جعله خير
 

علامك عسى ماشر ياصبح جعله خير
ثواني دقايق ساعتك ليه منهده
وش العلم علمني من الزود للتقصير
بلا مقدمات اللي على خاطرك بده
تعجل علي الليل والليل وضعه غير
هجرته مثل مايهجر الادمي نده
ماكني علشانك صحيتك سوات الطير
تركت السهر ومنادم الليل من مده
اله كان عندي وش معزه ووش تقدير
اعده رفيقاً ليتني كنت ماعده
قبل غيبة اللي غيبته مالها تبرير
طوت سيرةً من عفة الحب ممتده
تلافت عليها كل عاذل وقام امغير
كبودن قبل فرقى المواليف منقده
شعتني مثل ماتشعي البدو بنت بعير
من الاصل ابوها يعرفون البدو جده
قبل عالم الترفيه والزيف والتطوير
حموها عتيبه في حمى نجد من بده
خذوها قبل ماينبت البذر بالتبذير
على مهندن تنتك الانفاس من حده
من الولف لاقفت تلفت سوات الذير
علشان ترقب راعي الصوت لاوده
وانا يوم انادي وارفع الصوت للاخير
احط العذر عن صمتها بالهوى رده
بعد جاتني ماتسمع الا صدى التكبير
تناثر شعرها من حياها وانا ارده
وراحت وانا من حيرة امري تحت تاثير
غرامً مقادير الليال اوقفت ضده
وانا الشاعر اللي مالقى للهوى تفسير
لو اني كتبت اعظم قصيده على خده
اصيغ القصيده من ورا مفرق التسرير
وأختْم القصيده قبل لاقْبل على امصدّه
ليا سمْعها العاشق تغنّى بصوت منير
وعلى قلبه المجروح دوب الحقت يدّه

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

يسلمو ع المرور

سلمت يمناك
طرح جميل جدا

يعطيك العااافيه على الطررح الروووعه
مجهوودك كبير

شكراااا لك من قلبي

شكرا من الاعماق
وشكرا لاختيارك هذا

الموضوع القيم والمفيد

في محتواه


‏إنتقآء اختيارك

جدا موفق دليل ذآئقه رفيعة

المستوى واناقة فكر



من الاعماق اقدم لك شكري


الحريري

بورك المداد ومن قاد خطاه
لروحك وطرحك أجمل التحايا
دمت بخير