بقايا أنثى مجروحة / الكاتبة : سحر الاحساس ، الجزء الثاني
 

%%البارت الثاني%%


الساعة تسع بالليل
كنت أتقلب على السرير أبي أنام مو قادرة بكرة ملكتي وهذا الشيء موترني..
رن جوالي..
:هلا عبوري
عبير وبصوت باكي:مشاعل أنا تعبانة تعبانة
جلست بسرعة وبخوف:بسم الله عليك وشفيك
عبير وبكاها يزيد:سامي خطب وملكته بعد أسبوعين
قلت بصدمة:إيش
عبير بين كل كلمة وكلمة تشهق:والمشكلة بيأخذ هند أغلى وحدة عندي من بنات خالتي الجوهرة
حطيت إيدي من الصدمة على فمي:..........
عبير وصوتها منخفض من كثر ما تبكي:مشاعل أحس أني ضايعة وتايهة
تنهدت بتعب:عبير عمري الزواج قسمة ونصيب..وسامي مو نصيبك خلاص حاولي تنسيه..الله يرزقك باللي أحسن منه
عبير:بس أنا ما أبي ألا سامي..سامي يامشاعل مو حب سنة أو سنتين..سامي حب الطفولة والمراهقة وما زال
تنهدت بأسى:حاسة فيك يا عبير بس مع الأيام بتنسينه أذا حاولتي بأن شاء الله..
عبير:وتعتقدين بسهولة أقدر أنساه..صعب صعب يامشاعل
:عبير هدي وصدقيني مع الايام بتنسينه
وبعد ما هديت عبير أو بالأصح عزيتها بأحلامها الوردية اللي انهارت سكرت منها..غمضت عيوني عشان أمنع دموعي تنزل..
آآآآآآه ياعبير على حظنا..أنا صحيح أخذت اللي أحبه بس للأسف مجبور ويحب غيري..وأنتي ولد خالتك اللي حبيته من طفولتك أخذ غيرك..لكن الحمد الله على كل حال..

==============================

اليوم الثاني الساعة ثمان......
كنت لابسة فستان ذهبي حريرتصميمه ضيق من فوق ألين خصري ومن تحت مكسر ووسيع وماسك من عند الصدر.. وكنت مسوية بوف لشعري.. ومكياجي كان ناعم الوحيد الصارخ في مكياجي هو القلوس الأحمر الصارخ..واكسسوراتي ناعمة..
جابت نورة من عند خالد الكتاب عشان أوقع مسكت القلم بأيد
مرتجفة ووقعت..ومن هالتوقيع راح تبدأ معاناتي..باركت لي نورة ونزلت..
كنت محتاجة للبكى بس مسكت نفسي وباركولي شجون وعبير وفي..
رن جوالي..فرررحت لما شفت المتصل..
:هلا والله حبيبي بندر كيفك..
شجون:بندر عطيني الجوال بأكلمه..أشرت لها بأنها تنتظر..
بندر:هلا فيك أنا الحمد لله بخير..أنتي كيفك يا ميشو وكيف أهلي
:كلنا بخير الحمد لله ومو ناقصنا غير شوفتك..
بندر:أن شاء الله قريب تفرحون برجعتي..عالعموم أنا متصل.. أبركلك عالملكة مبروك ياحياتو..
:الله يبارك فيك..
بندر:تصدقين ما تخيلك متزوجة..أجل انتي يالبزر بتتزوجين
تنرفزت:لا أنت يالكبير..على فكرة ترى مابين ألا سنتين
ضحك بندر وبعدها قال:ترى سنتين فرق كبير..
:لا والله
شجون وبضيق وهي تهز أيدي:يووووه يا مشاعل عطيني بكلمه..
عصبت:أوف أقول بندر خذا المزعجة اللي جنبي..
بعد ما انتهت شجون من مكالمة بندر جت نورة عشان الزفة..
انزفيت..وفرحت لما شفت صديقاتي مرام وسجى حاضرات ما عدا صديقتي رغد اللي اعتذرت ولمى اللي ممنوع عندها تزور صحباتها لأن أبوها شديد وابتسمت لما رمت لي مرام بوسة..
انزفيت وبدأ سلام الحاضرات علي ومن بينهن غادة اللي كانت مررررة كشخة ولابسة تركواز وكانت جميلة بملامحها البريئة والناعمة..
مرام وبصوت منخفض بعد ما باركت لي:من قدك ألحين خذيتي حبيب القلب وبتنسينا
قلت بابتسامة:لا تخافين ما راح ينسيني فارس أغلى وأعز صديقة عندي..
مرام:ياقلبي أنتي والله..
جتني نهاد وقالت فارس يبي يشوفك..
..بدت نبضات قلبي تزيد..
وطلعت للمجلس..ودخل علي فارس وأبوي وعماني وخالد وخلدون
ومد فارس أيده يسلم سلمت عليه وانا منزلة رأسي وخجلانة
قال:هلا مشاعل كيفك
قلت وصوتي رايح من الحيا:الحمد لله بخير
ثم وقف جنبي..وكان يوصل رأسي لكتفه من طوله ما شاء الله..
سلموا أبوي وعماني وأخواني ثم طلعوا...
جت بعدها أمي وأم فارس وأمها وخواتها وعماتي ونهاد وباركوا لنا..وجاء وقت الشبكة وجابتها نهاد كانت شبكة ولا أروع.. لابسنيه فارس وأنا مارفعت عيوني ومتوترة بسبب قربه..
بعد دقايق الكل طلع..
واااااااااااااو ما بقى أحد عندنا..
أنا وفارس لوحدنا..
فارس بدون نفس:مبروك..
:الله يبارك فيك..وأنا بقلبي ..بدري..
فارس:مشاعل..
:هلا..
فارس:ممكن ترفعين رأسك عشان أعرف أتكلم معك..
..أوف وشهالأسلوب اللي عنده..رفعت رأسي بشويش..وطحت عيوني بعيونه..ماقدرت أنزل عيوني من وسامته..ونسيت نفسي..وجلست أطالع فيه..
..أخر مرة شفته قبل مايسافر عشان دراسته بصراحة أوسم من قبل..يجنن وهو قريب..
جلست أتأمل ملاحمه ....
..عيون وساع حرة..ورموش كحيلة..وحاجبه اليمين فيها شرخ..وحنك بارزوخشمه حاد..
فارس وبنبرة جدية:مشاعل ترى زواجنا راح يكون أن شاء الله بعد أسبوعين من بداية الإجازة الصيفية..
من نطق باسمي انتبهت لحالي كيف اطالعه استحيت ونزلت عيوني..
ولكن لما قال موعد الزواج رفعت رأسي مستغربة...يكفي الملكة تحددت من دن رأيي..بعد الزواج..
ابتسم فارس لكن برود:أنا بصراحة كنت ناوي اخذ رأيك في تحديد زواجنا بس االيوم تفأجات أن أبوي وأبوك حدووا وانتهوا ....
مرت لحظة صمت..وأنا أحاول أمسك دموعي..آآآآآآآآآه يايباه..جبرتني وحددت الملكة والزواج من دون رأيي..وأنت ما تدري أنك بكذا تستعجل على جروحي آآآآآآآآه..
قطع فارس هالصمت وهو يوقف:مشاعل ممكن تعطيني رقمك عشان أكلمك
:رقمي####
فارس:طيب أستأذن..وطلع بسرعة..وكأنه مو مصدق انه طلع..
وقفت وأنا أضم أيديني لصدري ودموعي متجمعة بعيوني واطالع الباب اللي طلع معه فارس..وكأني خايفة..وأنا فعلاً خايفة..خايفة من الحياة اللي راح أعيشها مع فارس..تنهدت بعمق..ومسحت بظهر كفي دموعي..وطلعت عند البنات

================================================== ====

الساعة ثنتين..بعد ما انتهنت الملكة..طلعت لغرفتي بسرعة..أبي أفرغ دموعي المحبوسة..
..رميت نفسي على السرير..وجلست أبكي على حبي وعلى حالي وعلى مستقبلي المجهول مع فارس..
لما نمت بعد صراع مع دموعي وأفكاري....


================================================== ======
الساعة ٤العصر....
امي :يمه نورة انتبهي على نفسك واهتمي بأكلك عشان صحتك وصحة اللي بطنك..
نورة:أن شاء الله يالغالية
أمي:واتصلي علي أذا وصلتوا الخبر..
نورة:ان شاء الله..
قلت وأنا اضمها:راح اشتاق لك لا تطول علينا..
نورة بعد ما بعدت عنها:أن شاء الله راح أجيكم قبل ملكة خالد بيومين..بس انتبهي مو تشغلك مكالمات فارس وتقطعين..
اغتصبت لي ابتسامة:أن شاء الله..
نورة:يله مع السلامة..
..مع السلامة..
بعد ما جلسنا..شجون:ميشو..وش رأيك تخلون زواجك أنتي وفارس وخالد والهنوف مع بعض..
:لا حبيبتي أنا ما تعجبني الزواجات اللي كذا..وكملت بحالمية..تصدقين أتمنى يطلع زواحي شيء والكل يمدح فيه ويأخذون سنين يمدحون فيه..
أمي:أكيد بيطلع شيء دام العروس أنتي..
ابتسمت لكن تلاشت هالابتسامة بسرعة لما تذكرت..
(((((أخذ مشاعل وأنا أعتبرها مثل أختي لا أكثر ولا أقل..)))))
وش الفايدة أذا كانت حفلة الزواج روعة والفرحة معدومة عند العروس والعريس..
شجون:ياحلو وين سرحت..
أمي وبابتسامة:ما يبيلها سؤال..
واااااااااااااااااو انحرجت..

======================================

الساعة٩مريت بنات خالي عشان نطلع يمكن أقدر أغير نفسية عبير اللي كان باين عليها بحفلة الملكة متضايقة وحزينة..
في مطعم الريف الإيطالي:
في واللي بعمر شجون:كل وحدة منا تقول وش تتمنى..وش طموحها بالمستقبل أنا عن
نفسي أتمنى أني أكون مديرة مدرسة
شجون:عز الله دجوا طالباتك
الكل ضحك..ماعاد عبير اللي اكتفت بابتسامة
في:لا عاد في ذاك الوقت قد كبرت وعقلت أن شاء الله..
شجون:طيب وأنتي يا حرم الدكتور فارس
:بصراحة أتمنى أني أذا خلصت البكالوريس أخذ الماجستير والدكتوارة والكل يقولي د/جواهر
في:ماشاءالله عليك ياجواهر طموحة مثل زوجك الله يحققلك اللي تبينه
شجون:وأنت عبوري
في وبضحكة:أكيد بتقول مثل العادة أني أتزوج بشخص يحبني ويموت فيني..البنت طايرة على رزقها
عبير وبصوت بلا مبالاة:لا ارتاحي ماراح أقول..
شجون وبضيق:عبير وش فيك..
من جلسنا وأنتي باين عليك أنك مو مرتاحة..في شيء مضايقك
عبير واللا مبالة لازال مغطي ملامحها وصوتها:مافيني شيء بس أحس بصداع..وقفت ومسكت شنطتها..يله خلينا نمشي..
ياعمري ياعبير مو أنا الوحيدة اللي أعاني..
وقفت:يله أجل مشينا

================================================== ===

اليوم الثاني الصباح الساعة سبع وثلث..
صحيت متأخرة خذيت شور ولبست تنورة سوداء وقميص رمادي وشعري الناعم اللي يوصل لتحت أكتافي تركته على طبيعته بعدما جففته بالمجفف..وحطيت ميك أب صباحي وناعم..وخذيت شنطتي وعبايتي..ونزلت..وحصلت أمي وخالد..
:السلام عليكم..
أمي وخالد:وعليكم السلام..
بستها أمي على خدها:كيف صباحك يالغالية..
أمي:زين الحمدلله..
خالد:أقول ميشو اليوم أبيك تروحين معاي للسوق عشان تختارين شبكة الهنوف لأني ما أعرف ذوقكم يالبنات..
:من عيوني أنت تأمر..
خالد:تسلم لي عيونك..وقف وكمل..يله أنا طالع للشركة..
أمي:درب السلامة يايمه
باس رأسي أمي وطلع..
لبست النقاب وأنا أقول:يله مامي مع السلامة
أمي:وين يمه ما أفطرتي..
:لا مامي متأخرة..بستها وطلعت

==============================

دخلت بوابة٢ونزلت عبايتي بسرعة لأني تأخرت عالمحاضرة وعطتيها الخدامة ستي عشان تطبقها وأخذت شنطتي منها..وطلعت للقاعة..
فتحت الباب..
:ممكن أدخل..
الدكتورة طالعت ساعتها:ادخلي بس ماراح احضرك..لأنك متأخرة ربع ساعة
أوف قهر يعني احضر ويتصلب ظهري من الجلسة ساعتين وفي الأخير..ماراح تحضريني..دخلت وأشرت لي لمى..جلست جنبها..
قلت بصوت واطي:صباح الخير..
لمى وبنفس درجة صوتي:صباح النور..وش فيك تأخرتي
:ماصحيت ألا متأخ..
الدكتورة:لو سمحتنا اللي جالسات ورى ممكن تسكتون..وطالعتني..أنتي مو كافي متأخرة وتتكلمي..
سكت وعلى شفاتي مرسومة شبه ابتسامة متفشلة..
الدكتورة:وين وصلنا بنات
البنات:أسباب الإعاقة العقلية
الدكتورة:أيوه..هناك ثلاث أسباب للأعاقة العقلية..أولها أسباب ماقبل الولادة وتنقسم........
بعدها بساعة ونص انتهت الدكتورة من المحاضرة خذت الحضور وطلعت وطبعا ماحضرتني..
لمى وهي توقف:أقول ياحلو أكيد أمس سهرانة على صوت الحبيب مادامك ماصحتي ألا متأخر..
تنهدت بداخلي ووقفت: لا مو عشان كذا بس لأني أمس طلعت مع بنات خالي نتعشا برى وماردينا ألا متأخر..
لمى:طيب كيف كانت الملكة يوم الخميس..
:حلوة ومرتبة..بس بغى يوقف قلبي لما دخل فارس..
لمى:يوووه ذكرتيني بحالي يوم دخل فيصل علي..كنت بموت..
:ألا صح كيفك معاه..
لمى وبابتسامة:مزعجني ليلة نهار..بس ياحلاته من إزعاج..
فهاللحظة رن جوالها..
لمى:الطيب عند ذكره هذا هو اتصل..استأذن منك بكلمه
قلت بابتسامة:أذنك معك حبيبتي
طلعت للكافتيريا اللي دايمن أجلس فيها مع صديقاتي وحصلت مرام وسجى..
:السلام عليكم
مرام وسجى:وعليكم السلام..
:كيفكم..
مرام وسجى:بخير الحمد لله
مرام:أنتي كيفك..وغمزت بعينها..وكيف حبيب القلب معك..
ابتسمت بألم:أنا بخير وحالي مع حبيب قلبي زينة..
مرام:الله يسعدكم يارب
:آمين
سجى:ألا وين لمى ..ما داومت
:ألا..بس تكلم خطيبها..
رغد:هااي صبايا..
الكل:هايات..
رغد:كيفكو ياحلوات..
سجى:كلنا بخير ولله الحمد..أنت اللي كيفك ماعاد صرنا نشوفك وحتى ملكة ميشو ماحضرتيها..
رغد:سوري حبيبتي بس كنا طالعة مع الماما لجدة عشان جدو
مسوي عملية..
سجى:لا..سلمته..
رغد:الله يسلمك..
جت لمى بعد ما انهت مكالمتها..وأكتملت الجلسة..وخذتنا السوالف والضحك متناسين همومنا اللي تهد الحيل..
بعطيكم نبذة عن صديقات:::::
مرام هي أقرب أنسانة لقلبي وأغلى صديقة..صداقتنا ابتدت من المرحلة المتوسطة كن على طول جنب بعض..وما افترقنا ألا لما دخلنا الجامعة..هي دخلت إدارة أعمال وأنا علم نفس..أنا وهي أسرارنا ومشاعرنا مانخبيها عن بعض..باستثناء اللي سمعته من فارس..مرام حبوبة كثير..وطيبة..حياتها مآسات.. انصدمت صدمت حياتها لما توفى أبوها اللي كانت متعلقة فيه كثير بحادث سيارة وهي عمرها١٧..وأمها معها مرض السكري وهي كبيرة السن..ولها أخ أكبر منها جاسم ومتزوج وعنده ولد..وزوجته دائما تسبب المشاكل بينها وبين جاسم ..وهي كل مرة تحاول تسكت عن أخوها عشان أمها المريضة..
لمى..هادية وناعمة..وكلها طيبة وحنية ..وهي من الطبقات المتوسطة..تعرفت عليها بالجامعة..توفت أمها وهي تولدها..وتعيش مع مرة أبوها وثلاث من أخوانها وأخت من أبوها..متملكة من فيصل ولد زوجة أبوها من زوجها الأولي..وبصراحة هالبنت أحس أحيانا فيها غموض..بس أن شاء الله مع الأيام بيوضح لي هالغموض..
سجى..ملامحها تركية لأن جدتها تركية عيونها رمادية وشعرها بني<ولا تقولون بعد أبالغ أنا ثنتين من صديقاتي فيهم عرق تركي وحدة أمها تركية والثانية جدة أمها..
متزوجة وعندها توأم يأخذون العقل أياد وريان وعمرهم سنتين وهي صديقتي من الصف ثاني ثانوي..وقسمها دراسات اجتماعية..
رغد..صحيح مغرورة كثير..بس في الحقيقة قلبها طيبة..عايشة حياتها بكل حرية..يعني فرري..
تزعل بسرعة بس ترضى على طول..تعرفت عليها عن طريق مرام بالجامعة..وهي من الطبقات المخملية..وله أخ زياد يدرس خارج الملكة يكمل الماجستير..ومن كلام رغد عنه أحس أنه هو بعد مغرور..
احنا يالخمسة تربطنا علاقة صداقة قووية..وصحيح رغد
ولمى ماتعرفت عليهم ألا من سنة بس مع ذلك كأن نعرف بعضنا من سنين..
وأن شاء الله من خلال سياق روايتي راح تتعرفرن على صديقاتي أكثر..

سلمت يمناك
طرح جميل جدا

الله يعطيك العافيه على الطرح
اللي كله ابداااااااع


حضوري شكر وتقدير لك
ولاهتمامك في مواضيعك


اخوك
نجم الجدي

اقتطافة أنيقة
لاعدمنـآ هذا الجمال بالطرح..
بإنتظآرجديدك بكل شوق..
ودي وشذى الورد..

100

أناقة طرح وجاذبيه
إهتمام و..

اجتهاد واضح في الطرح
وذائقة عالية المستوى

استمعت النفس بما مرت عليه هنا،،،
فبهذا العطاء سنرقي

من أعماق القلب أشكرك

اخوك
محمد الحريري

http://img.el-wlid.com/imgcache/282050.gifhttp://img.el-wlid.com/imgcache/282050.gif

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد