لو باتمنى قلت يا ليت من غاب =عمـّـا جرى باللوح واللي كتب به
رجالهم ما يسفه الا اليا شاب =مثل القرع يفسد اليا كثر لبـّـه
صدوقهم عندي خنوبن وكذاب =والبحر مثل الليل ما ينشرب به
ضراغمن عند الخوندات واطواب =واليا طلع للدو تلقاه دبـّـه

اهل العمايم والنمايم والاصحاب =مد الحبل في ذمـّـهم واحتطب به

خف القطين وحين قوضن الاحباب =هبت لنا من نسمة الشرق هبه
حامل هواها القلب في ليل الاتعاب =حمل ثقيل ما ادري وين ابى اذبه
لو صار في قبرن ومستور بتراب =كان الحقه يا بن حمد واصطحب به

ذا حس طار او ضميرك خفوقه =يدق به من نازح الفكر دقاق
الحي هو حيـّـك وطابت وفوقه =والدار هي دارك وهذيك الاسواق
ياعبيد خل اللي تشكل بسوقه =شيخ وهو عبد يذكــّـر بالاعماق

العبد عبد هافيات عموقه = ان جاع باق عمومته وان شبع ماق
والحر حر ينهضنه سبوقه = والبوم يلعي في الخرابات خفاق
قم لا رعاك الله وقرب سبوقه = ثم ارفعه عن دار غاقه وغرناق

بع بالهجر وصال حي تشوقه = دار عساها للزرايا بتيفاق
دار الشنا للي بها والمعوقه = ما تنبغي لو هي على سبع الاطباق
دار بها الوالد كثير عقوقه = واللي يعقونه مصلين الاشراق
تلقى بها هذا على ذا يسوقه = الله يعزك .. والخوندات بسحاق
راعي الوفا منهم عميله يبوقه =وتلقاه حلاف مهين وملاق

يا علي صحت بالصوت الرفيع =يا مره لاتذبين القنـــــــــــاع
يا علي عندكم صفراً صنيـــــع=سنها يا علي وقم الربــــــــاع
نشتري ياعلي كانك كانك تبيـع= با لعمر مير ما ظني تبــــــــــاع
شاقني يا علي قمرا وربيــــع=يوم انا آمر وكل أمري مطــــــاع
يوم أهلنا وأهل مي ٍ جميــــــع=نازلين ٍ على جال الرفـــــــــــاع
ضحكتي بينهم و انا رضيـــــع=ما سوت دمعتي يوم الــــــــوداع
هم بروني وانا عودي رفيـــــع=يا علي مثل ماتبرى اليــــــــراع
طوعوني وانا ماكنت اطيـــــع=و غلبوني وان قرم ٍ شجــــــــــاع
دون مي الظبي و ام الوضيـــع=و الثعالب و تربيع الشــــــــــــراع
راس ريع ٍ دخل في راس ريــــع=مستطيل ٍ و وديان ٍ وســــــــــاع