لا وداعية

لا وداعية ولاهم يحزنون
قط لي كل الرسايل وانصرف

رافض حتى وداع التلفون
قام يكرر:ماتخبيه انكشف

ماجداي الا أناظر بالعيون
لين زوله عن مدى العين انحرف

كيف خان وهو حالف مايخون
وين عهده..وين كلمات الشرف

كل شي عقب محبوبي يهون
واستوى عندي عذابي والترف

موت الرجا

جيته ابستأنف مواعيد فرقاي
أبي الوداعيه تأخر نهارين

جيته وانا مسبوهة الفكر والراي
بجاهة الرحمن..بعدين بعدين

يسراي راحت تلتجي وسط مخباي
مابيه يلحظ رعشة بي من البين

ويمناي تمسح دمعة في محياي
وكلتها تستر دموع من العين

وبين التنهد والحيا موت رجواي
أبي الكلام وعز..وا فالي الشين

أنتم تحبوني وانا أحب ثاني
واللي أحبه باغي ناس ثانين

هذا ابتلى فيني وهذا بلاني
واللي بلى مبلي وباليه مسكين

أنا ترجيته وغيره رجاني
والمشكله ماينقل القلب حبين

سهوم تجمع بين قاصي وداني
ياليت لسهوم المحبه قوانين

هذا ينوح وذا جريح يعاني
هذا قتل هذا ولاهم دارين

وهذا كتم سره وهذا علاني
الله أكبر يا جهاد المحبين

http://forum.hwaml.com/imgcache2/hwa...243986_285.gif

متفرقات

العمر يا صاحبي معدود
نضيع في لمحة الرمشي

مهما نسوي نريد الزود
الواسطة فيه ماتمشي

أن بغيته حبيبي قمت كلمته
ما عليه من النمام والحاسد

كان رقمه من الأجواد مانلته
بارك الله في واحد صفر واحد

العين بالعين

تدري بطبعي حبيبي حيل وتعرفه
العين بالعين والبادي هو الظالم

ماني ورا العاطفة بالحيل منجرفه
طبعي على صد ردات الفعل والم

إلا خيانتك ما املك عندها صرفه
واحذر تحاتي ترى من خونتي سالم

ما ارضى أخونك ولا ارضى اعيش منحرفه
ماهو عشانك عشان النفس والعالم

درب الخيانات لو أموت ما اعرفه
لكن يا عمري تحاشى ثورة الحالم

http://forum.hwaml.com/imgcache2/hwa...243986_285.gif

حروف ومعاني

أنت أهلك ياصاحبي صاد والعين
وانا اهلي صاد وعين على صاد

بلاني العاذل من الجيم للسين
ياليت كاف ونون حولته ارماد

لك نون عيني والحشا بيت يازين
إستعمل اللامات من دون الابعاد

http://forum.hwaml.com/imgcache2/hwa...243986_285.gif

ذبحني غلاه

يجيني بلا غلط وانا ضيقتي بغناي
أغني باحكم هاجس ماكل حالي

ذبحني غلاه وحدني لين جبت اقصاي
ذبحني عسى مال الغلا ياعرب والي

غدا راس دبوس بدمي سرىلعضاي
ولا ادري أهو وينه وقف كيف ينطالي

تغلغل بمخي والعصب والعظم وكلاي
يدوج غلاه بمهجتي دون ترحالي

سبه عقلي الراجح وضل الفكر والراي
ياخبل الذي هاقيه..نزوه وتنزالي

بلاني عفاه الله..ليته بلى بلواي
غدا علتي ودواي والمر والحالي

آه .. ليته

كل ماجيت اغط بنومتي واهدي
جاني صوت لا نادى خافقي طار..به

جاني صوت ينادي عابرة إقعدي
ودعيني ترى شمس الرجا غاربه

ثم قمت اتقلب في لهب مرقدي
واتهاوش أنا والنوم واحاربه

و ردت الذاكرة للي مضى لي تعدي
يابيوت الغرام الخاوية الخاربه

اه..ياوقتي اللي راح حظي ردي
واقعي وامنياتي حيل متضاربه

اه..ليته يساعدني واجيب جهدي
نلغي السور والا نولع النار..به

يتصبر وانا للصبر ترفض يدي
إن طرا لي كلامه وضحكته وشاربه

غرامه ربى في داخلي وانتشر بالحيل
من الصغر حبه في حشا النفس منغرسي

أنا في نظر عيني حشا ماسمعت القيل
أهو حاضري ومستقبلي وباكري وأمسي

جحدني مثل مايجحد الكافر التنزيل
فجعني مثل فجع الهواجيس للمسي

جرحني مثل جرح الثرى من غزير السيل
رماني مثل مايرمى بالي اللبسي

محبة ثمان سنين ضاعت بلا تحصيل
تصدق..ختمها صاحبي يوم قال..انسي

ختمها بصمت..لا وداع ولا تعليل
ولا زال جرحه داخل الروح مايبسي

تسرب طواري صاحبي مع ظلام الليل
تحرم عليه لا مست الخلق..ما امسي

أويلاه..عقب الحب والخير والتدليل
أهل الدموع وخاطري ضايق عمسي

على ادناة شي ازعل على ادناة شي اعيل
أويلاه..عقب اليوم ياخفها نفسي

ياويلي عليه اليوم ويل يجر الويل
عقب صاحبي كن القدر معلن حبسي

فلا عدت اميز ياعرب بالعدل والميل
خياله يتابعني من الصبح لين أمسي

http://forum.hwaml.com/imgcache2/hwa...243986_285.gif

الضيقة

جاني بلاي وضيقة العام جتني
تلم بي لم الهوا بالبيارق

لامنها وقت المغيب حضرتني
يسيل دمعي فوق الأوجان حارق

الضيقه اللي في حشاي ادمرتني
بلاي من هم بالاضلاع غارق

باسباب من مدة غايبه طوتني
عامين لا علم ولا منه طارق

جفت حياتي والهموم امحلتني
ولا اشوف به غيث ولا اشوف بارق

من وين ماطقيتها عاكستني
ياكثر مابيني وبينه فوارق