعب ولا انه الموضوع غياض وحده بوحده وأنتي أكثر وحده فينا متضرره من التسرع في هالآمور من قبل والمفروض يكون تعلمتي مب عشان أمج وقفت ضدج تروحين توافقين على طول على فيصل عاليه حست أن قلبها توقف شوي يوم طرى موضوعها الاولي وان كيف عرف ان هي واقفت بس عناد على اللي استوي عاليه حبت ما تبين له ان هي فهمت شويقصد: أنت شايف على فيصل شي؟ سعيد: لا ما شفت عليه شي بس هذا الباين بعدنا ما سألنا عن الريال زين عاليه: حتى لو سألت الناس تعرفه من بعيد. الانسان ما تعرف حقيقته ألا يوم تعاشره سعيد: عشان جيه يا بنتي أنا ما أباج توافقين على فيصل جيه عاليه: انا ما وافقت عليه جيه انا فكرت من قبل سعيد: وليش ما قلتي حق أمج قرارج من قبل ليش يوم بس يابت طاري الشغل قلتلي لها! لانج عارفه أن أمج في قرارة نفسها تباج لسالم عاليه ماردت عليه ما تقدر تناقش أكثر تخاف تنفضح أفكارها قامت وستأذنت وطلعت أول ما طلعت دق على سيف وبعد السلام: عطني رقم هذا اربيعك فيصل سيف بتأفف: مب اربيعي سعيد: ما يهمني عطني الرقم سيف: عندي رقم الشغل سعيد: على أساس ما تقدر تيب رقمه الشخصي ! سيف: اقدر وما أبا سعيد: وهذا وانت ما تبا البنت سيف: ما اباها هذا موضوع خالصين منه بس فيصل ما ابلعه وايد علي دخلت وياه مشروع والحمدلله انه خسر سعيد: بدون كثر الكلام بعد صلاه الظهر أبا الرقم عندي واباك تي تتغدا عندنا سيف: ما اقدر أي اتغدا عندكم سعيد: ليش إن شاء الله سيف: ابوي انت جايف الأجواء عندكم كيف سعيد: الحمدلله أجواءنا ما فيها شي سيف: بشوف مب اكيد سعيد: يصير خير مع السلامة في مكتبها ومستغرقه في الشغل رن تلفون المكتب وكان الدكتور يطلب منها تروح له المكتب قامت وراحت عند مكتبه ودقت الباب وسمح لها بالدخول أحلام: تفضل بدر: زاد فضلج استريحي أحلام بعد ما قعدت بدر: أحلام عندي لج فكره بما أنج أنسانه ماشاء الله عليج شاطره وكنتي من طالباتي المتميزات وصاحبه شخصيه قويه ليش ما تكلمين دراستج في الخارج عن طريق الجامعه؟ الوظائف الحكومية في غيرج بآلاف يحل محلج بس كدكتوره وباحثه في تخصصج جدا قليل أحلام: والله يا دكتور أبداً ما فكرت في الموضوع بعدين أنا اللي أعرفه أن الشروط صعبه ومب أي حد يقبلونه د بدر: أنتي بس فكري وعطيني موافقه مبدئيه وما عليج من الباقي أحلام: إن شاء الله . |
سلمت يمناك
طرح جميل جدا |
ضاميه
لِرُوحكْ وَردْ مُخْمَلِي’..يَ عَبقِ البَسآتِين ...’♥ |
يعطيك العاااافيه على
طررحك الروووووعه واللي نااال الاعجاااااب |
نجم
لِرُوحكْ وَردْ مُخْمَلِي’..يَ عَبقِ البَسآتِين ...’♥ |
يعُطيك آلعآفيييه..
بـ إنتظآأر روعة طروحاتك آلقآدمه.. لك جنآأئن آلورد و أصدق آلود.. دمتْ بـِ عطآء و تميز، |
عازفه
لِرُوحكْ وَردْ مُخْمَلِي’..يَ عَبقِ البَسآتِين ...’♥ |
- أنتقآؤكْ رَبيعٌ فاتِنْ ..
أروتني معرفتٌك حد الإكتفاء لقلبك بياض لا ينتهي |
اطيافي
لِرُوحكْ وَردْ مُخْمَلِي’..يَ عَبقِ البَسآتِين ...’♥ |
آختيَآرَ جَميلَ جِدآ
سَلمتَ علىَ هذهِ الآطَروحهَ الآنيقَهَ وَسَلِمتَ يُمنَآكِ المُخمليِهَ لِ جلبهآ المُتميزَ جَزيَلِ شُكِريَ ..ْ~| http://www.tratel3asheq.com/up/uploads/153532066871.gif |
| الساعة الآن 11:24 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية