صفحة 1 من 3 1 2 3 > عرض 40 مشاركات من هذا الموضوع لكل صفحة

جنــــون 07-23-2011 06:01 PM ديوان الشاعر عبد الله الظفيري   السلام عليكم ورحمة الله وبركاته سَأقدم لكم متصفح خآص لِشاعر شاب صاحب الإلقاء الفريد من نـوعه بِعذوبة المعنى وأصدق الكلمات التي تعبر عن صدق الشاعروموهبته الربّانيّة و ولعه بالقوافي صاحب الاسلوب الـسهل الممتع في قصائده || • الـشـاعـر عـبـدالله الـظـفـيـري ●• | آشتهر بِ قصيدته المليئة بِ بالأحساس الصآدق |"| الجرح آرحم ~ اللي بقى لـي مـع الأيـام .. وفّيتـه والضيق لـو ينهمـر تشربْـه وديانـي ماهي كبيـره علـي والحـزن غنيتـه وْلاهـي غريبـه إذا وقتـي تحـدانـي الخوف -يا من نبشت القلب وادميته- لاعشت زهرة شبابك وانت وحدانـي!! كم جرح خذْته من الأحباب.. ضمّيتـه وجروح قلبـي زكـاة لْحُـبّّ خِلاّنـي مطعون؟ عاااادي ،، جفا الأقراب؟ داويته تعبان؟ مبطي ،، ردى هالحظ؟ خاوانـي صدمه؟ بسيطه ،، هَوان الحال؟ مرّيتـه مقرود؟ أدري ،، وإذا حرمان؟ عدّانـي ما فاح هـمّ ٍلـك الله مـا تقهويتـه ما مـرّ حـزن ٍبغيـري مـا تبلاّنـي! ياما ويامـا مـن الخـذلان .. عديتـه إلا بصاحبْ .. بعد عِشـره تناسانـي!! أزريت لأنسـى غيابـه ليـن ناديتـه والمـوت لامـن تجاهلنـي وجافـانـي وينه يجينـي .. وكـل عْتـاب كنّيتـه ياليت يدري بعد فرقـاه وش جانـي!! من كنت طفل ٍوانا أرجـاه فـي بيتـه شيّبت.. واثره على هالحـال خلانـي! حتى جنـاح العَتَـب لرضـاه ذليتـه ماطِرْت بعده فـرح مـن ذلّ جنحانـي يا قلب صبرك .. ترى كل شيّ سويتـه ما كان أفضل من اللي كـان بإمكانـي لو بيّ قـوه علـى الهجـران؟ خليتـه لو بـيّ ذره مـن النكـران؟ يفدااانـي الجرح أرحم .. إذا يرجع مـن أغليتـه مجروح؟ فِدوه .. ولكن صعب وحداني!

جنــــون 07-23-2011 06:01 PM || • مقتطفـآت من قـصـائـده فـي الغــزل ●• || يسألوني ليه أحبك ..~ نور عيني.. علميني كيف أبكتب لك شعـر؟ وانتي نظره من عيونك ضيّعت كل المعاني! انتي كلماتك عذوبـه.. وابتساماتـك مطـر وصوت ضحكك يحتويني وينثر الدنيا أغاني أشهد إن العمر من بعدك ترى ماهـو عمـر واشهد إني ماأطيق الغيبه من بعدك ثوانـي من عرفتك لاحزن غطى عيونـي ولاكـدر يابعد من شافته عيني وعن شوفـك خذانـي جارت الدنيا علينا وحالت ظـروف الدهـر لكن انتي ياأصيله دايم أكسب بـك رهانـي واذكر إنك يوم رحتي صحت أنا صيحة قهر ويعلم الله ماتركتـك ليـن ماربـي هدانـي كل ليله تذكريني يضـوي ف(ليلـي) قمـر وإن جفيتيني في ليله أظلمت حولي المبانـي عند بابك ياغناتـي أنحـر أشواقـي نحـر من عرفتك ياطموحي وانتي لي كل الأماني "يسألوني ليه أحبـك حـب ماحبـه بشـر" هذي الغنوه "لراشد" لك تعبّر عـن حنانـي انتي ياعطر القصيد وطيش فكري والسهـر والله ماغيرك أحد يستاهل أبياتـي وجنانـي يابعد كل الخلايق واللي فـي بالـي خطـر من دخلتي في حياتي مابقى لغيرك مكانـي أقبلي يانور عينـي وتامريـن انتـي أمـر يااللي ذكرك يهدي عمري والقصايد جو ثاني مالي إلا أعتـرف بعيـون حسـادك وأقـر إنك - أحلى مارأت عيني- وقابلت بزمانـي قلت أبكتب لك قصيده وطاشت أبيات الشعر ولا طرالي طاري اسمك ينعقد حتى لساني!!

جنــــون 07-23-2011 06:01 PM لـيــه الإعـتــذار ..~ يا غشيمه ليـه تبديـن الأسـف والإعتـذار؟ أصلا احنا منتهين ان كـان هـذا يجهلـك!! ثم أنا مـا ودي أفتـح بيننـا بـاب الحـوار بس أنا عارف فضولك.. بالنهايـة يقتلـك!! تسأليني من معي بعدك خذت فكري وصـار.. يحتفل فيها قصيـدي.. وعلّمَتنـي أهملـك؟؟ واسمحي لي راح أجاوب لك سؤالك في إطار.. الصراحه.. وادري إنّ آخر كلامـي يزعلـك ذيك بنت ٍمن غلاهـا عاملـه فينـي حصـار وين ما وجهت نبضـي لجلهـا قلبـي سلـك ذيك بنت ٍتزرع البسمات فـي كـل الديـار تغفـل بطيبـة نواياهـا .. ولا تستغفـلـك ذيك يوم إنك تركتينـي علـى شبـه انهيـار جتني وطرت بهواهـا للسمـا وابعـد فلـك ذيك يوم آكلمك وابقى على الخـط انتظـار حطت الدنيا انتظار وجت تقول: اشتقت لـك ذيك غيم وصالها ما شـح فـي ليـل ونهـار وانتي ياخذك التغلـي للغيـاب ويشغلـك !! ذيك يوم إني –أموّل- لك تفاصيلـي دمـاااار جت تغني: (الماضي لك/ وبكره لك/ وبعده لك) وعن جمال أوصافها خايف يصيبـك انكسـار لانها لو تلتفت لـك؟ ضيّعـت مستقبلـك!! وانصحك من حسنها لايبتـدي قلبـك يغـار وابعدي عنها تراها "حبه .. حبـه .. تاكلـك" نور عيني حبّها .. يعنـي لـي أكبـر انتصـار حزت عرش ٍمن ملوك الأرض ما حازه ملـك كن قلبي من بعـد مـا حبهـا علّـق شعـار: " الرجاء الإبتعاد .. القلـب هـذا ممتلـك " واعتقد ما فيه داعـي يكتمـل هـذا الحـوار بس هـي كلمـه .. إذا ودك تعرفـي منزلـك

جنــــون 07-23-2011 06:01 PM فـي خـاطــري كـلمــه ..~ كثر ماعشت أنا الفرحه بقربك واضحكت لي عين وكثر ماعشت متهني وكثر ماابتسمـت اشفاتـي وكثر ماقلت في حبـك قصايـد جمّعـت قلبيـن أشوف الوقت من دونك جمـع همـي ومعاناتـي غدا وقتي مثـل ليـلٍ طويـلٍ ماانتهـى للحيـن سواده امتلى بصـدري وسالـت منـه دمعاتـي حشا من يوم ماغبتي وربي ماغفت لـي عيـن طغى همي على عيوني ولعب في حسبتي وذاتي!! أنا من رحتي بفالك وتلعـب بـي همـوم البيـن وتاهت خطوتي بعـدك وتاهـت بـي مساراتـي وأنا وشلون أصور مامضى ويّاك فـي سطريـن وست شهـور ياعمـري تغنـي فيـك أبياتـي قضيت شهور في وصلك مضت لي كنها يوميـن فداها سنين من عمـري وفداهـا كـل لحظاتـي ألا ياحبـي الطاهـر أبيكـي دائـمـا تـدريـن بأن طاريـك إذا مرْنـي رفـع لـي معنوياتـي حياتي يابعـد عمـر القصيـد وخاطـر الغاليـن أنا لخاطر عيونك بـس أضحـي بكـل رغباتـي أضيع ليا طروا إسمـك ولـو جابـوه غلطانيـن وأنا لاضعت مـن حبـك عساهـا دوم ضيعاتـي وحبك من سكن قلبي أحسه فـي حياتـي ديـن لأني بس مـن شوفـك أحقـق كـل طموحاتـي ترى من قبل لاشوفـك لعبـت بحسبـة الباقيـن ولاحـد ٍعـارف ٍقلبـي ولا يـدري بغاياتـي قضيت الحب من قبلـك ولاأدري طريقـي ويـن وأشوف اللي تعلق بي يضيع بصمتي واسكاتـي وجيتي اليوم ياذوقـي ورتبتـي خفوقـي زيـن وأنا من لمْسَتْ كفوفك رسمـت أحلـى بداياتـي

جنــــون 07-23-2011 06:02 PM مع بعض وبصوت واحد ..~ إذا كان الفرح يرسم على وجـه الشقـي حالـه علام الأرض ماتقوى تحمّـل مشيتـي وخْطـاي غشى بحر الفرح صدري وخذاني اليوم في جاله وبديت آحس ما بالكون يسكن عاشـق ٍشـرواي رجع لي خلي الغايب بعـد مـا حـرّم وصالـه وأنا اللي طول هجرانه جرحني وأيّس برجـواي صحيح إنه رحل عني وترك قلبـي علـى فالـه رحل وأتلى العهد منّه/ طلب أنساه/ وقولة: بااااي رجع لي وخابـر ٍقلبـي يحبـه فكـل أحوالـه رجع لي والسبب أدري صفا قلبي وطول دعـاي وأنا كالعـاده أتناسـى قسـى طبعـه وغربالـه عشانه بـس ماينـدم إذا حـس بكثـر شكـواي رقص حتى القلم فرحه وسطّـر مابـدى فبالـه وأنا اللي ربعي من اسبوع ملوا من كثر مغنـاي تعالوا ياعشاشيـق الطـرب غنـوا لـي موالـه أبعزف لجله أبياتي وأخلـي لـه قصيـدي نـاي تعالـوا صفـوا بجنبـي ونوقـف كلنـا قبالـه رجاء ًمع بعض وبصوت واحـد ردّدوا ويـاي: هلا باللي كثـر حبّـه ينسّينـي قسـى أفعالـه هـلا بالقلب/وعروقه/ونبضه/والنفس/والـمـاي هلا باللي كسـب رهنـه علـى عبـدالله ونالـه يغيب.. ولارجع يدري بأنه مـا براسـي راي؟! هلا في تاج راس الحسن جانـي تسبقـه هالـه من التصفيق والتصفير أحسه واسمعه باقصـاي هلابه كثـر مـا خـلا بغيابـه حالتـي حالـه كثر ما شارعه يشكي وأنا (تمتير) رايـح جـاي يقولوا أصحابي ف(خلي) رجع في وضع يرثاله وقالوا فرصه وجتني عشـان أحطـه بمخبـاي

جنــــون 07-23-2011 06:02 PM نكـسـر الـخـاطـر ..~ علامك جيت ياقلبي وراجع خاطرَك مكسـور أبد لاينكسر خاطرك دامـه صاحبـي جايـر أبي تنسى مبادئنا وتتـرك طبعنـا المغـرور وأبي هالحين ترجع له.. وقلّه يطلب ويامـر وإذا جت عينك بعينه أبي تشهد شهادة زور بأني مذنب ومخطي.. وقلبه ناسـي وغافـر وقلّه لايخليني على حزنـي أبـات شهـور لأن الموت أشوالي وأنا من طبعـي ماكابـر ولايفكّر يقول: انسى وغيري بالبشر مذكور لأني ماخبر غيره / قسـم بالله مـو خابـر أحس اللي خلق زينه خلق باقي البشر ديكور وأحس الورد لاشمه يميـل وينثنـي شاكـر وربي هالبشر بعده هياكل والبيـوت قبـور ولابه شي بالدنيـا يجـاري غيابـه الكافـر حبيبي يابعد كل الحبايـب والزمـان يـدور علامك ماتخاف الله تعال وشوفنـي وناظـر ألا ياصاحبي القاسي بدونك هالحياة تغووور ألا ياسبّـة جروحـي..ألا ياحظـي العاثـر أحبك يامنى عمري وغيرك يمسك الطابـور أحبـك يامولّعنـي وأذوب بصوتـك الخاثـر أنا من كثر مااحبك أحس إني معك مسحـور فديتك خلني مسحور إذا تبقى لـي الساحـر تعااال وخذني بكيفك.. قصيد ولو تبي جمهور فداك اللي قصدته أمس واللي بَقصِـده باكـر لك الله وانت خابرني شجاع ولاعلي قصـور ولكن لو وصل أمري بيدّك... آآه ياساتـر!! دخيلك انتبه! لا..لا.. تمادى مع رجل مقهور ترى قهر الرجال أكبر من اللي تحسب وفاكر

جنــــون 07-23-2011 06:02 PM المـقـــام الـســامــي ..~ ياباذخـه ف الحسـن.. ياسنيـوره عشقك: وطن... في داخلي مترامي يا غاية الشعـر وضفـاف بحـوره واسمى المعاني فـي حضـور إلهامـي يااحلى تفاصيل المسـا وحضـوره شفتك؟؟ وضاعت حسبتي وأرقامي ماشفت لك أشباه ف (المعمـوره) مثلك!! فلا قد مـر فـي أحلامـي يومك غديتـي بالجمـال اسطـوره مـا صوّرتهـا ريشـة الرسـامـي سبحان منهو صـوّرك هالصـوره وسبحان يوم انْكَسْتْ لك أعلامـي ياطاغيـة فـي الحـب يامغـروره يا اللي قتلتـي جرأتـي واقدامـي! الشوق ثاير فـي عروقـي ثـوره؟! والروح دونك تعلن استسلامـي!! كل المشاعر لـك بَنَـت مقصـوره في وسط قلبي من ركـام حطامـي من حسن حظي صرتـي الدكتـوره وانتي سبايـب علتـي وآلامـي!!! كل ما طعنتي.. قلت أنا معذوووره حتى عشقت اسلوبك الإجرامـي!! وكل ما نشف دمي لنزف شعـوره اشتاقت أوراقـي لنـزف أقلامـي يا ام الحـلا وام التـرف وغـروره كثـر الرجـاوي زوّدت بأوهامـي القلب بيتـك.. والأمانـي سـوره والموت رمشك.. والأمل قدامـي!!

جنــــون 07-23-2011 06:02 PM قـلـــب ضــــايــع ..~ سمّ بالرحمن.. وصلي ع(النبـي) ياالقليب اللي لعـب فيـك الغـرام داخ راسي يالهواوي وش تبـي؟؟ البشر نامـت وعـادك ماتنـام!! لو بداية حـب.. اسمـع مطلبـي لاتعذبنـي... ولاتقْـرب حــرام بعدهـا رح والقصايـد مركـبـي لاتخاف بحـور وأمـواج المـلام خذ علي لامن سهـرت بمكتبـي لك أطيّرلكمـن أسرابـي حمـام ويالعنود اللي سبت قلبـي سبـي خافي الله طالبـك كفّـي السهـام لك عيون ٍضيّعـت لـي مذهبـي دوّرينـي يـوم ترخيـن اللثـام أسألـك بالله يابـنـت اقـربـي هـذا قلبـي وعامليـه بإحتـرام بس..لامنّـك نويـتـي تلعـبـي اعتقيه لوجـه ربـي.. ياحـرااام والله إن القلـب ضايـع والغبـي به جروح ٍتكْفي لعشريـن عـام هذا تفكيره مثـل عقـل الصبـي وإلا أنا وينـي ووينـك يالهيـام وياقليبي وإن عرضْ لك أجنبـي احتمل كل مايجي لك مـن كـلام لي متـى دايـم يشيلـك منكبـي وأرْفَعَك كل ماتضايق مـن زحـام ولو عروقي تشتكي كثـر اتعبـي والأصابع وجّهـت لـي الإتهـام لاتغـط راسـك وراي وتختبـي لاتجازينـي مثـل فعـل النعـام! واجه أفعالـك ولـو مـرّه أبـي ماتخلينـي لصيـحـات الـمـلام وإلا تدري!! لو غدرت وخنت بي؟ لايهمك / كل شـي فينـي تمـام الغـدر كنـه سـواة اليعـربـي به حميه مـع علاقاتـي دوام ؟؟ يعني لو ضاقت على زود اتعبـي وتنتظر ردة فعـل منـي وكـلام هيّا صييييحه في ضلوعي تختبـي ولا أقول إلا.. على الدنيا السلام!!

جنــــون 07-23-2011 06:02 PM قـبـل أسـافـــر ..~ ليلة فراقك .. ودمعـك لمّـا بعيونـك بـدا من لمحته قبل أسافر .. ماهنا لي مرقـدي قلت لك :"أيام وارجع" ، والحكي ضايع سدى لاْن - بالأيام هذي - حتى هالقلب يغـدي!! ياوطن روحي أماااانه كفكفي هـذا النـدى واعذريني والله إن الوضع ماهو فـي يـدي كل شيّ ٍممكن إني أرفضه لجلك .. عَـدا.. [شايبي] لامن زهمني قلت: "أبشر يابعـدي" انتي أكثر من عرفني ماهو من طبعي الردى وآنا اعرْفك طووول عمرك ماتحبين الـردي رحت.. لا قلبي.. ولا فكري.. ولا بالي هدا رحت.. وهمومي تجر أحزان درب ٍسرمدي المصيبه.. كثر ماني والسفـر أكبـر عِـدا كثر ماربي كتب لي معه أجدّد موعـدي!!!

جنــــون 07-23-2011 06:03 PM عـيـــدك مـبــارك ..~ (عيدك مبارك) ياأجمل من سكن وجداني كل عام ٍوانت أغلى مـن يمـر طاريّـه كيف أنا ماعايدك ياللي غـلاك أشقانـي كيف أبنسى؟ وانت يوميا ًتجيبه فيّـه!! أشهد إن العيد هذا غيييير وطعمه ثانـي يوم اشوفك فيه راجع لي مصفـي النيّـه إنت تامرني ياعمري/ كيـف تترجانـي؟ بس أشّر لـي وأجيلـك كلـي برجليّـه في غيابك زاد عشقي.. وكثروا خلانـي والله العالم لو أحسـب وصّلـوا للميّـه! كنت أبهرب من شماتة ربعي وعدوانـي يوم تتركنـي لحالـي أصطفـق بإيديّـه لكن الحين انت في قلبي هنـا وحدانـي وكل هالميّه فوجـودك حاجـة ٍمنسيّـه ياغناتي.. ياربيـع القلـب.. ياتحنانـي اضحك وخـل الحيـاه ألوانهـا ورديّـه لابغيت أعزف وأغني بك تطيب ألحانـي والقصايد في وصوفـك تنكتـب عفويّـه والله إني يوم شفتك أورقـت أغصانـي وأزهرت في صبح عيدي (ورده سعوديّه) لارجع خلي لحضنـي وصـار يترجانـي مانظرته - مثل غيري - نظرة ٍدونيّـه الكبر لله ياقلبـي وغيـر وجهـه فانـي والله يعلم شوفتـك فـي ذاتهـا عيديـه (عيدك مبارك).. لغيرك مانطقها لسانـي كيف أبنطقها وغيرك مايمـر طاريّـه؟!!

الساعة الآن 08:46 PM

صفحة 1 من 3 1 2 3 > عرض 40 مشاركات من هذا الموضوع لكل صفحة

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية